Kavita Kular

ದೇವ್‌ಪಣ್ ಆನಿ ಆವಯ್‌ಪಣ್

ಸಂಪಾದಕೀಯ್:

ಕ್ರೀಸ್ತಾಕ್ ತಶೆಂ ಆವಯ್ಕ್ ಎಕೆ ತಾಕ್ಡೆರ್ ದವರ್ನ್ ತುಕ್ಚೆಂ ಪ್ರೇತನ್

ಕೊಣ್ ವ್ಹಡ್? ಆವಯ್ ಯಾ ಖುರ್ಸಾರ್ ಉಮ್ಕಳಲ್ಲೊ ಜೆಜು ಕ್ರೀಸ್ತ್? ಆವಯ್ಚ್ಯಾ ಪ್ರಸೂತ್ಪಣಾಚೆ ದುಖಿ ಮುಕಾರ್ ಕ್ರೀಸ್ತಾಚಿ ದೂಖ್ ಕಿತ್ಲಿ? ಆವಯ್ ಕಸಲ್ಯಾಯ್ ಫಾತರ್ ಕಾಳ್ಜಾಚ್ಯಾ ವ್ಯಕ್ತಿಕ್ ಸಯ್ತ್ ಭುಲಯ್ತಾ ಜಾಲ್ಯಾರ್, ಹರ‍್ಯೆಕಾ ವ್ಯಕ್ತಿಚ್ಯಾ ಜಿವಿತಾಂತ್ ತಿಚೊ ಪಾತ್ರ್ ಆಸಾ ಜಾಲ್ಯಾರ್, ಕ್ರೀಸ್ತಾಚೊ ಪಾತ್ರ್ ಇತ್ಲೊ ವಿಸ್ತಾರ್ ಆಸಾ? ಕ್ರೀಸ್ತಾಕ್ ತಶೆಂ ಎಕೆ ಆವಯ್ಕ್ ಎಕೆ ತಾಕ್ಡೆರ್ ದವರ್ನ್ ತುಕ್ಚೆಂ ಪ್ರೇತನ್ ಹೆ ಕವಿತೆಂತ್ ಕೆಲಾಂ.

ಅನಿಲ್ ಬೈಂದೂರ್ ಕವಿತಾ ಶೆತಾಂತ್ ಪರಿಪಿಕಾಯೆತೆವ್ಶಿಂ ಪಾವೊನ್ ಆಸ್ಚೊ ಕವಿ. ತಾಚಿ ವಾಡಾವಳ್ ದೆಖ್ತಾನಾ ಮನಾಕ್ ದಾಧೊಸ್ಕಾಯ್ ಜಾತಾ. ಹಿ ವಾಡಾವಳ್ ಇತ್ಲ್ಯಾರ್ ಥಾಂಬಯ್ನಾಸ್ತಾಂ ಫುಡಾರಾಂತ್ಲ್ಯಾ ಸುಕ್ಷೀಮ್ ಗಜಾಲಿಂವಿಶಿಂ ಧ್ಯಾನ್ ದೀವ್ನ್ ಶ್ರಮ್ ಕೆಲೆಂ ತರ್, ರುಚೀಕ್ ಕಾವ್ಯಫಳಾಂ ತಾಚೆಥಾವ್ನ್ ಲಾಭ್ತಲಿಂ ಮ್ಹಣ್ಚ್ಯಾಂತ್ ದೋನ್ ಉತ್ರಾಂ ನಾಂತ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

 

 

 

 

 

 

ದೇವ್‌ಪಣ್ ಆನಿ ಆವಯ್‌ಪಣ್

ತೆ ತೀನ್ ಖಿಳೆ
ತಾಚಿಂ ರಗ್ತಾ ಮಾಸ್ಕುಟಾಂ ಚಿರುನ್
ಖುರ್ಸಾಂತ್ ರಿಗ್ಲಲೆ.
ಹಾಂವ್ ತೊ ಹುಳ್ವುಳೊ
ತುಜ್ಯಾ ಗರ್ಭಾಂತ್ಲಿಂ ಮಾಸಾಂ ಶಿಂದುನ್
ಭುಮಿರ್ ಪಡ್ಲಲೊ.

ತುಂ ದೊಳ್ಯಾಂಕ್ ದಿಸ್ಚೊ ದೇವ್,
ಹಾಂವ್ ತುಕಾ ತಾಚ್ಯಾಕೀ ವರ್ತಿ ಮ್ಹಣೊಂ?
ತಾಚೆಂ ದೇವ್‌ಪಣ್ ಧ್ಯಾನಿ ಆನಿ ಆರಾಧಿತ್ ಆಸ್ತಿಕಾಂಕ್ ಮಾತ್ರ್ ಭುಲ್ತಾ
ತುಜೆಂ ಆವಯ್ಪಣ್ ಕಠೋರ್ ನಾಸ್ತಿಕಾಂಕೀ ಭುಲಯ್ತಾ.

ತಿ ಪ್ರಸೂತ್ಪಣಾಚಿ ಖುರ್ಸಾವಾಟ್
ತಾಲ್ವಾರಿಚೆ ಧಾರಿಂನಿ
ಜಿವೆಂ ಮಾಸ್ ಕೊಚಾಂವ್ಚಿ ದೂಖ್
ಕಾಲ್ವಾರಿಚ್ಯಾ ಪೊಂತಾಕ್ ವ್ಹಾವೊವ್ನ್ ವೆತಾ ಸುಖ್.

ಪಾಲಂವ್ ಪಾಂಗ್ರುನ್ ಪಾನೊ ಚಿಂವಯ್ತಾನಾ
ಹರ್ಧ್ಯಾಚೆ ಉಬೆಂತ್ ಸುಖಾಳ್ ಸರ್ಗ್
ಪಾಲ್ವಾ ಸುತಾಂನಿ ಘಾಮ್ ಪರ್ಮಳ್ತಾನಾ
ಸ್ವಾಸಾಂತ್ ಶಿಂಪ್ತಾ ಉಬಾಳ್ ಮೋಗ್

-ಅನಿಲ್ ಬೈಂದೂರ್

संपादकीय:

क्रीस्ताक तशें आवयक एके ताकडेर दवर्न तुकचें प्रेतन

कोण व्हड? आवय या खुर्सार उमकळल्लो जेजू क्रीस्त? आवयच्या प्रसूतपणाचे दुखी मुकार क्रीस्ताची दूख कितली? आवय कसल्याय फातर काळजाच्या व्यक्तीक सयत भुलयता जाल्यार, हरयेका व्यक्तिच्या जिवितांत तिचो पात्र आसा जाल्यार, क्रीस्ताचो पात्र इतलो विस्तार आसा? क्रीस्ताक तशें एके आवयक एके ताकडेर दवर्न तुकचें प्रेतन हे कवितेंत केलां.

अनिल बैंदूर कविता शेतांत परिपिकायेतेवशीं पावोन आसचो कवी. ताची वाडावळ देखताना मनाक दाधोस्काय जाता. ही वाडावळ इतल्यार थांबयनासतां फुडारांतल्या सुक्षीम गजालिंविशीं ध्यान दीवन श्रम केलें तर, रुचीक काव्यफळां ताचेथावन लाभतलीं म्हणच्यांत दोन उतरां नांत.

-मेल्विन रोड्रीगस

कविता:

देव‌पण आनी आवय‌पण

ते तीन खिळे
ताचीं रगता मासकुटां चिरून
खुर्सांत रिगलले.
हांव तो हुळवुळो
तुज्या गर्भांतलीं मासां शिंदून
भुमीर पडललो.

तूं दोळ्यांक दिसचो देव,
हांव तुका ताच्याकी वर्ती म्हणों?
ताचें देव‌पण ध्यानी आनी आराधीत आस्तीकांक मात्र भुलता
तुजें आवयपण कठोर नास्तीकांकय भुलयता.

ती प्रसूतपणाची खुर्सावाट
तालवारिचे धारिंनी
जिवें मास कोचांवची दूख
कालवारिच्या पोंताक व्हावोवन वेता सूख.

पालंव पांगरून पानो चिंवयताना
हर्ध्याचे उबेंत सुखाळ सर्ग
पालवा सुतांनी घाम पर्मळताना
स्वासांत शिंप्ता उबाळ मोग

-अनिल बैंदूर


Comment on this article

  • Praveen, Mangalore

    Wed, Feb 19 2014

    hai anil i liked your poem... its nice ... all the best for your future ..:)

    DisAgree Agree Reply

  • Anil nazareth, byndoor

    Wed, Feb 19 2014

    ದೇವ್ ಬೊರೆಂ ಕರುಂ ತುಮ್ಕಾಂ ಸರ್ Lancelote, ಆndrew, and sir Edward . ಮ್ಹಜ್ಯೊ ಕವಿತೆಚ್ಯೊ ವೊಳಿ ಆಪುರ್ಬಾಯೆನ್ ವಿಶ್ಲೆಶಿಲ್ಲ್ಯಾಕ್. ಕಾವ್ಯ್ ಶೆತಾಂತ್ ಹಾಂವ್ ಆನಿಕೀ ಲ್ಹಾನ್ಶೆಂ ಪಿಲ್ಕಾಟ್. ತುಮ್ಚ್ಯಾ ತಸಲ್ಯಾ ವ್ಹಡ್ ಮಾನಾಯಾಂಥಾವ್ನ್ ಜಾಯ್ತೆಂ ಶಿಕುಂಕ್ ಆಶೆತಾಂ ..

    DisAgree Agree Reply

  • Dr. Edward Nazareth, Mangalore

    Wed, Feb 19 2014

    Beautiful and meaningful poem. This may not be applicable to those mothers who deliver with surgical analgesia. It is absolutely not to those mothers who hesitate to breast feed their babies..this poem is to real mothers..

    DisAgree Agree Reply

  • Andrew L D Cunha, Mangalore

    Tue, Feb 18 2014

    ವ್ಹಾ...ವ್ಹಾ..ವ್ಹಾ ಅನಿಲ್...ಕವಿತಾ ವಾಚುನ್ ಕವಿಕ್ ಪೊಟ್ಲುನ್ ಧರ್ಯಾಂ ಮ್ಹಣ್ ಭೊಗ್ಲೆಂ...ಕಾಳ್ಜಾಕ್ ಲಾಗ್ಚಿಂ ರೂಪಕಾಂ ಕವಿತೆಂತ್ ಅಪುರ್ಬಾಯೆನ್ ಗುತ್ಲ್ಯಾಂಯ್...ಅವಯ್ಚಾ ಆನಿ ಕ್ರಿಸ್ತಾಚಾ ಮೊಗಾಚಾ ವೈಭವಾಚಿ ಕವಿತಾ ಹಿ...ವಾಚ್ತಾಂ ವಾಚ್ತಾ ಅವಯ್ಚಾ ಆನಿ ಕ್ರಿಸ್ತಾಚಾ ದೂಕಿಂತ್ ವಾಂಟೆ ಜಾಂವ್ಚೊ ಆನಿ ತಾಂಚಾ ಮೊಗಾನ್ ಉಪ್ಯೆಂವ್ಚ್ಯೊ ಅನ್ಭೊಗ್ ಜಾತಾ. ಕವಿಕ್ ಉಲ್ಲಾಸ್

    DisAgree Agree Reply

  • Lancy Pinto Nayak, Kulshekar

    Tue, Feb 18 2014

    ಮೊಗಾಚ್ಯಾ ಆನಿಲ್ ಬಾಬ್, ಶಹಭ್ಭಾಸ್ !! ಮೆಚ್ವಾಲೊ ಆನಿ ಪಿಸ್ವಾಲೊಂ. ತುಜಿಂ ಕವಿತಾಂ ಆನಿ ಬರ್ಪಾಂ ಸುರ್ವೆರ್ ಥಾವ್ನ್ ವಾಚುಂನ್ , ಸಮ್ಜೊಂವ್ನ್ ಆಸಾಂ. ತುಕಾ ಕೊಂಕ್ಣಿ ಭಾಸೆ ಥಂಯ್ ಆಸ್ಚಿ ವೋಡ್ ಆನಿ ಮೋಡ್ ಪಳೊಂವ್ಕ್ ಖುಶಿ ಭೊಗ್ತಾ. ಹಂತಾ ಹಂತಾಕ್ ತುಜಿ "ಲಿಖ್ಣಿ" , ಆಭಿವ್ರದ್ದೆಚ್ಯಾ ಪಾಂವ್ಡಾರ್ ಪಾವ್ಲಾಂ ಕಾಡ್ಚಿಂ ರೂಪ್ ರೂಪ್ ಝಳ್ಕಾತಾ. ಭೇಷ್ ಆನಿಲ್ !! ಮುಕಾರ್ಸಿ. ಕವಿತಾಂ ಬರೊಂವ್ಚೆ "ಕವಿ" ಕೆದ್ನಾಂಯ್ ಪ್ರಯತ್ನ್ ಕರುಂನ್ ಉದೆವ್ಯೆತ್ ಆನಿ ಉದೆವ್ನ್‌ಚ್ ಆಸಾತ್ ತಿ ಖುಶೆಚಿ ಗಜಾಲ್. ತಾಂತುಂ ವಿಶೇಷಾತಾ ನಾ.ಪುಣ್ ಚಿಂತ್ಪಾಚ್ಯಾ ಊಂಚಾಯೆಂತ್ , ವಿಭಿನ್ನಾತೆಚ್ಯಾ ಗ್ರೇಸ್ತ್‌ಕಾಯೆಂತ್ ಆಪ್ಲ್ಯಾ ಶಾಥೆಂತ್ ಆನಿ ವಿಂಚ್‌ಲ್ಲ್ಯಾ ಉತ್ರಾಂಚ್ಯಾ ವಿಶೇಷಾತೆಂತ್ "ದೆವಾಕ್" ಕವಿತೆಂತ್ ಮಧ್ಗತ್ ಗುಸೊನ್ ಆನಿ ಬಸೊಂನ್ ಬರೊಂವ್ಕ್ ಬರೋ ದಮ್ಮ್ ಜಾಯ್ ಪಡ್ತಾ. ಬರ್ಯಾ ಚಿಂತ್ಪಾಚಿ ಧಾರ್ ಚಿಂತುಂಕ್ ಗರ್ಜ್ ಪಡ್ತಾ ಸಾಂಗಾತಾ ಆನ್ಭವಾಚಿಯ್ ಗರ್ಜ್ ದಿಸ್ತಾ. ತುವೆಂ ಆವಾಯ್ಚ್ಯಾ ಆವಾಯ್ಪಾಣಾಚ್ಯಾ ಕಷ್ಟಾಂಕ್ ಆನಿಂ ಕಾಲ್ವಾರಿರ್ ಜೀವ್ ದಿಲ್ಲ್ಯಾಕ್ ಹೊಂದ್ವೊಂವ್ಣಿ ಕರುಂನ್ ಸೊಭಿತ್ ಉತ್ರಾಂ ಗೊಂತುಂನ್ , ಸುಂದರ್ ರೀತಿನ್ ಮನ್ ಆನಿ ಧ್ಯಾನ್ ವೊಡ್ಚ್ಯಾಬರಿಂ ವರ್ಣಾನ್ ಕೆಲಾಂಯ್. ವಾಚ್ತಾನಾ ಬೊರ್ಸೊಂವ್ಣೆಂತ್ , ಕಾಳಿಜ್ ಮುದ್ಗೊಂವ್ನ್ , ದುಖ್ ಝಡ್ಟಾ. ನಿಮಾಣೊ ಹಂತಾರ್ ಆವಾಯ್ ಸವೆಂ ದೆವಾಕ್ ಆನಿಕೀ ಮಾತ್ಸೆಂ ಜೋರ್ ಘಾಲ್ಲೆಂ ತರ್ , ಕವಿತೆಕ್ ಆನಿಕೀ ಆಪೂರ್ಭಾಯ್ ಆಸ್ತಿ ಮ್ಹಳ್ಳೆಂ ಮ್ಹಜೆಂ ಭೊಗಾಪ್. (ಚುಕ್ಲ್ಯಾರ್ ಭೊಗ್ಸಿಯಾತ್) ಸತ್ ಗಜಾಲ್ , ತುಜ್ಯಾ ಥಾವ್ನ್ ಇತ್ಲೆಂ ಊಂಚ್ ಕವಿತಾ ವಾಚ್ತಾನಾ , ಕೊಂಕ್ಣೆಂತ್ ಪುಡಾರ್ ಆಸ್ಚೊ "ಕವಿ" ಉದೆಲಾ ತೆಂ ಧಯ್ರ್‌ನ್ ಸಾಂಗ್ಯೆತ್. ತುಜಿ ಉಮೆದ್ ನಿವಾಯ್ನಾಕಾ ಆನಿ ಬಾವಾಯ್ನಾಕಾ. ಖಳಾನಾಸ್ತಾಂ , ವೊಳಾನಾಸ್ತಾಂ ಬರೊಂವ್ನ್‌ಚ್ ರಾವ್. ತುಜ್ಯಾ ಕಾಮಾಂ, ಕಾರ್ಯಾಂಕ್ ಆನಿ ಸಾಹಿತಿಕ್ ವಾವ್ರಾಕ್ ಸರ್ವ್ ಬರೆಂ ಮಾಗ್ತಾಂ. ದೇವ್ ತುಕಾ ವೊರ್ತೆಂ ಕರುಂ , ಜೈ ಕೊಂಕಣಿ ಲ್ಯಾನ್ಸಿ.

    DisAgree Agree Reply


Title : ದೇವ್‌ಪಣ್ ಆನಿ ಆವಯ್‌ಪಣ್

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.


 A  B  C  D  E  F  G  H  I  J  K  L  M
 
 N  O  P  Q  R  S  T  U  V  W  X  Y  Z