ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸ್:

ಉತ್ರಾಂನಿ ನ್ಹಂಯ್, ಕರ್‍ನ್ಯಾಂನಿ ಸಯ್ತ್ ಮಾಯ್ಪಾಸಾ ಸಾಗೊರ್

ಕೊಂಕ್ಣಿ ಸಂಗೀತ್ ಸಂಸಾರಾಂತ್ಲೊ ಎಕ್ ಮಾತ್ರ್ ಕಲಾಕಾರ್ ಜೊ, ಉತ್ರಾಂಚೊ ರಾಯ್, ಕವಿ ಆನಿ ಕೊಂಕ್ಣಿ ಸಮಾಜೆಂತ್ಲೊ ಶತಮಾನಾಚೊ ವೆಕ್ತಿ ಮ್ಹಣ್ ನಾಂವಾಡ್‌ಲ್ಲೊ ವಿಲ್ಫಿ ರೆಬಿಂಬಸ್ ತಾಚ್ಯಾ ಹ್ಯಾ ಉಂಚ್ಲ್ಯಾ ತಾಲೆಂತಾಖಾತಿರ್ ಕಿತ್ಲೊ ನಾಂವಾಡ್ಲಾಕೀ ತಿತ್ಲೊಚ್ ತಾಚ್ಯಾ ಖಾಲ್ತೆಪಣಾಖಾತಿರ್ ಆನಿ ಮನ್ಶ್ಯಾಪಣಾಚ್ಯಾ ಗುಣಾಂಖಾತಿರ್ ನಾಂವಾಡ್ಲಾ. ತಾಚ್ಯಾ ಮೊಗಾ ಮಾಯ್ಪಾಸಾಚಿ ಊಬ್ ಭೊಗ್‌ಲ್ಲ್ಯಾಂ ಪಯ್ಕಿ ಹಾಂವ್‌ಯಿ ಎಕ್ಲೊಂ. `ಉಮಾಳೊ ಪತ್ರಾ ಮಾರಿಫಾತ್ ತಾಚಿ ಸಳಾವಳ್ ಜಾವ್ನ್ ತಾಚ್ಯಾ 200ವ್ಯಾ ನಾಯ್ಟಾಥಾವ್ನ್ ಆನಿ 31ವ್ಯಾ ಕೊವ್ಳ್ಯಾಂಥಾವ್ನ್ ಹಾಂವ್ ತಾಚೊ ವಿನ್ಯಾಸ್‌ಕಾರ್ ಜಾವ್ನ್ ವಾವುರ್‍ಲಾಂ. ತಾಚ್ಯಾ ಮಾನವೀಯ್ ಮೌಲ್ಯಾಂಚ್ಯಾ ಅಯಸ್ಕಾಂತೀಯ್ ಸಕ್ತೆಕ್ ಲಾಗೊನ್ ತೀಸ್ ಚಾಳೀಸ್ ವರ್‍ಸಾಂ ಥಾವ್ನ್ ತಾಕಾ ವೊಳ್ಕೊನ್ ಭೋವ್ ಲಾಗ್ಶಿಲ್ಯಾನ್ ತಾಚ್ಯಾ ಮಾಯಾಮೊಗಾಚಿ ಊಬ್ ಭೊಗ್‌ಲ್ಲೆ ಅಸ್ತಾನಾ, ಕೇವಲ್ 14 ವರ್‍ಸಾಂ ಥಾವ್ನ್ ತಾಕಾ ಒಳ್ಕೊಂಚ್ಯಾ ಹಾಂವೆಂ, ತಾಚ್ಯಾ ಮಯ್ಪಾಸಿ ಗುಣಾಂವಿಶಿಂ ಕಿತ್ಲೆಂ ಬರವ್ಯೆತಾ ಮ್ಹಳ್ಳೆಂ ಸವಾಲ್ ಉದೆತಾ ಜಾಲ್ಯಾರೀ, ಹ್ಯಾ ಸಾದ್ಯಾಪಣಾಚ್ಯಾ ಸಾಕಾರ್ ಮೂರ್‍ತಿ ಸಂಗಿಂ ಕೊಣೆಂಯ್ ಫಕತ್ ಥೊಡ್ಯೊ ಘಡಿಯೊ ಖರ್‍ಚಿಲ್ಯಾರೀ ತಾಕಾ ತಾಚ್ಯಾ ಉಂಚ್ಲ್ಯಾ ವೆಕ್ತಿತ್ವಾಚೆಂ ಸಂಪೂರ್‍ಣ್ ದರ್ಶನ್ ಜಾತಾ ಜಾಲ್ಲ್ಯಾನ್ ವಿಲ್ಫಿ ವಿಶ್ಯಾಂತ್ ಕೊಣೆಂಯ್ ಬರವ್ಯೆತಾ. ಪುಣ್ ತಾಚ್ಯಾ ಮಾಯ್ಪಾಸಿ ಗುಣಾಂಚೆಂ ಸಮಗ್ರ್ ಚಿತ್ರಣ್ ದೀಂವ್ಕ್ ಮ್ಹಜೆಲಾಗಿಂ ಉತ್ರಾಂ ನಾಂತ್. ತೆಂ ತಾಚ್ಯಾ ಸಂಪರ್‍ಕಕಾಕ್ ಆಯಿಲ್ಲ್ಯಾ ಸರ್‍ವಾಂಕ್ ಹೆಂ ಲೇಕನ್ ವಾಚ್ತಾನಾ ಕಳ್ತೆಲೆಂ.

ಮಾಗ್ದಲೆನ್: ಆಪ್ಲ್ಯಾ ಆವಯ್ಚಾ ಅಪರಿಮಿತ್ ಮೊಗಾನ್ ಮಾಗ್ದಲೆನ್ ಮ್ಹಣ್ ವೊಲಾಯಿಲ್ಲ್ಯಾ ವಿಲ್ಫಿ ರೆಬಿಂಬಸಾಚ್ಯಾ ಘರಾ ಮೊಗಾ-ಮಯ್ಪಾಸಾಚೊ ವ್ಹಾಳೊಚ್ ವ್ಹಾಳ್ತಾ. ಆದಿಂ ವಿಲ್ಫಿ-ಮೀನಾ, ಉಪ್ರಾಂತ್ ವೀಣಾ, ವಿಶ್ವಾಸ್ ಆನಿ ಆತಾಂ ಆರ್‍ತರ್, ಅರ್‍ವಿನ್, ಆನ್ನಾ ಅನಿ ಶರ್‍ಲಿನ್, ಹ್ಯಾ ಘರಾಂತ್ಲಿಂ ಮನ್ಶ್ಯಾಂ ಜಾಚ್ಯಾ ರಕ್ತಾಂತ್ ದಯಾಳಾಯ್ ವ್ಹಾಳ್ತಾ, ಪೆಲ್ಯಾಚೊ ಹುಸ್ಕೊ ಲುಟೊನ್ ದಿಸ್ತಾ. ಆನಿ ಹಾಚೊ ಮೂಳ್ ವಿಲ್ಫಿ ರೆಬಿಂಬಸ್ ಮ್ಹಣ್ ವೆಗ್ಳ್ಯಾನ್ ಸಾಂಗ್ಚಿ ಗರ್‍ಜ್ ನಾ. ಆಪ್ಲ್ಯಾ ಕುಟ್ಮಾ ಥಂಯ್ ಅಪರಿಮೀತ್ ಮೋಗ್ ತಾಕಾ ತರೀ ತೊ ಕುಡ್ಡೊ ಮೋಗ್ ನ್ಯಂಯ್. ಆಪ್ಲ್ಯಾ ಭುರ್‍ಗ್ಯಾಂಕ್ ಕಿತ್ಲ್ಯಾ ಮೊಗಾನ್ ವಾಗಯ್ಲಾಲಾಂಗೀ ತಿತ್ಲ್ಯಾಚ್ ಶಿಸ್ತೆನ್‌ಯೀ ತಾಣೆ ತಾಂಕಾಂ ವಾಡಯ್ಲಾಂ. ಪುಣ್ ಹಿ ಶಿಸ್ತ್ ಭುರ್‍ಗ್ಯಾಂಕ್ ಬೆಸ್ಟಾವ್ನ್ ಶಿಕಯಿಲ್ಲಿ ನ್ಹಂಯ್ ಬಗಾರ್ ಮೊಗಾ ಮಾಯ್ಪಾಸಾನ್ಂಚ್ ಪಿಕಯಿಲ್ಲಿ.
 
ವಿಶುಕ್ ಪಯಿಲ್ಲೆಂ ಬೈಕ್ ಕಾಣ್ಘೆವ್ನ್ ದಿಂವ್ಚಾ ವೆಳಾರ್ ವಿಲ್ಫಿ ಅಕಂಲಾನ್ ಮ್ಹಜೆ ಲಾಗಿಂ ಆಶೆಂ ಮ್ಹಳ್ಳೆಂ, ಆತಾಂಚಿಂ ರಸ್ತ್ಯಾಂ ಅವ್ಘಡಾಂ ಪಳೆತಾನಾ, ತಾಚ್ಯಾ ಹಾತಾಂತ್ ಬೈಕ್ ದೀಂವ್ಕ್ ಮ್ಹಾಕಾ ಭಿರಾಂತ್ ದಿಸ್ತಾ. ಪುಣ್ ಮ್ಹಾಕಾ ತಿ ಭಿರಾಂತ್ ತಾಕಾ ದಾಕಂವ್ಕ್ ನಾಕಾ. ತಾಣೆ ಧಯ್ರಾನ್ ಜಿವಿತ್ ಫುಡ್ ಕರಿಜೆ....

ಹಿಂಚ್ ತಾಚಿಂ ಭೊಗ್ಣಾಂ ಜಾವ್ನಾಸ್‌ಲ್ಲಿಂ ವಿಶು ಅನಿ ಶರ್‍ಲಿನ್ ಗಲ್ಫಾಕ್ ವೆತಾನಾ ಆಮ್ಕಾಂ ದೊಗಾಂಯ್ಕಿ (ವಿಲ್ಫಿ-ಮೀನಾ) ಮಸ್ತ್ ದೂಕ್ ಭೊಗ್ತಾ ಪಿಂಟೊ ತಿಂ ದೊಗಾಂಯ್ ಪಯ್ಸ್ ವೆತಾತ್ ಮ್ಹಣ್ತಾನಾ, ಪುಣ್ ತಾಣಿಂ ತಾಂಚೊ ಫುಡಾರ್ ರೂಪಿತ್ ಕರುಂಕ್ ಅಸಾ. ದೆಕುನ್ ಅಮಿಂ ಆಮ್ಚೆಂ ದೂಕ್ ದಾಂಬುನ್ ಧರ್‍ನ್ ಹಾಸೊನ್ ಹಾಸೊನ್ ತಾಂಕಾಂ ಧಾಡ್ನ್ ದಿತಾಂವ್.... ತ್ಯಾ ದಿಸಾ ನಿಜಾಯ್ಕಿ ತಾಚ್ಯಾ ದೊಳ್ಯಾಂನಿ ದುಕಾಂ ಭರ್‌ಲ್ಲಿಂ.

ವಿಲ್ಫಿನ್ ಆಪ್ಲ್ಯಾ ಕುಟ್ಮಾಚೆರ್ ವೊತ್‌ಲ್ಲೊ ಮೋಗ್, ತಾಚ್ಯಾ ಕುಟ್ಮಾನ್ ವಿಲ್ಫಿಚ್ಯಾ ಪಿಡೆ ಸಂದರ್‍ಭಾರ್ ದೊಡ್ತ್ಯಾನ್ ಪಾಟಿಂ ದಿಲೊ. ವಿಲ್ಫಿಕ್ ಕ್ಯಾನ್ಸರ್ ಮ್ಹಣ್ ಕಳಿತ್ ಜಾಲ್ಲೆ ದಿಸಾ ಥಾವ್ನ್ ವಿಶು-ವೀಣಾ ಅನಿ ಶರ್‍ಲಿನ್ ಹಾಂಣಿ ಭೊಗ್‌ಲ್ಲೆ ಆಟೆವಿಟೆ, ತೆಂ ದೂಕ್ ಲಿಪವ್ನ್ ಆಪ್ಲ್ಯಾ ಆವಯ್ ಬಪುಯ್ ಮುಕಾರ್ ಹಾಸ್ಕುರೆಂ ತೋಂಡ್ ದಾಕಂವ್ಚ್ಯಾ ಹ್ಯಾ ಭುರ್‍ಗ್ಯಾಂಚೆ ಆಕ್ಲಾಸ್ ಪಳೆಯಿಲ್ಲ್ಯಾ ದೆವಾಕ್ ತರೀ ಕಿತ್ಯಾ ಬಿರ್‍ಮತ್ ದಿಸ್ಲಿನಾ?

ವಿಲ್ಫಿಚ್ಯಾ ಪಿಡೆ ಸಂದರ್‍ಭಾರ್ ತಾಚ್ಯಾ ಕುಟ್ಮಾನ್ ಹರ್ ಘಡಿ ತಾಚಿ ಜತನ್ ಘೆತ್ಲ್ಯಾ ಶರ್‍ಲಿನಾನ್ ಬಾಪಾಯ್‌ವರ್‍ತ್ಯಾ ಮೊಗಾನ್ ತಾಚಿ ಸೆಚಾ ಕೆಲ್ಯಾ. ಅನಿ ಹ್ಯಾ ದುಕಾ ಮಧೆಂಯ್ ವಿಲ್ಫಿಚ್ಯಾ ಆಶೆ ಪರ್‍ಮಾಣೆ ಯೂನಾಯ್ಟೆಡ್ ಯಂಗ್‌ಸ್ಟರ್‍ಸ್ ಹಾಚೊ ಭಾಂಗಾರೋತ್ಸವ್, ಸಿಂತಿಮೆಂತಾಳ್ ನಾಯ್ಟ್ ಅನಿ ವಿಲ್ಫಿಚ್ಯಾ ಹಸ್ತ್ಯಾ ಉಡ್ತ್ಯಾ ಪದಾಂಚಿ ನಾಯ್ಟ್ ಚಲವ್ನ್ ವ್ಹರ್‍ನ್ ಆಪ್ಲ್ಯಾ ಬಾಪಾಯ್ಚಿ ಆಶಾ ಜ್ಯಾರಿ ಕೆಲ್ಲಿ ಕೀರ್‍ತ್, ಮೀನಾ, ವಿಶು ಅನಿ ಶರ್‍ಲಿನಾಕ್ ಫಾವೊ ಜಾತಾ. ಹ್ಯಾ ಮಧೆಂ ಕೊಗುಳ್ ಗಾಯ್ತಾ ಅನಿ ವಿಲ್ಫಿಚ್ಯಾ ಪದಾಂಚೊ ಭಾಂಗ್ರಾಳಿ ಪುಂಜೊ ಭಾಯ್ರ್ ಕಾಡುಂಕ್ ಬುರ್‍ಗಿಂ ದೀಸ್ ರಾತ್ ವಾವುರ್‍ತಾನಾ, ಆಪ್ಲಿ ಪಿಡಾ ಅನಿ ತ್ಯಾ ಪಿಡೆಚಿ ದೂಕ್ ಘೆವ್ನ್‌ಯೀ ವಿಲ್ಫಿನ್ ಹಟಾನ್ ಗಂಟೆಗಟ್ಲ್ಯಾನ್ ಬಸೊನ್ ಕಾಮ್ ಸಂಪಯಿಲ್ಲೆಂ ಪಳೆತಾನಾ ನಿಮಾಣ್ಯಾ ಉಸ್ವಾಸಾ ಪರ್‍ಯಾಂತ್ ಝುಜ್ಚ್ಯಾ ಝುಜಾರ್‍ಯಾಚೆಂ ಪಿಂತುರ್ ದೊಳ್ಯಾ ಮುಖಾರ್ ಉದೆತಾ. ಹೆಂ ಸರ್‍ವ್ ಹ್ಯಾ ಕುಟ್ಮಾಂತ್ ಎಕಾಮೆಕಾಚೆರ್ ಆಸ್ಚ್ಯಾ ಮೊಗಾಕ್ ಲಾಗೊನ್ ಘಡೊನ್ ಗೆಲ್ಲೆಂ.

ವಿಲ್ಫಿ ಏಕ್ ಮೊವಾಳ್ ಕಾಳಿಜ್ ಆನಿ ಹ್ಯಾ ಕಾಳ್ಜಾ ಭಂವ್ತಿಲ್ಯೊ ಬೊರೊ ಜಾವ್ನ್ ತ್ಯಾ ಮಯ್ಪಾಸಿ ಕಾಳ್ಜಾಚಿ ರಾಕಣ್ ಕೆಲ್ಲಿ ಮೀನಾ ರೆಬಿಂಬಸಾಚಿ. ತಿ ತಾಚ್ಯಾ ಕುಶಿಚಿ ಬೋರ್ ನ್ಹಂಯ್ ಬಗಾರ್ ಬರ್‍ಯೊ ಜಾಲಿ. ಅನಿ ವಿಲ್ಫಿಚ್ಯಾ ಹರ್ ಕಶ್ಟಾಂಚ್ಯಾ ಸಂದರ್‍ಭಾಂನಿ, ಪ್ರತ್ಯೇಕ್ ಜಾವ್ನ್ ತಾಕಾ ಕೊಣೆಂಯ್ ದುಕಯಿಲ್ಲ್ಯಾ ವೆಳಾರ್ ತಿಣೆ ಹ್ಯಾ ಕಾಳ್ಜಾಕ್ ಆಪ್ಲ್ಯಾಚ್ ಕಾಳ್ಜಾಚ್ಯಾಕೀ ವ್ಹರ್‍ತಾ ಮಾಪಾನ್ ಜೊಗಾಸಾಣೆನ್ ಸಾಂಬಾಳ್ಳೆಂ. ಹ್ಯಾ ವೆಳಾರ್ ತಿಣೆ ದೆಂವಯಿಲ್ಲಿಂ ದುಕಾಂ ಕಿತ್ಲಿಂ ಜಾತಿತ್. ಥೊಡ್ಯಾ ಸಂದರ್‍ಭಾಂನಿ ತಿಂಚ್ ದುಕಾಂ ಕಿಟಾಳಾಂ ಜಾವ್ನ್ ಬದಲ್ಲಿಂಯ್ ಹಾಂವೆಂ ಪಳೆಯ್ಲ್ಯಾಂತ್. ಪುಣ್ ಕಾಂಯ್ ಥೊಡ್ಯಾಂನಿ ಹಾಚೊ ಅಪಾರ್‍ತ್ ಕೆಲ್ಲೊಯ್ ಆಸಾ. ಬೆಸ್ಟೆಂಚ್ ಉತ್ರಾಂಚ್ಯಾ ಭಾಲಿಯಾಂನಿ ಕಶ್ಟಿತಾನಾ ವಿಲ್ಫಿ ಮ್ಹಳ್ಯಾ ಮೊವಾಳ್ ಕಾಳ್ಜಾಕ್ ಭದ್ರತಿ ದಿಂವ್ಚಾಕ್ ತಿಣೆಂ ಬೊರಿಯಾಂಬರಿ ಘಟ್ ಜಾಲ್ಲ್ಯಾ ಶಿವಾಯ್ ವೆಗ್ಳಿ ವಾಟ್ ತರೀ ಖಂಯ್ ಅಸ್‌ಲ್ಲಿ ತಿಕಾ?

ಮಾಗ್ದಲೆನಾಂತ್ ಹರ್ ಎಕ್ಲೊ ಮಾನಾಚೊ ಸಯ್ರೊ: ಮಾಗ್ದಲೆನಾಂತ್ ಫಕತ್ ಹ್ಯಾ ಕುಟ್ಮಾ ಮಧ್ಲೊ ಮೋಗ್ ಮಾತ್ರ್ ಇತ್ಲೊ ಗೂಂಡ್ ಜಾಲ್ಲೊ ತರ್ ಆಜ್ ವಿಲ್ಫಿಯಾಬ್ ಲಾಕೊಂ ಲೊಕಾಚ್ಯಾ ಕಾಳ್ಜಾಂನಿ ರಾಜ್ ಕರ್‍ತೊ ನಾ. ಬಗಾರ್ ತಾಚ್ಯಾ ಘರಾ ಬಾಗ್ಲಾರ್ ಪಾಂಯ್ ದವರ್‌ಲ್ಲ್ಯಾ ಹರ್ ವೆಕ್ತಿಕ್ ಮಾನಾಚ್ಯಾ ಸಯ್ರ್ಯಾಚೊ ಯೆವ್ಕಾರ್‍ಚ್ ಲಾಭ್ತಾಲೊ. ಅಸಲೊ ಮೊಗಾ ಮಯ್ಪಾಸಾಚೊ ಯೆವ್ಕಾರ್ ಹಾಂವೆಂ ಮ್ಹಜೆಂ ಘರ್ ಧರ್‍ನ್ ಹೆರ್ ಖಂಚ್ಯಾಯ್ ಘರಾಂನಿ ಪಳೆಯಿಲ್ಲೆಂ ನಾ. ವಿಲ್ಫಿಚ್ಯಾ ನಾಯ್ಟಾಕ್ ಪ್ರಧಾನ್ ಪೋಶಕ್ ಜಾಲ್ಲೊ ವೆಕ್ತಿ ಜಾಂವ್, ಗ್ರೇಶಿಯಸ್ ರೆಬಿಂಬಸ್ ಶಿಕ್ಪಾನಿಧಿ ಥಾವ್ನ್ ಕುಮೊಕ್ ಮಾಗೊಂಕ್ ಆಯಿಲ್ಲೊ ವಿದ್ಯಾರ್ಥಿ ಜಾಂವ್ ಹರ್ ವೆಕ್ತಿಕ್ ಎಕಾಚ್ ಮಾಪಾಚೊ ಯೆವ್ಕಾರ್. ತ್ಯೊಚ್ ಹಾಸೊ, ಸ್ವಾಗತ್ ಅನಿ ತಾನೆಕ್ ಕಿತೆಂ ದೀಂವ್ ಮ್ಹಳ್ಳಿಂ ಮಾಯ್ಪಾಸಿ ಉತ್ರಾಂ.

ವಿಲ್ಫಿಚ್ಯಾ ಘರಾ ಕುಮೊಕ್ ವಿಚಾರ್‍ಣ್ ಆಯಿಲ್ಲೊ ಕೊಣ್‌ಯೀ ವೆಕ್ತಿ ಖಾಲಿ ಹಾತಾಂನಿ ಪಾಟಿಂ ವೊಚೊನಾ. ಪುಣ್ ತಾಚ್ಯಾಕೀ ವರ್‍ತೆಂ ಮ್ಹಳ್ಯಾರ್ ಭಿಕಾರ್‍ಯಾಕ್ ಸಯ್ತ್ ವಿಲ್ಫಿನ್ ಭಿಕಾರಿ ಮ್ಹಳ್ಳ್ಯಾ ದಿಶ್ಟಿನ್ ಪಳೆವ್ನಾ. ಎಕೆ ಸಂದರ್‍ಭಾಕ್ ಸದಾಂಯ್ ಯೆಂವ್ಚ್ಯಾ ಎಕಾ ಭಿಕಾರ್‍ಯಾಕ್ ತ್ಯಾ ದಿಸಾ ಇಲ್ಲೆಶೆ ಚಡ್‌ಚ್ ಪಯ್ಶೆ ದಿಲ್ಲ್ಯಾಕ್ ಆಜ್ ಕಿತೆಂ ತುಕಾ ಲೊಟ್ರಿ ಉಟ್ಲ್ಯಾಗೀ ಮ್ಹಳ್ಳೆಂ ಸವಾಲ್ ಕೆಲ್ಲೆಂ ವಿಲ್ಫಿಯಾಬಾಕ್ ತ್ಯಾ ಭಿಕಾರ್‍ಯಾನ್. ಮ್ಹಳ್ಯಾರ್ ತಾಂಚೆಲಾಗಿಂ ಸಯ್ತ್ ತೊ ಮೊಗಾ ಮಾಯ್ಪಾಸಾನ್, ಸಳ್ಗೆನ್ಂಚ್ ಉಲಯ್ತಾಲೊ. ಅಶೆಂ ಮ್ಹಣ್ತಾ ಚಾಳೀಸ್ ವರ್‍ಸಾಂ ಥಾವ್ನ ವಿಲ್ಫಿಚೊ ಆಪ್ತ್ ಮಿತ್ರ್ ಜಾವ್ನಾಸ್ಚೊ ರಿಚ್ಚಿ ಕ್ಯಾಸ್ತಲಿನೊ.

ವಿಲ್ಫಿ ಅನಿ ಯುನಾಯ್ಟೆಡ್ ಯಂಗ್‌ಸ್ಟರ್‍ಸ್: ಸಿಬಿಸಿಐ ಜೆರಾಲ್ ಜಮಾತೆಕ್ ಐಸಿವೈಎಮ್ ರಾಶ್ಟ್ರೀಯ್ ದಪ್ತರಾಚೊ ಪ್ರತಿನಿಧಿ ಜಾವ್ನ್ ಫೆಬ್ರೆರ್ 23ಕ್ ಗುವಹಾಟಿ ಪಾವ್‌ಲ್ಲೊಂ ಹಾಂವ್ ವಿಲ್ಫಿ ಅಂಕಲ್ ಸರ್‍ತಾನಾ ಡೆಲ್ಲಿ ಸಿಬಿಸಿಐ ದಪ್ತರಾಂತ್ ಆಸ್‌ಲ್ಲೊಂ. ಗಾಂವ್ ಸೊಡ್‌ಲ್ಲ್ಯಾ ದಿಸಾ ಥಾವ್ನ್ ಮ್ಹಜ್ಯಾ ಮೊಬಾಯ್ಲಾಚೊ ಸಂಪರ್‍ಕ್ ತುಟ್‌ಲ್ಲ್ಲ್ಲೊ. ಮಾರ್‍ಚ್ ೯ ತಾರಿಕೆರ್ ಸಕಾಳಿಂ ಪಾವ್ಣೆಂ ಇಕ್ರಾಂಕ್ ಮ್ಹಜ್ಯಾ ವೊಕ್ಲೆಚೊ ಸಂದೇಶ್ ಆಯ್ಲೊಕೀ ವಿಲ್ಫಿ ಅಂಕಲ್ ಜೋರ್ ಹುಶಾರ್ ನಾಂ. ತುಜೆಂ ಮೊಬಾಯ್ಲ್ ಲಾಗಾನಾ ಖಂಯ್. ಪಾಟ್ಲ್ಯಾ ದಿಸಾಂನಿ ಜಾಯ್ತೆ ಪಾವ್ಟಿಂ ತುಕಾ ವಿಚಾರ್‍ತಾಲೊ ಖಂಯ್. ದೆಕುನ್ ಕೂಡ್ಲೆ ವಿಶು ಯಾ ಶರ್‍ಲಿನಾಕ್ ಅಚಿಟಟ ಕರ್. ಆಕಾತಾಂತ್ ಭರೊನ್ ಹ್ಯಾ ದೊಗಾಂಯ್ಕಿ ಸಂಪರ್‍ಕ್ ಕರ್‍ಚೆಂ ಪ್ರೇತನ್ ಮ್ಹಜೆಂ ನಿರ್‍ಫಳ್ ಜಾಲೆಂ. ಇಕ್ರಾ ಜಾವ್ನ್ 10 ಮಿನುಟಾಂಕ್ ಮ್ಹಜ್ಯಾ ಭಾವಾನ್ ಮ್ಹಜೊ ಸಾಂಗಾತಿ ವಿನ್ಸೆಂಟ್ ಮಸ್ಕರೇನ್ಹಸಾಚ್ಯಾ ಮೊಬಾಯ್ಲಾಕ್ ಫೋನ್ ಕೆಲೆಂ. ದಾಟ್ಟು, ಶರ್‍ಲಿನಾಚೆಂ ಫೋನ್ ಆಯಿಲ್ಲೆಂ ತುಕಾ ವಿಚಾರ್‍ನ್. ವಿಲ್ಫಿ ಆಂಕಲ್ ಜ್ಯೋರ್ ಹುಶಾರ್ ನಾ. ಫಕತ್ ಸ್ವಾಸ್ ಮಾತ್ರ್ ಆಸಾ.... ದೆದೆಸ್ಪ್ರಾರ್ ಜಾಲ್ಲ್ಯಾ ಮ್ಹಾಕಾ ಕಿತೆಂ ಕರ್‍ಚೆಂ ಮ್ಹಳ್ಳೆಂಚ್ ಗಮ್ಲೆಂ ನಾ. ವಿಲ್ಫಿ ಅಂಕಲ್ಯಾಚ್ಯಾ ಘರಾ ಸಂಪರ್‍ಕ್ ಮೆಳ್ಳೊನಾ. ತಿತ್ಲ್ಯಾರ್ ರಾಕ್ಣೊ ದಪ್ತರಾ ಥಾವ್ನ್ ಪಚ್ಚು ಫೆರಾರಾನ್ ವಿನ್ಸಿಚ್ಯಾ ಮೊಬಾಯ್ಲಾಕ್ ಫೋನ್ ಕರ್‍ನ್ ಕಳಯ್ಲೆಂಕೀ ವಿಲ್ಫಿ ಅಂಕಲ್ ಅನಿ ನಾ. ಉಪ್ರಾಂತ್ಲೆಂ ಮ್ಹಜೆ ಆಕ್ಲಾಸ್ ಸಹಜ್. ಹರ್ ಸಂದರ್‍ಭಾರ್ ತಾಣೆ ಮ್ಹಾಕಾ ಫೋನ್ ಕರ್‍ನ್ ಆಪಯ್ತಾನಾ ತಡವ್ ಕರ್‍ನ್ ತರೀ ತಾಚೆಲಾಗಿಂ ಪಾವ್ತಾಲೊಂ ಹಾಂವ್. ಪುಣ್ ತಾಚ್ಯಾ ನಿಮಾಣ್ಯಾ ಆಪವ್ಣಾಕ್ ಪಾಳೊ ದೀಂವ್ಕ್ ಮ್ಹಜ್ಯಾ ನಶಿಬಾನ್ ಸೊಡ್ಲೆಂ ನಾ. ಪುಣ್ ಹೆಂ ಘಡಿತ್ ತ್ಯಾ ದೆಕುನ್ ಉತ್ರಾಯಿಲ್ಲೆಂ ನ್ಹಂಯ್, ಬಗಾರ್ ಆಪ್ಲ್ಯಾ ಒಳ್ಕಿಚ್ಯಾ ಸಾಮಾನ್ಯಾಂತ್ಲ್ಯಾ ಸಾಮಾನ್ಯ್ ವೆಕ್ತಿಚೊ ಸಯ್ತ್ ಉಡಾಸ್ ದವರ್‍ಚ್ಯಾ ತಾಚ್ಯಾ ಉಂಚ್ಲ್ಯಾ ವ್ಯಕ್ತಿತ್ವಾಕ್ ಪಿಂತ್ರಾಂವ್ಕ್. ಯು.ವೈ. ಮ್ಹಣ್ಚೆ ಯುನಾಯ್ಟೆಡ್ ಯಂಗ್‌ಸ್ಟರ್‍ಸ್ ಹಾಂತ್ಲ್ಯಾ ನಿಮಾಣ್ಯಾಂತ್ಲೊ ನಿಮಾಣೊ ಹಾಂವ್ ಜಾವ್ನಾಸೊನ್‌ಯಿ ಜರ್ ಮ್ಹಜೆರ್ ತಾಕಾ ತಿತ್ಲೊ ಮಯ್ಪಾಸ್ ಆಸ್ಲೊ ತರ್, ತಾಚ್ಯಾ ಜಿವಿತಾಚೊ ಮುಕೆಲ್ ವಾಂಟೊ ಜಾವ್ನಾಸ್ಲೆಲ್ಲ್ಯಾ ಯುನಾಯ್ಟೆಡ್ ಯಂಗ್‌ಸ್ಟರ್‍ಸ್ ಚೆರ್ ಕಿತ್ಲೊ ಆಸ್‌ಲ್ಲೊನಾ?

ಪಾಟ್ಲ್ಯಾ ವರ್‍ಸಾ ಮ್ಹಜ್ಯಾ ಜಿಣ್ಯೆಂತ್ ವ್ಹಡ್ ಏಕ್ ಅನ್ವಾರ್ ಆಯಿಲ್ಲ್ಯಾ ವೆಳಾರ್ ತಾಣೆ ದಿಲ್ಲೆಂ ಧಯ್ರ್, ಆಕಾಂತಾಚ್ಯಾ ವೆಳಾರ್ ತಾಣೆ ದಿಲ್ಲೊ ಸಾಂಗಾತ್ ಹಾಂವ್ ಮೊರಾ ಪರ್‍ಯಾಂತ್ ವಿಸ್ರೊಂಚೊ ನಾ. ಹರ್ ಏಕ್ ಪಾವ್ಟಿಂ ತಾಚ್ಯಾ ಘರಾ ಗೆಲ್ಲ್ಯಾ ವೆಳಾ ಹೆಮಾ ಕಶೆಂ ಆಸಾ? ಭರ್‍ಗಿಂ ಕಶಿಂ ಆಸಾತ್ ಮ್ಹಣ್ ವಿಚಾರಿನಾತ್‌ಲ್ಲೊ ದೀಸ್ ನಾ. ತಾಚೆಂ ಸಂಗಿಂ ಭಾಯ್ರ್ ಜೆವ್ಣಾಕ್ ಆಪವ್ನ್ ವ್ಹರ್‍ನ್ ಗೆಲ್ಲ್ಯಾ ಸಂದರ್‍ಭಾಂನಿ ಜರ್ ಹೇಮಾ ಸಂಗಿಂ ನಾತ್ಲ್ಯಾರ್ ಹೇಮಾ ಚುಕ್ಲೆಂ. ಆನ್ಯೇಕ್ ಪಾವ್ಟಿಂ ಹೇಮಾಕ್‌ಯೀ ಆಪವ್ನ್ ಘೆವ್ನ್ಂಚ್ ಜೆವ್ಣಾಕ್ ಯಾ ಮ್ಹಣ್ಚೆ ತಿತ್ಲೊ ಹುಸ್ಕೊ ತಾಚೊ.

ವಿಲ್ಫಿಕ್ ಯುನಾಯ್ಟೆಡ್ ಯಂಗ್‌ಸ್ಟರ್‍ಸ್ ಸಾಂದ್ಯಾಂಚೊ ಮಾತ್ರ ನ್ಹಂಯ್ ತಾಂಚ್ಯಾ ಕುಟ್ಮಾಚೊ ಸಯ್ತ್ ಬರೊ ಹುಸ್ಕೊ ಆಸ್‌ಲ್ಲೊ. ಹರ್ ಕಲಾಕಾರಾಂಚ್ಯಾ ಗರ್‍ಜಾಂಕ್ ತೊ ಪಾವ್ತಾಲೊ. ಹಾಂವೆಂ ಸೊರೊ ಸೊಡುಂಕ್ ಅನಿ ಜಿಣ್ಯೆಂತ್ ನಿರಾಶಿ ಜಾವ್ನ್ ಜೀವ್ಘಾತ್ ಕರುಂಕ್ ಗೆಲ್ಲ್ಯಾ ಮ್ಹಾಕಾ ವಾಂಚವ್ನ್, ನವೆಂ ಜೀವಿತ್ ಸುರು ಕರುಂಕ್ ಪ್ರೇರಣ್ ದಿಲ್ಲೊ ಮಹಾನ್ ವೆಕ್ತಿ ತೊ ಮ್ಹಣ್ತಾ ಯು.ವೈ.ಚೊ ಮಾಲ್ಘಡೊ ಸಾಂದೊ ಡೊಲ್ಲ.

ವಿಲ್ಫಿ ಆನಿ ಸಮಾಜೆಮದ್ಲೊ ಮಾಯ್ಪಾಸ್: ವಿಲ್ಫಿನ್ ಕಿತೆಂಯ್ ಕೆಲಾಂ ತರ್ ಸ್ವತಾ ಖಾತಿರ್, ಸಮಾಜೆ ಖಾತಿರ್ ತಾಣೆ ಕೆಲ್ಲೆಂ ಕಾಂಯ್ ದಿಸಾನಾ ಮ್ಹಣ್ ಕೊಣಾಯ್ಕಿ ಭೊಗ್ಲಾಂ ತರ್ ತಾಂತುಂ ಕಾಂಯ್ ಚೂಕ್ ನಾ. ಕಿತ್ಯಾ ತಾಣೆ ದೊಳ್ಯಾಂಕ್ ದಿಸ್ಚಿಂ ವ್ಹಡ್ ವ್ಹಡ್ ಬಾಂದ್ಪಾಂ ಉಬಾರುಂಕ್ ಮಾರ್‍ಬಲಾಚೆರ್ ಆಪ್ಲೆಂ ನಾಂವ್ ಕಾಂತವ್ನ್ ದವರುಂನಾ. ಕೊಂಕ್ಣಿ ಸಂಗೀತಾನ್ ಮ್ಹಾಕಾ ಪೊಸ್ಲೆಂ ಮ್ಹಳ್ಳ್ಯಾ ವಿಲ್ಫಿನ್ ಹ್ಯಾ ತಾಚ್ಯಾ ದೆಣ್ಯಾಂವರ್‍ವಿಂ ಜಮೊ ಜಾಲ್ಲ್ಯಾ ದುಡ್ವಾಹನ್ ಕಿತ್ಲೆಶ್ಯಾಗೀ ದುಬ್ಳ್ಯಾ ಭುರ್‍ಗ್ಯಾಂಚ್ಯಾ ಉಂಚ್ಲ್ಯಾ ಶಿಕ್ಪಾಕ್ ಆಧಾರ್ ದೀವ್ನ್ ತಾಂಚೊ ಫುಡಾರ್ ರೂಪಿತ್ ಕೆಲಾ. ಹ್ಯಾ ಮಾರಿಫಾತ್ ಬಾಂದ್ಪಾಂ ನ್ಹಂಯ್ ಕುಟ್ಮಾಂ ಉಬಾರ್‍ಲ್ಯಾಂತ್, ಫಕತ್ ತಾಚ್ಯಾ ಪದಾಂನಿ ಮಾತ್ರ್ ನ್ಹಂಯ್ ದುಡ್ವಾ ಕುಮ್ಕೆನ್ ಸಯ್ತ್ ಹಜಾರೊಂ ಕುಟ್ಮಾಂನಿ ಜಾಣ್ವಾಯೆಚೊ ದಿವೊ ಜಳಯ್ಲೊ, ಪುಣ್ ಸರ್‍ವ್ ಗುಪ್ತಿಂ. ಹಾಂವೆಂ ತಾಚ್ಯಾ ೬೦ ವ್ಯಾ ಜಲ್ಮಾ ದಿಸಾ ಸಂಬಂಧಿಂ ತಾಚೆ ಸಂದರ್‍ಶನ್ ಘೆತಾನಾ ಪ್ರಚಾರಾ ಖಾತಿರ್ ನ್ಹಂಯ್, ಲೊಕಾಚ್ಯಾ ಸಮ್ಜಣೆ ಖಾತಿರ್ ಪುಣೀ ಗ್ರೇಶಿಯನ್ ರೆಬಿಂಬಸ್ ಶಿಕ್ಪಾ ನಿಧಿ ಥಾವ್ನ್ ದುಡ್ವಾ ಕುಮೊಕ್ ಘೆತ್‌ಲ್ಲ್ಯಾ ಥೊಡ್ಯಾಂಚ್ಯೊ ಅಭಿಪ್ರಾಯ್ ಕಾಣ್ಗೆತಾಂ ಮ್ಹಣ್ತಾನಾ, ನಾಕಾ ಪಿಂಟೊ, ಅಶೆಂ ಕೆಲ್ಲ್ಯಾನ್ ತಾಂಕಾಂ ಪೆಲ್ಯಾಚ್ಯಾ ಕುಮ್ಕೆನ್ ಶಿಕ್ಲೊಂ ಮ್ಹಳ್ಳಿ ನಾಲಿಸಾಯ್ ಭೊಗುಂಕ್ ಪುರೊ. ತಾಂಚ್ಯಾ ಗವ್ರವಾಕ್ ಬಾಧಕ್ ಹಾಡ್ಚೆಂ ನಾಕಾ ಮ್ಹಣಾಲೊ. ಆಪ್ಲೆಂ ದಿಲ್ಲೆಂ ಲೊಕಾಕ್ ಕಳ್ನಾಸ್ತಾನಾ ಆಪ್ಣಾಕ್ ಚೂಕ್ ಸಮ್ಜಾಲ್ಯಾರೀ ವ್ಹಡ್ ನಾ ಪುಣ್ ಘೆತ್‌ಲ್ಲ್ಯಾಚ್ಯಾ ಸ್ವಾಭಿಮಾನಾಕ್ ಬಾದಕ್ ಜಾಯ್ನಾಯೆ ಮ್ಹಳ್ಳೆಂ ಮನ್ಶ್ಯಾಪಣಾಚೆಂ ಚಿಂತಪ್ ತಾಚೆಂ! ಜಾಯ್ತೆ ಪಾವ್ಟಿಂ ಹ್ಯಾ ನಿಧಿಚೊ ದುಡು ಉಣೆ ಪಡ್ತಾನಾ ಅಪ್ಲ್ಯಾ ಕ್ಯಾಸೆಟಿಚ್ಯಾ ವಿಕ್ರ್ಯಾ ಥಾವ್ನ್ ಮೆಳ್‌ಲ್ಲ್ಯಾ ದುಡ್ವಾನ್ ಹ್ಯಾ ಭುರ್‍ಗ್ಯಾಂಕ್ ಕುಮೊಕ್ ಕೆಲ್ಯಾ, ಅಶೆಂ ಕುಮೊಕ್ ಘೆತ್‌ಲ್ಲ್ಯಾ ಸರ್‍ವಾಂನಿ ಪೆಲ್ಯಾಕ್ ಕುಮೊಕ್ ಕರ್‍ಚ್ಯಾಂತ್ ವಿಲ್ಫಿಚಿಚ್ ದೇಖ್ ಘೆತ್ಲ್ಯಾರ್ ತಾಚೊ ಮಯ್ಪಾಸಿ ಅತ್ಮೊ ಸಮಾಧಾನೆಚೊ ವಿಶೆವ್ ಘೆತಲೊ.

ವಿಲ್ಫಿಕ್ ಸರ್‍ವ್ ಈಶ್ಟ್‌ಚ್: ಮನಿಸ್ ಉಂಚಾಯೆಕ್ ಪಾವ್‌ಲ್ಲ್ಯಾ ತಿತ್ಲೊ ವಿವಾದಾಂನಿ ರೆಂವೊಡ್ತಾ. ಪುಣ್ ಮ್ಹಜ್ಯಾ ಸಮ್ಜಾಣೆ ಪರ್‍ಮಾಣೆ ವಿಲ್ಫಿ ಖಂಚ್ಯಾಯ್ ವಿವಾದಾಂನಿ ಸಾಂಪಡ್‌ಲ್ಲೊ ನಾ. ಹಾಕಾ ಮುಕೆಲ್ ಕಾರಣ್ ತಾಚಿ ಉಗ್ತಿ ಜಿಣಿ ಆನಿ ತಾಣೆ ಹರ್ ಎಕ್ಲ್ಯಾಕ್ ತಾಚೊ ಈಶ್ಟ್ ಮ್ಹಣ್ ಲೆಕ್‌ಲ್ಲೆಂ ತಾಚೆಂ ಬರೆಂ ಮನ್. ತರೀ ತಾಕಾ ದುಕಯಿಲ್ಲಿಂ ಘಡಿತಾಂ ಸಭಾರ್ ಆಸಾತ್. ಪುಣ್ ಹ್ಯಾ ಸಂದರ್‍ಬಾರ್‌ಯಿ ತಾಣೆ ತಾಚೆಂ ಸಮಾದಾನ್ ಹೊಗ್ಡಾಂವ್ಕ್ ನಾ, ಮಾರ್‍ಲೆಲ್ಯಾಕ್ ಪಾಟಿಂ ಮಾರುಂಕ್ ನಾ.

ವಿಲ್ಫಿಚ್ಯಾ ಸಾಂಗಾತ್ಯಾಂ ಪಯ್ಕಿ ಎಕ್ಲೊ ಮ್ಹಣ್ತಾ, `` ವಿಲ್ಫಿಚ್ಯಾ ಲೊಕಾ ಮೊಗಾಳಾಯೆಚೆ ಭಾಂಗ್ರಾಳೆ ದೀಸ್ ಸುರ್‍ವಾತ್ತಾನಾ `ತಾಚೆಂ ನಾಂವ್ ಮೊಡಿಜೆ ಮ್ಹಳ್ಳ್ಯಾ ಉಗ್ತ್ಯಾ ಉದ್ದೇಶಾನ್ಂಚ್ ಕಾಂಯ್ ಥೊಡೆ ಸಾಂಗಾತಾ ಮೆಳ್ತಾನಾ, ವಿಲ್ಫಿಚ್ಯಾ ಖಾಸ್ ಅಭಿಮಾನಿ ಮಾದೆಂ ಜಾಯ್ತೆಂ ನಾಸಮಾದಾನ್ ಉದೆಲ್ಲೆಂ. ಪುಣ್ ವಿಲ್ಫಿ ಸಮಾದಾನಿ ಅಸ್‌ಲ್ಲೊ. `ತ್ಯಾ ಉದ್ದೇಶಾನ್ ತರೀ ಕೊಂಕ್ಣಿ ಉದ್ದಾರ್ ಜಾಂವ್ದಿ ಮ್ಹಣ್ ಆಶೆಲ್ಲೊ ಆಶಾವಾದಿ ತೊ.

ಅನ್ಯೇಕ್ ನಾಂವಾಡ್ದಿಕ್ ಕಲಾಕಾರಾನ್ ಥೊಡ್ಯಾ ವರ್‍ಸಾಂ ಪಯ್ಲೆಂ ಎಕಾ ಸಂದರ್‍ಬಾರ್ ಮ್ಹಳ್ಳೆಂ `` ವಿಲ್ಫಿಚ್ಯಾ ಬಿರುದಾಕ್ ಹಿಣ್ಸುಂಚ್ಯಾ ಖಾತಿರ್‌ಚ್ ತಾಣಿಂ ಅಶೆಂ ಕೆಲಾಂ. ಕಿತ್ಯಾ ಖಾತಿರ್ ತ್ಯಾ ಮೊವಾಳ್ ಕಾಳ್ಜಾಕ್ ತೆ ಅಶೆಂಯ್ ದುಕಯ್ತಾತ್ ತೆಂ ಕಳಾನಾ... ಪುಣ್ ಹ್ಯಾ ಸಂದರ್‍ಬಾರ್‌ಯಿ ವಿಲ್ಫಿನ್ ಮ್ಹಳ್ಳೆಂ ಖಂಯ್, `ಕಿತ್ಯಾ ಮ್ಹಜ್ಯಾಕೀ ಉಂಚ್ಲೊ ಗಾವ್ಪಿ ಕೊಂಕ್ಣೆಂತ್ ಉದೆಂವ್ಕ್ ನಜೊ?

ಫುಡೆಂ ಅನ್ಯೇಕಾ ಸಂದರ್‍ಬಾರ್ ಪಿಡೆಂತ್ ಆಸ್ತಾನಾ ಖುದ್ ವಿಲ್ಫಿನ್ ಮ್ಹಾಕಾ ಫೊನ್ ಕರ್‍ನ್ ``... ಮ್ಹಾಕಾ ಮಾನ್ ಕರುಂಕ್ ಆಶೆತಾತ್ ಖಂಯ್, ಆತ್ತಾಂ ಯೇವ್ನ್ ಗೆಲೆ... ಮ್ಹಣ್ತಾನಾ, ``ಹ್ಯಾ ವೆಳಾರ್ ಅವ್ಜಿತ್ ತಶೆಂ ಕಿತ್ಯಾ? ತುಮ್ಚೆಂ ಸಂಗೀತ್ ಕೊಂಕ್ಣಿ ಸಂಗೀತ್‌ಚ್ ನಂಯ್, ತ್ಯಾ ಸಂಗೀತಾವರ್‍ವಿಂ ಖರಿಂ ಕೊಂಕ್ಣಿ ಸಂಗೀತ್ ಅಸ್ಕತ್ ಜಾಲಾಂ ಮ್ಹಣ್ತೆಲ್ಯಾಂಥಾವ್ನ್ ತುಮಿ ತೆಂ ಸ್ವಿಕಾರ್ ಕರ್‍ಚ್ಯಾಕೀ ನಮೃತಾಯೆನ್ ತೆಂ ನೆಗಾರ್‍ಚೆಂ ಬರೆಂ.;; ಮ್ಹಳ್ಳೆಂ ಹಾಂವೆಂ. ಮ್ಹಜೆ ತಸಲ್ಯಾ ಜಾಯ್ತ್ಯಾ ತಾಚ್ಯಾ ಸಾಮಾನ್ಯ್ ಅಭಿಮಾನಿಂಚಿ ಅಭಿಪ್ರಾಯ್ ತಿಚ್ ಆಸ್‌ಲ್ಲಿ. ತರೀ ಊಂಚ್ ವೆಕ್ತಿತ್ವಾಚ್ಯಾ ವಿಲ್ಫಿನ್ ಮಾನ್ ಕರುಂಕ್ ಅಯಿಲ್ಲ್ಯಾಂಕ್ ದುಕಯಿಲ್ಲೆಂ ನಾ, ಯಾ ನೆಗಾರ್‍ಚೆ ತಿತ್ಲೆಂ ವ್ಹಡ್‌ಪಣ್ ದಾಕಯಿಲ್ಲೆಂಯ್ ನಾ. ಬಗಾರ್ ಖಾಲ್ತೆಪಣಿ ತೊ ಮಾನ್ ತಾಣೆ ಸ್ವೀಕಾರ್ ಕೆಲೊ ಮಾತ್ರ್ ನ್ಹಂಯ್ ಆಪ್ಣಾಕ್ ಮೆಳ್‌ಲೊ ದುಡ್ವಾಕ್ ಆಪ್ಣಾಚೊ ವಾಂಟೊಯ್ ಕುಡ್ಸುನ್ ತಾಣಿಂ ಕರ್‍ಚ್ಯಾ ಕೊಂಕ್ಣಿ ವಾವ್ರಾಕ್ ಅರ್‍ಪಿಲೊ! ಹ್ಯಾ ಘಡಿತಾವರ್‍ವಿಂ ವಿಲ್ಫಿಚ್ಯಾ ಮನ್ಶಾಪಣಾಚಿ ಉಂಚಾಯ್ ಕಿತ್ಲಿ ಮ್ಹಳ್ಳೆಂ ರುಜು ಜಾಲೆಂ.

ಆರ್‍ವಿಲ್ಯಾ ವರ್‍ಸಾಂನಿ ತಾಣೆ ಮ್ಹಾಕಾ ಬೊವ್ ಲಾಗ್ಶಿಲೊ ಜಾವ್ನ್ ಘೆತ್‌ಲ್ಲೊ ಕೀ ತಾಚ್ಯಾ ಜಿಣ್ಯೆಚಿಂ ಜಾಯ್ತಿಂ ಖಾಸ್ ಘಡಿತಾಂ ಮ್ಹಜೆ ಸಂಗಿಂ ವಾಂಟುನ್ ಫೆತಾಲೊ. ತರ್‍ನ್ಯಾ ಪತ್ರರಕರ್‍ತಾಂನಿ ಆಪ್ಣಾ ಸಂಗಿಂ ಥೊಡೊ ಸಂದರ್‍ಬ್ ದುರುಪಯೋಗ್ ಕೆಲ್ಲ್ಯಾ ವೆಳಾರ್, ತರ್‍ನ್ಯಾ ಎಕಾ ಸಂಗೀತ್ಗರಾನ್ `ಮ್ಹಾಕಾ ತುಜೆ ಪರಿಂ ಪದಾಂನಿ ಬೂದ್‌ಬಾಳ್ ಸಾಂಗೊಂಕ್ ಯೇನಾ... ಮ್ಹಣ್ ನಿಶ್ಟೂರ್ ಪಣಿ ಉಲಯಿಲ್ಲ್ಯಾ ವೆಳಾರ್... ಅಶೆಂ ಜಾಯ್ತ್ಯಾ ಸಂದರ್‍ಬಾಂನಿ ತಾಚಿ ಬೆಜಾರಾಯ್ ಮ್ಹಜೆಲಾಗಿಂ ವಾಂಟುನ್ ಘೆತ್ಲ್ಯಾ ತರೀ ಖಂಚ್ಯಾಯ್ ಸಂದರ್‍ಬಾರ್ ತಾಣೆ ತಾಕಾ ದುಕಯಿಲ್ಲ್ಯಾಂಕ್ ಆಪ್ಲೆಂ ನಾಸಮಾದಾನ್ ದಾಕಯಿಲ್ಲೆಂ ನಾ. ತಾಚಿಂ ಪದಾಂ ಭಾವನಾತ್ಮಕ್, ಜಿಂ ತಾಣೆ ಭೊಗ್‌ಲ್ಲ್ಯಾ ಕಶ್ಟಾಂ ಸುಖಾಚೆಂ ಸಮ್ಮಿಲನ್. `ಹಾಂವೆಂ ಪದಾಂ ಬರಯ್ತಾನಾ ಆಕೇರಿಚ್ಯಾ ಥೊಡ್ಯಾ ಪಂಗ್ತಿಂನಿ ಬೂದ್‌ಬಾಳಿಚಿಂ ಉತ್ರಾಂ ಲಿಕ್ಲ್ಯಾಂತ್ ತರೀ, ತಿಂ ಪದಾಂ ಗಾಯ್ತಾನಾ ಹಾಂವ್ ತೆಂ ಭೊಗ್ತಾಲೊಂ ಶಿವಾಯ್, ಊಂಚ್ ವೆದಿರ್ ರಾವೊನ್ ಆಯ್ಕೊವ್ಪ್ಯಾಕ್ ಬೂದ್ ಬಾಳ್ ದಿತೇ ಆಸಾಂ ಮ್ಹಣ್ ಚಿಂತಿನಾತ್‌ಲ್ಲೊಂ. ಮ್ಹಣ್ತಾಲೊ ತೊ.

``ವಿಲ್ಫಿ ಏಕ್ ವೊಡಾ ರೂಕ್... ವೊಡಾ ರುಕಾ ಮುಳಾಂತ್ ಕಿತೆಂಚ್ ಕಿರ್‍ಲಾನಾ ಮ್ಹಣ್ ಎಕಾ ನಾಮ್ಣೆಚ್ಯಾ ಸಾಹಿತಿನ್ ಉಗ್ತ್ಯಾನಾ ಸಾಂಗ್‌ಲ್ಲೆಂ. ಪುಣ್ ಆಮ್ಕಿಂಚ್ ಬಿಯಾಂ ಘಾಲ್ನ್ ಎಕಾ ಕವಿಕ್ ಯಾ ಸಾಹಿತಿಕ್ ಕಿರ್‍ಲಾಯಿಲ್ಲೊ ಧಾಕ್ಲೊ ಸಂಸಾರಾಂತ್ ನಾ. ಬಗಾರ್ ಕಿರ್‍ಲೊನ್ ಪಾಲೆಂವ್ಕ್ ಅತ್ರೆಗ್ಚ್ಯಾಚೊ ಪೋಸ್ ಖಂಡಿತ್ ಕರ್‍ಯೆತಾ. ಆನಿ ಹೆಂ ವಿಲ್ಫಿನ್ ಜಾಯ್ತ್ಯಾ ತರ್‍ನ್ಯಾ ಸಂಗೀತ್ಗಾರಾಂಕ್, ಪದಾಂ ಘಡ್ಣಾರಾಂಕ್ ಕೆಲಾಂ. ತೊ ಜರ್ ಏಕ್ ವೊಡಾ ರೂಕ್‌ಚ್ ಮ್ಹಣ್ಂಚ್ ಧರ್‍ಲ್ಯಾರ್‌ಯಿ, ತಾಚ್ಯಾ ವಿಸ್ತಾರ್ ಫಾಂಟ್ಯಾಂನಿ ಮ್ಹಜೆ ತಸಲ್ಯಾ ಜಾಯ್ತ್ಯಾ ಕಲಾಕಾರಾಂನಿ, ಸಂಗೀತ್ಗಾರಾಂನಿ, ಪದಾಂ ಘಡ್ಣಾರಾಂನಿ, ಗಾವ್ಪ್ಯಾಂನಿ, ನಾಚ್ಪ್ಯಾಂನಿ, ಫೊಕಾಣಾಂ ಗಾರಾಂನಿ ಆಸ್ರೊ ಘೆತ್ಲಾ ಆನಿ ಉಂಚಾಯೆಕ್ ಪಾವ್ಲ್ಯಾತ್. ತಾಚೆಂ ಪ್ರೇರಣ್ ಘೆನಾತ್‌ಲ್ಲೆ ಆರ್‍ವಿಲೆ ಕೊಂಕ್ಣಿ ಸಂಗೀತ್ಗಾರ್‌ಚ್ ಆಸ್ಚೆನಾಂತ್. ತರೀ ತಾಣೆ ತಾಕಾ ಕೆದಿಂಚ್ ಊಂಚ್ ಮ್ಹಣ್ ಲೆಕ್‌ಲ್ಲೆಂ ನಾ. ``ಜೆಂ ಕಿತೆಂ ಹಾವೆಂ ಘಡ್ಲಾಂ ವಾ ರಚ್ಲಾಂ, ತೆಂ ಉಂಚ್ಲೆಂ ಮ್ಹಣ್ ಲೊಕಾನ್ ಮಾಂದುನ್ ಘೆತ್ಲಾಂ. ತೆಂ ಮ್ಹಜೆಂ ವ್ಹಡ್ ಭಾಗ್ ಮ್ಹಣ್ತಾಲೊ ತೊ.

ಮ್ಹಜ್ಯಾ ವಾವ್ರಾ ವರ್‍ವಿಂ ಕೊಂಕ್ಣೆಂತ್ಲ್ಯಾ ಚಡ್ತಾವ್ ಸರ್‍ವ್ ಸಂಗೀತ್ಗರಾಂಕ್ ಆನಿ ಸಾಹಿತಿಂಕ್ ಖಾಸ್ಗೆನ್ ಸಂಪರ್‍ಕ್ ಕರ್‍ಚೆಂ ವರ್‍ತೆಂ ಭಾಗ್ ಮ್ಹಾಕಾ ಲಾಬ್ಲಾಂ. ಅಸಲ್ಯಾ ಎಕಾ ಸಂದರ್‍ಬಾರ್ ವಿಲ್ಫಿಚ್ಯಾ ಸಿಂತಿಮೆಂತಾಳ್ ನಾಯ್ಟಾವೆಳಿಂ ಸರ್‍ವ್ ಪರ್‍ನ್ಯಾ ಕಲಾಕಾರಾಂಕ್ ವೆದಿಕ್ ಹಾಡ್ಚೊ ಅವ್ಕಾಸ್ ಲಾಬಾನಾತ್‌ಲ್ಲೆ ವಿಶಿಂ ಬೆಜಾರಾಯೆಚಿ ಅಬಿಪ್ರಾಯ್ ಆಯಿಲ್ಲಿ ತಿ ಪರೋಕ್ಶ್ ರಿತಿನ್ ವಿಲ್ಫಿಚ್ಯಾ ಗುಮಾನಾಕ್ ಹಾಡ್‌ಲ್ಲ್ಯಾ ವೆಳಾರ್ ``ತೆಂ ಉಣೆಂಪಣ್ ಘಡ್ಲಾಂ ವ್ಹಯ್. ಜಾಂಕಾಂ ಹಾಂವೆಂ ವೆದಿರ್ ಹಾಡುಂಕ್ ನಾ, ತಾಂಕಾಂ ಹಾಂವೆಂ ಮ್ಹಜ್ಯಾ ಕಾಳ್ಜಾಥಾವ್ನ್ ಭಾಯ್ರ್ ಉಡಂವ್ಕ್ ನಾ. ಸುರ್‍ವಿಲ್ಯಾ ದಿಸಾಂನಿ ಮ್ಹಜೆಸಂಗಿಂ ಆಸ್‌ಲ್ಲ್ಯಾಂಕ್ ಹಾಂವ್ ಕಶೆಂ ವಿಸ್ರೊಂ? ಮ್ಹಳ್ಳೆಂ ತಾಣೆ. ಥೊಡೆ ಪಾವ್ಟಿಂ ತೊ ಅಸಾಹಯಕ್ ಜಾಲಾ ವ್ಹಯ್, ಪುಣ್ ಅನುಪ್ಕಾರಿ ನ್ಹಂಯ್.

ಮೊಗಾಳ್, ಮೊವಾಳ್ ಮಾತ್ರ್ ನ್ಹಂಯ್, ಉಗ್ತ್ಯಾ ಮನಾಚೊ: ಆಪ್ಣಾಚ್ಯಾ ಪಿಡೆವಿಶಿಂ ಜಾಯ್ತೊ ತೇಂಪ್ ತಾಕಾ ಖಬರ್ ನಾತ್‌ಲ್ಲಿ. ಜ್ಯಾ ಎಕಾ ದಿಸಾ ತಾಣೆ ಮ್ಹಾಕಾ ಫೊನ್ ಕರ್‍ನ್ `` ದಪ್ತರಾಕ್ ವೆಚೆ ಪಯ್ಲೆಂ ಮ್ಹಾಕಾ ಯೇವ್ನ್ ಮೇಳ್, ತುಜೆಲಾಗಿಂ ಇಲ್ಲೆಂ ಉಲಂವ್ಕ್ ಆಸಾ. ಮ್ಹಣ್ ತಾಣೆ ಮ್ಹಾಕಾ ಅಪಯ್ಲೆಂ. ಘರಾ ಪಾವ್‌ಲ್ಲ್ಯಾ ಮ್ಹಾಕಾ ಬಗ್ಲೆಕ್ ಬಸವ್ನ್ ಮ್ಹಜೊ ಹಾತ್ ಧರ್‍ನ್ ಪಿಂಟೊ, ತುಕಾ ಯೆದೊಳ್ ಹಾಂವೆಂ ಸಾಂಗೊಂಕ್ ನಾ... ಮ್ಹಜಿ ಭಲಾಯ್ಕಿ ಭಿಗಡ್ಲ್ಯಾ....... ಅಶೆಂ ಮುಕಾರ್ ಸಾಂಗ್ತೆಚ್ ವೆತಾನಾ ಮ್ಹಜ್ಯಾನ್ ತಡ್ವೊಂಕ್ ಜಾಲೆಂ ನಾ. ಹಾಂವ್ ತಾಚೊ ಬಾವ್ಳೊ ಧರ್‍ನ್ ರಡ್ಲೊಂ. ತೋಯ್ ರಡ್ಲೊ... ಮೀನಾ ಅಂಟಿ, ವಿಶು, ಶರ್‍ಲಿನ್ ಮೊನಿಂ ಜಾಲ್ಲಿಂ. ಪುಣ್ ವಿಲ್ಫಿ ಅಂಕಲಾನ್ ಮ್ಹಳೆಂ, `` ಮರ್‍ಣಾಕ್ ಹಾಂವ್ ಭಿಯೆನಾ, ಕಿತ್ಯಾ ೬೭ ವರ್‍ಸಾಂಚಿ ಫಳಾದಿಕ್ ಜಿಣಿ ಹಾಂವ್ ಜಿಯೆಲಾಂ...

ತ್ಯಾ ಉಪ್ರಾಂತ್ ದೋನ್ ಸಂಗೀತ್ ಸಾಂಜೊ, ಭಾಂಗಾರೋತ್ಸವ್ ಕಾರ್‍ಯಿಂ ಘಡೊನ್ ಗೆಲಿಂ. ಆಪ್ಲ್ಯಾ ಪಿಡೆಸಂಗಿಂಚ್ ತಾಣೆ ಸರ್‍ವ್ ಕಾಮಾಂ ಸಂಪಯ್ಲಿಂ. ಮರ್‍ಣಾಚ್ಯಾ ಥೊಡ್ಯಾ ವೊರಾಂ ಪಯ್ಲೆಂ ಗ್ರೇಶಿಯನ್ ರೆಬಿಂಬಸ್ ಶಿಕ್ಪಾ ನಿದಿಥಾವ್ನ್ ದಿಂವ್ಚ್ಯಾ ದುಡ್ವಾ ಕುಮ್ಕೆಚ್ಯಾ ಚೆಕ್ಕಿಂಕ್ ದಸ್ಕತ್ ಘಾಲ್ತಾ ಪರ್‍ಯಾಂತ್ ಹರ್ ದಿಸಾಂಚಿಂ ತಾಚಿಂ ಕಾಮಾಂ ಕರ್‍ನ್ಂಚ್ ಗೆಲೊ ತೊ. ಪುಣ್ ಮ್ಹಜ್ಯಾ ಆನಿ ತಾಚ್ಯಾ ನಿಮಾಣ್ಯಾ ಭೆಟೆವೆಳಾರ್ ತಾಣೆ ಮ್ಹಳ್ಳಿಂ ಉತ್ರಾಂ, `` ಕಿತ್ಲೆಂ ನಾ ನಾ ಮ್ಹಳ್ಯಾರೀ ದೂಕ್ ಚಡ್ ಹಾತಾನಾ ಭೆಂ ದಿಸ್ತಾ; ಅನಿಕೀ ಕಿತ್ಲಿ ದೂಕ್ ಸೊಸುಂಕ್ ಅಸಾ ಮ್ಹಣ್...

ಪಿಡೆಚ್ಯಾ ದುಕಿನ್ ತಾಕಾ ಇಲ್ಲೊ ಇಲ್ಲೊಚ್ ಅಸ್ಕತ್ ಕೆಲ್ಲೊ. ವಿಲ್ಫಿಚ್ಯಾ ಪದಾಂನಿ ಕಶೆಂ ಲೊಕಾಕ್ ಪಿಶ್ಯಾರ್ ಘಾಲ್ಲೆಂ ಕೀ ತಾಚ್ಯಾ ಅಮೃಕ್ಯಾ ಹಾಸ್ಯಾನಿಂಯಿ ಲೊಕಾಕ್ ತಿತ್ಲೆಂಚ್ ಪಿಶ್ಯಾರ್ ಘಾಲ್ಲೆಂ. ತಾಚ್ಯಾ ನಿಮಾಣ್ಯಾ ದಿಸಾಂನಿ ದುಕಿನ್ ತಾಚ್ಯಾ ತೊಂಡಾರ್ ಆಪ್ಲಿ ಕರಾಳಾ ಛಾಯಾ ಛಾಪ್‌ಲ್ಲಿ ತರೀ ತ್ಯೊ ತಾಚ್ಯೊ ಹಾಸೊ ಮಾಜ್ವೊಂಕ್ ನಾತ್‌ಲ್ಲ್ಯೊ.. ಆಜ್ ತಾಚೆಂ ಹಾಸ್ಕುರೆಂ ಮಾಯ್ಪಾಸಿ ವದನ್ ಆಮ್ಚೆ ಮದೆಂ ನಾ ಮ್ಹಣ್ತಾನಾ ಲಾಕೊಂ ತಾಚ್ಯಾ ಭೊಗ್ಚಿ ದೂಕ್ ವಿಶೇಸ್. ವಿಲ್ಫಿಚ್ಯಾ ಸಾಂಗಾತ್ಪಾಣಾಚೆಂ ಸುಖ್ ಭೊಗ್‌ಲ್ಲ್ಯಾಂಕ್ ಹಿ ದೂಕ್ ಅನಿಕೀ ಕಠೀಣ್ ಜಾವ್ನಾಸ್ತೆಲಿ. ಆಮಿ ತಾಚೆ ಅಭಿಮಾನಿ ತಾಕಾ ಸಾಸ್ಣಾಕ್ ಆದೆವ್ಸ್ ಮ್ಹಣೊಂಕ್ ಸಕಾನಾಂವ್; ಬದ್ಲಾಕ್ ಜಲ್ಮಾಲ್ಲ್ಯಾ ಹರ್ ವೆಕ್ತಿಂಕ್ ಮೊರೊಂಕ್ ಆಸಾ ಮ್ಹಳ್ಳ್ಯಾ ಸತಾ ಸಂಗಿಂ, ಕ್ರೀಸ್ತಿ ಭಾವಡ್ತಾಚೆ ಆಮಿ, ಹೆಂ ಸಂಸಾರಿ ಜಿವಿತ್ ತೊಡ್ಯಾ ಖಿಣಾಂಚೆಂ ಮ್ಹಣ್ ಚಿಂತುನ್ ಹ್ಯಾ ಮಹಾನ್ ಮಾನವತಾವಾದಿಕ್, ಇತ್ಲೆಂಚ್ ಮ್ಹಣ್ತಾಂವ್ ಕೀ `ವಿಲ್ಫಿಯಾಬ್, ವೆಗಿಂಚ್ ಆಮಿ ಪರತ್ ಮೆಳ್ತೆಲ್ಯಾಂವ್.

ಪಿಂಟೊ ವಾಮಂಜೂರ್; ಕುರ್‍ಪಾ: ರಾಕ್ಣೊ ಹಪ್ತ್ಯಾಳೆಂ