ಕೊಂಕ್ಣಿ ಸಂಗೀತ್ ಮೊತಿಯಾಂ ರಾಸ್ ಸಂಗೀತ್ ಘರಾಣ್ಯಾಚೊ ಶ್ರೀ ಡೆನಿಸ್ ಪೆರಿಸ್

ಕೊಂಕ್ಣಿ ಸಂಗೀತ್ ಮೊತಿಯಾಂ ರಾಸ್
ಸಂಗೀತ್ ಘರಾಣ್ಯಾಚೊ ಶ್ರೀ ಡೆನಿಸ್ ಪೆರಿಸ್

ವಯ್ಲ್ಯಾ ಊಂಚ್ ಮೊಳ್ಬಾರ್ ಥೊಡಿಂ ನಕ್ತಿರಾಂ ಖಳನಾಸ್ತಾಂ ಆಪ್ಲೊ ಪ್ರಕಾಸ್ ಸಂಸಾರಾರ್ ಫಾಂಕಯ್ತಾತ್ ತರ್, ಥೊಡಿಂ ಆಪ್ಲೊ ಪ್ರಕಾಸ್ ಫಾಂಕವ್ನ್ ಆಸ್ತಾನಾಂಚ್ ತಾಂಚೆ ಮುಕ್ಲ್ಯಾನ್ ಪಾಸಾಯೊ ಮಾರ್‍ಚ್ಯಾ ದಾಟ್ ಕಾಳ್ಯಾ ಮೊಡಾಂ ಭಿತರ್ ಲಿಪ್ತಾತ್ ಆನಿ ಆಪ್ಲ್ಯಾ ಪ್ರಕಾಸಾಕ್ ಆಂವ್ಡೆಂವ್ಚ್ಯಾ ಸಂಸಾರಾಕ್ ನಿರಾಶಿ ಕರ್‍ತಾತ್. ಆಯ್ಚ್ಯಾ ಹ್ಯಾ ಸಂಗೀತ್ ಸ್ವರಾಂತ್ ಸಾದರ್ ಜಾಂವ್ಚೊ ಕೊಂಕ್ಣಿ ಸಂಗೀತ್ ಸಂಸಾರಾಂತ್ಲೊ ಫಾಮಾದ್ ಗಾವ್ಪಿ, ಮಂಗ್ಳುರಾಂತ್ ನಾಮ್ಣೆಚ್ಯಾ `ಸಂಗೀತ್ ಘರ್' ಘರಾಣ್ಯಾಚೊ ಶ್ರೀ ಡೆನಿಸ್ ಪೆರಿಸ್. ಅಸಲ್ಯಾ ದುಸ್ರ್ಯಾ ವರ್ಗಾಕ್ ಸೆರ್‍ವಲ್ಲೊ ಮಾನೆಸ್ತ್. ತೊ ಉಂಚ್ಲೆ ಕಾಲೆತಿಚೊ ಸಂಗೀತ್ಗಾರ್ ಜಾವ್ನ್ ಸಂಗೀತ್ ಶಿಖರಾ ದಿಶಿಂ ಭರ್ಮಾಚಿಂ ಮೆಟಾಂ ಕಾಡ್ಚ್ಯಾ ವಸಂತ್ ಕಾಳಾರ್ ಆಪ್ಲ್ಯಾ ಕುಟ್ಮಾಚೊ ಹುಸ್ಕೊ ಕಾಳ್ಜಾ-ಮನಾಂತ್ ಫಿಚಾರ್ ಕರುನ್ ಆಪ್ಲಿ ಆರ್ಥಿಕ್ ಸ್ಥಿತಿ ಬಳ್ ಕರ್‍ಚ್ಯಾ ಉದ್ದೇಶಾನ್ ಆಪ್ಲೊ ಮಾಯ್‌ಗಾಂವ್ ಸಾಂಡುನ್ ಪಯ್ಶಿಲ್ಯಾ ಖಾಡಿಗಾಂವಾಂತ್ಲ್ಯಾ ಸೌದಿ ಆರೇಬಿಯಾಕ್ ಪಾವ್ಲೊ. ಥಂಯ್ಸರ್ ಪಾಶಾರ್ ಕೆಲ್ಲ್ಯಾ ೨೧ ವರ್‍ಸಾಂನಿ ತಾಚಿ ಆರ್ಥಿಕ್ ಸ್ಥಿತಿ ಘಟ್ ಜಾಲಿ ತರೀ ತಾಚ್ಯಾ ಮಧುರ್ ಅವಾಜಾವಿಣೆಂ ಕೊಂಕ್ಣಿ ಸಂಗೀತ್ ಸಂಸಾರ್ ಗರೀಬ್ ಜಾಲ್ಲೆಂ ಘಡಿತ್ ಸರ್‍ವಾಂನಿ ವಳ್ಕಜಾಯ್ ತಸಲೆಂ.

ಡೆನಿಸ್ ಪೆರಿಸಾಚೊ ಜಲ್ಮ್ 1945 ಇಸ್ವೆಚ್ಯಾ ಆಗೋಸ್ತ್ 25 ವೆರ್ ಮಂಗ್ಳುರ್ ದಿಯೆಸೆಜಿಂತ್ಲ್ಯಾ ಒಮ್ಜೂರ್ ಫಿರ್ಗಜೆಂತ್ ಜಾಲೊ. ದೆವಾಧಿನ್ ಬೊನಾವೆಂಚರ್ ಆನಿ ದೆವಾಧಿನ್ ಆಂಜೆಲಿನ್ ಪೆರಿಸ್ ಹಾಂಚ್ಯಾ ಪಾಂಚ್ ಜಣಾಂ ಭುರ್ಗ್ಯಾಂ ಪಯ್ಕಿ (3 ಚಲೆ, 2 ಚಲಿಯೊ). ಡೆನಿಸ್ ಮ್ಹಾಲ್ಘಡೊ. ಡೆನಿಸಾಚೊ ಬಾಪಯ್ ಬೊನಾವೆಂಚರ್ ತ್ಯಾ ಕಾಳಾಚೊ ಫಾಮಾದ್ ಗಾವ್ಪಿ ಜಾವ್ನಾಸೊನ್ ಕಾಜಾರ್ ಸೊಭಾಣಾಂ ತಾಚ್ಯಾ ಹಾಸ್ತ್ಯಾ ಉಡ್ತ್ಯಾ ಪದಾಂನಿ ಸೊಭ್ತಾಲಿಂ. ಹೆಂ ಸಂಗೀತ್ ದೆಣೆಂ ತಾಚೆ ದೋಗ್ ಸುಪುತ್ರ್ ಡೆನಿಸ್ ಆನಿ ಮೆಲ್ವಿನ್ ಪೆರಿಸ್ ಹಾಂಣಿಂ ಮುಕಾರುನ್ ವ್ಹರುನ್ ಕೊಂಕ್ಣಿ ಸಂಗೀತಾಕ್ ಗಿರೇಸ್ತ್ ಕೆಲ್ಲೆಂ `ಪೆರಿಸ್' ಕುಟ್ಮಾಚೆಂ ವ್ಹಡ್ಪಣ್. ಹ್ಯಾಚ್ ಕುಟ್ಮಾಂತ್ಲೊ ಆನ್ಯೇಕ್ ಸುಪುತ್ರ್ ಆಲ್ಬರ್ಟ್ ಪೆರಿಸ್ ಏಕ್ ತಾಲೆಂತ್ವಂತ್ ಗಾವ್ಪಿ ಮಾತ್ರ್ ನ್ಹಯ್ ಉತ್ತೀಮ್ ರಂಗ್‌ಮಂಚ್ ನಟ್ ಜಾವ್ನ್ ನಾಂವಾಡ್ಲಾ.

ಭುರ್ಗ್ಯಾ ಡೆನಿಸಾನ್ ಆಪ್ಲೆಂ ಹೈಸ್ಕೂಲ್ ಶಿಕಪ್ ಸಾಂ ಲುವಿಸ್ ಶಿಕ್ಪಾಶಾಳಾಂತ್ ಸಂಪಯ್ತಚ್ ಪದ್ವೆ ಶಿಕಪ್ ಸಾಂ ಲುವಿಸ್ ಸಾಂಜೆ ವಿದ್ಯಾಲಯಾಂತ್ ಮುಕಾರುನ್ ಥಂಯ್ಸರ್ ತಾಣೆಂ ಬಿ.ಕೊಮ್. ಪದ್ವಿ ಆಪ್ಣಾಯ್ಲಿ. ಜಿವಿತಾಚೆಂ ಹೊಡೆಂ ಮುಕಾರುನ್ ವೆತಾಂ ವೆತಾಂ ಫುಡಾರಾ ಬಾಬ್ತಿನ್ ತೊ ಸೌದಿಅರೇಬಿಯಾಕ್ ಪಾವ್ಲೊ. ಥಂಯ್ಸರ್ ಆರಾಮ್ಕೊ ತೆಲಾಕಂಪ್ಣೆಂತ್ 21 ವರ್‍ಸಾಂಚಿ ಸೆವಾ ಅರ್ಪುನ್ ಆಪ್ಲ್ಯಾ 50 ವರ್‍ಸಾಂ ಪ್ರಾಯೆರ್ ತೊ ಮಾಯ್‌ಗಾಂವಾಕ್ ಪಾಟಿಂ ಆಯ್ಲೊ. ಉಪ್ರಾಂತ್ ಥೊಡಿಂ ವರ್ಸಾಂ ರಾಕ್ಣೊ ದಫ್ತರಾಂತ್ ಮೆನೆಜರ್ ಜಾವ್ನ್ ಆಪ್ಲಿ ಸೆವಾ ಅರ್ಪುನ್ 60 ವರ್‍ಸಾಂ ಪ್ರಾಯೆರ್ ನಿವೃತ್ ಜಾಲ್ಲೊ ತೊ ಪ್ರಸ್ತುತ್ ಆಪ್ಲಿ ಮೊಗಾಳ್ ಪತಿಣ್ ಮೊನಿಕಾ ಸವೆಂ ಮಂಗ್ಳುರಾಂತ್ಲ್ಯಾ ಕೊರ್ಡೆಲ್ ಫಿರ್ಗಜೆಂತ್ಲ್ಯಾ ಸಂಗೀತ್-ಘರಾಂತ್ ವಸ್ತಿ ಕರುನ್ ಆಸಾ. ಡೆನಿಸ್ ಆನಿ ಮೊನಿಕಾಚ್ಯಾ ಸುಖಿ ಕಾಜಾರಿ ಜಿವಿತಾಂತ್ ದೆವಾನ್ ಫಾವೊ ಕೆಲ್ಲಿಂ ಸುಂದರ್ ಫಳಾಂ ತೀನ್ ಚಲಿಯೊ.

ಆಪ್ಲ್ಯಾ ಬಾಳ್ಪಣಾ ಥಾವ್ನ್ ಡೆನಿಸಾಕ್ ಸಂಗೀತಾ ವಯ್ರ್ ವಿಶೇಷ್ ವೊಡ್ಣಿ. ಆಪ್ಲ್ಯಾ ಜಿವಿತಾಚಿಂ ಸುರ್‍ವಿಲಿಂ ೧೨ ವರ್‍ಸಾಂ ತಾಣೆಂ ಬೆಂದುರ್ ಫಿರ್ಗಜೆಚ್ಯಾ ಕದ್ರಿ ವಾಡ್ಯಾಂತ್ ಖರ್ಚಿಲಿಂ. ತೆ ಆವ್ದೆರ್ ಕೊಂಕ್ಣಿ ನಾಟಕ್ ಸಭೆನ್ ವರ್ಸಾವಾರ್ ಚಲಂವ್ಚ್ಯಾ ಸಂಗೀತ್ ಸ್ಪರ್ಧ್ಯಾಂನಿ ಪಾತ್ರ್ ಘೆವ್ನ್ ಸಭಾರ್ ಇನಾಮಾಂ ತಾಣೆಂ ಆಪ್ಣಾಯ್ಲಿಂ. ಹ್ಯಾಚ್ ವೆಳಾರ್ ತ್ಯಾ ಕಾಳಾಚೊ ಸಂಗೀತ್ಗಾರ್ ಆನಿ ನಾಟಕಿಸ್ತ್ ಜಾವ್ನ್ ಫಾಮಾದ್ ಜಾಲ್ಲೊ ತಾಚೊ ಬಾಪುಲ್ ಭಾವ್ ದೆವಾಧಿನ್ ವಲ್ಲಿ ವಾಸ್ ತಾಚೆರ್ ವಿಶೇಷ್ ಪ್ರಭಾವ್ ಘಾಲುಂಕ್ ಸಕ್ಲೊ. ಆಪ್ಲೆ ೧೨ ವರ್ಸಾಂ ಪ್ರಾಯೆರ್ ಕೊರ್ಡೆಲ್ ಫಿರ್ಗಜೆಂತ್ ವಸ್ತಿ ಕರ್‍ತಚ್ ಥಂಯ್ಸರ್ ಕಥೊಲಿಕ್ ಯುವ ಸಂಚಾಲನ್ (ಸಿ.ವೈ.ಎಂ.) ಹಾಂತುಂ ಕ್ರಿಯಾಳ್ ಸಾಂದೊ ಜಾಲೊ ತೊ. ಹಾಂಗಾಸರ್ ತಾಚಿಂ ಉಂಚ್ಲಿ ಸಂಗೀತ್ ಆನಿ ನಾಟಕ್ ಕಲೆಚಿಂ ದೆಣಿಂ ಪರ್ಜಳೊಂಕ್ ಲಾಗ್ಲಿಂ. ಡೆನಿಸ್ ತ್ಯಾ ಕಾಳಾಚೊ ಪ್ರಖ್ಯಾತ್ ಪಡ್ದ್ಯಾ ಪಾಟ್ಲೊ ಗಾವ್ಪಿ ಜಾವ್ನ್ ಮಾತ್ರ್ ನ್ಹಯ್, ಸ್ತ್ರೀಯೊ - ನಾಟಕಾಂನಿ ಪಾತ್ರ್ ಘೆಂವ್ಕ್ ಲಜೆಂವ್ಚ್ಯಾ ತ್ಯಾ ಕಾಳಾರ್, ಸ್ತ್ರೀ ಪಾತ್ರ್‌ಧಾರಿ ಜಾವ್ನ್ ಫಾಮಾದ್ ಕಲಾಕಾರ್ ತೊ ಜಾಲೊ. ಉಪ್ರಾಂತ್ ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸ್ ಹಾಚ್ಯಾ ಪಂಗ್ಡಾಂತ್ ಭರ್‍ತಿ ಜಾವ್ನ್ ಪ್ರಖ್ಯಾತೆಚ್ಯಾ ಶಿಖರಾಕ್ ತೊ ಪಾವ್ಲೊ. ಆಖ್ಖ್ಯಾ ಸಂಸಾರಾಂತ್ ವ್ಹರ್‍ತೆಂ ನಾಂವ್ ಆಪ್ಣಾಯ್ಲಲ್ಯಾ `ವಿಲ್ಫಿ-ನಾಯ್ಟ್' ಸಂಗೀತ್ ಕಾರ್ಯವಳಿಂನಿ ಸುರ್‍ವೆರ್ ಥಾವ್ನ್ ಗಾಯ್ಲಲ್ಯಾ ಥೊಡ್ಯಾಚ್ ಗಾವ್ಪ್ಯಾಂ ಪಯ್ಕಿ ಡೆನಿಸ್ ಪೆರಿಸ್ ಎಕ್ಲೊ. ವಿಲ್ಫಿ ರೆಬಿಂಬಸ್ ಡೆನಿಸಾಚ್ಯಾ ಮಧುರ್ ಆನಿ ಉಂಚ್ಲ್ಯಾ ತಾಳ್ಯಾಕ್ ಸರಿ ಜಾಲ್ಲಿಂ ಪದಾಂ ಘಡ್ತಾಲೊ. ಆಜ್ ತೀನ್ ಚ್ಯಾರ್ ಧಾಕ್ಡೆ ಪಾಶಾರ್ ಜಾಲೆ ತರೀ ಡೆನಿಸಾಚ್ಯಾ ಉಂಚ್ಲ್ಯಾ ಸ್ವರಾನ್ ವಿಣ್‌ಲ್ಲಿಂ ತಿಂ ಮಧುರ್ ಪದಾಂ ಆಜೂನ್ ಸಂಗೀತ್ ಪ್ರೇಮಿ ಘುಣ್ಗುಣೊನ್ ಆಸಾತ್.

ಖಾಲ್ತ್ಯಾ ಸ್ವಭಾವಾಚೊ ಶ್ರೀ ಡೆನಿಸ್ ಪೆರಿಸ್ ಏಕ್ ಖರೊ ಕೊಂಕ್ಣಿ ಸಂಗೀತ್ ಪುಜಾರಿ. ತಾಚ್ಯಾ ಉಂಚ್ಲ್ಯಾ ಸಂಗೀತ್ ದೆಣ್ಯಾಕ್ ಕಸಲೋಯ್ ಪ್ರಚಾರ್ ತೊ ಆಶೆಲ್ಲೊ ನಾ. ಪ್ರಾಯೆನ್ ತೊ ಜಾಂಟೊ ತರೀ ಕೊಂಕ್ಣಿ ಪದಾಂ ಸಂಗೀತ್ ಮ್ಹಣ್ತಾನಾ ತರ್‍ನ್ಯಾ ಕೊಂಬ್ಲ್ಯಾಚೊ ಸ್ಪಿರಿತ್ ತಾಚೆ ಥಂಯ್ ವ್ಹಾಳ್ತಾ. ತಾಚ್ಯಾ ಅಭಿಮಾನಿಂಕ್ ತೊ ಸದಾಂಚ್ ಋಣಿ ಜಾವ್ನಾಸಾ ಆನಿ ತಾಂಚೊ ಮೋಗ್ ಆನಿ ಪ್ರೋತ್ಸಾಹ್ ಆಪ್ಲ್ಯಾ ಜೈತಾಚೆಂ ಕಾರಣ್ ಮ್ಹಳ್ಳೆಂ ಸತ್ ತೊ ಖಾಲ್ತ್ಯಾ ಕಾಳ್ಜಾನ್ ಉಚಾರ್‍ತಾ.

ಮಾನೆಸ್ತ್ ಡೆನಿಸ್ ಪೆರಿಸಾನ್ ತಾಚ್ಯಾ ಮಧುರ್ ತಾಳ್ಯಾ ದ್ವಾರಿಂ ಕೊಂಕ್ಣಿ ಮಾತೆಕ್ ದಿಲ್ಲೆ ಸೆವೆಕ್ ಹಾಂವ್ ತಾಕಾ ಚೆಪೆಂ ಉಕಲ್ನ್ ಮಾನ್ ಬಾಗಾಯ್ತಾಂ ಆನಿ ತಾಚೆಂ ನಿವೃತ್ ಜೀವನ್ ಸಂತೊಸಾಚೆಂ ಜಾಂವ್ ಆನಿ ಸಂಗೀತ್ ಘರಾಂತ್ ಕೊಂಕ್ಣಿ ಸಂಗೀತ್ ಸದಾಂಚ್ ವ್ಹಾಳೊನ್ ಆಸೊಂ ಮ್ಹಳ್ಳಿ ಮ್ಹಜಿ ಆಶಾ ಆನಿ ಮಾಗ್ಣೆಂ.