ಸಂಪಾದಕೀಯ್:
ಸಾಂಜೆಚ್ಯಾ ಸಾತಾಂಚೆಂ ಮುಂಬಯ್ ಶಹರ್
ಸಾಂಜೆಚ್ಯಾ ಸಾತಾಂಚೆಂ ಮುಂಬಯ್ ಶಹರ್ ಕಶೆಂ ಆಸ್ತಾಗಾಯ್? ತುಮ್ಕಾಂ ಖಬರ್ ನಾ ತರ್, ಹಾಂಗಾ ತಾಚಿ ಖಬರ್ ಆಮಿ ದಿತಾಂವ್. ತೇಂಯ್ ಕವಿತಾ ರುಪಾರ್. ಹರ್ಧೆಂ ಚಿರಿನ್ ಧಾಂವ್ಚೆಂ ಟ್ರೇನ್, ಝಗ್‌ಝಗೀತ್ ಹೊಟೆಲಾಂ - ಅಶೆಂ ಕಾಂಯ್ ಸಭಾರ್ ಸುಕ್ಷೀಮ್ ಗಜಾಲಿ ಹೆ ಕವಿತೆಂತ್ ಗುಂತ್ಲ್ಯಾತ್. ಕವಿ ಆನಂದ್ ವರ್ಟಿ ಮುಂಬಂಯ್ತ್ ವಸ್ತಿ ಕರ್‍ತಾಲೊ. ಜಲ್ಮಾನ್ ತೊ ಹುಬ್ಳಿಚೊ. ಕ್ರಮೇಣ್ ಬೆಳ್ಗಾಂವಾಂತ್ ಆಸೊನ್, ಉಪ್ರಾಂತ್ ಮುಂಬಯ್ ತೊ ಪಾವ್‌ಲ್ಲೊ. ಬಿ. ಎ., ಎಮ್. ಕೊಮ್. ಶಿಕಪ್‌ಯ್ ತಾಣೆ ಜೊಡ್‌ಲ್ಲೆಂ.
ತೀನ್ ವರ್ಸಾಂ ಆದಿಂ ಜನೆರಾಂತ್ ಹೊ ಸಂಸಾರ್ ತಾಣೆಂ ಸಾಂಡ್ಲೊ. ಕಾಂಯ್ ಸತ್ತರ್ ವರ್ಸಾಂಚಿ ಜೀಣ್ ತಾಚಿ. `ಅಕ್ಷಯ್ ದಿವೊ' ತಾಚೆಂ ಕವಿತಾ ಪುಸ್ತಕ್. ಕನ್ನಡ ಕವಿ ದಿನಕರ ದೇಸಾಯಿಚೆಂ `ದಿನಕರಾಲಿಂ ಕವನಾಂ' ತಾಣೆಂ ತರ್ಜಣ್ ಕೆಲ್ಲೆಂ ಪುಸ್ತಕ್. ಪ್ರಭಾಕರ್ ನಾಡ್ಕರ್ಣಿಚೆಂ ಕವಿತಾ ಪುಸ್ತಕ್ `ಗಜಲ್ ಪ್ರಭಾ' ತಾಣೆಂ ಸಂಪಾದಿತ್ ಕೆಲಾಂ.
ಹಾಂಗಾಸರ್ ಪರ್ಗಟ್ ಕೆಲ್ಲಿ ಕವಿತಾ ಹಾಂವೆಂಚ್ ಸಂಪಾದಿತ್ ಕೆಲ್ಲ್ಯಾ `ವಿಸಾವ್ಯಾ ಶೆಕ್ಡ್ಯಾಚ್ಯೊ ಕೊಂಕಣಿ ಕವಿತಾ' ಕವಿತಾ ಸಂಗ್ರಹಾಂತ್ಲಿ. ಹೆಂ ಪುಸ್ತಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಪರ್ಗಟ್ ಕೆಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಾಂಜೆ ವೆಳ್ಚೆ ಸಾತ್
ಶಿಣುನ್ ಗೆಲ್ಲೊ ತಾಂಬ್ಡೊ ಸೂರ್ಯ್ ಉದ್ಕಾಸಕಲ್ ವತಾ ಜೆನ್ನಾಂ
ಹುಸ್ಕ್ಯಾಮೆಕ್ಳೆಂ ಜಾತಾ ಮಳಬ್
ಏಕ್ ದಿವಸ್ ಸಲ್ಲೊ ಮ್ಹಣುನ್ ಸವ್ಕಾಸಾಯೆನ್
ಘೆಂವ್ಚಿ ಆಸ್ತಾ ತಾಕಾ ಶಾಂತ್ ನಿದೆ ಊಬ್
ವಿಸನ್ನ್ ಬೊವಾಳ್ ಆಯ್ಚೊ ಆನಿ ಉಸ್ತ್‌ವಾರ್ ಫಾಲ್ಯಾಚೊ ನವೊ
ಎಕೇಕ್ ತಾಜಿ ಪಾಪ್ಣಿ ಜಶಿ ಧಾಪ್ತಾ ತಸೊ ಪೆಟ್ತಾ ದಿವೊ
ಎಕಾ ಫಾಟ್ಲ್ಯಾನ್ ಏಕ್ ಆನಿ ಖಿಣಾನ್ ಸಗ್ಳೆ ಲಖ್‌ಲಖ್ತಾತ್
ತೆನ್ನಾಂ ಮುಂಬೈಂತ್ ವಾಜಿಲ್ಲೆ ಆಸ್ತಾತ್ ಸಾಂಜೆವೆಳ್ಚೆ ಸಾತ್.
ಶುಕ್‌ಶುಕಾಟ್ ಒಫಿಸಾಂನಿ ಸ್ತಬ್ದ್ ಝಾಡಾಂ
ಸವ್ಣಿಂ ಉಡುನ್ ಗೆಲ್ಲಿಂ ಜಶಿಂ
ಬಂಧ್ ಜಾತಾತ್ ಖಿಡ್ಕ್ಯೊ-ಕವ್ಡಾಂ ಖೊಲ್ಯಾಂತ್ಲೊ ಥಂಡ್ ವಾರೊ
ಘೆತಾತ್ ಯಂತ್ರಾಂ ಶ್ವಾಸ್ ಏಕ್ ಖಿಣಾಚೀಚ್ ಉಸಂತ್ ಅಶಿ
ಲಾಖ್ ಲಾಖ್ ಪೊಟಾಂ ಭರುನ್ ಕರ್‍ತಾ ತಾಂಚೆಂ ಪಾಲನ್-ಪೋಷಣ್
ಚಾಕ್ ಕೆದೆಂ ಮೊಟೆಂ ತಾಕಾ ಖಿಳ್ ಪಡತ್ ಜಾಲ್ಯಾರ್ ಮರಣ್
ಪೈಸ್ ಗಿರಾಣ್ ಜಾಂಬೊಯ್ ದಿತಾ ಸುಸ್ತ್ ಆಳ್ಸಾಯೆಂತ್
ತೆನ್ನಾಂ ಮುಂಬೈಂತ್ ವಾಜಿಲ್ಲೆ ಆಸ್ತಾತ್ ಸಾಂಜೆವೆಳ್ಚೆ ಸಾತ್.
ಛಾತಿ ಫೊಡುನ್ ಧಾಂವ್ತಾ ಟ್ರೇನ್ ಸ್ಟೇಶನಾ ಸ್ಟೇಶನಾರ್
ಸೊಡುನ್ ಲೊಕಾಂಕ್ ಹುಮ್ಲೆಲ್ಯಾ ಅರ್ಧ್‌ಮೆಲ್ಯಾ
ಗಚ್ಚ ರಸ್ತೆ, ಗಚ್ಚ್ ಪೂಲ್ ಘುಸ್ಮಟ್ತಾ ಸಾಮ್ಕೊ ಜೀವ್
ಗಾಡೆಮುಳಾಂತ್ ಕೋಣ್ ಮೆಲಾ ಕೊಣಾಚ್ಯಾ ಪಾಕಿಟಾ ಚೊರಿ ಜಾಲ್ಯಾ
ನಾ ಕೊಣಾಕ್ ಚಡುಣೆ ತಾಜೋಚ್ ತಾಕಾ ಸುವಾರ್ಥ್ ಹೊಡ್
ಗೊಠ್ಯಾಂತ್ ಯೆವ್ಪಿ ಗೊರ್‍ವಾಂವರಿ ಮೊತ್ಯಾನೀಚ್ ಜಾವ್ನ್ ಜಡ್
ಪಾಂಯ್ ಜೆನ್ನಾಂ ಘರಾಂಕಡೆನ್ ವೊಡುನ್ ಘೆವ್ನ್ ವತಾತ್
ತೆನ್ನಾಂ ಮುಂಬೈಂತ್ ವಾಜಿಲ್ಲೆ ಆಸ್ತಾತ್ ಸಾಂಜೆವೆಳ್ಚೆ ಸಾತ್.
ಝಗ್‌ಝಗೀತ್ ಹೊಟೆಲಾಂನಿ ಮಂದ್ ವಾಸ್ ಧುಂದ್ ಶ್ವಾಸ್
ಕಾರಿಂತ್ಲ್ಯಾನ್ ಉತರ್‍ತಾತ್ ಗೊರೆ ಪಾಂಯ್ ಸೂಟ್ ನಿಳೆ
ಯೆವ್ಪಿ ರಾತೀಕ್ ಯೆವ್ಕಾರ್ ದಿವ್ಪಾಕ್ ನಿಶಾಚರಾಂಚೆ ಭರ್‍ತಾತ್ ಮೆಳೆ
ಸರ್ಕಯ್ತಾಚ್ ಕರ್‌ಕರೀತ್ ನೊಟಾಂ ಘಾಲ್ತಾತ್ ಭಲ್ತೆಚ್ ಉಲೆ
ವೊತೊ ಯೆತಾ ಬಾಜಾರಾಕ್ ಜಾಯ್ತೆ ಘೆಯಾತ್ ಆಂಗ್‌ಲೆಗೀತ್
ಸಗ್ಳೆಚ್ ಕಶೆಂ ನಾಚುಂಕ್ ಲಾಗ್ತಾ ಆಪೈತ್ ಆಸ್ತಾ ದೊಳೆ ಮೊಡೀತ್
ದುಕಾನಾಂಚ್ಯೊ ಕಾಚೆ ಖಿಡ್ಕ್ಯೊ ಹಾಂಸುನ್ ಫುಡೆಂ ಕರ್‍ತಾತ್ ಹಾತ್
ತೆನ್ನಾಂ ಮುಂಬೈಂತ್ ವಾಜಿಲ್ಲೆ ಆಸ್ತಾತ್ ಸಾಂಜೆವೆಳ್ಚೆ ಸಾತ್.
ಎಕೇಕ್ ಮನೀಸ್ ಪಾವ್ತಾ ಘರಾ ಬ್ಲೊಕಾಂತ್ ಚಾಳೀಂತ್ ಝೊಪ್ಡೀಂತ್ ಕೊಣಿ
ಕೊಣಾಗೆರ್ ಪೆಟ್ಟಾ ಟೀವ್ಹಿ ಕೊಣಾಗೆರ್ ದಿವೋಯ್ ಲಾಗನಾ
ನಳಾಮುಖಾರ್ ರಾಂಗ್ ಖಂಯ್ ಗಳೊ ಕಾಡುನ್ ರಡ್ತಾ ಕೊಣೀ
ವ್ಹಾಂವ್ತಾತ್ ರಸ್ತೆ ಆಜೂನ್‌ಯ್ ವೇಳ್ ಥೊಡೊ ಖೂಬ್ ಕಾಮಾಂ
ಸರ್‍ತಾ ಸರ್‍ಚಿ ನಾತ್ ಕೆನ್ನಾಂ ದಿವಸ್ ಬುಡ್ಲೊ ಜರೀ ಬೆಗಿಂ
ನೋಕ್ರಿರ್ ಗೆಲ್ಯಾ ಆವಯ್ಲಿಂ ಭುರ್ಗಿಂ ಪರ್‍ಥುನ್ ದಾರಾಲಾಗಿಂ
ವಾಟ್ ಪಳೈತ್ ಆಸ್ತಾತ್ ಜೆನ್ನಾಂ ದುಖಾಂ ಘೆವ್ನ್ ದೊಳ್ಯಾಂತ್
ತೆನ್ನಾಂ ಮುಂಬೈಂತ್ ವಾಜಿಲ್ಲೆ ಆಸ್ತಾತ್ ಸಾಂಜೆವೆಳ್ಚೆ ಸಾತ್.
-ಆನಂದ ವರ್ಟಿ
संपादकीय:
सांजेच्या सातांचें मुंबय शहर
सांजेच्या सातांचें मुंबय शहर कशें आसतागाय? तुमकां खबर ना तर, हांगा ताची खबर आमी दितांव. तेंय कविता रुपार. हर्धें चिरीन धांवचें ट्रेन, झगझगीत होटेलां - अशें कांय सभार सुक्षीम गजाली हे कवितेंत गुंतल्यात. कवी आनंद वर्टी मुंबंयत वसती करतालो. जल्मान तो हुबळिचो. क्रमेण बेळगांवांत आसोन, उपरांत मुंबय तो पावल्लो. बी. ए., एम. कोम. शिकपय ताणे जोडल्लें.
तीन वर्सां आदीं जनेरांत हो संसार ताणें सांडलो. कांय सत्तर वर्सांची जीण ताची. `अक्षय दिवो' ताचें कविता पुसतक. कन्नड कवी दिनकर देसायिचें `दिनकरालीं कवनां' ताणें तर्जण केल्लें पुसतक. प्रभाकर नाडकर्णिचें कविता पुसतक `गजल प्रभा' ताणें संपादीत केलां.
हांगासर पर्गट केल्ली कविता हांवेंच संपादीत केल्ल्या `विसाव्या शेकड्याच्यो कोंकणी कविता' कविता संग्रहांतली. हें पुसतक कर्नाटक कोंकणी साहित्य अकाडेमीन पर्गट केलां.
-मेलवीन रोड्रिगस
कविता:
सांजे वेळचे सात
शिणून गेल्लो तांबडो सूऱ्य उदकासकल वता जेन्नां
हुसक्यामेकळें जाता मळब
एक दिवस सल्लो म्हणून सवकासायेन
घेंवची आसता ताका शांत निदे ऊब
विसन्न बोवाळ आयचो आनी उसतवार फाल्याचो नवो
एकेक ताजी पापणी जशी धाप्ता तसो पेटता दिवो
एका फाटल्यान एक आनी खिणान सगळे लखलख्तात
तेन्नां मुंबैंत वाजिल्ले आसतात सांजेवेळचे सात.
शूकशुकाट ओफिसांनी स्तब्द झाडां
सवणीं उडून गेल्लीं जशीं
बंध जातात खिडक्यो-कवडां खोल्यांतलो थंड वारो
घेतात यंत्रां श्वास एक खिणाचीच उसंत अशी
लाख लाख पोटां भरून करता तांचें पालन-पोषण
चाक केदें मोटें ताका खीळ पडत जाल्यार मरण
पैस गिराण जांबोय दिता सुसत आळसायेंत
तेन्नां मुंबैंत वाजिल्ले आसतात सांजेवेळचे सात.
छाती फोडून धांवता ट्रेन स्टेशना स्टेशनार
सोडून लोकांक हुम्लेल्या अर्धमेल्या
गच्च रसते, गच्च पूल घुस्मटता सामको जीव
गाडेमुळांत कोण मेला कोणाच्या पाकिटा चोरी जाल्या
ना कोणाक चडुणे ताजोच ताका सुवार्थ होड
गोठ्यांत येवपी गोरवांवरी मोत्यानीच जावन जड
पांय जेन्नां घरांकडेन वोडून घेवन वतात
तेन्नां मुंबैंत वाजिल्ले आसतात सांजेवेळचे सात.
झगझगीत होटेलांनी मंद वास धुंद श्वास
कारिंतल्यान उतरतात गोरे पांय सूट निळे
येवपी रातीक येवकार दिवपाक निशाचरांचे भरतात मेळे
सर्कयताच करकरीत नोटां घाल्तात भल्तेच उले
वोतो येता बाजाराक जायते घेयात आंगलेगीत
सगळेच कशें नाचुंक लाग्ता आपैत आसता दोळे मोडीत
दुकानांच्यो काचे खिडक्यो हांसून फुडें करतात हात
तेन्नां मुंबैंत वाजिल्ले आसतात सांजेवेळचे सात.
एकेक मनीस पावता घरा ब्लोकांत चाळींत झोपडींत कोणी
कोणागेर पेट्टा टीव्ही कोणागेर दिवोय लागना
नळामुखार रांग खंय गळो काडून रडता कोणी
व्हांवतात रसते आजूनय वेळ थोडो खूब कामां
सरता सरची नात केन्नां दिवस बुडलो जरी बेगीं
नोक्रीर गेल्या आवयलीं भुर्गीं परथून दारालागीं
वाट पळैत आसतात जेन्नां दुखां घेवन दोळ्यांत
तेन्नां मुंबैंत वाजिल्ले आसतात सांजेवेळचे सात.
-आनंद वर्टी