ಸಂಪಾದಕೀಯ್:
ಪುತಾಚ್ಯಾ ಕಾಳ್ಜಾಂತ್ ತಿಳುಂಕ್ ಆವಯ್ಕ್ ಜಾಯ್ ಪಾಸ್ವರ್ಡ್
ಎಕೆ ಆವಯ್ಚೆಂ ಕಾಳೀಜ್, ಜೆಂ ಪುತಾಖಾತೀರ್ ಚಡ್ಪಡ್ತಾ, ತೆಂ ಹಾಂಗಾಸರ್ ಉಗ್ತೆಂ ಜಾಲಾಂ. ಆಧುನಿಕತೆಚ್ಯಾ ಕಂಪ್ಯೂಟರ್ ಯುಗಾಂತ್ ಭುರ್ಗಿಂ ಆಪ್ಲ್ಯಾ ಬೊಟಾಂನಿ ಸಂಸಾರ್ ವೆಂಗೊನ್ ಧರ‍್ತಾತ್ ತರೀ, ಹಿಂ ಬೊಟಾಂ ಆವಯ್ಚೆ ಪಾಸ್ಳೆಕ್ ವೊಳ್ಕನಾಂತ್. ಹಿ ಆಮ್ಚಿ ದುರ್ದಶಾ. ಪುತಾಕ್ ಆಪ್ಲೆ ಮಾಂಡಿಯೆರ್ ಲ್ಯಾಪ್‌ಟೊಪಾಬರಿ ಖೆಳಯಿಲ್ಲೆ ಆವಯ್ಚೆ ಕಳ್ವಳೆ ಹೆ.
ಆಧುನಿಕ್ ಕಂಪ್ಯೂಟರ್ ಯುಗಾಕ್ ಲಾಗೊನ್ ಆಮಿ ಸಮ್ಜೊನ್ ಘೆಂವ್ಚಿ ಭಾಸ್ ಲೆಗುನ್ ವೆಗ್ಳಿ ಜಾಲ್ಯಾ. ನವಿಂ ರೂಪಕಾಂ ಸದಾಂ ಮ್ಹಳ್ಳೆಬರಿ ಆಮಿ ಆಮ್ಚೆ ಭಾಶೆಂತ್ ವಾಪರುನ್ ಆಸಾಂವ್. ಪಾಸ್ವರ್ಡ್ ಜಾಲ್ಯಾರಿ ಅಸಲೆಂಚ್ ಏಕ್ ಉತರ್, ಜೆಂ ಬಂಧ್ ಜಾಲ್ಲೆ ಮನ್ಶಾಚೆ ಸಂಬಂಧ್ ಉತ್ರಾಂವ್ಕ್ ಸಕ್ತಾ ತಸಲೆಂ.
ನೂತನಾಚಿ ಕವಿತಾ ನವೆಚ್ ದಿಷ್ಟಿಂತ್ಲ್ಯಾನ್ ಆಮಿ ಪಳೆಜಾಯ್ ಪಡ್ತಾ. ಆವಯ್ಚ್ಯಾ ಮನಾಂತ್ಲ್ಯಾನ್ ಆಮಿ ತಿಳಿಜಾಯ್ ಪಡ್ತಾ. ಕಳ್ವಳ್ಚ್ಯಾ ಕಾಳ್ಜಾಥಾವ್ನ್ ಆಮಿ ಭೊಗಿಜಾಯ್ ಪಡ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪಾಸ್ವರ್ಡ್
ತುಂ ಚಲ್ಲೊ?
ವಚ್, ಹಾಂವ್ ತುಕಾ ರಾವ್ ಮ್ಹಣ್ಚೆಂ ನಾ
ಪುಣ್, ವೆಚೆ ಪಯ್ಲೆಂ
ಏಕ್ ವೊರ್‌ಭರ್ ತರೀ
ಪೊಟ್‌ಭರ್ ಉಲಯ್‌ಮುರೆ ಪಾಪಿಯಾ...
ಅಶೆಂ ಕಿತೆಂ ಆಸಾ ತ್ಯಾ ಕಂಪ್ಯೂಟರಾಂತ್
ಜೆಂ ಮ್ಹಜೆಕಡೆನ್ ನಾ?
ತೊ ತುಕಾ ವ್ಹರ‍್ತಾ ಆಸತ್
ಸಂವ್ಸಾರಾಚ್ಯಾ ಹ್ಯಾ ಪೊಂತಾವೆಲ್ಯಾನ್
ತ್ಯಾ ಪೊಂತಾರ್ ಖಿಣಾಭಿತರ್
ಮ್ಹಜ್ಯಾ ಪುತಾ,
ಕಂಪ್ಯೂಟರಾ ವಯ್ಲೊ ಸಂವ್ಸಾರ್
ಮ್ಹಳ್ಯಾರ್ ಸಂವ್ಸಾರ್ ನ್ಹಯ್
ಖರೊ ಸಂವ್ಸಾರ್ ತುಕಾ ಆತಾಂ ಕಳ್ಟಲೊ
ತುಂ ಆತಾಂ ಘರಾ ಭಾಯ್ರ್ ಪಾಂಯ್ ದವರ‍್ತಲೊ ತೆನ್ನಾ.
ಹಾಲಿಂ ತುಜೆ ಮಾಂಡಿಯೆರ್ ಸದಾಂಚ್ ಲ್ಯಾಪ್‌ಟೊಪ್
ತಶೆಂ ಹಾಂವಯ್ ಬಸಯ್ತಾಲೆಂರೆ
ತುಕಾ ಲ್ಯಾಪ್‌ಟೊಪ್ ಕಸೊ ಮಾಂಡಿಯೆರ್ ಘೆವ್ನ್
ವೊರಾಂಚಿಂ ವೊರಾಂ...
ಆತಾಂ ಗರಜ್ ನಾಸ್ತಾನಾ
ಮ್ಹಾಕಾ ತುಜ್ಯಾ ಭುರ್ಗ್ಯಾಂಚೊ ಹುಸ್ಕೊ
ಮೆಳ್ತಲಿ ಕಾಂಯ್ ತಾಂಕಾಂ ಮಾಂಡಿ ತುಮ್ಚಿ?
ಖರ‍್ಯಾನೀಂಚ್ ತುಂ ಆತಾಂ ವ್ಹಡ್ಲೊ ಜಾಲಾ...
ಆತಾಂ ತುಜ್ಯಾ ಕೆಸಾರೂಯ್ ಹಾತ್
ಭೊಂವ್ಡಾಯಿಲ್ಲೊ ತುಕಾ ಆವಡ್ನಾ
ತುಜೆ ಕೇಸ್ ರೊಕ್ಡೆಚ್ ಇಬಾಡ್ತಾತ್
ತುಜೆರ್ ತಾಪಿಲ್ಲೇಂಯ್ ತುಕಾ ಆವಡ್ನಾ?
ತುಂ ರೊಕ್ಡೊಚ್ ಫುರ್ರ್ ಜಾತಾ
ತುಂ ವಚ್,
ಹಾಂವ್ ತುಕಾ ರಾವ್ ಮ್ಹಣ್ಚೆಂ ನಾ
ಪುಣ್ ವೆತಾನಾ
ತುಜೊ ಪಾಸ್ವರ್ಡ್ ಮಾತ್ರ್ ದೀವ್ನ್ ವಚ್
ಕೆನ್ನಾಂಯ್ ಮ್ಹಾಕಾ ದಿಸ್ಲೆಂ ಜಾಲ್ಯಾರ್
ತುಜ್ಯಾ ಕಾಳ್ಜಾಂತ್ ಭಿತರ್ ರಿಗುಂಕ್
ತುಜ್ಯಾ ಮನಾಚೊ ಥಾವ್ ಘೆಂವ್ಕ್
ದಿತಲೊ ಮುರೆ ತುಜೊ ಪಾಸ್ವರ್ಡ್?
-ನೂತನ್ ಸಾಖರ್‌ದಾಂಡೆ
संपादकीय:
पुताच्या काळजांत तिळुंक आवयक जाय पासवर्ड
एके आवयचें काळीज, जें पुताखातीर चडपडता, तें हांगासर उगतें जालां. आधुनिकतेच्या कंप्यूटर युगांत भुरगीं आपल्या बोटांनी संसार वेंगोन धरतात तरी, हीं बोटां आवयचे पासळेक वोळकनांत. ही आमची दुर्दशा. पुताक आपले मांडयेर लॅपटॉपाबरी खेळयल्ले आवयचे कळवळे हे.
आधुनीक कंप्यूटर युगाक लागोन आमी समजोन घेंवची भास लेगून वेगळी जाल्या. नवीं रूपकां सदां म्हळ्ळेबरी आमी आमचे भाशेंत वापरून आसांव. पासवर्ड जाल्यारी असलेंच एक उतर, जें बंध जाल्ले मनशाचे संबंध उत्रावंक सक्ता तसलें.
नूतनाची कविता नवेच दिष्टींतल्यान आमी पळेजाय पडता. आवयच्या मनांतल्यान आमी तिळिजाय पडता. कळवळच्या काळजाथावन आमी भोगिजाय पडता.
-मेल्विन रोड्रीगस
कविता:
पासवर्ड
तूं चल्लो?
वच, हांव तुका राव म्हणचें ना
पूण, वेचे पयलीं
एक वोरभर तरी
पोटभर उलयमुरे पापिया...
अशें कितें आसा त्या कंप्यूटरांत
जें म्हजेकडेन ना?
तो तुका व्हरता आसत
संवसाराच्या ह्या पोंतावेल्यान
त्या पोंतार खिणाभितर
म्हज्या पुता,
कंप्यूटरा वयलो संवसार
म्हळ्यार संवसार न्हय
खरो संवसार तुका आतां कळटलो
तूं आतां घरा भायर पांय दवरतलो तेन्ना.
हालीं तुजे मांडयेर सदांच लॅपटॉप
तशें हांवय बसयतालेंरे
तुका लॅपटॉप कसो मांडयेर घेवन
वोरांचीं वोरां...
आतां गरज नासताना
म्हाका तुज्या भुरग्यांचो हुसको
मेळतली कांय तांकां मांडी तुमची?
खर्यानींच तूं आतां व्हडलो जाला...
आतां तुज्या केसारूय हात
भोंवडायल्लो तुका आवडना
तुजे केस रोकडेच इबाडतात
तुजेर तापिल्लेंय तुका आवडना?
तूं रोकडोच फूर्र जाता
तूं वच,
हांव तुका राव म्हणचें ना
पूण वेताना
तुजो पासवर्ड मात्र दीवन वच
केन्नांय म्हाका दिसलें जाल्यार
तुज्या काळजांत भितर रिगुंक
तुज्या मनाचो थाव घेवंक
दितलो मुरे तुजो पासवर्ड?
-नूतन साखरदांडे