ಸಂಪಾದಕೀಯ್:
ಸಂಸಾರಾಚ್ಯಾ ಕುಸ್ಡೆಪಣಾಥಾವ್ನ್ ಭೋವ್ ಪಯ್ಸ್
ಸಂಸಾರಾಚ್ಯಾ ಕುಸ್ಡೆಪಣಾಥಾವ್ನ್ ಝೆಂಜ್ರೊನ್ ಗೆಲ್ಲ್ಯಾ ಮನ್ಶಾಕ್ ಆತಾಂ ಎಕ್ಸುರ್ಪಣಾಚೊ ಆಸ್ರೊ ಜಾಯ್ ಜಾಲಾ. ಆನಿ ಹೊ ಶಾಂತೆಚೊ, ಸಮಾಧಾನೆಚೊ ಆಸ್ರೊ ಪ್ರಕೃತಿ ಸೊಡುನ್ ಹೆರ್ ಕೊಣ್ ದೀಂವ್ಕ್ ಸಕತ್? ತೊ ಪ್ರಕೃತಿಂತ್ ಏಕ್ ಜಾಂವ್ಕ್ ಆಶೆತಾ. ರಾನಾಂತ್ಲ್ಯಾ ರುಕಾಂಚೆಂ ಪಾಚ್ವೆಂ ಪಾಂಗ್ರುಂಕ್ ಆಶೆತಾ; ಸುಕ್ಣ್ಯಾಂಚೊ ತಾಳೊ ಜಿಕುನ್ ಧರುಂಕ್ ಆಶೆತಾ; ಉದ್ಕಾ ಝರ್ಯಾಂತ್ ನ್ಹಾಂವ್ಕ್ ಆಶೆತಾ ಆನಿ ತಿತ್ಲೆಂ ಕರುನ್ ಮನ್ಶಾಕುಳಾಚ್ಯಾ ಬೊಬಾಳಾ ಮಧೆಂ ನಪಯಿಂಚ್ ಜಾಲ್ಲೆಂ ತಾಚೆಂಚ್ ಗೀತ್ ಆಯ್ಕೊಂಚಿ ಘಡಿ ತೊ ಲಾಲೆವ್ನ್ ಆಸಾ.
ಕಸಲೆಂ ಏಕ್ ಚಿಂತಪ್! ಪಾಟ್ಲ್ಯಾ ದಿಸಾಂನಿ ಹ್ಯಾ ಸಂಪಾದಕಾಚಿ ಏಕ್ ಕವಿತಾ ’ಪ್ರಕೃತಿಚೊ ಪಾಸ್' ಪರ್ಗಟ್ ಜಾಲ್ಲಿ. ಹ್ಯಾ ದೊನೀ ಕವಿತೆಂಕ್ ಲಾಗ್ಶಿಲೊ ಸಂಬಂಧ್ ಆಸಾ. ದೊನೀ ಕವಿತೆಂನಿ ಮ್ಯಾಕ್ಸಿಮ್ ಲೋಬೊನ್ ಸಾಂಗ್ಚೆಬರಿ ಮಿಸ್ತಿಕತಾ ಆಟಾಪ್ಲ್ಯಾ. ಮಾಗೀರ್ ಮನೀಸ್ ಹ್ಯಾ ಸಂಸಾರಾಕ್ ಅಸೋಯ್ ಕಾಂಟಾಳ್ತಾ ಕಿತ್ಯಾಕ್?
ನಾಗೇಶ್ ಕರ್ಮಲಿ ಗೊಂಯ್ಚೊ ಸುಟ್ಕೆ ಝುಜಾರಿ. ಹಿ ಕವಿತಾ ತಾಚ್ಯಾ ’ಥಾಂಗ್-ಅಥಾಂಗ್' ಪುಸ್ತಕಾಂತ್ ಪರ್ಗಟ್ ಜಾಲ್ಯಾ. ಹ್ಯಾ ಪುಸ್ತಕಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತೀಯ್ ಲಾಭ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೋಚ್ ಮ್ಹಾಕಾ ಲಾಗ್ಚೊ ಸೊಧ್
ಕೆನ್ನಾ ಕೆನ್ನಾಯ್
ಸಾಮ್ಕೆಂ ಸಾಮ್ಕೆಂ ದಿಸ್ತಾ ಮ್ಹಾಕಾ -
ಖಂಯ್ಚ್ಯಾ ತರೀ ರಾನಾಂತ್
ಅಕಸ್ಮಾತ್ ಸಾಂಡ್ಚೊ ಹಾಂವ್...
ಆನಿ ಸಾಪ್ಪ್ ಎಕ್ಸುರ್ಯಾಂನಿ
ಮ್ಹಾಕಾಚ್ ಮ್ಹಜೊ ಘೆಂವ್ಕ್ ಮೆಳ್ಚೊ ಸೊಧ್;
ಸೊಧ್ ಘೆತಾಂ ಘೆತಾಂ
ಪಾಚ್ವ್ಯಾ ಪಾಚ್ವ್ಯಾ ರುಕಾಪಾನಾಂನಿ
ಪಾಚ್ವೊಚ್ ಜಾವ್ನ್ ವಚ್ಚೊಂ ಹಾಂವ್;
ಮ್ಹಜೊ ಆವಾಜ್ ಮ್ಹಾಕಾಚ್
ತಿರಾಯ್ತ್ಪಣಾಕ್
ಮೆಳ್ಚೊ ಆಯ್ಕುಂಕ್
ಏಕ್ ರಾನ್ ಸವ್ಣೆಂ ಜಾವ್ನ್...
ಮನಾಕ್ ಜಶೆ ಫುಟ್ಚೆ ಪಾಖ್ಟೆ
ಮನ್ಮುಕ್ತ್ ದಿಗಂತ್ ಅಂತ್ರಳಾಂತ್
ಯೆಂವ್ಚೆಂ ತೆಂ ಭೊಂವುನ್ ...
ಖಂಯ್ಚ್ಯಾಯ್ ವನ್ವಝ್ರ್ಯಾಂತ್
ಹಾಂವ್ಯ್ ವಚ್ಚೊಂ
ಉದ್ಕಾಳುನ್, ವಿರ್ಗಳೂನ್
ಮಾತ್ಯೆಚ್ಯಾ ಗಂಧ್ಭಾರಾಂತ್
ವ್ಹಾಂವುನ್ ಧುವ್ನ್...
ಆನಿ ರುಕಾಮದಿಂ
ಆಪಾಲಿಪಾ ಖೆಳ್ಪಿ ವಾರ್ಯಾನ್
ಉಡೊವ್ಪಿ ಮ್ಹಾಕಾ
ಘುಂವ್ಡಾವ್ನ್, ಭಿರ್ಕಟಾವ್ನ್
ಹ್ಯಾ ಮನ್ಶಾಂಚ್ಯಾ
ಗಾಂವಾ ಶೆರಾಂ ಪಾಸುನ್ ಪಯ್ಸ್
ನದ್ರೆಪಾರ್...
ಆನಿ ಹೆ ಅಪಾರ್ ಅನಂತ್
ನಿರ್ಮಣೆಚೆ
ಅಳಂಗ್ ಜಾಗ್ರುತ್ಕಾಯೆಂತ್
ಮ್ಹಜೆಂ ಗೀತ್ ಮ್ಹಾಕಾಚ್
ಲ್ಹಾರೆ-ಲ್ಹಾರೆತ್
ಸಾದಯ್ತಲೆಂ ತೆನ್ನಾಂ
ಮ್ಹಜೋಚ್ ಮ್ಹಾಕಾ ಲಾಗ್ಚೊ ಸೊಧ್!
-ನಾಗೇಶ್ ಕರ್ಮಲಿ