संपादकीय:
म्हानमनीस आमकां सांडून वचत, ताचीं उतरां, पावलां हांगासर थिर उरतात
म्हामनीस हो संसार सांडून वेताना कितें जाता, तें बोवच आपुरबायेन कवीन हांगासर विवरायलां. हांगाची बोली केरळाची तरूय, वाचूंक कसलीच हरकत जायना. म्हामनीस कोणूय जांवक पुरो - आमच्याच वोळकिचो, आमी सदां पळेंवचो, आमकां सदां उलोंवक मेळचो. तो जांवक पुरो, आमी केन्नांच पळेंवक नातल्लो, तरूय आमच्या काळजांनी जागो करून घेतल्लो.
म्हानमनशाचें एक बरें कितें म्हळ्यार - तो ह्या संसारा थावन मेकळो जाल्यारय, ताचीं पावलां हांगासर थिर उरतात आनी त्या पावलांक हजारॊं अस्कत व्यक्तिंक वाट दाकोंवची सकत आसता. तो ह्या संसारा थावन मेकळो जाल्यारय, ताचीं उतरां हांगासर थिर उरतात आनी त्या उतरांनी हजारों असक्त मनांक थाकाय दिंवची अदभुत ताकत आसता.
शरतचंद्र शेणै अकाडेमी थावन प्रशस्ती जोडल्लो कवी.
-मेल्विन रोड्रीगस
ಸಂಪಾದಕೀಯ್:
ಮ್ಹಾನ್‍ಮನೀಸ್ ಆಮ್ಕಾಂ ಸಾಂಡುನ್ ವಚತ್, ತಾಚಿಂ ಉತ್ರಾಂ, ಪಾವ್ಲಾಂ ಹಾಂಗಾಸರ್ ಥಿರ್ ಉರ್ತಾತ್.
ಮ್ಹಾಮನೀಸ್ ಹೊ ಸಂಸಾರ್ ಸಾಂಡುನ್ ವೆತಾನಾ ಕಿತೆಂ ಜಾತಾ, ತೆಂ ಬೋವಚ್ ಆಪುರ್ಬಾಯೆನ್ ಕವಿನ್ ಹಾಂಗಾಸರ್ ವಿವರಾಯ್ಲಾಂ. ಹಾಂಗಾಚಿ ಬೋಲಿ ಕೇರಳಾಚಿ ತರೀ, ವಾಚುಂಕ್ ಕಸಲಿಚ್ ಹರ್ಕತ್ ಜಾಯ್ನಾ. ಮ್ಹಾಮನೀಸ್ ಕೊಣಯ್ ಜಾಂವ್ಕ್ ಪುರೊ - ಆಮ್ಚ್ಯಾಚ್ ವೊಳ್ಕಿಚೊ, ಆಮಿ ಸದಾಂ ಪಳೆಂವ್ಚೊ, ಆಮ್ಕಾಂ ಸದಾಂ ಉಲೊಂವ್ಕ್ ಮೆಳ್ಚೊ. ತೊ ಜಾಂವ್ಕ್ ಪುರೊ, ಆಮಿ ಕೆನ್ನಾಂಚ್ ಪಳೆಂವ್ಕ್ ನಾತಲ್ಲೊ, ತರೀ ಆಮ್ಚ್ಯಾ ಕಾಳ್ಜಾಂನಿ ಜಾಗೊ ಕರುನ್ ಘೆತಲ್ಲೊ.
ಮ್ಹಾನ್‍ಮನ್ಶಾಚೆಂ ಏಕ್ ಬರೆಂ ಕಿತೆಂ ಮ್ಹಳ್ಯಾರ್ - ತೊ ಹ್ಯಾ ಸಂಸಾರಾ ಥಾವ್ನ್ ಮೆಕ್ಳೊ ಜಾಲ್ಯಾರಯ್, ತಾಚಿಂ ಪಾವ್ಲಾಂ ಹಾಂಗಾಸರ್ ಥಿರ್ ಉರ್ತಾತ್. ಆನಿ ತ್ಯಾ ಪಾವ್ಲಾಂನಿ ಹಜಾರೊಂ ಅಸ್ಕತ್ ವ್ಯಕ್ತಿಂಕ್ ವಾಟ್ ದಾಕೊಂವ್ಚಿ ಸಕತ್ ಆಸ್ತಾ. ತೊ ಹ್ಯಾ ಸಂಸಾರಾ ಥಾವ್ನ್ ಮೆಕ್ಳೊ ಜಾಲ್ಯಾರಯ್, ತಾಚಿಂ ಉತ್ರಾಂ ಹಾಂಗಾಸರ್ ಥಿರ್ ಉರ್ತಾತ್ ಆನಿ ತ್ಯಾ ಉತ್ರಾಂನಿ ಹಜಾರೊಂ ಅಸಕ್ತ್ ಮನಾಂಕ್ ಥಾಕಾಯ್ ದಿಂವ್ಚಿ ಅದ್ಭುತ್ ತಾಕತ್ ಆಸ್ತಾ.
ಶರತ್‌ಚಂದ್ರ ಶೆಣೈ ಅಕಾಡೆಮಿ ಥಾವ್ನ್ ಪ್ರಶಸ್ತಿ ಜೊಡಲ್ಲೊ ಕವಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ
ಮಹಾಮನೀಷ್ ವತಾಯ್ ತೆನ್ನಾ
ಮಹಾಮನೀಷ್ ವತಾಯ್ ತೆನ್ನಾ
ಜಿಣೆ ಮೈದಾನಾರ್ ಪಾವ್ಲಾಂ ಛಾಪ್ ಸೊಡೂನ್ ವತಾಯ್
ಪ್ರಭಾವ್ ತಾಂಚೊ ಸಮಸ್ತಾಂಚೆರ್ ಘಾಲೂನ್ ವತಾಯ್
ಮನೀಷ್ ಮ್ಹಳ್ಳೆಂ ಉತರ್ ತಿಂ ಸಾರ್ಥಕ್ ಕರ್‍ತಾಯ್
ಮನೀಷ್‌ಜನ್ಮು ಧನ್ಯ್ ಮ್ಹಣೂನ್ ಗವಾಯ್ ದಿತಾಯ್-
ಮಹಾಮನೀಷ್ ವತಾಯ್ ತೆನ್ನಾ
ಥೊಡಿಂ ತಾಂಚಿಂ ಸಪ್ನಾಂ ಆಮ್ಕಾಂ ದೀವ್ನು ವತಾಯ್
ಬರಿಂ ತಾಂಚಿ ಉರ್ಬಾ ಆಮ್ಚೆರ್ ಶಿಂಪಡೂನ್ ವತಾಯ್
ತಾಂಚ್ಯಾ ಆತ್ಮ್ಯಾಚೊ ಏಕ್ ಕುಟ್ಕೊ ಹಾಂಗಾ ದವ್ರೂನ್ ವತಾಯ್
ತಾಂಚ್ಯಾ ಚೈತನ್ಯಾಚೊ ಏಕ್ ವಾಂಟೊ ಆಮ್ಚ್ಯಾಂತ್ ವಾಂಟೂನ್ ವತಾಯ್-
ಮಹಾಮನೀಷ್ ವತಾಯ್ ತೆನ್ನಾ
ರಕರಕೀ ವೊತಾಂತೂಯ್ ಆಮ್ಕಾಂ ಕಾಳೂಕ್ ದಿಸ್ತಾ
ಥಂಡ್ ಚಾಂದಿಣ್ಯಾಂತೂಯ್ ಆಮ್ಚೆಂ ಆಂಗ್ ಹುಲ್ಪತಾ
ನಾಕಾ ವಚೂನಾಕಾ ಮ್ಹಣ್ ಆಮ್ಚೆಂ ಅಂತರಂಗ್ ರಡ್ತಾ
ಆಮಿ ದುರ್ಬಲ್ ನಿರಾಲಂಬ್ ಮ್ಹಣ್ ಹರ್ದೆಂ ಹುಂಡ್ಕೆತಾ
ಮಹಾಮನೀಷ್ ವತಾಯ್ ತೆನ್ನಾ
ಆಮಿ ಹತಾಶ್ ಜಾತಾಯ್.. ಬೆಠೀಚ್ ಹಾತ್ ಪಿಳೂನ್
ಗಳ್ಯಾಂತುಲೊ ವಿಳಾಪ್ ಗಿಳೂನ್ ವಿಮೂಕ್ ರಾಬ್ತಾಯ್
ಉಡ್ಗಾಸ್ ತಾಂಚೆ ಉಜಳ್ ಜಿವೆ ಆಮ್ಚೆ ಮನಾಂತ್ ಉದೆತಾಯ್
ಆಮಿ ನೆಣ್ತಾಂ ಆಮ್ಚೆ ದೊಳೆ ಅಶ್ರು ಗಳಯ್ತಾಯ್
-ಶರತ್‍ಚಂದ್ರ್ ಶೆಣೈ
कविता
महामनीष वताय तेन्ना
महामनीष वताय तेन्ना
जिणे मैदानार पावलां छाप सोडून वताय
प्रभाव तांचो समस्तांचेर घालून वताय
मनीष म्हळ्ळें उतर तीं सार्थक करताय
मनीषजन्मु धन्य म्हणून गवाय दिताय -
महामनीष वताय तेन्ना
थोडीं तांचीं सपनां आमकां दीवनु वताय
बरी तांची उर्बा आमचेर शिंपडून वताय
तांच्या आत्म्याचो एक कुटको हांगा दवरून वताय
तांच्या चैतन्याचो एक वांटो आमच्यांत वांटून वताय -
महामनीष वताय तेन्ना
रकरकी वोतांतूय आमकां काळूक दिसता
थंड चांदीण्यांतूय आमचें आंग हुलपता
नाका वचूनाका म्हूण आमचें अंतरंग रडता
आमी दुर्बल निरालंब म्हूण हरदें हुंडकेता -
महामनीष वताय तेन्ना
आमी हताश जाताय..बेठींच हात पिळून
गळ्यांतुलो विळाप गिळून विमूक राबताय
उडगास तांचे उजळ जिवे आमचे मनांत उदेताय
आमी नेणतां आमचे दोळे अश्रु गळयताय -
-शरतचंद्र शेणै