ಸಂಪಾದಕೀಯ್:
ವ್ಹಡಾಂನಿ ವಾಚಿಜಾಯ್ ಜಾಲ್ಲಿ ಭುರ್ಗ್ಯಾಂಚಿ ಕವಿತಾ
ಭರತ್ ನಾಯ್ಕಾಚಿ ಹಿ ಕವಿತಾ ಭುರ್ಗ್ಯಾಂ ಖಾತೀರ್ ಬರಯಿಲ್ಲಿ. ಹ್ಯೆ ಕವಿತೆಂತ್ಲೊ ದುಲೊ, ಸೈಕಲ್ ಶಿಕುಂಕ್ ನೆಣಾಸ್‌ಲ್ಲೊ. ಮಾಗೀರ್ ಪ್ರೇತನ್ ಕರುನ್, ಚ್ಯಾರ್ ಚೊವ್ಗಾಂಕ್ ಆಪ್ಟುನ್ ಧಾಪ್ಟುನ್, ಪಡುನ್ ಉಟುನ್ ಮಾರ್ ಖೆಲ್ಯಾ ಉಪ್ರಾಂತ್‍ಚ್ ತೊ ಸೈಕಲ್ ಚಲೊಂವ್ಕ್ ಶಿಕ್ತಾ.
ಹಿ ಭುರ್ಗ್ಯಾಂಚಿ ಕವಿತಾ ವ್ಹಯ್ ಜಾಲ್ಯಾರೀ ವ್ಹಡಾಂಕ್‌ಯ್ ಲಗ್ತಿ ಕರುಂಕ್ ಜಾಂವ್ಚೆ ತಸಲಿ. ಆಮ್ಚ್ಯಾ ಜಿವಿತಾಂತ್ ಖಂಯ್ಚೇಂಯ್ ಸಪಣ್ ನೀಜ್ ಜಾಯ್ಜಾಯ್ ಜಾಲ್ಯಾರ್ ಆಮಿ ಕಷ್ಟ್ ಕಾಡಿಜಾಯಿಚ್ ಪಡ್ತಾ. ಪಡಜಾಯಿಚ್ ಪಡ್ತಾ. ಮಾರ್ ಖಾಯ್ಜಾಯಿಚ್ ಪಡ್ತಾ. ತವಳ್ ಮಾತ್ರ್ ಜೀಕ್ ಆಮ್ಚಿ ಜಾತಲಿ.
ಹ್ಯಾಚ್ ವರ್ಸಾ ಕವಿ ಭರತ್ ನಾಯ್ಕಾಚೆಂ ದೇಹಾಂತ್ಯ್ ಜಾಲೆಂ. ತಾಚ್ಯಾ ಆತ್ಮ್ಯಾಕ್ ಸದ್ಗತಿ ಲಾಭುಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದುಲೊ ಸೈಕಲ್ ಶಿಕ್ಲೊ
ಶೆಜಾರ‍್ಯಾಲೊ ದುಲೊ
ಯೆದೊ ವ್ಹಡ್ಲೊ ಜಾಲೊ
ಸೈಕಲ್ ಯೇನಾ ಚಲೊಂವ್ಕ್ ಮ್ಹಣ್
ಸಗ್ಳೆ ಲಾಗ್ಲೆ ಚಾಳೊಂವ್ಕ್
ಏಕ್ ದೀಸ್ ತಾಣೆ ಚಿಂತ್ಲೆಂ
ದಾಂತ್-ವೋಂಠ್ ರಾಗಾನ್ ಚಾಬ್ಲೆ
ಆತಾಂ ಸೈಕಲ್ ಶಿಕ್ತಲೊಂಚ್
ಹಾಂಕಾಂ ಬುದ್ ಶಿಕಯ್ತಲೊಂಚ್
ದೊನ್ಪಾರಾಂಚ್ಯಾ ದೆಡಾಕ್
ಸೈಕಲ್ ಘೆತ್ಲಿ ಭಾಡ್ಯಾಕ್
ದಿಲಿ ಹಾಡುನ್ ಚಾರಾಂಕ್
ಪಾಂಚ್ ಘಾವೆ ಪಾಂಯಾಂಕ್
ದುಸ್ರೆ ದಿಸಾ ವ್ಹೆಲಿ
ಮಾಥ್ಯಾರ್ ಮಾರುನ್ ಹಾಡ್ಲಿ
ರೊದಾಚೆ ಜಾಲೆ ಆಠ್
ಗಿಯೆನ್ ಕೆಲಿ ಫಾಟ್
ತಿಸ್ರೆ ದಿಸಾ ಭಾವಾಕ್ ವ್ಹೆಲೊ
ತಾಣೆ ತಾಜ್ಯಾ ಸಿಟಾಕ್ ಧಲ್ಲೊ
ಚಲಯ್ತಾಸೊ ದಿಸ್ಲೊ
ಹಳೂಚ್ ಹಾತ್ ಸೊಡ್ಲೊ
ಸೈಕಲ್ ಮಾಲ್ಲಿ ಪಾಡ್ಯಾರ್
ದುಲೊ ಶೆತಾಂತ್ ಆಡ್ಯಾರ್
ತೆನ್ನಾ ಪಸುನ್ ದುಲೊ
ಸೈಕಲ್ ಚಲೊಂವ್ಕ್ ಶಿಕ್ಲೊ
- ಭರತ್ ನಾಯ್ಕ್
संपादकीय:
व्हडांनी वाचीजाय जाल्ली भुरग्यांची कविता
भरत नायकाची ही कविता भुरग्यां खातीर बरयिल्ली. ह्ये कवितेंतलो दुलो, सैकल शिकुंक नेणासल्लो. मागीर प्रेतन करून, च्यार चोवगांक आपटून धापटून, पडून उटून मार खेल्या उपरांतच तो सैकल चलोवंक शिकता.
ही भुरग्यांची कविता व्हय जाल्यारी व्हडांकय लगती करुंक जांवचे तसली. आमच्या जिवितांत खंयचेंय सपण नीज जायजाय जाल्यार आमी कष्ट काडीजायीच पडतात. पडजायीच पडता. मार खायजायीच पडता. तवळ मात्र जीक आमची जातली.
ह्याच वर्सा कवी भरत नायकाचें देहांत्य जालें. ताच्या आत्म्याक सदगती लाभूं.
-मेल्विन रोड्रीगस
कविता:
दुलो सैकल शिकलो
शेजार्यालो दुलो
येदो व्हडलो जालो
सैकल येना चलोवंक म्हण
सगळे लागले चाळोवंक
एक दीस ताणे चिंतलें
दांत-वोंठ रागान चाबले
आतां सैकल शिकतलोंच
हांकां बूद शिकयतलोंच
दोनपारांच्या देडाक
सैकल घेतली भाड्याक
दिली हाडून चारांक
पांच घावे पांयांक
दुसरे दिसा व्हेली
माथ्यार मारून हाडली
रोदाचे जाले आठ
गियेन केली फाट
तिसरे दिसा भावाक व्हेलो
ताणे ताज्या सिटाक धल्लो
चलयतासो दिसलो
हळूच हात सोडलो
सैकल माल्ली पाड्यार
दुलो शेतांत आड्यार
तेन्ना पसून दुलो
सैकल चलोवंक शिकलो
- भरत नायक