ವಲ್ಲಿ ವಗ್ಗ -ಹಾಂಕಾಂ 2025ವ್ಯಾ ವರ್ಸಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್
ಕವಿತಾ ಟ್ರಸ್ಟಾನ್ ದಿಂವ್ಚೊ 2025ವ್ಯಾ ವರ್ಸಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ವಲ್ಲಿ ವಗ್ಗ ಕಾವ್ಯನಾಂವಾನ್ ಬರೊಂವ್ಚ್ಯಾ ವಲೇರಿಯನ್ ಡಿಸೋಜಾಕ್ ಫಾವೊ ಜಾಲಾ. ಹೊ ಪುರಸ್ಕಾರ್ ರು. 25,000, ಯಾದಸ್ತಿಕಾ ಆನಿ ಪ್ರಮಾಣ್ ಪತ್ರ್ ಆಟಾಪ್ತಾ. 2026 ಜನೆರ್, 11 ತಾರಿಕೆರ್ ಮದರ್ ತೆರೆಸಾ ಪೀಸ್ ಪಾರ್ಕ್, ಸೈಂಟ್ ಎಲೋಶಿಯಸ್ (ಪರಿಗಣಿತ್ ವಿಶ್ವವಿದ್ಯಾಲಯ್) ಹಾಂಗಾಸರ್ ಚಲ್ಚ್ಯಾ ವಿಸಾವ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ನಾಮ್ಣೆಚೆ ಕೊಂಕಣಿ ಲೇಖಕ್ ತಶೆಂಚ್ ಜ್ಞಾನಪೀಠ್ ಪುರಸ್ಕಾರ್ ಜೊಡ್ಪಿ ಕಥಾಕಾರ್ ದಾಮೋದರ್ ಮಾವ್ಜೊ ಹೊ ಪುರಸ್ಕಾರ್ ತಾಂಕಾಂ ಭೆಟಯ್ತಲೆ.
ವಲ್ಲಿ ವಗ್ಗ ಲಿಖ್ಣೆನಾಂವಾನ್ ಬರೊಂವ್ಚೆ ಕೊಂಕಣಿ-ಕನ್ನಡ ಕಥಾಕಾರ್ ಆನಿ ಕವಿ ಮಾನೆಸ್ತ್ ವಲೇರಿಯನ್ ಸೊಜ್, ದಕ್ಷಿಣ ಕನ್ನಡ ಜಿಲ್ಲ್ಯಾಚ್ಯಾ ಬಂಟ್ವಾಳ್ ಲಾಗ್ಸಾರ್ಚ್ಯಾ ನಿರ್ಕಾಣಾಂತ್, ವಗ್ಗ ಮ್ಹಳ್ಳೆ ಲ್ಹಾನ್ ಪೆಂಟೆಂತ್ ವಸ್ತಿ ಕರುನ್ ಆಸ್ಲಲ್ಯಾ ಪೀಟರ್ ಆನಿ ಮೇರಿ ಸೊಜಾಚೆಂ ಚೊವ್ತೆಂ ಬಾಳ್ ಜಾವ್ನ್, ಭಾರತಾಕ್ ಸ್ವಾತಂತ್ರ್ಯ್ ಮೆಳಲ್ಲ್ಯಾ ವರ್ಸಾ ಜುಲಾಯ್ಚೆ ಸತ್ತಾವೀಸ್ ತಾರಿಕೆರ್ ಜಲ್ಮಲೆ. ಸತ್ರಾ ವರ್ಸಾಂಚ್ಯೆ ಪ್ರಾಯೆರ್ ’ರಾಕ್ಣೊ’ ಪತ್ರಾಚೆರ್ ತಾಂಚಿ ಪಯ್ಲಿ ಕಥಾ ’ಸೊರ್ಯಾವರ್ವಿಂ ಚುರ್ಚುರೆ’ ಪರ್ಗಟ್ ಜಾಲಿ. ತ್ಯಾ ಉಪ್ರಾಂತ್ ಪಾಟ್ಲ್ಯಾ ಸಾಟ್ ವರ್ಸಾಂನಿ ವೆವೆಗ್ಳ್ಯಾ ನೆಮಾಳ್ಯಾಂನಿ, ಜಾಳಿಜಾಗ್ಯಾಂನಿ ತಶೆಂ ಕಥಾ-ಸಂಕಲನಾಂನಿ ತಾಂಚ್ಯೊ ಸುಮಾರ್ ದೆಡ್ಶೆಂ ಕವಿತಾ ಆನಿ ತಿತ್ಲ್ಯೊಚ್ ಕಥಾ, ಅಯ್ಶಾಂಚ್ಯಾಕೀ ಮಿಕ್ವುನ್ ಲೇಖನಾಂ, ಅಂಕಣ್ ಬರ್ಪಾಂ ಪರ್ಗಟ್ ಜಾಲ್ಯಾಂತ್.
’ದೊಂಗ್ರಾ ವಯ್ಲಿ ವಾಟ್’ (2007) ಆನಿ ’ನೆಕೆತ್ರಾಂ’ (2013) ತಾಂಚೆ ಕವಿತಾ ಸಂಗ್ರಹ್. ’ಜಿನ್ನಿ ಕೊಣಾಚೆಂ? (1966), ’ಸತ್ ಆನಿ ಜಿವಿತ್’ (1967), ’ಧುಳ್’ (1990) ಆನಿ ’ಖಾಂದಿ ಖುರಿಸ್’ (2015) ತಾಂಚೆ ಕಥಾ ಸಂಗ್ರಹ್. ಅಭಿರುಚಿ ಪ್ರಕಾಶನ್, ಮೈಸೂರ್ ಹಾಂಣಿ ತಾಂಚ್ಯಾ ಸತ್ರಾ ಕಾಣಿಯಾಂಚೊ ಸಂಗ್ರಹ್ ’ಹೆಗಲ ಶಿಲುಬೆ’ ನಾಂವಾಖಾಲ್ 2013 ವರ್ಸಾ ಕನ್ನಡಾಂತ್ ಪರ್ಗಟ್ ಕೆಲಾ.
2001 ವರ್ಸಾ ಕರ್ನಾಟಕ ರಾಜ್ಯ ಮಟ್ಟಾಚ್ಯಾ ಕನ್ನಡ ಕಥಾ ಸ್ಪರ್ಧ್ಯಾಂತ್ ತಾಚ್ಯೆ ’ಕಾಡಾಡಿ’ ಕಾಣ್ಯೆಕ್ ಪಯ್ಲೆಂ ಬಹುಮಾನ್ ಲಾಬ್ಲಾಂ ಆನಿ ಪ್ರಖ್ಯಾತ್ ಕನ್ನಡ ಸಾಹಿತಿ ಪ್ರೊ. ಜಿ. ಎಸ್. ಸಿದ್ದಲಿಂಗಯ್ಯ ಹಾಂಣೀ ವಲ್ಲಿ ವಗ್ಗಾಕ್ ಪರ್ಗಟ್ ಸನ್ಮಾನ್ ಕೆಲಾ.
ವಲ್ಲಿ ವಗ್ಗ ಬರೊವ್ಪಿ ಮಾತ್ರ್ ನ್ಹಯ್ ಕೊಂಕ್ಣಿ ಭಾಶೆಚೊ ಉರ್ಬೆವಂತ್ ವಾವ್ರಾಡಿ. ಮೈಸೂರ್ ಶಹರಾಂತ್ ಸ್ಥಾಪನ್ ಜಾಲ್ಲ್ಯಾ ಕೊಂಕ್ಣಿ ಕ್ರಿಶ್ಚಿಯನ್ ಎಸೋಸಿಯೇಶನಾಚೊ ತೊ ಪಯ್ಲೊ ಸಹ-ಕಾರ್ಯದರ್ಶಿ ಆನಿ 1991 ವರ್ಸಾ ಥಾವ್ನ್ ಸ ವರ್ಸಾಂ ಹ್ಯಾ ಸಂಘಾಚೊ ಅಧ್ಯಕ್ಷ್. ಕರ್ನಾಟಕ ಸರ್ಕಾರಾನ್ 1995 ವರ್ಸಾ ಸ್ಥಾಪನ್ ಕೆಲ್ಲ್ಯಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚ್ಯಾ ಸ್ಥಾಯಿ ಸಮಿತಿಚೊ ತೊ ಸಾಂದೊ ಆಸಲ್ಲೊ.
ತಾಂಕಾಂ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಿ ಗೌರವ್ ಪ್ರಶಸ್ತಿ (2010), ಕೊಂಕ್ಣಿ ಕುಟಮ್ ಬಾಹ್ರೇನ್ ಪ್ರಶಸ್ತಿ(2012), ದಾಯ್ಜಿ ದುಬಾಯ್ ಪ್ರಶಸ್ತಿ(2019), ಸಂದೇಶ ಸಾಹಿತ್ಯ್ ಪ್ರಶಸ್ತಿ(2020) - ಅಶೆಂ ಜಾಯ್ತ್ಯೊ ಪ್ರಶಸ್ತ್ಯೊ ಲಾಬ್ಲ್ಯಾತ್. 2020 ವರ್ಸಾ ಕರ್ನಾಟಕ ಸರ್ಕಾರಾಚ್ಯಾ ವಾರ್ತಾ ಮತ್ತು ಸಂಪರ್ಕ ಇಲಾಖ್ಯಾನ್ ವಲ್ಲಿ ವಗ್ಗ ಹಾಂಚೊ ಕೊಂಕ್ಣಿ-ಕನ್ನಡ ಸಾಹಿತ್ಯ್ ವಾವ್ರ್ ಮಾಂದುನ್ ಘೆವ್ನ್ 7 ಮಿನುಟಾಂಚೆಂ ಸಾಕ್ಷಚಿತ್ರ ಶ್ರೀಮತಿ ನಾಗಿಣಿಭರಣ ಹಿಚ್ಯಾ ನಿರ್ದೇಶನಾಖಾಲ್ ತಯಾರ್ ಕೆಲಾಂ. ನವೆಂಬರ್ 2020 ವರ್ಸಾ ತಾಂಕಾಂ ಏಕ್ ಲಾಖ್ ರುಪಯ್, ವೀಸ್ ಗ್ರಾಮ್ ಭಾಂಗ್ರಾ ಪದಕ್ ದೀವ್ನ್ ಕರ್ನಾಟಕಾಚ್ಯಾ ಮುಕೆಲ್ ಮಂತ್ರಿನ್ ವಲ್ಲಿ ವಗ್ಗ ಹಾಂಕಾಂ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ದೀವ್ನ್ ಸನ್ಮಾನ್ ಕೆಲಾ.
Joseph Mathias and Family
2008 ವರ್ಸಾ ದುಬಾಯ್ಚ್ಯಾ ಮೆರಿಟ್ ಫ್ರೈಟ್ ಸಿಸ್ಟಮ್ಸಾಚೆ ವೆವಸ್ಥಾಪಕ್ ದಿರೆಕ್ತೊರ್ ಜೋಸೆಫ್ ಮಥಾಯಸ್ ಹಾಂಣಿ ಆಪ್ಲ್ಯಾ ಕುಟ್ಮಾಚ್ಯಾ ನಾಂವಾನ್ ಸ್ಥಾಪನ್ ಕೆಲ್ಲ್ಯಾ ಹ್ಯಾ ಪುರಸ್ಕಾರ್ ಶಿಂಕ್ಳೆಂತ್ ವಲ್ಲಿ ವಗ್ಗ 18ವೊ ಪುರಸ್ಕಾರ್ ಮೆಳೊವ್ಪಿ ಕವಿ ಆಸಾ.
वल्ली वग्गा - हांकां 2025व्या वर्साचो मथायस कुटम कविता पुरस्कार
कविता ट्रस्टान दिंवचो 2025व्या वर्साचो मथायस कुटम कविता पुरस्कार वल्ली वग्गा काव्यनांवान बरोंवच्या वलेरियन डिसोजाक फावो जाला. हो पुरस्कार रू. 25,000, यादस्तीका आनी प्रमाण पत्र आटापता. 2026 जानेर, 11 तारकेर मदर तेरेसा पीस पार्क, सैंट एलोशियस (परिगणीत विश्वविद्यालय) हांगासर चलच्या विसाव्या कविता फेस्त संदर्भार नामणेचे कोंकणी लेखक तशेंच ज्ञानपीठ पुरस्कार जोडपी कथाकार दामोदर मावजो हो पुरस्कार तांकां भेटयतले.
वल्ली वग्गा लिखणे नांवान बरोंवचे कोंकणी-कन्नड कथाकार आनी कवी मानेस्त वलेरियन सोज, दक्षीण कन्नड जिल्ल्याच्या बंटवाळ लागसारच्या निर्काणांत, वग्गा म्हळ्ळे ल्हान पेंटेंत राबितो करून आसलल्या पीटर आनी मेरी सोजाचें चोवतें बाळ जावन, भारताक स्वातंत्र्य मेळल्ल्या वर्सा जुलायचे सत्तावीस तारकेर जल्मले. सत्रा वर्सांचे प्रायेर ’राकणो’ पत्राचेर तांची पयली कथा ’सोर्यावर्वीं चुरचुरे’ पर्गट जाली. त्या उपरांत फाटल्या साट वर्सांनी वेवेगळ्या नेमाळ्यांनी, जाळीजाग्यांनी तशें कथा-संकलनांनी तांच्यो सुमार देडशें कविता आनी तितल्योच कथा, अयशांच्याकी मिकवून लेखनां, अंकण बरपां पर्गट जाल्यांत.
’दोंग्रा वयली वाट’ (2007) आनी ’नेकेत्रां’ (2013) तांचे कविता संग्रह. ’जिन्नी कोणाचें? (1966), ’सत आनी जिवीत’ (1967), ’धूळ’ (1990) आनी ’खांदी खुरीस’ (2015) तांचे कथा संग्रह. अभिरुची प्रकाशन, मैसूर हांणी तांच्या सत्रा काणयांचो संग्रह ’हेगला शिलुबे’ नांवाखाल 2023 वर्सा कन्नडांत पर्गट केला.
2001 वर्सा कर्नाटक राज्य मट्टाच्या कन्नड कथा सर्तेंत ताचे ’काडाडी’ काणयेक पयलें बहुमान लाबलां आनी प्रख्यात कन्नड साहिती प्रो. जी. एस. सिद्दलिंगय्या हांणी वल्ली वग्गाक पर्गट सन्मान केला.
वल्ली वग्गा बरोवपी मात्र न्हय कोंकणी भाशेचो उरबेवंत वावराडी. मैसूर शहरांत स्थापन जाल्ल्या कोंकणी क्रिश्चियन एसोसियेशनाचो तो पयलो सह-कार्यादर्शी आनी 1991 वर्सा थावन स वर्सां ह्या संघाचो अध्यक्ष. कर्नाटक सर्कारान 1995 वर्सा स्थापन केल्ल्या कर्नाटक कोंकणी साहित्य अकादेमीच्या स्थायी समितिचो तो वांगडी आसल्लो.
तांकां, कर्नाटक कोंकणी साहित्य अकादेमीची गौरव प्रशस्ती (2010), कोंकणी कुटम बाह्रेन प्रशस्ती (2012), दायजी दुबाय प्रशस्ती (2019), संदेश साहित्य प्रशस्ती (2020) - अशें जायत्यो प्रशसत्यो लाबल्यात. 2020 वर्सा कर्नाटक सर्काराच्या वार्ता मत्तू संपर्क मंत्रालयान वल्ली वग्गा हांचो कोंकणी-कन्नड साहित्य वावर मांदून घेवन 7 मिनुटांचें साक्षचित्र श्रीमती नागिणीभरण हिच्या निर्देशनाखाल तयार केलां. नवेंबर 2020 वर्सा तांकां एक लाख रुपय, वीस ग्राम भांग्रा पदक दीवन कर्नाटकाच्या मुकेल मंत्रीन वल्ली वग्गा हांकां कर्नाटक राज्योत्सव प्रशस्ती दीवन सन्मान केला.
2008 वर्सा दुबायच्या मेरीट फ्रैट सिस्टम्साचे वेवस्थापक दिरेक्तोर जोसेफ मथायस हांणी आपल्या कुटमाच्या नांवान स्थापन केल्ल्या ह्या पुरस्कार शिंकळेंत वल्ली वग्गा 18वो पुरस्कार मेळोवपी कवी आसा.