ಸಂಪಾದಕೀಯ್:
ಬಾವನಾತಲ್ಲ್ಯಾ ಗುಲೊಬಾಂನಿ ಜೀವ್ ಜೊಡಲ್ಲೆ ಆತ್ಮೆ
ಆಯ್ಲೆವಾರ್ ಜಾಲ್ಲ್ಯಾ ವಿಮಾನ್ ಅವ್ಘಡಾಂತ್ ಸರೊನ್ ಗೆಲ್ಲ್ಯಾ ಅತ್ಮ್ಯಾಂಕ್ ಜೀವ್ ಗುಂತ್ಚೊ ವಾವ್ರ್ ವಿನ್ಸಿ ಪಿಂಟೊ ಆಂಜೆಲೊರಾನ್ ಹೆ ಕವಿತೆ ದ್ವಾರಿಂ ಕೆಲಾ. ಆಖ್ಖೊ ಸಂಸಾರ್ ದುಖಾಂಚ್ಯಾ ಕೊಂಡಾಂತ್ ಕಳ್ವಳೊನ್ ಆಸ್ತಾನಾ, ವಿನ್ಸಿ ಪಿಂಟೊ ಸಮಾಧಾನಾಚಿ ಚೂಡ್ ಘೆವ್ನ್ ಸರ್ವಾಂಕ್ ಭುಜಯ್ತೆ ಆಸಾ. ನಿರ್ಜೀವ್ ಆತ್ಮೆ ಬಾವನಾತಲ್ಲ್ಯಾ ಗುಲೊಬಾಂನಿ ಜೀವ್ ಜೊಡುಂಕ್ ಪಾವ್ಲ್ಯಾತ್ ಮ್ಹಣೊನ್ ಸಾಂಗೊನ್ ತೊ ಸಂಸಾರಾಕ್, ಆನಿ ಸರ್‍ಲಲ್ಯಾಂಚ್ಯಾ ಕುಟ್ಮಾಂಕ್ ಭರ್ವಸೊ ದೀವ್ನ್ ಆಸಾ.
ವಿನ್ಸಿ ಪಿಂಟೊಚ್ಯೊ ಆಯ್ಲೆವಾರ್‍ಚ್ಯೊ ಕವಿತಾ ನವೆ ಘುಂವ್ಡೆರ್ ಯೇವ್ನ್ ರಾವ್ಲ್ಯಾತ್. ಹಿ ಘುಂವ್ಡಿ ಬರಿ. ಅಸಲ್ಯೊಚ್ ಕವಿತಾ ತೊ ಸರಾಗ್ ಬರೊವ್ನ್ ಗೆಲೊ ಜಾಲ್ಯಾರ್ ತಾಂಕಿವಂತಾಂಚೆ ಪಂಗ್ತಿಂತ್ ಭರ್‍ತಿ ಜಾಂವ್ಕ್ ತಾಕಾ ವರ್ಸಾಂ ಸೊಡ್ಯಾಂ, ಮ್ಹಯ್ನೆ ಲಾಗ್ಚೆನಾಂತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದುಲೊಬ್ ಆತ್ಮೆ
ವಿಮಾನ್ ಥಳಾರ್ ಪುಲ್ಲ್ಯಾತ್ ಗುಲೊಬ್
ಸಂಗಿಂ ಪುನರ್ಜೀವಿತ್ ಜಾಲ್ಯಾತ್ ಆತ್ಮೆ ದುಲೊಬ್
ಹೆಂ ಗುಲೊಬ್ ತರೀ ಕಸ್ಲೆ ?
ಧೊಣು ರಂಗಾಚೆ ಥರಾವಳ್, ವೊಳಿಂನಿ
ಮುಳಾಕ್, ರಗ್ತಾಚೆಂ ಉದಕ್ ಆನಿ ದೂಕ್
ಲೊಂಕ್ಡಾಚೊ ಈಟ್, ಮಾಸಾಚೆಂ ಸಾರೆಂ
ಜಿರೊನ್, ಇರೊನ್ ಸೊರ್‍ಕೆಲ್ಯಾತ್ ಬರೆ
ಆಜ್ಯಾಪ್ ದಿಸ್ಲೆಂ?
ಹ್ಯಾ ಝಾಡಾಂನಿ ನಾಂತ್ ಕಾಟೆಂ, ಫಾಂಟೆ
ಹಾಂಗಾ ನಾ ವೋಂಯ್ ವೊಡ್ತಾಕ್,
ನಾ ಚಲಿ, ಮ್ಹಾಲಿ ವಾ ಧನಿ
ನಾಂತ್ ಕೇಸ್, ದೇವ್, ಗಿರಾಯ್ಕ್
ತಾಂಕಾಂ ಮಾಳುಂಕ್, ಅರ್‍ಪುಂಕ್, ಘೆಂವ್ಕ್
ಶಾಂತ್ ಧರ್ತೆಂತ್ ನಾ ಮನ್ಶಾಂಚಿ ಝಳಕ್
ಪುಲ್ಲ್ಯಾತ್ ಸೊಬಿತ್ ಸಗ್ಳ್ಯಾಂನಿ...
ಫಕತ್ ಗುಲೊಬಚ್ ಗುಲೊಬ್,
ಸಂಗಿಂ ಆತ್ಮೆ ದುಲೊಬ್.
(ಮಂಗ್ಳುರಾಂತ್ ವಿಮಾನ್ ಆವ್ಘಡಾಂತ್ ಬಲಿ ಜಾಲ್ಲ್ಯಾಂಕ್ ಅರ್‍ಪುನ್)
- ವಿನ್ಸಿ ಪಿಂಟೊ, ಆಂಜೆಲೊರ್