ಕವಿತಾ:

ಹಾಡ್, ಚೆಡ್ವಾ, ಬುಡ್ಕುಲೊ

ಹಾಡ್, ಚೆಡ್ವಾ, ಬುಡ್ಕುಲೊ ಲಕಯ್ ತಳ್ಯಾಂತ್
ತುಜೆಂ ಮ್ಹಜೆಂ ಉತರ್ ಜಾಲಾಂ ಕಾಜ್ಚ್ಯಾ ಮಳ್ಯಾಂತ್

ಅಮೃತಾಚಿ ಧಾರ್‌ಗೊ ಆಮ್ಚ್ಯಾ ಲಗ್ನಾರ್ ವೊತುಂಗೊ
ಬರ‍್ಯಾವಾಯ್ಟಾ ರಿವಾಜಿಂಚಿ ತಕ್ಲಿ ತಿಣೆ ಭೆತುಂಗೊ
ತುಜೊ ಮ್ಹಜೊ ರೋಸ್ ಘಡೊಂ ಅರ್ಧ್ಯಾ ವೊಳ್ಯಾಂತ್
          ಹಾಡ್, ಚೆಡ್ವಾ, ಬುಡ್ಕುಲೊ ಲಕಯ್ ತಳ್ಯಾಂತ್

ಪಾದ್ರಿ ಚೀಟ್ ವಾಚಿನಾ, ವ್ಹಡಿಲ್ ಮಾಟವ್ ರಚಿನಾ
ಮ್ಹಜ್ಯಾ ತುಜ್ಯಾ ಬರ‍್ಯಾ ಫಾಲ್ಯಾ ಸಯ್ತ್ಯಾಂ ಸಾವ್ಳಿ ಯೆಂವ್ಚಿ ನಾ
ಪಾದ್ರಿ ಸೈರೆ ವ್ಹಾಳೊನ್ ವಚೊಂ ವ್ಹಾಳ್ಚ್ಯಾ ವೊಳ್ಯಾಂತ್
          ಹಾಡ್, ಚೆಡ್ವಾ, ಬುಡ್ಕುಲೊ ಲಕಯ್ ತಳ್ಯಾಂತ್

ಕರಿಯಮಣಿ ಬಾಂದಿನಾ, ಭಾಂಗರ್ ಶಿಂಗಾರ್ ಘಾಲಿನಾ
ಆಮ್ಚ್ಯಾ ವ್ಹೊರಾ ಮುಕ್ಲ್ಯಾನ್‍ಗೊ ರಸ್ಮಾ ಗಾಡಿ ವೆಚಿ ನಾ
ಮ್ಹಜೆಂ ತುಜೆಂ ಲಗಿನ್ ಘಡೊಂ ಮೊಗ್ರೆ ಕಳ್ಯಾಂತ್
          ಹಾಡ್, ಚೆಡ್ವಾ, ಬುಡ್ಕುಲೊ ಲಕಯ್ ತಳ್ಯಾಂತ್

ಧೊಲ್ ಗುಮಟ್ ನಾಸ್ತಾನಾ, ಗರ‍್ನಾಳಿಂಚೊ ನಾದ್ ನಾ
ಪೆಂಪಾರ‍್ಯಾಂಚೊ ಸಾದ್ ನಾ, ಆಪ್ಲ್ಯಾ ಪೆಲ್ಯಾ ವಾದ್ ನಾ
ಕಾಜಾರಾಚೆಂ ಗಾಯಾನ್ ಗಾಜೊಂ ಕೊಗ್ಳೆ ಗಳ್ಯಾಂತ್
          ಹಾಡ್, ಚೆಡ್ವಾ, ಬುಡ್ಕುಲೊ ಲಕಯ್ ತಳ್ಯಾಂತ್

ಸಾತ್ ಸಾತ್ ಜಾಕಿನಾ, ಚೊವ್ದಾ ಜಾತಿತ್‍ಮು ಸನ್ನಾಂ
ಸನ್ನಾಂಚೀಯ್ ಪರ‍್ವಾ ನಾ, ಸೈರೆ ಧಾಯ್ರೆ ಆಸ್ಚೆ ನಾ
ಆಮ್ಚ್ಯಾ ಲಗ್ನಾ ಕಾಫ್ಯೆ ಸಂಭ್ರಮ್ ಪಾವ್ ಪೆಳ್ಯಾಂತ್
          ಹಾಡ್, ಚೆಡ್ವಾ, ಬುಡ್ಕುಲೊ ಲಕಯ್ ತಳ್ಯಾಂತ್

ಬುಡ್ಕುಲೊಗೊ ಆಯ್ಲೊ ನಾ, ತಳ್ಯಾ ಉದ್ಕಾಂತ್ ಲಕ್ಲೊ ನಾ
ದಸ್ತುರ‍್ಯಾಂಚೆ ಪಾಜೆ ಮುಕಿಂ ತರ್ನೊ ತಕ್ಲೊ ಠಿಕ್ಲೊನಾ
ಆಮ್ಚ್ಯಾ ಲಗ್ನಾ ಆಂವ್ಡೊಗೊ ಸುಕ್ಲೊ ಗಳ್ಯಾಂತ್
          ಹಾಡ್, ಚೆಡ್ವಾ, ಬುಡ್ಕುಲೊ ಲಕಯ್ ತಳ್ಯಾಂತ್

ಹಾಡ್, ಚೆಡ್ವಾ, ಬುಡ್ಕುಲೊ ಲಕಯ್ ತಳ್ಯಾಂತ್
ಆಜೂನ್ ತುಕಾ ರಾಕೊನ್ ರಾವ್ಲಾಂ ಕಾಜ್ಚ್ಯಾ ಮಳ್ಯಾಂತ್

-ಚಾ. ಫ್ರಾ. ದೆಕೊಸ್ತಾ