ಸಂಪಾದಕೀಯ್:
ಸತಾ ಮುಖಾರ್ ಕೊಣಾಯ್ಚೆಂ ಬೊಳ್ಕೆಂ ಶಿಜನಾ
ಸತಾಚೊ, ನಿತಿಚೊ ತಾಳೊ ಹಾಂಗಾಸರ್ ಉಲಯ್ತಾ. ಹ್ಯಾ ತಾಳ್ಯಾ ಪಾಟ್ಲ್ಯಾ ಮನ್ಶಾಕ್ ಜಿವೊ ಉರೊಂವ್ಕ್ ದಿಂವ್ಚೆನಾಂತ್ ತರೀ, ಹ್ಯಾ ಮನ್ಶಾನ್ ಉಗ್ತಾಯಿಲ್ಲೆ ವಿಚಾರ್ ಕೊಣಾಯ್ ವರ್ವಿಂ ಧಾಂಪುನ್ ವ್ಹರುಂಕ್ ಜಾಂವ್ಚೆಂ ನಾ ಮ್ಹಣುನ್ ಹಿ ಕವಿತಾ ಸಾಂಗ್ತಾ. ಲೊಂಕ್ಡಾಚ್ಯಾ ಖಿಳ್ಯಾಕ್ ತರೀ ಭಾಗ್ಶಿಯೆತ್, ಪುಣ್ ಸತಾಕ್ ಭಾಗ್ಸುಂಕ್ ಕೊಣಾಯ್ಕಿ ಸಾಧ್ಯ್ ನಾ ಮ್ಹಳ್ಳೊ ಆಶಯ್ ಹ್ಯೆ ಕವಿತೆಚೊ.
ಆಲ್ಫೊನ್ಸ್ ಮೆಂಡೊನ್ಸಾ ಪಯ್ಲೆಚ್ ಪಾವ್ಟಿಂ ಆಪ್ಲಿ ಕವಿತಾ ಘೆವ್ನ್ ಕವಿತಾ ಕುಳಾರಾಕ್ ಆಯ್ಲಾ. ತಾಣೆ ಆಶೆಲ್ಲೊ ಸುಶೆಗ್ ಹ್ಯಾ ಕುಳಾರಾ ತಾಕಾ ಮೆಳುಂ ಮ್ಹಳ್ಳೆಂಚ್ ಆಮ್ಚೆಂ ಮಾಗ್ಣೆಂ
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೊ ತಾಳೊ...
ಆಯ್ಕಾ ಪಿಶ್ಯಾಂನೊ ಸಾಂಗ್ತಾಂ ತೆಂ
ಹಾಂವ್ ಆನಿಕೀ ಜೀವ್ ಆಸಾಂ
ಗುಳೊ ಮಾರ್ನ್ ಲಗಾಡ್ ಕಾಡ್ಲೊ
ಹಾಂವ್ ಮೆಲೊಂ ಮ್ಹಣ್
ಭಿಲ್ಕುಲ್ ಚಿಂತಿನಾಕಾತ್
ಜೀವ್ ಆಸ್ತಾನಾ ತುಮಿ
ಮ್ಹಜೊ ಗಳೊ ಚಿಡ್ಡಿಲೊ
ಪುಣ್ ಮ್ಹಜಿಂ ಉತ್ರಾಂ ನ್ಹಯ್
ಮ್ಹಜಿಂ ಪತ್ರಾಂ ಹುಲ್ಪಾಯ್ಲಿಂ
ಮ್ಹಜೆಂ ವಿಚಾರ್ ನ್ಹಯ್
ಮ್ಹಜಿ ಲಿಖ್ಣಿ ನ್ಹಯ್
ಮ್ಹಾಕಾ ಬಂಧಿವಾನ್ ಕೆಲೊ
ಪುಣ್ ಮ್ಹಜಿಂ ಸತಾಂ ನ್ಹಯ್
ತುಮ್ಚಿಂ ಪಾತ್ಕಾಂ ಲಿಪೊಂವ್ಕ್
ಭೃಷ್ಟಾಚಾರ್ ಧಾಂಪುನ್ ವ್ಹರುಂಕ್
ಪೊಕೊಳ್ಪಣ್ ಪುರುಂಕ್
ಮ್ಹಜೆ ವ್ಹಯ್ರ್ ಆನೇಕ್ ಅಪ್ರಾಧ್ ಮಾಂಡ್ಲೆ
ಮ್ಹಾಕಾ ಜೈಲಾಂತ್ ಫಿಚಾರ್ ಕೆಲೊ
ಪುಣ್,
ಮ್ಹಜೊ ತಾಳೊ ದಾಂಬುಂಕ್
ಮ್ಹಜಿಂ ಪತ್ರಾಂ ಬಂಧ್ ಕರುಂಕ್
ತುಮ್ಚ್ಯಾನ್ ಜಾವ್ನಾ
ಹಾಂವ್ ಮ್ಹಜ್ಯಾ ನಿಚೆವಾಂತ್ ಘಟ್ ರಾವ್ಲೊಂ
ಲೊಂಕ್ಡಾಚ್ಯಾ ಖಿಳ್ಯಾಕ್ ಪುಣೀ
ಮೊಡ್ತೆಲಾಂತ್ ದಾಢಾವ್ನ್ ಭಾಗ್ಶಿಯೆತ್
ಪುಣ್ ಮ್ಹಜೆ ವಿಚಾರ್, ಸತ್, ನೀತ್
ಭಿಲ್ಕುಲ್ ಭಾಗ್ಸುಂಕ್ ತುಮ್ಕಾಂ ಜಾಲೆಂನಾ
ನಷ್ಟ್ಯಾಂನೊ, ಕಪಟ್ಯಾಂನೊ, ಭಿಂವ್ಕುರ್ಯಾಂನೊ
ತುಮಿ ಭಿಂಯೆಲ್ಯಾತ್, ಧೆದೆಸ್ಫೊರ್ ಜಾಲ್ಯಾತ್
ತುಮ್ಚೊ ಘುಟ್ ಭಾಯ್ರ್ ಪಡ್ತಾ ಮ್ಹಣ್ ಕಾವ್ಜೆಲ್ಯಾತ್
ಮ್ಹಜೊ ತಾಳೊ ಬಂಧ್ ಕರುಂಕ್
ತುಮಿ ಮ್ಹಾಕಾ ಜಿವೆಶಿಂ ಮಾರ್ಲೊ
ಪುಣ್
ಉಡಾಸ್ ದವರಾ
ಮ್ಹಜೊ ತಾಳೊ ಬಂಧ್ ಕರುಂಕ್
ತುಮ್ಚ್ಯಾನ್ ಭಿಲ್ಕುಲ್ ಸಾಧ್ಯ್ ನಾ.
ಮ್ಹಜೆ ವಿಚಾರ್ ಪರ್ತ್ಯಾನ್ ಪರ್ತ್ಯಾನ್
ಛಾಪ್ತೆಲೆ ಖಳನಾಸ್ತಾಂ
ವರ್ಸಾಂಚಿಂ ವರ್ಸಾಂ..
ಮ್ಹಜಿಂ ಉತ್ರಾಂ-ಸುತ್ರಾಂ
ಗಾಂವ್ಚ್ಯಾ-ಶೆರಾಂಚ್ಯಾ ಕೊನ್ಶಾ-ಕೊನ್ಶಾ ಥಾವ್ನ್
ವ್ಹಡಾ ತಾಳ್ಯಾನ್ ಬೊಬ್-ಮಾರ್ನ್ ಸಾಂಗ್ತಲಿಂ
ಪರ್ತ್ಯಾನ್ ಪರ್ತ್ಯಾನ್ ಛಾಪ್ತಲಿಂ
ಪತ್ರಾಂನಿ ಅಂತರ್-ಜಾಳಿಂನಿ
ಸಾಮಾಜಿಕ್ ಜಾಳಿಜಾಗ್ಯಾಂನಿ
ನಿರಂತರ್....
ಮ್ಹಾಕಾ ಫೊಂಡಾಕ್ ಧಾಡ್ಲೆಂ ಮ್ಹಣ್
ಖುಶಿ ಪಾವನಾಕಾತ್..
ಹಾಂವ್ ಮರುನ್ಯ್ ಜೀವ್ ಆಸಾಂ
ಲೊಕಾಚ್ಯಾ ಕಾಳ್ಜಾಂನಿ ಸದಾಂಚ್
ಮ್ಹಜಿಂ ಉತ್ರಾಂ ಪಾಜ್ಲೆಲ್ಯೆ ಸುರಿಯೆಬರಿ
ತುಮ್ಚೆಂ ಕಾಳೀಜ್ ಚಿರ್ತಲಿಂ
ತುಮಿ ಸದಾಂಚ್ ಮರ್ತಲ್ಯಾತ್ ಜೀವ್ ಆಸುನ್ಯ್
ತುಮ್ಚೊ ದುಡು, ಗರ್ವ್, ಪದ್ವಿ
ತುಮ್ಕಾಂ ಧರ್ಣಿಕ್ ಶೆವ್ಟಾಯ್ತಲಿ
ಸದಾಂಚ್ ಉಡಾಸ್ ದವರಾ
ಜೀವ್ ಆಸುನ್ಯ್ ತುಮಿ ಮರ್ತಲ್ಯಾತ್...
ಹಜಾರ್ ಪಾವ್ಟಿಂ
ಪುಣ್, ಮ್ಹಜೊ ತಾಳೊ ಭಿಲ್ಕುಲ್ ರಾಂವ್ಚೊನಾ...
-ಆಲ್ಫೊನ್ಸ್ ಪಾಂಗ್ಳಾ
संपादकीय:
सता मुखार कोणायचें बोळकें शिजना
सताचो, नितिचो ताळो हांगासर उलयता. ह्या ताळ्या फाटल्या मनशाक जिवो उरोवंक दिंवचेनांत तरी, ह्या मनशान उगतायिल्ले विचार कोणाय वर्वीं धांपून व्हरुंक जांवचें ना म्हणून ही कविता सांगता. लोंकडाच्या खिळ्याक तरी भागशियेत, पूण सताक भागसूंक कोणायकी साध्य ना म्हळ्ळो आशय ह्ये कवितेचो.
आल्फोन्स मेंडोन्सा पयलेच फावटीं आपली कविता घेवन कविता कुळाराक आयला. ताणे आशेल्लो सुशेग ह्या कुळारा ताका मेळूं म्हळ्ळेंच आमचें मागणें
-मेल्विन रोड्रीगस
कविता:
म्हजो ताळो...
आयका पिश्यांनो सांगतां तें
हांव आनिकी जीव आसां
गुळो मारन लगाड काडल्लो
हांव मेलों म्हण
भिलकुल चिंतीनाकात
जीव आसताना तुमी
म्हजो गळो चिड्डिलो
पूण म्हजीं उतरां न्हय
म्हजीं पत्रां हुल्पायलीं
म्हजें विचार न्हय
म्हजी लिखणी न्हय
म्हाका बंधीवान केलो
पूण म्हजीं सतां न्हय
तुमचीं पातकां लिपोवंक
भृष्टाचार धांपून व्हरुंक
पोकोळपण पुरुंक
म्हजे वयर आनेक आप्राध मांडले
म्हाका जैलांत फिचार केलो
पूण,
म्हजो ताळो दांबूंक
म्हजीं पत्रां बंध करुंक
तुमच्यान जावना
हांव म्हज्या निचेवांत घट रावलों
लोंकडाच्या खिळ्याक पुणी
मोडतेलांत दाढावन भागशियेत
पूण म्हजे विचार, सत, नीत
भिलकुल भागसुंक तुमकां जालेंना
नष्ट्यांनो, कपट्यांनो, भिंवकुऱ्यांनो
तुमी भिंयेल्यात, धेदेस्फोर जाल्यात
तुमचो घुट भायर पडता म्हण कावजेल्यात
म्हजो ताळो बंध करुंक
तुमी म्हाका जिवेशीं मारलो
पूण
उडास दवरा
म्हजो ताळो बंध करुंक
तुमच्यान भिलकुल साध्य ना.
म्हजे विचार परत्यान परत्यान
छापतेले खळनासतां
वरसांचीं वरसां...
म्हजीं उतरां-सूत्रां
गांवच्या-शेरांच्या कोनशा-कोनशा थावन
व्हडा ताळ्यान बोब-मारन सांगतलीं
परत्यान परत्यान छापतलीं
पत्रांनी अंतर-जाळींनी
सामाजीक जाळीजाग्यांनी
निरंतर....
म्हाका फोंडाक धाडलें म्हण
खुशी पावनाकात..
हांव मरूनय जीव आसां
लोकाच्या काळजांनी सदांच
म्हजीं उतरां पाजलेल्ये सुरयेबरी
तुमचें काळीज चिरतलीं
तुमी सदांच मरतल्यात जीव आसुनय
तुमचो दुडू, गर्व, पद्वी
तुमकां धरणीक शेवटायतली
सदांच उडास दवरा
जीव आसुनय तुमी मरतल्यात...
हजार फावटीं
पुण, म्हजो ताळो भिलकुल रांवचोना...
-आल्फोन्स पांगळा