ಕವಿತಾ:

ಪಾವ್ಸ್

ಪಾವ್ಸ್ ಆಯ್ಲೊ, ಬಾಂಯೊಂ ಭರ್ಲ್ಯೊ
ಜೊತಾಂ ಗಾದ್ಯಾಕ್ ದೆಂವ್ಲಿಂ, ಬಿಂಯಾಳೊ ರೊಯ್ಲೊ
     ಆಳ್ಮಿಂ ಉಟೊನ್ ಫುಲ್ಲಿಂ
ಸಾಂಗಾತಾಚ್ ಆವ್ರ್ ಆಯ್ಲೆಂ
ಘರಾಂ ಕೊಸಾಳ್ಳಿಂ, ಮಾರೊಗ್ ಭಿಗಡ್ಲೆ
     ಬಸ್ಸಾಂ ರಾವ್ಲಿಂ
ತಾನ್ ಥಾಂಬ್ಲಿ, ತಳಿಂ ಬಾಂಯೊಂ
ವೊಮ್ತಾಲಿಂ, ಝರಿ ಫುಲ್ಲ್ಯೊ
     ವ್ಹಾಳ್ ಪೊಕ್ರಿ ಜಾಲೆ
ನಳಾ ಉದಕ್ ತಾಂಬ್ಡೆಂ ಜಾಲೆಂ
ಚರಂಡೆಚೆಂ ನಳಾಂತ್ ಗೆಲೆಂ
     ಬಾಂಯ್ತ್‌ಲೆಂ ಉದಕ್ ಮ್ಹೆಳೆಂ ಜಾಲೆಂ
ಝರಮ್, ಕೊಲೆರಾ, ಕಾಳ್ಜೊರ್
ಆನಿ  ಜೊಂಡಿಸಾಚಿ ಪಿಡಾ ಮುರ್ಮುರ್ಲಿ
     ಲಿಂಗನಮಕ್ಕಿ ವಯ್ರ್ ಆಯ್ಲೆಂ
ಕಾತರಲ್ಲಿ ವೀಜ್ ಪಾಟಿಂ ಮೆಳ್ಳಿ
ರೂಕ್ ಹುಂಬಾಳ್ಳೆ, ಖಾಂದೆ ಕೊಸಾಳ್ಳೆ
     ವೀಜ್ ದಿವ್ಯಾಂನಿ ಕೂಕ್ಲು ಕೆಲೆಂ
ಥೊಡೆ ಪಾವ್ಟಿಂ ಪಾವ್ಸ್
ಪಡ್ತಾ ಕಿತ್ಯಾಕ್ ಆನಿ
     ಥೊಡೆ ಪಾವ್ಟಿಂ ರಡ್ತಾ ಕಿತ್ಯಾಕ್?

-ಚಾ.ಫ್ರಾ. ದೆಕೊಸ್ತಾ