ಸಂಪಾದಕೀಯ್:
ಕವಿತೆದ್ವಾರಿಂ ಚಿತ್ರಾಂ ಸೊಡಂವ್ಚೊ ಕವಿ
ದಿನೇಶ್ ಕೊರೆಯಾ ಕವಿತೆ ದ್ವಾರಿಂ ಚಿತ್ರಾಂ ಸೊಡಂವ್ಚ್ಯಾಂತ್ ಎಕ್ದಮ್ ಹುಶ್ಯಾರ್. ಹಾಂಗಾಸರ್ ದಿಲ್ಲೆ ಕವಿತೆಂತ್ ಭುರ್ಗ್ಯಾಪಣಾಲೆಂ ಏಕ್ ಪೊಕ್ರಿ ತರೀ ಸೊಭಿತ್ ಪಿಂತುರ್ ತೊ ಸೊಡಯ್ತಾ. ದುಸ್ರೆ ಕಡೆ ತರ್ನಾಟ್ಪಣಾಕ್ ಪಾವ್ತಾನಾ ತಾಚೆ ಮತಿಕ್ ಧೊಸ್ಚೆಂ ಪೊಕ್ರಿ ಚಿಂತಪಯ್ ಆಸಾ.
ದಿನೇಶ್ ಕೊಂಕಣಿಂತ್ ವೆಗ್ಳೊಚ್ ಕವಿ. ಕವಿತೆಂನಿ ಉತ್ರಾಂಚಿ ಮಾಂಡಾವಳ್ ತಾಚಿ ವೆಗ್ಳಿಚ್. ತಾಚ್ಯ್ತಾ ಕವಿತಾಂನಿ ರೂಪಕಾಂಕಚ್ ತೊ ಚಡಿತ್ ಧ್ಯಾನ್ ದಿತಾ.
ದಿನೇಶಾನ್ ಸರಾಗ್ ಬರಯ್ಜೆ ಆನಿ ಕೊಂಕಣಿ ಕವಿತಾ ಶೆತ್ ಗಿರೇಸ್ತ್ ಕರ್ಚ್ಯಾಂತ್ ಯೋಗದಾನ್ ದೀಜಾಯ್ ಮ್ಹಳ್ಳಿ ಆಮ್ಚಿ ಆಶಾ
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬಾಳ್ ಸಾಂಗಾತಿಣ್
ಸಕಾಳಿಂಚೊ ಸುರ್ಯೊ
ಮುಡ್ಲಾ ದಾರಾಂತ್ಲ್ಯಾನ್ ತಿಳ್ಚ್ಯಾ ಪಯ್ಲೆಂಚ್
ಚೊವ್ಕೆಕ್ ಪಾವ್ತಾಲೆಂ
ಆಸ್‌ಲ್ಲೆಂ ಆಂಗ್ಲೆಂ
ದಿಸ್‌ಲ್ಲೆಂ ಇಜಾರ್
ಶಿರ್ಕಾವ್ನ್
ದೋವ್ ಆರಾಂವ್ಕ್ ವೆತಾಲ್ಯಾಂವ್
ತೆದ್ನಾಂ ತಾಚ್ಯಾ ಕೆಸಾರ್ ಫುಲ್‌ಲ್ಲ್ಯಾ
ಗುಲೊಬಾ ತಸ್ಲಿಂಚ್
ಶೆತ್‌ಭರ್ ಹಾಸ್ಕುರಿಂ
ಕಾಳ್ಜಾಂ;
ತೊಂಡಾರ್ ಚರ್‌ಚೆಂ ಥಂಡ್ಡ್ ವ್ಹಾರೆಂ,
ಕಾಂಟ್‌ಭರ್ ಖುಶಾಲ್ ಹಾಸೊ.
ರಾಣಿಯೆಬರಿ
ಧಲಯ್ತಾನಾ ಗಾಣಾಂ ಜಾಯ್
ಚಲಯ್ತಾನಾ ಗಾಡಿ ಜಾಯ್
ಭುಲಯ್ತಾನಾ ಕೀಸ್ ಜಾಯ್
ಸಾಳ್ಕಾಂ ಖುಂಟುನ್ ಸರ್ ಗುಂತುನ್
ಗಳೊಭರ್ ಸಜಂವ್ಕ್ ಜಾಯ್
ಕೆದ್ನಾಂ,
ವೊರಾಂಗಟ್ಲ್ಯಾನ್
ದೊಳೆ ಮೆಳವ್ನ್
ಪಳೆವ್ನ್
ಬಸ್‌ಲ್ಲ್ಯೊ ಘಡಿಯೊ
ನೆಣ್ತಿಂ ಪಾವ್ಲಾಂ
ಪಿಂಪ್ರಿಂ ಸ್ಥನಾಂ
ನೆಣ್ತಿಂ ಸಪ್ಣಾಂ-
ಕಿತ್ಲಿಂ ವಾಡ್ಲ್ಯಾಂತ್ ಆಸ್ತಲಿಂ?
-ದಿನೇಶ್ ಕೊರೆಯಾ