ಸಂಪಾದಕೀಯ್:
ಗಡಂಗಾಂತ್ಲ್ಯಾ ದೆವಾ ವೋತ್ ಸೊರೊ ಕೊಪಾಂತ್ ಮ್ಹಜ್ಯಾ
ಹೆ ಕವಿತೆಂತ್ಲೊ ಮನೀಸ್ ಮ್ಹಣೊಂಕ್ ಪುರೊ ಹೆಂ ತಾಚೆಂ ರಡ್ಣೆಂ ಮ್ಹಣೊನ್ - ಜೆಂ ಜಿವಿತಾಚ್ಯಾ ಪಾಂವ್ಡ್ಯಾ ಪಾಂವ್ಡ್ಯಾಂನಿ ಕಾಳ್ಜಾಕ್ ಆನಿ ಮನಾಕ್ ಜಾಲ್ಲ್ಯಾ ಘಾಯಾಂ ವರ್ವಿಂ ವ್ಹಾಳ್‌ಲ್ಲೆಂ. ಪುಣ್ ಮ್ಹಾಕಾ ಹಾಂತ್ಲೆಂ ಎಕೇಕ್ ಉತರ್ ವಾಚ್ತಾಂ ವಾಚ್ತಾಂ ಈದ್ರಾಂತ್ಲ್ಯಾ ಆಮಾಲಾಚೊ ಥೆಂಬೊ ಗಳ್ಯಾಂತ್ ದೆಂವ್‌ಲ್ಲೊ ಅನ್ಭೋಗ್ ಜಾತಾ, ಆನಿ ಹಾಂವ್ ಹೆ ನಶೆಂತ್ ಧಲ್ತಾಂ. ಮಾಗೀರ್ ತ್ಯಾಚ್ ನಶೆಚ್ಯಾ ಕೊಂಡಾಂತ್ ದುಕರ್ ಲೊಳ್‌ಲ್ಲ್ಯಾಬರಿ ಲೊಳೊಂಕ್ ಕೊಣಾಕ್ ಭೊಗ್ಲೆಂ ಜಾಲ್ಯಾರ್ ನವಲ್ ನಾ.
ವ್ಹಾಹ್! ಕಸಲಿ ಏಕ್ ಆಪುರ್ಬಾಯ್ ಹೆ ಕವಿತೆಚಿ ಮ್ಹಣೊಂ? ಹೆ ಕವಿತೆನ್ ಉಜಾರ್ ಕರ್‍ಚೆಂ ಚಿಂತಪ್ ಆಮಾಲಾಬರೀಚ್, ಭಲಾಯ್ಕೆಕ್ ಬರೆಂ ನ್ಹಯ್ ಜಾವ್ಯೆತ್. ಪುಣ್ ಆಮಾಲ್ಯಾಕ್ ತೆಂಚ್ ದಾಧೊಸ್ಕಾಯ್ ದಿತಾ ನ್ಹಯ್? ತಾಚೊ ದೇವ್ ಗಡಂಗಾಂತ್ ಜಿಯೆತಾ ನ್ಹಯ್?
ಜೆರಿಚಿ ಕವಿತಾ ವಾಚ್ತಾನಾ ಒಮರ್ ಖಯ್ಯಾಮಾಚ್ಯೊ ಕವಿತಾ ಉಡಾಸಾಂತ್ ಯೇನಾಸ್ತಾಂ ರಾವಶ್ಯೊನಾಂತ್. ಫುಡಾರಾಂತ್‌ಯ್ ವೆಗ್ಳ್ಯಾಚ್ ಮಾದರೆಚ್ಯೊ ಕವಿತಾ ಜೆರಿಥಾವ್ನ್ ಅಮ್ಕಾಂ ವಾಚುಂಕ್ ಮೆಳ್ತಲ್ಯೊ ಮ್ಹಣೊನ್ ಆಶೆವ್ಯಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರಡ್ಣೆಂ
ವೋತ್ ವೋತ್ ಸೊರೊ
ಕೊಪಾಂತ್ ಮ್ಹಜ್ಯಾ
ನಾ ಮ್ಹಣನಾಕಾ
ನಾ ಮ್ಹಣನಾಕಾ
ಸೊರ್‍ಯಾಚ್ಯಾ ಕೊಪಾಂತ್ ಪುನ್ವೆಚೊ ಚಂದ್ರ್
ಉಡಾಸ್ ಹಾಡಯ್ತಾ ತುಜೊ
ವೋತ್ ವೋತ್ ಸೊರೊ ಕೊಪಾಂತ್ ಮ್ಹಜ್ಯಾ
ಕಾಳ್ಜಾಚ್ಯಾ ರುವಾಂಚೊ ನಿಂವೊಂದಿ ಹುಲೊಪ್ ಆನಿ ಉಜೊ
ಆಹಾ! ಕಸಲೊ ಏಕ್ ಸಾದ್ ಕೊಂಬ್ಯಾಚೊ
ಅಮೊಲಿಕ್ ಘಡಿಯೆ ಫಾಂತ್ಯಾಚ್ಯಾ
ತಾಂಬ್ಶೆಲ್ಲ್ಯಾ ಮುಡ್ಲಾ ಥಾವ್ನ್ ಉದೆಂವ್ ಸುರ್ಯೊ
ವೋತ್ ಸೊರೊ ಕೊಪಾಂತ್ ಮ್ಹಜ್ಯಾ
ಸೆಪೆರಾತ್ ಜಾಲ್ಲ್ಯಾ ಮೊಗಿಕ್
ಪಳೆ ಮೆಳ್ಳ್ಯಾ ಕಸಲಿ ಸಜಾ
ನಾಕಾ ಸಕಯ್ಲ್ ಕೊಪ್
ಸೊರ್‍ಯಾಚ್ಯಾ ಹರ್‍ಯೆಕಾ ಥೆಂಬ್ಯಾಂತ್ ಮಜಾ!
ವೋತ್ ವೋತ್ ಸೊರೊ
ದೆವಾ ಗಡಂಗಾಂತ್ಲ್ಯಾ
ಕೊಪಾಕ್ ಮ್ಹಜ್ಯಾ
ಕೊಪಾಕ್ ಮ್ಹಜ್ಯಾ
-ಜೆರಿ ರಾಸ್ಕಿಞ, ಆಂಜೆಲೊರ್