ಸಂಪಾದಕೀಯ್:
ಸಂಸ್ಕೃತಿಚೊ ಹುಸ್ಕೊ ಆಸಲ್ಲೆ ಜನೆಲಾಂತ್ಲ್ಯಾನ್ ತಿಳ್ತಾನಾ!
ಸರ್ವ್ ಕವಿ ಆಲ್ತಡಿ ರಾವೊನ್ ಕವಿತಾ ಬರಯ್ತಾತ್ ತರ್, ವಾಲ್ಟರ್ ದಾಂತಿಸ್ ಪಲ್ತಡಿ ರಾವೊನ್ ಹಿ ಕವಿತಾ ಬರಯ್ತಾ. ಕವಿತೆಚೆ ಶಿರೋನಾಂವ್ ಸಾಂಗ್ಚೆಬರಿ ಎಕಾ ಹಲ್ಲ್ಯಾಗಾರಾಚಿ ಕಥಾ ಕವಿತೆರುಪಾರ್ ತಾಣೆಂ ದಿಲ್ಯಾ. ತಾಚಿಂ ಭೊಗ್ಣಾಂ, ತಾಚ್ಯಾ ಜಿವಾಂತ್ ಕಿತೆಂ ಜಾತಾ ತೆಂ ಕವಿನ್ ಹಾಂಗಾಸರ್ ಬರಯ್ಲಾಂ.
ಆಕ್ರೇಕ್ `ತ್ಯಾ ಘರಾ' ವೆಚೆಂ ಕಾರಣ್ ತಾಣೆಂ ಹಾಂಗಾಸರ್ ಸೊಧುನ್ ಕಾಡ್ಲಾಂ. ಹಾಚೆ ಪಾಟ್ಲ್ಯಾನ್ ಸಂಸ್ಕೃತಿಚೊ ಹುಸ್ಕೊ ಮಾತ್ರ್ ಬಿಲ್ಕುಲ್ ನಾ.
ವಾಲ್ಟರ್ ದಾಂತಿಸಾಚೆಂ ಕವಿತಾ ಪುಸ್ತಕ್ `ನಿದೊನ್ ಪಡಲ್ಲೊ ಗಾಂವ್' ಆಯ್ಲೆವಾರ್ ಮೊಕ್ಳೀಕ್ ಜಾಲ್ಯಾ ಉಪ್ರಾಂತ್ ಪಯ್ಲೆಂಚಿ ಕವಿತಾ ತಾಚಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಎಕಾ ಹಲ್ಲ್ಯಾಗಾರಾಚಿ ಆತ್ಮಕಥಾ
ತುಮಿ ರೇವ್ ಪಾರ್ಟಿ ಕರ್‍ತಾತ್, ಯಾ
ಎಕಾಮೆಕಾ ಘಸ್ಟುನ್ ನಾಚ್ತಾತ್
"ಆಮ್ಚೆ ಸಂಸ್ಕೃತೆಚೆ"
ತೀರ್ ತೀರ್ ತಿರ್ಕಾಟ್ ಕರ್‍ತಾತ್
ಹಾಚಿ ಮ್ಹಾಕಾ ಕಾಂಯ್ ಪರ್‍ವಾ ನಾ...
ಪುಣ್,
ಹಾಂವ್ "8 pm" ಚಿ ಅರ್ಧಿ ಬಾಟ್ಲಿ ಮಾರ್‍ನ್
ಲಕೊನ್ ಲಕೊನ್ ಘರಾ ತೆವ್ಶಿಂ ಚಮ್ಕತಾನಾ
ಚಿಂತುನ್ ಆಸಾಂ... ಪಿಂಜ್‍ಲ್ಲೆ ಮಾಂದ್ರೆಕ್
ಕಾಪ್ಡಾಂತ್ ರೆವ್ಡಲ್ಲೆ ಘಾಮಾ ಕುಡಿಕ್...
ಕಾಳೊಕಾಂತ್ ಸಾಸ್ಪೊನ್ ಕರ್‍ಚೆ ಕರ್ನೆಕ್...
ತೆದ್ನಾಂ ಮ್ಹಾಕಾ ತುಮ್ಚಿ ಕಿಂಕ್ರಾಟ್ ಆಯ್ಕತಾ
ಮಧುರ್ ಸಂಗೀತಾಕ್ ನಾಚ್ಚ್ಯೊ ತರ್ನ್ಯೊ ಕುಡಿ
ಜನೆಲಾಂತ್ಲ್ಯಾನ್ ಲೈಟಾಚ್ಯಾ ಉಜ್ವಾಡಾಕ್
ಅರ್ಧಿ ಉಗ್ತಿ ಪಾಟ್...
ನಾಜೂಕ್ ಆಂಗಾರ್ ಚರ್‍ಚೆ ಹಾತ್...
ಮ್ಹಜೇಂಯ್ ಕಾಳೀಜ್ ಲಾಸ್ತಾ.. ಮತ್ ಕುಸ್ತಾ
ಪಾಯ್ ಆಪ್ಶೆಂಚ್ "ತ್ಯಾ ಘರಾ" ಕುಶಿಂ ಚಮ್ಕತಾತ್
ರಗತ್ ಕಾರಣ್ ನಾಸ್ತಾಂ ಉಚಾಂಬಳ್ ಜಾವ್ನ್
ನಾಜೂಕ್ ಧವೆ ಕುಡಿಂಕ್ ಚಿಡ್ಡುಂಕ್ ಲಾಗ್ತಾ...
ಮುಡ್ಡುಂಕ್ ಲಾಗ್ತಾ.. ಕಳನಾತ್ಲ್ಯಾ ರಾಗಾನ್
ಥಾಪ್ಡಾಂವ್ಕ್ ಲಾಗ್ತಾ..
ಸತ್ ಸಾಂಗ್ತಾಂ...
ಮ್ಹಜ್ಯಾ ದೊಳ್ಯಾಂಕ್ ಸಂಸ್ಕೃತಿ ದಿಸನಾ...
ದಿಸ್ತಾ ಫಕತ್ ಹಾಂವೆಂ ವರ್ಸಾಂ ಥಾವ್ನ್
ಸಪ್ಣೆವ್ನ್ ಆಸಲ್ಲ್ಯೊ ನಾಜೂಕ್ ತರ್ನ್ಯೊ ಕುಡಿ!!
-ವಾಲ್ಟರ್ ದಾ೦ತಿಸ್. ಕಿನ್ನಿಗೋಳಿ.