ಕವಿತಾ:
ದೊಂಗ್ರಾ ವಯ್ಲಿ ವಾಟ್
ಎಕ್ಲೊ ದುಸ್ರೊ ತಿಸ್ರೊ ಆನಿ ಚವ್ತೊ
ಗಿರೆಸ್ತಾಂಚೊ ಲಾಂಬಾಯೆಚೊ ಪುರ್ಶಾಂವ್
ಲಾಳಿ ಮಾರ್‌ಲ್ಲಿಂ ಕಡ್ತಾರಾಂ ಶಿರ್ಕಾವ್ನ್
ಧರ್ಣಿಕ್ ಶೆವ್ಟಲ್ಲ್ಯಾ ಮ್ಹಜೆ ವಯ್ಲ್ಯಾನ್
ಖಳನಾಸ್ತಾಂ ಚಮ್ಕೊನ್ ಆಸಾ
ಹೆ ಚಮ್ಕೊಣೆನ್ ಮ್ಹಜಿ ಕೂಡ್
ಮೆಲ್ಲೆ ಜೀವಿಚೆಂ ಪರ್ಕಟೆಂ ಚಾಮ್ಡೆಂ
ಆನಿ ಮ್ಹಜೆಂ ರಗ್ತಾಳೆಂ ಕಾಳೀಜ್
ನಿರ್ಜೀವ್ ಹಾಡ್ಕುಟ್ಯಾ ಕುಡ್ಕ್ಯಾ ತಶೆಂ
ವ್ಯಂಗ್‌ಪಣಾಚೊ ಎಕ್ತಾರ್ ಜಾವ್ನ್
ಆಶಾ ಖುಶಿ ಮಾನ್ ಮರ್ಯಾದ್
ಅಸಲೆ ಖಂಯ್ಚೇಯ್ ಗೂಣ್ ನಾತ್‌ಲ್ಲೆಂ
ಮಿಲಾವಾಚೆಂ ಫೊಳೆಂ ಜಾಲಾಂ.
ದೊಂಗ್ರಾ ವಯ್ಲ್ಯಾ ಸುಕ್ಯಾ ತಣಾಕ್
ಉಜ್ಯಾ ಜಿಬೊ ಗ್ರಾಸುನ್ ಗೆಲ್ಯೊ
ಪುಣ್ ತಿ ವಾಟ್ ಪೆಟ್ಲಿನಾ
ಪೆಟೊಂಕ್ ಆಸಾ ಕಿತೆಂ? ಕಿರ್‍ಲಲ್ಲೆಂ ತಣ್ ನಾ
ತೆ ನಿರ್ಭಾಗಿ ವಾಟೆಪರಿಂ
ಭುಕೆಚೊ ಜಳ್ತೊ ಉಜೊ
ಕೆದಿಂಚ್ ಮ್ಹಾಕಾ ಭಸ್ಮಿನಾ
ಭುಕೆವ್ನ್ ಭುಕೆವ್ನ್ ಆನಿ
ಗಿರೆಸ್ತಾಂಚ್ಯಾ ಶೆಂಭರೊಂ ಕಡ್ತಾರಾಂ ಪೊಂದಾ
ಚಿರ್ಡೊನ್ ಮುರ್ಡೊನ್
ಹಾಂವ್‌ಯ್ ತಸಲೀಚ್
ದೊಂಗ್ರಾ ವಯ್ಲಿ
ಝರೊನ್ ಗೆಲ್ಲಿ ವಾಟ್ ಜಾಲಾಂ!
-ವಲ್ಲಿ ವಗ್ಗ