ಬಾರ್ಕೂರ್ ಚೌಳಿಕೆರೆಂತ್ ಕವಿಂಚೆಂ ದರ್ಬಾರ್. ಕವಿತಾ ಫೆಸ್ತ್-2015 ರಂಗ್ಲೆಂ.
ಬಾರ್ಕೂರ್ ಚೌಳಿಕೆರೆಕ್ ಲಾಗೊನ್ ಆಸ್ಚ್ಯಾ ಸ್ಟೇನಿ ಆನಿ ಗ್ರೆಟ್ಟಾ ಲುವಿಸ್ ಹಾಂಚ್ಯಾ ಘರ್‍ಚ್ಯಾ ಆಂಗ್ಣಾಂತ್ 2015 ಜನೆರ್ 11 ತಾರಿಕೆರ್ ಲಗ್ನಾಚೊ ಸಂಭ್ರಮ್ ಮ್ಹಳ್ಳೆಬರಿ ಮಾಟವ್ ಉಬಾರಲ್ಲೊ. ತಳ್ಯಾಚ್ಯಾ ಎಕಾ ಪೊಂತಾಥಾವ್ನ್ ಘರ್‍ಚ್ಯಾ ದಾರಾ ಪರ್ಯಾಂತ್ ಸುಂರ್‍ಗಾರ್ ಕೆಲ್ಲೊ. ಸಕಾಳಿಂ ಥಂಡ್ ವಾರೆಂ ವ್ಹಾಳ್ತಾಲೆಂ. ಹ್ಯಾ ಮಧೆಂ ಸಕಾಳಿಂ ನೋವ್ ವೊರಾಂ ಪಯ್ಲೆಂಚ್ ಮಂಗ್ಳುರ್, ಗೊಂಯ್ ಆನಿ ಹೆರ್ ಪ್ರದೇಶಾಂ ಥಾವ್ನ್ ಕವಿತೆಚ್ಯಾ ಪಾವ್ಸಾಂತ್ ನ್ಹಾಂವ್ಕ್ ತಯಾರ್ ಜಾವ್ನ್ ಮ್ಹಳ್ಳೆಬರಿ ಕವಿ ತಶೆಂ ಕಾವ್ಯರಸಿಕ್ ಎಕ್ಟಾಂಯ್ ಜಾತಾನಾ, ಸಗ್ಳ್ಯಾ ವಾತಾವರಣಾಚೊ ರಂಗ್ ಬದಲ್ಲೊ. ನೊವೆಂ ಕವಿತಾ ಫೆಸ್ತ್ ಸುರು ಜಾಂವ್ಚಿ ಘಡಿ ಲಾಗಿಂ ಪಾವಲ್ಲಿ.
ಸಕಾಳಿಂಚೊ ನಾಸ್ಟೊ ಜಾತಚ್, ತಳ್ಯಾಚ್ಯಾ ಎಕೆ ಪಲ್ತಡಿ ಥಾವ್ನ್ ಥಳೀಯ್ ವಾಡ್ಯಾಚೊ ಗುರ್ಕಾರ್ ಮಾನೆಸ್ತ್ ಸ್ಟೇನಿ ಪಾಯ್ಸ್ ಹಾಣೆ ಧೊಲ್ ಬಡೊವ್ನ್ ಪುರ್ಶಾಂವಾಕ್ ಚಾಲನ್ ದಿಲೆಂ ಆನಿ ಕಾರ್ಯಾಕ್ ಬರೆಂ ಮಾಗ್ಲೆಂ. ತಿನ್ಶಾಂಕ್ ಮಿಕ್ವೊನ್ ಲೊಕಾಂನಿ ಹ್ಯಾ ಎಕಾ ಪುರ್ಶಾಂವಾಂತ್ ಭಾಗ್ ಘೆತ್ಲೊ.
ಕಾರ್ಯಾಚೊ ಸುತಾರಿ ಜಾವ್ನಾಸಲ್ಲ್ಯಾ ಎರಿಕ್ ಸೋನ್ಸಾನ್ ಸರ್ವಾಂಕ್ ಮಾಟ್ವಾಕ್ ಯೆವ್ಕಾರ್ ಮಾಗ್ತಚ್, ಆಪ್ಲ್ಯಾ ಸಾಂಗೊಡ್ಯಾಂ ಬರಾಬರ್ ಕವಿತಾ ಫೆಸ್ತಾಚೆಂ ಆಶಯ್ ಗೀತ್ 'ಮಾನ್ ಮ್ಹಜಿ ಪಾಂಯಾಂ ತುಜ್ಯಾ' ಗಾಯ್ಲೆಂ. ಉಪ್ರಾಂತ್ ಕಾರ್ಯಾಚೆ ಉಗ್ತಾವಣೆ ಖಾತೀರ್ ಸೈರ್‍ಯಾಂಕ್ ವೆದೀಕ್ ಆಪಯ್ಲೆಂ.
ಸುರ್‍ವೆರ್ ಕಾರ್ಯದರ್ಶಿ ಕಿಶೋರ್ ಗೊನ್ಸಾಲ್ವಿಸಾನ್ ಕವಿತಾ ಫೆಸ್ತಾನ್ ಯೆದೊಳ್ ಪರ್ಯಾಂತ್ ಕವಿಂಚೆರ್ ಘಾಲ್ಲೊ ಪ್ರಭಾವ್ ಮಟ್ವ್ಯಾನ್ ಸಾಂಗ್ಲೊ ಆನಿ ಸೈರ್‍ಯಾಂಚಿ ವೊಳಕ್ ಕರುನ್ ದಿಲಿ ತಶೆಂ ಸರ್ವಾಂಕ್ ಕವಿತಾ ಫೆಸ್ತಾಕ್ ಯೆವ್ಕಾರ್ ಮಾಗ್ಲೊ. ಮೆಲ್ವಿನ್ ರೊಡ್ರಿಗಸಾನ್ ದಶೆಂಬರ್ ನಿಮಾಣ್ಯಾ ಹಪ್ತ್ಯಾಂತ್ ಸಂಸಾರ್ ತ್ಯಾಗ್ ಕೆಲ್ಲ್ಯಾ ಮಾಧವಿ ಸರ್ದೇಸಾಯಿ ತಶೆಂ ಜೆ. ಬಿ. ಮೊರಾಯಸ್ ಹಾಂಕಾಂ ಶೃದ್ದಾಂಜಲಿ ವೊಂಪ್ಲಿ ಆನಿ ಸರ್ವಾಂನಿ ಮೌನ್ ಪ್ರಾರ್ಥನ್ ಕೆಲೆಂ.
ಉಪ್ರಾಂತ್ ವೆದೀರ್ ಆಸಲ್ಲ್ಯಾ ಸೈರ್‍ಯಾಂನಿ ಯೆದೊಳ್ಚೆ ದಸ್ತುರೆ ಬರಿ ಗುಲೊಬಾಚ್ಯೊ ಪಾಕ್ಳ್ಯೊ ವಾರ್‍ಯಾಂತ್ ಉಬೊಂವ್ಕ್ ಸೊಡುನ್ ಕವಿತಾ ಫೆಸ್ತಾಚೆಂ ಉಗ್ತಾವಣ್ ಕೆಲೆಂ. ಹ್ಯಾ ಉಪ್ರಾಂತ್ ಮಾಟ್ವಾಂತ್ ಹಾಜರ್ ಆಸಲ್ಲ್ಯಾ ಟ್ರಸ್ಟಿಂನಿ, ಕವಿತಾ ಟ್ರಸ್ಟಾಚ್ಯಾ ದಾತಾರಾಂನಿ, ಕವಿತಾ ಫೆಸ್ತಾಚ್ಯಾ ಪೋಷಕಾಂನಿ, ಸಂಘ್ ಸಂಸ್ಥ್ಯಾಂಚ್ಯಾ ಪ್ರತಿನಿಧಿಂನಿ, ಗಾಂವ್ಚ್ಯಾ ಮುಕೆಲ್ಯಾಂನಿ ದಾಲಿಯೆಂತ್ ದವರಲ್ಲ್ಯೊ ಪಾಕ್ಳ್ಯೊ ಹರ್ವಾಣಾಂತ್ಲ್ಯಾ ಉದ್ಕಾಂತ್ ಉಪ್ಯೆಂವ್ಕ್ ಸೊಡುನ್ ಫೆಸ್ತಾಚ್ಯಾ ಕಾರ್ಯಾಂತ್ ತಾಂಚೆಂ ಭಾಗೆಲಿಪಣ್ ಜಾಹೀರ್ ಕೆಲೆಂ.
ಹ್ಯಾಚ್ ಸಂದರ್ಭಾರ್ ಮುಕೆಲ್ ಸೈರೊ ಪಾಸ್ಕಲ್ ಆಲೆನ್ ನಜ್ರೆತಾನ್ ಮ್ಯಾಕ್ಸಿಮ್ ಲೋಬೊ ಹಾಚೆಂ ಕವಿತಾ ಆಸ್ವಾದನಾಚೆಂ, ಪ್ರಬಂಧ್ ಪುಸ್ತಕ್ 'ಕವಿತ್ವಾಚೆಂ ನಂದನಾವನ್' ಲೋಕಾರ್ಪಣ್ ಕೆಲೆಂ. ದಾಲಿಯೆಂತ್ ಮಾಂಡುನ್ ದವರಲ್ಲ್ಯಾ ಫುಲಾಂ ಭಿತರ್ ಆಸಲ್ಲ್ಯಾ ಪುಸ್ತಕಾಚ್ಯೊ ಸುರ್‍ವಿಲ್ಯೊ ಪ್ರತಿಯೊ ತಾಂಣಿ ವೆದೀ ವಯ್ಲ್ಯಾ ಸೈರ್‍ಯಾಂಕ್ ದಿಲ್ಯೊ. ಕವಿ ಎಂಡ್ರ್ಯೂ ಎಲ್. ಡಿಕುನ್ಹಾನ್ ಮ್ಯಾಕ್ಸಿಮಾಚಿ ತಶೆಂ ಪುಸ್ತಕಾಚಿ ವೊಳಕ್ ಕರುನ್ ದಿಲಿ ತರ್, ಮ್ಯಾಕ್ಸಿಮಾನ್ ಹ್ಯಾ ಪುಸ್ತಕಾಚಿ ಪಾಟ್ ಭುಂಯ್ ವಿವರುನ್ ಸಾಂಗ್ಲಿ ಆನಿ ತಾಕಾ ಸಹಕಾರ್ ದಿಲ್ಲ್ಯಾಂಚೊ ಆಭಾರ್ ಮಾಂದ್ಲೊ.
ಮಾನಾಚೆ ಸೈರೆ ಜಾವ್ನ್ ಆಯಿಲ್ಲ್ಯಾ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಟಾನ್ ಹಾಚೊ ಅಧ್ಯಕ್ಷ್ ಬಸ್ತಿ ವಾಮನ್ ಶೆಣೈ ತಶೆಂ ದಿ ಎಕ್ಸಪ್ರೆಶನ್ಸ್ ಅಧ್ಯಕ್ಷ್ ನವೀನ್ ಡಾಯಸ್ ಹಾಂಣಿ ಕವಿತಾ ಫೆಸ್ತಾಕ್ ತಾಂಚೆ ಸಂದೇಶ್ ದಿತಚ್, ಮುಕೆಲ್ ಸೈರೊ ಜಾವ್ನ್ ಆಯಿಲ್ಲೊ ನಿವೃತ್ತ್ ರಾಯಭಾರಿ ಪಾಸ್ಕಲ್ ಆಲೆನ್ ನಜ್ರೆತ್ ಉಲೊವ್ನ್ "ನಶಿಬಾನ್, ಮ್ಹಜ್ಯಾ ಆವಯ್ ಬಾಪಾಯ್ ವರ್‍ವಿಂ, ಕವಿತೆಚೆರ್ ಮ್ಹಾಕಾ ಧಾರಾಳ್ ಮೋಗ್ ಉಬ್ಜಾಲೊ ಆನಿ ಕವಿತಾ ಮ್ಹಳ್ಯಾರ್ ಉತ್ರಾಂ ಸಾಂಗಾತಾ ಘಾಲ್ನ್ ಪ್ರಾಸಾಚಿಂ ವಾಕ್ಯಾಂ ರಚ್ಚ್ಯಾ ಪ್ರಾಸ್ ವ್ಹರ್‍ತಿ ಏಕ್ ಕಲಾ ಜಾವ್ನಾಸಾ ಮ್ಹಳ್ಳಿ ಜಾಣ್ವಾಯ್ ಹಾಂವೆಂ ಜೊಡಲ್ಲಿ. ತಾಂಚೆ ಥಾವ್ನ್ ಹಾಂವೆಂ ಪಯ್ಲೆ ಪಾವ್ಟಿಂ ಥೊಡ್ಯೊ ಕವಿತಾ ಆನಿ ಶೇಕ್ಸಪಿಯರಾಚ್ಯೊ ಥೊಡ್ಯೊ ಸೊಲಿಲೊಕೀ ಆಯ್ಕಲ್ಲ್ಯೊ. ಹ್ಯಾವರ್‍ವಿಂ ಮ್ಹಜ್ಯಾ ಮಾನಸಿಕ್ ವಾಡಾವಳಿಚೆಂ ಸುರ್‍ವಿಲೆಂ ರೂಪ್ ಹಾಂವೆಂ ಜೊಡಲ್ಲೆಂ.
"ಮ್ಹಜೆ ಆವಯ್ನ್ ಗದ್ಯ್ ಆನಿ ಕವಿತಾ ಮಧ್ಲೊ ಫರಕ್ ಬೋವ್ ಸಂಪೆ ತಶೆಂ ಪ್ರಭಾವಿತ್ ರಿತಿನ್ ಆಮ್ಕಾಂ ಭುರ್ಗ್ಯಾಂಕ್ ಸಾಂಗಲ್ಲೊ. ತಿ ಏಕ್ ಫಾಮಾದ್ ಕಾಂತಾರ್ ಗಾಯ್ತಾಲಿ ಆನಿ ತಾಂತ್ಲೆ ಸಬ್ದ್ ವಾಚುನ್ ಸಾಂಗ್ತಾಲಿ. ಕವಿತಾ ಮ್ಹಳ್ಯಾರ್ ಗದ್ಯಾಕ್ ಸಂಗೀತ್ ಬಸೊಂವ್ಚೆಂ ಆನಿ ತ್ಯಾ ಗದ್ಯಾಚಿ ಸೊಭಾಯ್ ಆನಿ ಅರ್ಥ್ ವಾಡಂವ್ಚೊ ಮ್ಹಣ್ ತಿ ಆಮ್ಕಾಂ ಸಾಂಗ್ತಾಲಿ. ಥೊಡೆ ಪಾವ್ಟಿಂ ತಿ ವಿಲಿಯಮ್ ವರ್ಡ್ಸ್‍ವರ್ತಾಚಿ ಡ್ಯಾಫೊಡಿಲ್ಸ್ ಕವಿತಾಯ್ ವಾಚುನ್ ಸಾಂಗ್ತಾಲಿ,
"ಪುಣ್ ಮ್ಹಜಿ ಚಡ್ ಮೊಗಾಚಿ ಕವಿತಾ ಮ್ಹಳ್ಯಾರ್ ಬೈರನಾನ್ ಸಾಗೊರಾವಿಶಿಂ ಬರಯಿಲ್ಲಿ. ಹಿ ಕವಿತಾ ಮ್ಹಜಿ ಆವಯ್ ಕಾಂಯಿಂಚ್ ಚುಕನಾಸ್ತಾಂ ಸಾಂಗ್ತಾಲಿ ಆನಿ ತಿಚೆ 89 ವರ್ಸಾಂ ಪ್ರಾಯೆರ್ 2005 ಜುಲಾಯ್ಚ್ಯಾ 10 ತಾರಿಕೆರ್ ತಿಣೆಂ ಪ್ರಾಣ್ ಸೊಡ್ಚ್ಯಾ ಹಪ್ತ್ಯಾ ಆದಿಂ ಸಯ್ತ್ ಹಿ ಕವಿತಾ ಸಗ್ಳಿ ತಿಣೆ ಸಾಂಗಲ್ಲಿ. ಫ್ರೇಮ್ ಘಾಲ್ಲೆ ಹೆ ಕವಿತೆಚಿ ಪ್ರತಿ, ಜಿ ತಿಣೆ ಮ್ಹಜ್ಯಾ 55 ವರ್ಸಾಂಚ್ಯಾ ಜಾಲ್ಲ್ಯಾ ದಿಸಾಕ್ ಉಡಾಸಾಚಿ ಕಾಣಿಕ್ ಜಾವ್ನ್ ದಿಲ್ಲಿ, ತಿ ಮ್ಹಜೆಂ ವ್ಹರ್ತೆಂ ಏಕ್ ಖಜಾನ್ ಮ್ಹಳ್ಳೆಬರಿ ಮ್ಹಜೆಲಾಗಿಂ ಆಸಾ.
"ಮ್ಹಜ್ಯಾ ಬಾಪಾಯ್ನ್ ಶೇಕ್ಸಪಿಯರಾಚಿ ಮ್ಹಾಕಾ ಪಯ್ಲಿ ವೊಳಕ್ ಕರುನ್ ದಿಲ್ಲಿ ಆನಿ ನಾಟಕಾಂನಿ ಸಯ್ತ್ ಕವಿತಾ ಹಾಡುಂಕ್ ಜಾತಾ ಮ್ಹಳ್ಳಿ ಜಾಣ್ವಾಯ್ ತಾಚೆಥಾವ್ನ್ ಮ್ಹಾಕಾ ಲಾಭಲ್ಲಿ. ಮ್ಹಜೊ ಬಾಪಯ್ ಜಾಯ್ತೆಪಾವ್ಟಿಂ ದರ್ಯಾಕ್ ಉಪ್ಯೆಂವ್ಕ್ ವೆತಾನಾ ಯಾ ಸಾಂಜೆಚೆಂ ಪಾಸಾಯೊ ಮಾರುಂಕ್ ವೆತಾನಾ, ಮ್ಹಜಿ ಆವಯ್ ತಾಕಾ ಜಾಗ್ವಣ್ ದಿತಾಲಿ. ತವಳ್ ಮ್ಹಜೊ ಬಾಪಯ್ ಹಾಸುನ್ ಹಾಸುನ್ ಶೇಕ್ಸಪಿಯರಾಚ್ಯಾ ಜೂಲಿಯಸ್ ಸೀಜರಾಚ್ಯೊ ವೊಳಿ ಸಾಂಗ್ತಾಲೊ: "ಭಿಂವ್ಕುರೆ ತಾಂಚ್ಯಾ ಮರ್ಣಾ ಪಯ್ಲೆಂ ಜಾಯ್ತೆ ಪಾವ್ಟಿಂ ಮರ್‍ತಾತ್. ಧೈರಾದಿಕ್ ಮನೀಸ್ ಏಕಚ್ ಪಾವ್ಟಿಂ ಮರ್‍ತಾತ್." ಹೆಂ ನಾಸ್ತಾಂ ಜಾಯ್ತೆ ಪಾವ್ಟಿಂ ಹ್ಯಾಮ್ಲೆಟಾಂತ್ ಪೊಲೋನಿಯಸಾಸ್ ಆಪ್ಲ್ಯಾ ಪುತಾಕ್ ಸಾಂಗ್ಚಿ ಬೂದ್‌ಬಾಳ್ ತೊ ಮ್ಹಾಕಾಯ್ ದಿತಾಲೊ:
"ಕವಿತೆಚೆ ಸೊಭಾಯೆಕ್, ತಿಚ್ಯಾ ವೆವೆಗ್ಳ್ಯಾ ರುಪಾಂಕ್ ಮ್ಹಜ್ಯಾ ಭುರ್ಗೆಪಣಾರಚ್ ಮ್ಹಾಕಾ ವೊಳಕ್ ಕರುನ್ ದಿಲ್ಲ್ಯಾ ಮ್ಹಜ್ಯಾ ಆವಯ್ ಬಾಪಾಯ್ಕ್ ಹಾಂವ್ ಸದಾಂಕಾಳ್ ರಿಣ್ಕಾರಿ. ಹಾಂವೆಂ ತ್ಯಾ ಉಪ್ರಾಂತ್ ಪಸಂದ್ ಕರುಂಕ್ ಧರಲ್ಲ್ಯಾ ಜಾಯ್ತ್ಯಾ ಕವಿತಾಂ ಪಯ್ಕಿ ಠಾಗೋರಾಚೆಂ ಗೀತಾಂಜಲಿ ಆನಿ ವೊಲ್ಟ್ ವ್ಹಿಟಮನಾಚೆಂ 'ಪ್ಯಾಸೇಜ್ ಟೂ ಇಂಡಿಯಾ' ಆಸಾತ್. ಕವಿತೆಚಿಂ ಜಾಯ್ತಿಂ ವ್ಯಾಖ್ಯಾನಾಂ ಹಾಂವೆಂ ಆಯ್ಕಲ್ಯಾಂತ್. ಪುಣ್ ವಿಲಿಯಮ್ ವರ್ಡ್ಸ್‍ವರ್ತಾಚೆಂ ವ್ಯಾಖ್ಯಾನ್ ಮ್ಹಾಕಾ ಚಡಿತ್ ಪಸಂದೆಚೆಂ: ತೊ ಮ್ಹಣ್ತಾ: “deep emotions recalled in tranquility” for it is only in tranquility that one is able to fathom the eternal varities and the great harmony and beauty in all of creation.
"ಮ್ಹಜಿ ನಿಮಾಣೀ ಧುವ್ ಸೀಮಾ, 1999 ವರ್ಸಾ ಮರಣ್ ಪಾವ್ತಾನಾ, ಏಕ್ ತರ್ನಿ ಪತ್ರಕಾರ್ ಜಾವ್ನಾಸ್ಲಿ. ತಿಕಾ ಕವಿತೆ ಖಾತೀರ್ ನ್ಯೂಯೋರ್ಕಾಂತ್ ತಶೆಂ ಕೈರೊಂತ್ ಜಾಯ್ತಿಂ ಇನಾಮಾಂ ಲಾಭಲ್ಲಿಂ. ಥಂಯ್ಸರ್ ತಿಣೆಂ ತಿಚೆಂ ಹೈಸ್ಕೂಲಾಚೆಂ ಆನಿ ಪ್ರಾಥಮಿಕ್ ಶಿಕಪ್ ಕೆಲ್ಲೆಂ. ತಿ ಏಕ್ ಡೈರಿ ಸಾಂಬಾಳ್ತಾಲಿ ಆನಿ ಸಗ್ಳೆಂ ಕವಿತೆದ್ವಾರಿಂ ಬರಯ್ತಾಲಿ" ಅಶೆಂ ತಾಂಣಿ ಸಾಂಗ್ಲೆಂ.
ಉಗ್ತಾವಣ್ ಸುವಾಳ್ಯಾ ಉಪ್ರಾಂತ್ ಕವಿ ಪೂರ್ಣನಂದಾಚಾರಿಚ್ಯಾ ಅಧ್ಯಕ್ಷಪಣಾರ್ ಬಹುಭಾಶಾ ಕವಿಗೋಷ್ಟಿ ಚಲ್ಲಿ. ಯೋಗಿನಿ ಆಚಾರ್ಯ, ಎರಿಕ್ ಸೋನ್ಸ್, ಸಿಜ್ಯೆಸ್ ತಾಕೊಡೆ, ಫೆಲ್ಸಿ ಲೋಬೊ, ಜ್ಞಾನದೇವ್ ಮಲ್ಯಾ, ನೀಲ್ಭಾ ಖಾಂಡೇಕಾರ್ ಹಾಂಣಿ ಕೊಂಕಣಿಚ್ಯೊ ಕವಿತಾ ವಾಚ್ಲ್ಯೊ ಜಾಲ್ಯಾರ್ ಅಂತರಾಷ್ಟ್ರೀಯ್ ನಾಮ್ಣೆಚಿ ತಮಿಳ್ ಕವಯಿತ್ರಿ ಸಲ್ಮಾ, ಇಂಗ್ಲಿಷ್ ಕವಯಿತ್ರಿ ನಮಿತಾ ವರ್ಮಾ, ತುಳು ಕವಿ ವಿ. ಕೆ. ಯಾದವ್ ಹಾಂಣಿ ತಾಂಚ್ಯೊ ಕವಿತಾ ಪೇಶ್ ಕೆಲ್ಯೊ. ಮೆಲ್ವಿನ್ ರೊಡ್ರಿಗಸಾನ್ ಕೆಲ್ಲೊ ಹ್ಯಾ ತೆಗಾಂಯ್ಚೊ ಅನುವಾದ್ ಹ್ಯಾ ಸಂದರ್ಭಾರ್ ಎವ್ರೆಲ್ ರೊಡ್ರಿಗಸ್ ತಶೆಂ ರೋಶನ್ ಡಿಸೋಜಾ ಹಾಂಣಿ ವಾಚ್ಲೊ.
ಹ್ಯಾ ನಂತರ್ ನೆಲ್ಸನ್ ಆನಿ ಲವೀನಾ ರೊಡ್ರಿಕ್ಸ್ ಪಯ್ಲೊ ಚಾಫ್ರಾ ದೆಕೊಸ್ತಾ ಸ್ಮಾರಕ್ ಭುರ್ಗ್ಯಾಂಚೊ ಕವಿತಾ ವಾಚನ್ ಸ್ಪರ್ದೊ ಚಲ್ಲೊ. ತೆರಾ ಭುರ್ಗ್ಯಾಂನಿ ಹಾಂತುಂ ವಾಂಟೊ ಘೆತ್ಲೊ. ವೊರಯ್ಣಾರ್ ಜಾವ್ನ್ ಹೇಮಾಚಾರ್ಯ, ಅನ್ವೇಷಾ ಸಿಂಗ್‌ಬಾಳ್, ಮ್ಯಾಕ್ಸಿಮ್ ಲೋಬೊ, ಗುರು ಬಾಳಿಗಾ, ವಿಲಿಯಮ್ ಪಾಯ್ಸ್ ಆನಿ ಮೆಲ್ವಿನ್ ರೊಡ್ರಿಗಸ್ ಆಸಲ್ಲೆ. ಇನಾಮಾಂ ಹೆ ಪರಿಂ ಆಸಾತ್:
ಪಯ್ಲೆಂ: ಓಸ್ಟಿನ್ ಡಿಕುನ್ಹಾ, ರು.2000, ಪ್ರಮಾಣ್ ಪತ್ರ್, ಯಾದಸ್ತಿಕಾ
ದುಸ್ರೆಂ: ಪ್ರಿಥುಮಾ ಮೊಂತೇರೊ, ರು. 1500, ಪ್ರಮಾಣ್ ಪತ್ರ್, ಯಾದಸ್ತಿಕಾ
ತಿಸ್ರೆಂ: ಆನ್ನಾಲಿಸಾ ಡಿಸಿಲ್ವಾ, ರು. 1000, ಪ್ರಮಾಣ್ ಪತ್ರ್, ಯಾದಸ್ತಿಕಾ
ಪ್ರೋತ್ಸಾಹಕ್ ಇನಾಮಾಂ: ಗ್ರೇಶಲ್ ಕ್ವಾಡ್ರಸ್, ಶೈನಾ ಡಿಸಿಲ್ವಾ, ವಿಯೋನ್ ಪ್ರೆಸ್ಟನ್ ಲೋಬೊ. ಹರ್ಯೆಕ್ಲ್ಯಾಕ್ ರು. 500 ಆನಿ ಪ್ರಮಾಣ್ ಪತ್ರ್
ದೊನ್ಪಾರಾಂ ಜೆವ್ಣಾ ವೆಳಾರ್ ಸಭಿಕಾಂ ಮದ್ಲ್ಯಾ ಕೊಣಾಯ್ಕಿ ಕವಿತಾ ವಾಚನ್ ಕರ್‍ಚೊ ಆವ್ಕಾಸ್ ಆಸಲ್ಲೊ. ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ, ಸನ್ನು ಮೊನಿಸ್, ಗೊಂಯ್, ಭಟ್ಕಳ್ ತಶೆಂ ಹೆರ್ ಪ್ರದೇಶಾಂತ್ಲ್ಯಾಂನಿ ಹ್ಯಾವೆಳಾ ಕವಿತಾ ವಾಚ್ಲ್ಯೊ. ಸ್ಟೇನಿ ಆನಿ ಗ್ರೆಟ್ಟಾ ಲುವಿಸ್ ಹಾಂಚ್ಯಾ ಲಗ್ನಾಚೊ ದೀಸ್ ಜಾಲ್ಲ್ಯಾನ್ ಕವಿತಾ ಟ್ರಸ್ಟಾನ್ ತಾಂಚೆ ಥಾವ್ ಕೇಕ್ ಕಾತರ್ನ್ ಲೊಕಾಹುಜಿರ್ ತಾಂಕಾಂ ಉಲ್ಲಾಸಿಲೆಂ.
ದೊನ್ಪಾರಾಂ ಉಪ್ರಾಂತ್ ಚಲಲ್ಲ್ಯಾ ರೋಹನ್ ಆನಿ ಲವೀಟಾ ಮೊಂತೇರೊ ಚೊವ್ತ್ಯಾ ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಂತ್ ಆಟ್ರಾ ಯುವಜಣಾಂನಿ ಭಾಗ್ ಘೆತಲ್ಲೊ. ವೊರಯ್ಣಾರ್ ಜಾವ್ನ್ ಚೇತನ್ ಆಚಾರ್ಯ, ಮ್ಯಾಕ್ಸಿಮ್ ಲೋಬೊ, ಗುರು ಬಾಳಿಗಾ, ಎಂಡ್ರ್ಯೂ ಡಿಕುನ್ಹಾ, ವಿಲಿಯಮ್ ಪಾಯ್ಸ್ ಆನಿ ಮೆಲ್ವಿನ್ ರೊಡ್ರಿಗಸ್ ಹಾಜರ್ ಆಸಲ್ಲೆ. ಇನಾಮಾಂ ಹೆಪರಿಂ ಆಸಾತ್:
ಪಯ್ಲೆಂ: ಸುಪ್ರಿಯಾ ಕಾಣ್ಕೋಣ್ಕಾರ್, ರು.2500, ಪ್ರಮಾಣ್ ಪತ್ರ್, ಯಾದಸ್ತಿಕಾ
ದುಸ್ರೆಂ: ಮಂಗೇಶ್ ಹರಿಜನ್, ರು. 2000, ಪ್ರಮಾಣ್ ಪತ್ರ್, ಯಾದಸ್ತಿಕಾ
ತಿಸ್ರೆಂ: ಮಿಲಿಂದ್ರಾ ವೆಳಿಪ್, ರು. 1000, ಪ್ರಮಾಣ್ ಪತ್ರ್, ಯಾದಸ್ತಿಕಾ
ಪ್ರೋತ್ಸಾಹಕ್ ಇನಾಮಾಂ: ಜೈಸನ್ ಸಿಕ್ವೇರಾ, ನಝೀಫ್ ಮನೆಗಾರ್ ಆನಿ ತನ್ವಿ ಜಾಂಬ್ಳೆ. ಹರ್ಯೆಕ್ಲ್ಯಾಕ್ ರು. 500 ಆನಿ ಪ್ರಮಾಣ್ ಪತ್ರ್
ತ್ಯಾನಂತರ್ ಡೊ ರಾಜಯ್ ಪವಾರಾನ್ ಕವಿ ರಮೇಶ್ ವೆಳುಸ್ಕಾರಾಲಾಗಿಂ ಸಂವಾದ್ ಚಲೊವ್ನ್ ವೆಲೊ. ಎಂಡ್ರ್ಯು ಡಿಕುನ್ಹಾನ್ ರಾಜಯಾಚಿ ಆನಿ ವೆಳುಸ್ಕಾರಾಚಿ ವೊಳಕ್ ಕರುನ್ ದಿಲಿ. ಸಂವಾದಾಚೊ ವಿಷಯ್ ಆಸಲ್ಲೊ: 'ಮ್ಹಜಿ ಜೀಣ್, ಮ್ಹಜಿ ಕವಿತಾ'. ಕಾವ್ಯಾಕ್ ತಶೆಂ ಜಿವಿತಾಕ್ ಸಂಬಂಧ್ ಜಾಲ್ಲ್ಯಾ ರಾಜಯಾಚ್ಯಾ ಅಪ್ರೂಪ್ ಸವಾಲಾಂಕ್ ರಮೇಶ್ ವೆಳುಸ್ಕಾರಾನ್ ಜಾಪಿ ದಿಲ್ಯೊ. ಕಾಂಯ್ ಸಂದರ್ಭಾಂನಿ ಆಪ್ಲೆ ಖಾಶೆಲೆ ಶೈಲೆನ್ ಕವಿತಾ ವಾಚುನ್ ತಾಣೆಂ ಸಭಿಕಾಂಕ್ ಖುಶಿ ಕೆಲೆಂ.
ಸಾಂಜೆರ್ ಚಲಲ್ಲ್ಯಾ ಸಮಾರೋಪ್ ಸುವಾಳ್ಯಾಕ್ ಮುಕೆಲ್ ಸೈರೊ ಮ್ಹಣುನ್ ಕವಿ ಮಾಧವ್ ಬೋರ್ಕರ್ ಆಸಲ್ಲೆ ತರ್ ಮಾನಾಚೆ ಸೈರೆ ಮ್ಹಣುನ್ ಬಾರ್ಕೂರ್ ಇಗರ್ಜೆಚೊ ವಿಗಾರ್ ಫಾ. ವಲೇರಿಯನ್ ಮೆಂಡೊನ್ಸಾ ತಶೆಂ ಉದ್ಯಮಿ ಎಮ್. ಎ. ರೆಹಮಾನ್ ಆಸಲ್ಲೆ. ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಆಪ್ಲ್ಯಾ ಯೆವ್ಕಾರ್ ಭಾಶಣಾಂತ್ ಚಲಿ ಜಿವಾಚೆರ್ ಚಲ್ಚ್ಯಾ ಅತ್ತ್ಯಾಚಾರಾವಿಶಿಂ ಉಲ್ಲೇಕ್ ಕರುನ್ ಸ್ತ್ರೀಯಾಂನಿ ಆಪ್ಣಾಥಂಯ್ ಘಡುನ್ ಆಸ್ಚ್ಯಾ ಹೆರ್ ಗಜಾಲಿಂವಿಶಿಂ ಕವಿತಾಂ ಮಾರಿಫಾತ್ ತಾಳೊ ಉಟೊಂವ್ಕ್ ಉಲೊ ದಿಲೊ ಆನಿ ತ್ಯಾ ಮಾರಿಫಾತ್ ಸಮಾಜಾಂತ್ ಜಾಗ್ ಹಾಡುಂಕ್ ಜಾಯ್ ಮ್ಹಣುನ್ ಸಾಂಗ್ಲೆಂ.
ಭಟ್ಕಳ್ಚೊ ಕವಿ ಇಕ್ಬಾಲ್ ಸಯೀದಿ ಹಾಂಕಾಂ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಜಾವ್ನ್ ರುಪಯ್ 10000, ಯಾದಸ್ತಿಕಾ ಆನಿ ಮಾನ್ ಪತ್ರ್ ಸೈರ್‍ಯಾಂನಿ ಭೆಟಯ್ಲೆಂ. ವಿಲಿಯಮ್ ಪಾಯ್ಸಾನ್ ಸಯೀದಿಚಿ ವೊಳಕ್ ಕರುನ್ ದಿಲಿ. ಇಕ್ಬಾಲಾನ್ ಹ್ಯಾ ಸಂದರ್ಭಾರ್ ಕವಿತಾ ಟ್ರಸ್ಟಾಚೊ ಉಪ್ಕಾರ್ ಮಾಂದ್ಲೊ.
ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಸಾತ್ವ್ಯಾ ಅಖಿಲ್ ಭಾರತ್ ಭುರ್ಗ್ಯಾಂಚ್ಯಾ ಕವಿತಾ ಲಿಖ್ಚೆ ಸರ್ತೆಂತ್ ಜಿಕಲ್ಲ್ಯಾಂಕ್ ಹ್ಯಾ ಸಂದರ್ಭಾರ್ ಇನಾಮಾಂ ವಾಂಟ್ಲಿಂ. ಎವ್ರೆಲ್ ರೊಡ್ರಿಗಸಾನ್ ಸರ್ತೆವಿಶಿಂ ಮ್ಹಾಯೆತ್ ದಿಲಿ.
ಪಯ್ಲೆಂ: ಅಶ್ಮಿ ದಶರಥ್ ನಾಯ್ಕ್, ರು. 2000, ಪ್ರಮಾಣ್ ಪತ್ರ್ ಆನಿ ಯಾದಸ್ತಿಕಾ
ದುಸ್ರೆಂ: ಶ್ರೀಲಕ್ಷ್ಮಿ ಶೆಣೈ ರು. 1000 ಪ್ರಮಾಣ್ ಪತ್ರ್ ಆನಿ ಯಾದಸ್ತಿಕಾ
ತಿಸ್ರೆಂ: ಎಶ್ಲಿನ್ ಕ್ರೆಸ್ ಫೆರ್ನಾಂಡಿಸ್ ಆನಿ ದಿವ್ಯಾ ಸೋಮನಾಥ್ ಪಾರ್ಸೆಕಾರ್, ದೊಗಾಂಯ್ಕಿ ರು. 750 ಪ್ರಮಾಣ್ ಪತ್ರ್ ಆನಿ ಯಾದಸ್ತಿಕಾ
ಹ್ಯಾ ಸಂದರ್ಭಾರ್ ಉಲಯಿಲ್ಲ್ಯಾ ಮಾಧವ್ ಬೋರ್ಕರಾನ್ "ಕವಿತಾ ಆಜ್ ಲೊಕಾ ಮಧೆಂ ಆಸಾ ಯಾ ಲೊಕಾಥಾವ್ನ್ ಪಯ್ಸ್ ಗೆಲ್ಯಾ - ಹೊ ವಿಚಾರ್ ಕರುಂಕ್ ಜಾಯ್" ಮ್ಹಳೆಂ. "ಕವಿತಾ ಫೆಸ್ತಾಚ್ಯಾ ಹ್ಯಾ ಸಂದರ್ಭಾರ್ ಸರ್‍ವಾಂಚ್ಯೊ ಕವಿತಾ ಅಯ್ಕಲ್ಯಾ ಉಪ್ರಾಂತ್ ಆಮ್ಚೆ ಕವಿ ಭೊಂವ್ತಣಿಂಚ್ಯಾ ಸಂಗ್ತಿಂಲಾಗಿಂ ಚಡಿತ್ ಕರುನ್ ಸ್ಪಂದನ್ ಕರ್‍ತಾತ್ ಮ್ಹಣುನ್ ಕಳುನ್ ಯೆತಾ" ಮ್ಹಣ್ ಸಾಂಗಲ್ಲ್ಯಾ ತಾಂಣಿ ಕೊಂಕಣಿ ಲೊಕಾಥಂಯ್ ಕವಿತಾ ಉರಂವ್ಚ್ಯಾಕ್ ಕವಿತಾ ಟ್ರಸ್ಟಾನ್ ಕರ್‍ಚ್ಯಾ ವಾವ್ರಾಚಿ ತೋಖ್ಣಾಯ್ ಕೆಲಿ. ಮಾನಾಚೆ ಸೈರೆ ಜಾವ್ನ್ ಆಯಿಲ್ಲ್ಯಾ ಫಾ. ವಲೇರಿಯನ್ ಮೆಂಡೊನ್ಸಾ ಆನಿ ಎಮ್. ಎ. ರೆಹಮಾನ್ ಹ್ಯಾ ಸಂದಭಾರ್ ಉಲಯ್ಲೆ. ಆಲ್ವಿನ್ ಆಂದ್ರಾದೆನ್ ಧನ್ಯವಾದ್ ಭೆಟಯ್ಲೆ.
बारकूर चौळिकेरेंत कविंचें दरबार. कविता फेस्त-२०१५ रंगलें.
बारकूर चौळिकेरेक लागोन आसच्या स्टेनी आनी ग्रेट्टा लुविस हांच्या घरच्या आंगणांत २०१५ जनेर ११ तारिकेर लग्नाचो संभ्रम म्हळळेबरी माटव उबारल्लो. तळ्याच्या एका पोंताथावन घरच्या दारा पर्यांत सुंर्गार केल्लो. सकाळीं थंड वारें व्हाळतालें. ह्या मधें सकाळीं नोव वोरां पयलेंच मंगळूर, गोंय आनी हेर प्रदेशां थावन कवितेच्या पावसांत न्हावंक तयार जावन म्हळळेबरी कवी तशें काव्यरसीक एकटांय जाताना, सगळ्या वातावरणाचो रंग बदल्लो. नोवें कविता फेस्त सुरू जांवची घडी लागीं पावल्ली.
सकाळिंचो नास्टो जातच, तळ्याच्या एके पलतडी थावन थळीय वाड्याचो गुरकार मानेस्त स्टेनी पायस हाणे धोल बडोवन पुरशांवाक चालन दिलें आनी कार्याक बरें मागलें. तिनशांक मिकवोन लोकांनी ह्या एका पुरशांवांत भाग घेतलो.
कार्याचो सुतारी जावनासल्ल्या एरीक सोन्सान सरवांक माटवाक येवकार मागतच, आपल्या सांगोड्यां बराबर कविता फेस्ताचें आशय गीत 'मान म्हजी पांयां तुज्या' गायलें. उपरांत काऱ्याचे उगतावणे खातीर सैर्यांक वेदीक आपयलें.
सुर्वेर कार्यदर्शी किशोर गोन्साल्विसान कविता फेस्तान येदोळ पर्यांत कविंचेर घाल्लो प्रभाव मटव्यान सांगलो आनी सैर्यांची वोळक करून दिली तशें सरवांक कविता फेस्ताक येवकार मागलो. मेल्विन रोड्रीगसान दशेंबर निमाण्या हफत्यांत संसार त्याग केल्ल्या माधवी सर्देसायी तशें जे. बी. मोरायस हांकां शृददांजली वोंपली आनी सरवांनी मौन प्रार्थन केलें.
उपरांत वेदीर आसल्ल्या सैर्यांनी येदोळचे दस्तुरे बरी गुलोबाच्यो पाकळ्यो वाऱ्यांत उबोवंक सोडून कविता फेस्ताचें उगतावण केलें. ह्या उपरांत माटवांत हाजर आसल्ल्या ट्रस्टिंनी, कविता ट्रस्टाच्या दातारांनी, कविता फेस्ताच्या पोषकांनी, संघ संस्थ्यांच्या प्रतिनिधिंनी, गांवच्या मुकेल्यांनी दालियेंत दवरल्ल्यो पाकळ्यो हरवाणांतल्या उदकांत उपयेवंक सोडून फेस्ताच्या कार्यांत तांचें भागेलिपण जाहीर केलें.
ह्याच संदरभार मुकेल सैरो पासकल आलेन नजरेतान म्याक्सीम लोबो हाचें कविता आसवादनाचें, प्रबंध पुस्तक 'कवित्वाचें नंदनावन' लोकारपण केलें. दालियेंत मांडून दवरल्ल्या फुलां भितर आसल्ल्या पुस्तकाच्यो सुर्विल्यो प्रतियो तांणी वेदी वयल्या सैर्यांक दिल्यो. कवी एंडऱ्यू एल. डिकुन्हान म्याकसिमाची तशें पुस्तकाची वोळक करून दिली तर, म्याकसिमान ह्या पुस्तकाची पाट भूंय विवरून सांगली आनी ताका सहकार दिल्ल्यांचो आभार मांदलो.
मानाचे सैरे जावन आयिल्ल्या कोंकणी भास आनी संसकृती प्रतिषटान हाचो अध्यक्ष बस्ती वामन शेणै तशें दी एक्सप्रेशन्स अध्यक्ष नवीन डायस हांणी कविता फेस्ताक तांचे संदेश दितच, मुकेल सैरो जावन आयिल्लो निवृत्त रायभारी पासकल आलेन नजरेत उलोवन "नशिबान, म्हज्या आवय बापाय वरवीं, कवितेचेर म्हाका धाराळ मोग उबजालो आनी कविता म्हळ्यार उत्रां सांगाता घालन प्रासाचीं वाक्यां रच्च्या प्रास व्हर्ती एक कला जावनासा म्हळ्ळी जाणवाय हांवें जोडल्ली. तांचे थावन हांवें पयले पावटीं थोड्यो कविता आनी शेक्सपियराच्यो थोड्यो सोलिलोकी आयकल्ल्यो. ह्यावर्वीं म्हज्या मानसिक वाडावळिचें सुर्विलें रूप हांवें जोडल्लें.
"म्हजे आवयन गद्य आनी कविता मधलो फरक बोव संपे तशें प्रभावित रितीन आमकां भुरग्यांक सांगल्लो. ती एक फामाद कांतार गायताली आनी तांतले सब्द वाचून सांगताली. कविता म्हळ्यार गद्याक संगीत बसोंवचें आनी त्या गद्याची सोभाय आनी अर्थ वाडंवचो म्हण ती आमकां सांगताली. थोडे पावटीं ती विलियम वर्ड्स्वरताची ड्याफोडिल्स कविताय वाचून सांगताली,
"पुण म्हजी चड मोगाची कविता म्हळ्यार बैरनान सागोराविशीं बरयिल्ली. ही कविता म्हजी आवय कांयींच चुकनास्तां सांगताली आनी तिचे ८९ वर्सां प्रायेर २००५ जुलायच्या १० तारिकेर तिणें प्राण सोडच्या हपत्या आदीं सयत ही कविता सगळी तिणे सांगल्ली. फ्रेम घाल्ले हे कवितेची प्रती, जी तिणे म्हज्या ५५ वर्सांच्या जाल्ल्या दिसाक उडासाची काणीक जावन दिल्ली, ती म्हजें व्हरतें एक खजान म्हळळेबरी म्हजेलागीं आसा.
"म्हज्या बापायन शेक्सपियराची म्हाका पयली वोळक करून दिल्ली आनी नाटकांनी सयत कविता हाडूंक जाता म्हळ्ळी जाणवाय ताचेथावन म्हाका लाभल्ली. म्हजो बापय जायतेपावटीं दर्याक उपयेवंक वेताना या सांजेचें पासायो मारूंक वेताना, म्हजी आवय ताका जागवण दिताली. तवळ म्हजो बापय हासून हासून शेक्सपियराच्या जूलियस सीजराच्यो वोळी सांगतालो: "भिंवकुरे तांच्या मरणा पयलें जायते पावटीं मरतात. धैरादीक मनीस एकच पावटीं मरतात." हें नासतां जायते पावटीं ह्यामलेटांत पोलोनियसास आपल्या पुताक सांगची बूदबाळ तो म्हाकाय दितालो:
"कवितेचे सोभायेक, तिच्या वेवेगळ्या रुपांक म्हज्या भुरगेपणारच म्हाका वोळक करून दिल्ल्या म्हज्या आवय बापायक हांव सदांकाळ रिणकारी. हांवें त्या उपरांत पसंद करूंक धरल्ल्या जायत्या कवितां पयकी ठागोराचें गीतांजली आनी वोल्ट व्हिटमनाचें 'प्यासेज टू इंडिया' आसात. कवितेचीं जायतीं व्याख्यानां हांवें आयकल्यांत. पूण विलियम वर्ड्स्वरताचें व्याख्यान म्हाका चडीत पसंदेचें: तो म्हणता: “deep emotions recalled in tranquility” for it is only in tranquility that one is able to fathom the eternal varities and the great harmony and beauty in all of creation.
"म्हजी निमाणी धुव सीमा, १९९९ वर्सा मरण पावताना, एक तरनी पत्रकार जावनासली. तिका कविते खातीर न्यूयोरकांत तशें कैरोंत जायतीं इनामां लाभल्लीं. थंयसर तिणें तिचें हैसकूलाचें आनी प्राथमीक शिकप केल्लें. ती एक डैरी सांबाळताली आनी सगळें कवितेद्वारीं बरयताली" अशें तांणी सांगलें.
उगतावण सुवाळ्या उपरांत कवी पूर्णनंदाचारिच्या अध्यक्षपणार बहुभाशा कविगोष्टी चल्ली. योगिनी आचार्य, एरीक सोन्स, सिजयेस ताकोडे, फेल्सी लोबो, ज्ञानदेव मल्या, नीलभा खांडेकार हांणी कोंकणिच्यो कविता वाचल्यो जाल्यार अंतराष्ट्रीय नामणेची तमिळ कवयित्री सल्मा, इंगलिष कवयित्री नमिता वर्मा, तुळू कवी वी. के. यादव हांणी तांच्यो कविता पेश केल्यो. मेल्विन रोडरिगसान केल्लो ह्या तेगांयचो अनुवाद ह्या संदरभार एवरेल रोड्रीगस तशें रोशन डिसोजा हांणी वाचलो.
ह्या नंतर नेल्सन आनी लवीना रोडरिक्स पयलो चाफ्रा देकोसता स्मारक भुरग्यांचो कविता वाचन स्पर्दो चल्लो. तेरा भुरग्यांनी हांतूं वांटो घेतलो. वोरयणार जावन हेमाचार्य, अनवेषा सिंगबाळ, म्याक्सीम लोबो, गुरू बाळिगा, विलियम पायस आनी मेल्विन रोड्रीगस आसल्ले. इनामां हे परीं आसात:
पयलें: ओसटीन डिकुन्हा, रु.२०००, प्रमाण पत्र, यादस्तिका
दुसरें: प्रिथुमा मोंतेरो, रु. १५००, प्रमाण पत्र, यादस्तिका
तिसरें: आननालिसा डिसिलवा, रु. १०००, प्रमाण पत्र, यादस्तिका
प्रोत्साहक इनामां: ग्रेशल क्वाडरस, शैना डिसिलवा, वियोन प्रेसटन लोबो. हरयेकल्याक रु. ५०० आनी प्रमाण पत्र
दोनपारां जेवणा वेळार सभिकां मदल्या कोणायकी कविता वाचन करचो आवकास आसल्लो. फ्रान्सिस फेर्नांडिस काससिया, सननु मोनीस, गोंय, भटकळ तशें हेर प्रदेशांतल्यांनी ह्यावेळा कविता वाचल्यो. स्टेनी आनी ग्रेट्टा लुविस हांच्या लग्नाचो दीस जाल्ल्यान कविता ट्रसटान तांचे थाव केक कातर्न लोकाहुजीर तांकां उल्लासिलें.
दोनपारां उपरांत चलल्ल्या रोहन आनी लवीटा मोंतेरो चोवत्या अखील भारत कोंकणी कविता वाचन सरतेंत आटरा युवजणांनी भाग घेतल्लो. वोरयणार जावन चेतन आचार्य, म्याक्सीम लोबो, गुरू बाळिगा, एंडऱ्यू डिकुन्हा, विलियम पायस आनी मेल्विन रोड्रीगस हाजर आसल्ले. इनामां हेपरीं आसात:
पयलें: सुपरिया काणकोणकार, रु.२५००, प्रमाण पत्र, यादस्तिका
दुसरें: मंगेश हरिजन, रु. २०००, प्रमाण पत्र, यादस्तिका
तिसरें: मिलिंद्रा वेळीप, रु. १०००, प्रमाण पत्र, यादस्तिका
प्रोत्साहक इनामां: जैसन सिकवेरा, नझीफ मनेगार आनी तनवी जांबळे. हरयेकल्याक रु. ५०० आनी प्रमाण पत्र
त्यानंतर डो राजय पवारान कवी रमेश वेळुसकारालागीं संवाद चलोवन वेलो. एंडऱ्यु डिकुन्हान राजयाची आनी वेळुसकाराची वोळक करून दिली. संवादाचो विषय आसल्लो: 'म्हजी जीण, म्हजी कविता'. काव्याक तशें जिविताक संबंध जाल्ल्या राजयाच्या अपरूप सवालांक रमेश वेळुसकारान जापी दिल्यो. कांय संदरभांनी आपले खाशेले शैलेन कविता वाचून ताणें सभिकांक खुशी केलें.
सांजेर चलल्ल्या समारोप सुवाळ्याक मुकेल सैरो म्हणून कवी माधव बोरकर आसल्ले तर मानाचे सैरे म्हणून बारकूर इगर्जेचो विगार फा. वलेरियन मेंडोन्सा तशें उद्यमी एम. ए. रेहमान आसल्ले. कविता ट्रस्ट अध्यक्ष मेल्विन रोडरिगसान आपल्या येवकार भाशणांत चली जिवाचेर चलच्या अत्त्याचाराविशीं उल्लेक करून स्त्रीयांनी आपणाथंय घडून आसच्या हेर गजालिंविशीं कवितां मारिफात ताळो उटोवंक उलो दिलो आनी त्या मारिफात समाजांत जाग हाडूंक जाय म्हणून सांगलें.
भटकळचो कवी इकबाल सयीदी हांकां मथायस कुटम कविता पुरस्कार जावन रुपय १००००, यादस्तिका आनी मान पत्र सैर्यांनी भेटयलें. विलियम पायसान सयीदिची वोळक करून दिली. इकबालान ह्या संदरभार कविता ट्रसटाचो उपकार मांदलो.
चार्ल्स आनी तेरेजा रोड्रीगस स्मारक सातव्या अखील भारत भुरग्यांच्या कविता लिखचे सरतेंत जिकल्ल्यांक ह्या संदरभार इनामां वांटलीं. एवरेल रोडरिगसान सरतेविशीं म्हायेत दिली.
पयलें: अश्मी दशरथ नायक, रु. २०००, प्रमाण पत्र आनी यादस्तिका
दुसरें: श्रीलक्ष्मी शेणै रु. १००० प्रमाण पत्र आनी यादस्तिका
तिसरें: एशलीन क्रेस फेर्नांडिस आनी दिवया सोमनाथ पारसेकार, दोगांयकी रु. ७५० प्रमाण पत्र आनी यादस्तिका
ह्या संदरभार उलयिल्ल्या माधव बोरकरान "कविता आज लोका मधें आसा या लोकाथावन पयस गेल्या - हो विचार करूंक जाय" म्हळें. "कविता फेस्ताच्या ह्या संदरभार सरवांच्यो कविता अयकल्या उपरांत आमचे कवी भोंवतणिंच्या संगतिंलागीं चडीत करून स्पंदन करतात म्हणून कळून येता" म्हण सांगल्ल्या तांणी कोंकणी लोकाथंय कविता उरंवच्याक कविता ट्रसटान करच्या वावराची तोखणाय केली. मानाचे सैरे जावन आयिल्ल्या फा. वलेरियन मेंडोन्सा आनी एम. ए. रेहमान ह्या संदभार उलयले. आलविन आंद्रादेन धन्यवाद भेटयले.