ಸಂಪಾದಕೀಯ್:
ಸವಾಲಾಂಚ್ಯಾ ಸಾಗೊರಾಂತ್ ಉಸ್ಮಡ್ತಾನಾ ಲಾಭ್ಚೆಂ ಸುಖ್
ಆತಾಂ ಹಾಂವ್ ಸಂಪೂರ್ಣ್ ಗುಸ್ಪಡ್ಲಾಂ. ಮನೀಸ್ ಜಾವ್ನ್ ಜಲ್ಮಲ್ಯಾಕ್ ಜೀವಂತ್ ಆಸ್ತಾನಾ ಕೆಲ್ಲ್ಯಾ ಪಾಪಾಂ ಖಾತೀರ್ ಮರ್ಣಾ ಉಪ್ರಾಂತ್ ಸುಕ್ಣೆಂ ಜಾವ್ನ್‌ಕಿ, ಮೊನ್ಜಾತ್ ಜಾವ್ನ್‌ಕಿ ಜಲ್ಮೊಂಚೆಂ ಪ್ರಾಯಶ್ಚಿತ್ ಮೆಳ್ತಾ ಮ್ಹಳ್ಳೆ ಪಾತ್ಯೆಣೆಚೆರ್ ಜಬರ್‌ದಸ್ತ್ ಸವಾಲ್ ಉಟಯ್ಲಾಂ ಹಾಂಗಾಸರ್ ಕವಿ ವಲ್ಲಿ ವಗ್ಗಾನ್. ತೊ ಸಾಮ್ಕೆಂ ಉಳ್ಟೆಂ ಚಿಂತಾ. ಸುಕ್ಣೆಂ ಜಾವ್ನ್ ಜಲ್ಮಲ್ಲ್ಯಾಕ್ ತಾಚೆ ಜಿಣ್ಯೆಂತ್ ಕೆಲ್ಲ್ಯಾ ಪಾಪಾಂ ಖಾತೀರ್ ಮನೀಸ್ ಜಾವ್ನ್ ಜಲ್ಮೊಂಚೆಂ ದುರ್ಭಾಗ್ ಫಾವೊ ಜಾಲೆಂ ಜಾಲ್ಯಾರ್!
ಮನ್ಶಾ ಜಿವಿತ್ ತಿತ್ಲೆಂ ನಾಲಾಯಕ್ ಕಿತ್ಯಾ? ಕವಿ ಕಿತ್ಯಾಕ್ ಅಶೆಂ ಚಿಂತಾ? ತಾಕಾ ಹ್ಯಾ ಸಂಸಾರಿ ಜಿಣ್ಯೆಚೊ ವೀಟ್ ಅಸೋಯ್ ಕಿತ್ಯಾಕ್?
ಹಿ ಕವಿತಾ ವಾಚ್ತಾಂ ವಾಚ್ತಾನಾ ತುಂ ಸವಾಲಾಂಚ್ಯಾ ಸಾಗೊರಾಂತ್ ಸಾಸ್ಪಾತಾಯ್, ಉಸ್ಮಡ್ತಾಯ್, ದಡ್ಬಡ್ತಾಯ್. ಹಿಚ್ ಕಷ್ಟೊವ್ಣಿ ಹೆ ಕವಿತೆಚಿ ಜೀಕ್ ಅಶಿ ಹಾಂವ್ ಸಮ್ಜತಾಂ. ವಲ್ಲಿ ವಗ್ಗ ಥೊಡ್ಯಾಚ್ ಉತ್ರಾಂನಿ ಜಾಯ್ತೆಂ ಸಾಂಗ್ಚೊ ಕವಿ. ಪುಣ್ ಆಯ್ಲೆವಾರ್ ವಾಚ್‌ಲ್ಲ್ಯೊ ತಾಚ್ಯೊ ಕವಿತಾ ವಾಚ್ತಾನಾ ತಾಚ್ಯಾ ಕವಿತಾ ಪಯ್ಣಾಕ್ ನವಿ ಘುಂವ್ಡಿ ಆಯಿಲ್ಲಿ ಝಳ್ಕತಾ. ಬರಿ ಘುಂವ್ಡಿ, ಬಳಾಧಿಕ್ ಘುಂವ್ಡಿ, ಆಪುರ್ಬಾಯೆಚಿ ಘುಂವ್ಡಿ. ಹೆ ಘುಂವ್ಡೆರ್ ಆಮ್ಕಾಂ ಸರ್‍ವಾಂಕ್ ಸುಖಾ ಸಂತೊಸಾಚೊ ಸಾಗು ಪಿಯೆಂವ್ಕ್ ಮೆಳ್ತಲೊ ತೆಂ ಖಂಡಿತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಂತ್ರಳಾ ಥಾವ್ನ್ ಪಾತಾಳಾಕ್
ಹಾಂವ್ ತೆದ್ನಾಂ ಶೂನ್ಯ್ ತಿಬೊ
ರಚ್ನಾರಾ ಮುಕಾರ್ ಉಬೊ ಆಸ್ಚೊ
ತೊ ಮ್ಹಾಕಾ ಸುಕ್ಣೆಂ ಕರ್‍ತಲೊ
ಉಪ್ರಾಂತ್ ಹಾಂವ್ ಅಂತ್ರಳಾಚೆ
ಉಬಾರಾಯೆರ್
ಪಾಕಟೆ ಉಸೊವ್ನ್ ಉಬ್ತಲೊಂ
ವಾರ್‍ಯಾರ್ ಧಲೊನ್ ನಾಚ್ತಲೊಂ
ಪುಣ್ ಅಶೆಂ ಘಡ್ಲೆಂನಾ
ತಾಣೆಂ ಮ್ಹಜಿಂ ಪಾಕಾಂ ಹುಮ್ಟುನ್
ಪಾಕಟೆ ಕಾತ್ರುನ್ ಬೊಂಚ್ ಕಿಮ್ಚಿಲಿ
ಸುಖಾಳ್ ಉಬ್ಣೆಚಿ ಸ್ವಾಧಿಕ್ ಗೊಡ್ಸಾಣ್
ಮ್ಹಜೆ ಥಾವ್ನ್ ಲುಟುನ್ ಜಾತಚ್
ಪೃಥ್ವೆ ತಕ್ಲೆರ್ ಪಾಂಯ್ ಝರವ್ನ್
ಚಲ್ಚೊ ಆನಿ ಧಾಂವ್ಚೊ ಮನಿಸ್ ಜಾ
ಮ್ಹಳ್ಳೊ ಶಿರಾಪ್ ದೀವ್ನ್
ಮ್ಹಜೆ ಆವಯ್ಚ್ಯಾ ಗರ್ಭಾಂತ್
ತಾಣೆಂ ಮ್ಹಾಕಾ ಠೆವ್ಲೊ!
-ವಲ್ಲಿ ವಗ್ಗ