ಸಂಪಾದಕೀಯ್:

ಸ್ತ್ರೀಯೆಚೆ ದಿಷ್ಟಿಂತ್ಲ್ಯಾನ್ ಸ್ವಾತಂತ್ರ್ಯಾಚೊ ಅರ್ಥ್

ಸ್ವಾತಂತ್ರ್ಯಾಚೊ ಅರ್ಥ್ ಸ್ತ್ರೀಯೆಚೆ ದಿಷ್ಟಿಂತ್ಲ್ಯಾನ್ ಸೊಧುನ್ ಕಾಡ್ಚೆಂ ಪ್ರೇತನ್ ಹೆ ಕವಿತೆಂತ್ ಕೆಲ್ಲೆಂ ದಿಸ್ತಾ. ಆಯ್ಲೆವಾರ್ ಜಾಲ್ಲಿಂ, ಯಾ ಜಾವ್ನ್ ಆಸ್ಚಿಂ ಅತ್ಯಾಚಾರಾಚಿಂ ಘಡಿತಾಂ ಆಂಗ್ ಶಿರ‍್ಶಿರಾಯ್ತಾನಾ ಕವಿಚೆಂ ಕಾಳೀಜ್ ಪೆಟೊನ್ ಆಸಾ, ಶಿಜೊನ್ ಆಸಾ.

ಪಯ್ಶಿಲ್ಯಾ ಸ್ಪೇಯ್ನಾಂತ್ ಬಸೊನಯ್, ಭಾರತಾಚ್ಯಾ ಘಡಿತಾಂಕ್ ಸ್ಪಂದನ್ ಕರ‍್ಚ್ಯಾ ಕವಿನ್ ಬರಯಿಲ್ಲಿ ಹಿ ಕವಿತಾ, ಎಕಾ ಕವಿಚೆ ಜವಾಬ್ದಾರಿವಿಶಿಂ ಸಾಂಗೊನ್ ಆಸಾ. ತೊ ಫಕತ್ ಪಳೆವ್ನ್ ನಾ, ಆಯ್ಕೊನ್ ನಾ ಮ್ಹಣೊನ್ ಸಾಂಗೊನ್ ಆಸಾ. ಬದ್ಲಾ ತೊ ಅನ್ಯಾಯಾ ವಿರೋಧ್ ತಾಳೊ ಉಬಾರುಂಕ್ ಪಾವ್ಲಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಸ್ವಾತಂತ್ರ್ಯ್

ಬಂಧ್ ಕುಜ್ನಾಂತ್ಲ್ಯಾ
ಧುಂವ್ರಾ ಧಗಿಂತ್ಲ್ಯಾನ್ ಸುಟೊನ್
ಗಾಂಧೀಜಿಚ್ಯಾ ಉತ್ರಾಂಕ್
ಬಾರಾ ವೊರಾಂ ರಾತಿಚ್ಯಾ
ಕಾಳ್ಕಾಕ್ ಫುಡ್ ಕರುನ್
ಭಾಯ್ರ್ ಸುಟ್ಲಿ ನಾರಿ ಮ್ಹಣೊನ್ -
ಭಾರತಾಕ್ ಮೆಳ್ಳೊ ಉಗ್ತೊ ಸ್ವಾತಂತ್ರ್ ...

ಮೇನಕಾಚೆಂ ನರ್ತನ್
ಭರೊನ್ ವೊಮ್ತೊಂಚಿ ಸೊಭಾಯ್
ವಿಶ್ವಾಮಿತ್ರಾಚೆ ತಪಸ್ವಿ ಕುಡಿಂತ್
ಮೋಹ್ ವಾಡೊಂಕ್ ಕಾರಣ್
ಆಶೆಚಿ ಕೂಡ್ ಪೆಟ್ತಾನಾ
ಸಂಸಾರ್ ತೊ ವಿಸರ‍್ತಾ
ಸನ್ಯಾಸ್ ಸಾಂಡ್ತಾ
ಕಲಿಯುಗಾಚ್ಯಾ ರಸ್ತ್ಯಾಂನಿ
ಸಂಯಮ್ ರಾಕೊನ್ ಸಲ್ವಾಲ್ಲೆ ವಿಶ್ವಾಮಿತ್ರ್
ಕುಜ್ನಾಥಾವ್ನ್ ಸುಟ್ಲೆಲ್ಯಾ ತುಕಾ ರಾಕೊನ್ ಆಸಾತ್

ಥಂಯ್ ಚಿಂವೊನ್ ಉಡಯಿಲ್ಲ್ಯಾ ಹಾಡಾಂನೀಂಯ್
ನಾಕಾಕ್ ಮಾರ್ಚೆಪರಿಂ ಮಾಸಾ ಹಿಮ್ಸಾಣ್
ಧೊಸುನ್ ಹೆಡಾಂವ್ಚ್ಯಾ ಶಿರಾಂನಿ
ವೀಕ್ ವೊಂಕ್ತಾ ಕಾಮುಕ್ಪಣ್ .
ಸಜವ್ನ್ ಭೊಂವ್ಚೆ ಕುಡಿಂನಿ
ಆಧುನಿಕತೆಚೆಂ ನ್ಹಾಣ್.
ಕುಸಡ್ ಭರಲ್ಲೆ ಮೂರ್ಖ್ ಮತಿಂನಿ
ಕಾಮುಕಿ ಚಿಂತ್ಪಾಚಿ ಘಾಣ್ ......

ಎಕೆ ಕುಶಿನ್ ದೊಗ್ ಭುಕೆಲಿ
ಕಾಳೊಕ್ ಮಾಂಡಲ್ಲ್ಯಾ ಕುಡಾಂತ್
ಅಂತಸ್ಕರ್ನಾಚಿಂ ಜನೆಲಾಂ ಲಜೆವ್ನ್ ಧಾಂಪ್ತಾನಾ
ಕಾಮುಕ್ಪಣ್ ಉಗಡ್ತಾ ಉಗ್ತೆಂ ಉದಾರೆಂ -
ಸುಖಿ ಕಿಂಕ್ರಾಟ್ ತಿಚಿ
ನಿಸ್ಕಳ್ಪಣ್ ಮಸ್ತುಂಚೆಂ ಬಳ್ ತಾಂಚೆಂ
ಹಾಂಚಿ ಕಾಮುಕಿ ಭುಕ್ ನಿಂವ್ತಾನಾ
ತಿಣೇಂಯ್ ಲಾಂಬ್ ಉದ್ಗಾರ್ ಸೊಡ್ಲೊ
ಪೊಟಾಚಿ ಆನಿ ಸಂಭೋಗಿ ಭುಕ್ ನಿಂವಲ್ಲ್ಯಾಕ್

ಆನ್ಯೇಕೆ ಕುಶೀನ್ ಸ್ವತಂತ್ರ್ ವಾರ‍್ಯಾಕ್ ಉಬೊಂಕ್
ಪಾಕಾಂ ಸುಟೊನ್ ಭಾಯ್ರ್ ಸುಟಲ್ಲೆಂ
ಉಗ್ತ್ಯಾ ರಸ್ತ್ಯಾರ್ ಹಾತ್ ಉಸವ್ನ್ ವೊಳ್ವಳ್ತಾ
ತೆಂ ಮೊಲಾಧಿಕ್ ನಿಷ್ಕಳಂಕ್ಪಣ್
ವಾಂಟುನ್ ಚಾಕುನ್ ಆಸಾತ್
ಎಕ್ಲ್ಯಾ ಉಪ್ರಾಂತ್ ಎಕ್ಲ್ಯಾಕ್
ಅಸಹಾಯಕ್ ಕಿಂಕ್ರಾಟ್ ಪಿಂದ್ತಾನಾ
ರಗ್ತಾಸ್ರಾವ್ ಮೌನ್‌ಪಣಿ ವ್ಹಾಳೊನ್ ಆಸಾ
ನಿಂವಲ್ಲೆ ಭುಕೆಕ್ ಥಾಂಬವ್ಚಿ ತಾನ್ ಜಾವ್ನ್
ಆಕ್ರೇಕ್ ತಿಚೆ
ಭೃಷ್ಟ್ ಕುಡಿ ಥಾವ್ನ್ ಅತ್ಮೊಯಿ ಸರ್ಗಾಕ್ ಉಬ್ಲೊ
ವಯ್ಲ್ಯಾ ರಚ್ನಾರಾಚ್ಯಾ ತುರಂತ್ ಉಲ್ಯಾಕ್ ....

-ಅನಿಲ್ ಬೈಂದೂರ್, ಸ್ಪೇಯ್ನ್

-अनिल बैंदूर, स्पेयन