ಮಂಗ್ಳುರಾಂತ್ 'ಆಂಗಾಂತ್ ಕವಿ ರಿಗ್ಲಾ' ಕವಿತೆಚೆರ್ ಭಾಸಾಭಾಸ್ ಆನಿ ಕವಿಗೋಷ್ಟಿ

ಮಂಗ್ಳುರಾಂತ್ 'ಆಂಗಾಂತ್ ಕವಿ ರಿಗ್ಲಾ' ಕವಿತೆಚೆರ್ ಭಾಸಾಭಾಸ್ ಆನಿ ಕವಿಗೋಷ್ಟಿ

ಕವಿತಾ ಟ್ರಸ್ಟಾಚೆಂ ಹ್ಯಾ ವರ್ಸಾಚೆಂ ದುಸ್ರೆಂ ಕಾರ್ಯೆಂ ಜಾವ್ನ್, ಏಕ್ ಕವಿಗೋಷ್ಟಿ ಹ್ಯಾಚ್ ಫೆಬ್ರೆರ್ ಮ್ಹಯ್ನ್ಯಾಚೆ 1 ತಾರಿಕೆರ್ ಮಂಗ್ಳುರ್ ಬಲ್ಮಠಾಂತ್ ಆಸ್ಚ್ಯಾ ಓರ್ಕಿಡ್ ಆರ್ಟ್ ಗ್ಯಾಲರಿಂತ್ ಚಲ್ಲಿ. ಗ್ಯಾಲರಿಚೊ ಯೆಜ್ಮಾನಿ ತಶೆಂ ಕವಿತಾ ಟ್ರಸ್ಟಾಚೊ ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಹಾಜರ್ ಆಸಲ್ಲ್ಯಾ ಸರ್‍ವಾಂಕ್ ಯೆವ್ಕಾರ್ ಮಾಗ್ತಚ್ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಟ್ರಸ್ಟಾಚೆಂ ಮಿಸಾಂವ್ ಸಾಂಗ್ಲೆಂ.

ಆಪ್ಲ್ಯಾ ಉಲೊವ್ಪಾಂತ್ ತೊ ಮ್ಹಣಾಲೊಕಿ "ಆಯ್ಲೆವಾರ್ ಕೊಂಕಣಿ ಕವಿತೆಕ್ ಬರೆ ದೀಸ್ ಆಯ್ಲ್ಯಾತ್‍ಶೆಂ ದಿಸ್ತಾ. ಪಾಟ್ಲ್ಯಾ ದೋನ್ ಮ್ಹಯ್ನ್ಯಾಂನಿ ವಿಲ್ಮಾ ಬಂಟ್ವಾಳ್ ಹಿಚೊ "ಮುಕ್ಡಿಂ", ಎಂಡ್ರ್ಯು ಎಲ್. ಡಿಕುನ್ಹಾಚೊ "ಆಯೆರಾಚೊ ಬೂಕ್", ವಿಲ್ಸನ್ ಕಟೀಲಾಚೊ "ಪೀಕ್ ಆನಿ ದೀಕ್", ವಿಲ್ಸನ್ ಕಯ್ಯಾರ್ ಆನಿ ವಿಲ್ಸನ್ ಕಟೀಲಾಚೊ "ತಸ್ವೀಂತ್", ಪ್ರಕಾಶ್ ನಾಯ್ಕಾಚೊ "ಕುತ್ತಳ್", ಮ್ಯಾಕ್ಸಿಮ್ ಲೋಬೊಚೆಂ ಪ್ರಬಂಧಾಂಚೆಂ ಪುಸ್ತಕ್ "ಕವಿತ್ವಾಚೆಂ ನಂದನಾವನ್", ವಾಲಾವ್ಲಿಕಾರಾಚೊ ಅನುವಾದ್ "ಮೇಘದೂತ್" ಆನಿ ಜಾಯ್ತಿಂ ಹೆರ್ ಕವಿತೆಚಿಂ ಪುಸ್ತಕಾಂ ಪರ್ಗಟ್ ಜಾಲ್ಯಾಂತ್.

"ಡೊ. ನಾಗೇಶ್‍ಕುಮಾರ್ ರಾವ್, ಎಂಡ್ರ್ಯು ಎಲ್ ಡಿಕುನ್ಹಾಚ್ಯಾ ಪುಸ್ತಕಾಂಕ್ ತಶೆಂ ಕೊಂಕಣಿ ಕವಿ ರಮೇಶ್ ವೆಳುಸ್ಕಾರಾನ್ ಹಿಂದಿಂತ್ ಬರಯಿಲ್ಲ್ಯಾ ಕವಿತಾ ಪುಸ್ತಕಾಕ್ ಮಾನ್ ಫಾವೊ ಜಾಲಾ.

"ಕವಿತಾ ಟ್ರಸ್ಟ್, ಯುವ ಸಾಹಿತ್ಯ್ ಸಮ್ಮೇಳನ್, ಗೊಂಯ್ ವಿಶ್ವವಿದ್ಯಾಲಯಾಂನಿ ಕವಿತಾ ವಾಚನಾಚ್ಯೊ, ಬರೊಂವ್ಚ್ಯೊ ಸರ್ತಿ ಚಲಯ್ಲ್ಯಾತ್. ಯುವ ಮಹೋತ್ಸವಾ ವೆಳಾರ್ ಕವಿತಾ ಸಾದರೀಕರಣ್ ಸರ್ತ್ ಚಲ್ಲ್ಯಾ. ವಿಶ್ವ ಕೊಂಕಣಿ ಕೇಂದ್ರಾಂತ್ ಇಂಜಿನಿಯರಿಂಗ್ ತಶೆಂ ದಾಕ್ತೆರ್ಗಿ ಶಿಕ್ಚ್ಯಾ ವಿದ್ಯಾರ್ಥಿಂ ಖಾತೀರ್ ಕವಿಗೋಷ್ಟಿ ಚಲ್ತಾತ್. ಹೊ ಕಾವ್ಯಶೆತಾಂತ್ ಸದಾಂ ಆಸ್ಚ್ಯಾ ಆಮ್ಕಾಂ ಸಂಭ್ರಮಾಚೊ ಕಾಳ್" ಅಶೆಂ ತಾಣೆ ಸಾಂಗ್ಲೆಂ. ಮುಕಾರ್ ಉಲೊವ್ನ್ "ಕವಿತೆಕ್ ಆಪುರ್ಬಾಯೆಚೊ ಭೊಂವಾರ್ ನಿರ್ಮಾಣ್ ಜಾಲಾ ಖರೆಂ. ಪುಣ್ ಆಮಿ ಆತಾಂ ಆಮ್ಚೆ ಕವಿತೆಚೊ ಸಾಹಿತೀಕ್ ಪಾಂವ್ಡೊ ಬಳ್ವಂತ್ ಕರ್‍ಚೆ ದೀಸ್ ಆಯ್ಲ್ಯಾತ್" ಮ್ಹಣುನ್ ತಾಣೆಂ ಸಾಂಗ್ಲೆಂ.

ಉಪ್ರಾಂತ್ ಚಲಲ್ಲೆ ಕವಿಗೋಷ್ಟಿಂತ್ ಎಕುಣ್ವೀಸ್ ಕವಿಂನಿ ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ.  ಎಚ್ಚೆಮ್ ಪೆರ್ನಾಳಾನ್ 'ಮ್ಹಾಕಾ ದೊಳೆ ಆಸಾತ್', ಗೀತಾ ಕಿಣಿನ್ 'ಸ್ವಪಣ್', ಲೆಸ್ಲಿ ರೇಗೊನ್ 'ಮ್ಹಜಿ ವಿಸರ್', ಸ್ಟೇನಿ ಬೆಳಾನ್ 'ದೊರೊ', ಸ್ಮಿತಾ ಶೆಣೈನ್ 'ಆಯ್ತಾರ್ ದೊನ್ಪಾರಾಂ', ಜೆರಿ ರಾಸ್ಕಿನ್ಹಾನ್ 'ಗಾಯಾನ್ ರುಕಾಂಚೆಂ', 'ಫೆಲ್ಸಿ ಲೋಬೊನ್ 'ವಿನಾಶ್ ಕಾಳ್', ಎಲ್ಯೆರ್ ತಾಕೊಡೆನ್ 'ಎಕಾ ಉಶ್ಯಾಚಿ ಕಥಾ', ಪಾವ್ಲ್ ಮೊರಾಸಾನ್ 'ಲೋಕ್ ಯೆಂವ್ಚೊಚ್ ಉಣೊ ಖಂಯ್', ಟೈಟಸ್ ನೊರೊನ್ಹಾನ್ 'ಧನಿ ಆನಿ ಚಾಕೊರ್', ಸ್ಟೀವನ್ ಕ್ವಾಡ್ರಸಾನ್ 'ಹಿ ಏಕ್ ಮ್ಹಜಿ ಕಾಣಿ', ಎಡ್ಡಿ ಸಿಕೇರಿನ್ 'ಕಿತ್ಯಾಕ್ ಮ್ಹಣ್ತಾಯ್ರೆ ಕವಿ ಮ್ಹಾಕಾ?', ಎಂಡ್ರ್ಯೂ ಎಲ್ ಡಿಕುನ್ಹಾನ್ 'ಮರ್ಯಾದಿಚೆಂ ಝುಜ್', ಜೆ. ಎಫ್. ಡಿಸೋಜಾನ್ 'ಹಾಂವ್ ಕುರ್ಡೊ', ಜೂಲಿಯೆಟ್ ಮೊರಾಸಾನ್ 'ಚಿಕುಮಾಮ್ ಖುಶಿ ಜಾಲೊ', ಮಾರ್ಟಿನಾನ್ 'ಮ್ಹಜೊ ಗಾಂವ್', ಸುರೇಶ್ ಬಾಳಿಗಾನ್ 'ಆಂಗಾಂತ್ ಕವಿ ರಿಗ್ಲಾ', ರೋಹನ್ ಅಡ್ಕಬಾರೆನ್ 'ವಾತ್' ಆನಿ ಮೆಲ್ವಿನ್ ರೊಡ್ರಿಗಸಾನ್ 'ಪಾಂಚ್ ಬಾಯ್ಲಾಂಚೊ ದಾದ್ಲೊ' ಕವಿತಾ ವಾಚ್ಲ್ಯೊ.

ಉಪ್ರಾಂತ್ ಮೆಲ್ವಿನ್ ರೊಡ್ರಿಗಸಾನ್ ಸುರೇಶ್ ಬಾಳಿಗಾಚೆ 'ಆಂಗಾಂತ್ ಕವಿ ರಿಗ್ಲಾ' ಕವಿತೆಚೆರ್ ಭಾಸಾಭಾಸ್ ಚಲೊವ್ನ್ ವೆಲಿ. ಹೆ ಚರ್ಚೆಂತ್ ಸರ್ವಾಂನಿ ಹುಮೆದಿನ್ ವಾಂಟೊ ಘೆತ್ಲೊ. ಸುರೇಶ್ ಬಾಳಿಗಾನ್, ವೆದಿಚೆರ್ ಹಾಜರ್ ಆಸುನ್ ಸರ್ವಾಂಕ್ ಜಾಪಿ ದಿಲ್ಯೊ. ತಾಚಿ ಕವಿತಾ ಹಾಂಗಾಸರ್ ದಿಲ್ಯಾ:

ಆಂಗಾಂತ ಕವಿ ರಿಗಲಾ

ಮೆಗೆಲೆ ಆಂಗಾಂತ ಏಕ ಕವಿ ಯೇವನ ರಿಗಲಾ
ಹಾಂವ ವ್ಯಾರೇಲಿ ಫುರಸತ ನಾತಿಲೊ
ಹೆಂ ಕಶಿ ಜಾಲ್ಲೆ ಮ್ಹಣು ಕಳನಾ
ವ್ಯಾರಾಕ ಕಾಂಯ ಬಾಧಕ ನಾ.
ಜಾಲ್ಯಾರ ಫಾಯದೋಯ ಬಿಲ್ಕುಲ ನಾ.
ಹಾಂವ ನುತ ಬಸಲ್ಯಾರ ತೊ ಭಾಯರ ಯೆತಾ
ಗಿಚಿತಾ, ಬರಯತಾ ಆನಿ ಸಾಂಗತಾ
ಹೀ ಏಕಿ ಕವಿತಾ.

ಆಮಿ ಗಾಂವ ಸೋಣ
ಫ್ಲ್ಯಾಟಾಂತ ಯೇವನ ರಾಬತರಿ
ಪೊಶಿಲ್ಯಾ ಪೆಟ್ಯಾಕ ಘರ ನಾ ಜಾಲ್ಲೆ.
ತೊ ವಾಟೇರ ಪಳ್ಳಾ
ಮುಖಾರಚೆ ಡಾಭಾಚೆ ಜಗಲೇರ
ದೀಸ ಕಾಡತಾ
ಮ್ಹಾಕಾ ಪಳಯಲ್ಯಾರ ಭೊಂಕತಾ
ದುಸ್ರ್ಯಾಂಕ ಬಾಲ ಹಾಲಯತಚ
ಕವಿ ಲಾಗಿಂ ನಾಖುಶಿ ದಾಕಯತಾ.

ಲಾಗಿ ಗೆಲ್ಯಾರ ಖೆಳತಲೀಂ
ಸುಕಣ್ಯಾಂಚಿ ಜೋಡಿ
ಆತಾಂ ಮೊಬಾಯ್ಲ ಟವರಾರ ಬಸತಾತಿ
ರೂಕ ಕಾತರ್ಲೆಲೆ ಪರಾಂತ
ತಾನಿಂ ಪಾಕ ಮಾರ್ನ ಉಬತಾನಾ
ವಿಂಗಡ ವಿಂಗಡ ರಿಂಗ್‌ಟೋನ
ಆಯಕತಾ ಕವಿಲೆಂ ಕಾನಾಂಕ

ದಿವೋಡ ಏಕ ವಿಂದುರ ಖಾವಚೆ
ನೆವನಾರ ಬಂಡಸಾಳ್ಯಾಂತ ಆಯಲಾ
ಪಯಲೆಂ ಆಮಿ ಎಕಾಮೆಕಾಂಕ ಬಿತಾಲೆಂ
ಆತಾ ತಾಕಾ ಭಾಯರ ಸರೂಂಕ ಮನಚ ನಾ
ಸಿ.ಸಿ. ಕ್ಯಾಮರಶೆಂ ಮುಲ್ಯಾಂತ ಬಯಸೂನ
ಯೆತಾ ವತಲ್ಯಾಂಚೇರ ದೃಷ್ಟಿ ಘಾಲತಾ
ಕವೀಕ ಮಾತ ದಿಸತಾ
ಚಿಂತಾ, ತಾಗೆಲೆ ದೊಳ್ಯಾಂತ
ತಾಂಕಾ ಕೊಣಾಕಯ ಕವಿಲೀಂ
ಜವಾಬ ಮೆಳನಾ
ತೋಚ ಯೇವನ ಬಸಲಾ
ದುಸರ್‍ಯಾಲೆ ಆಂಗಾಂತ
ನಾ ನಾತಿಲೆ ಖಂಚೇಯ ಸಂಬಂಧು
ಏಕ ದೀಸ ಸೊಡಕಾ ಪಡತಲೆಂ ಕೀ
ಮ್ಹಣು ತಾಕಾಯ ಚಿಂತಾ
ಆಯ್ಲಲೆ ದೋನ ಗಿರಾಯ್ಕಿ ಪಳಯತರ
ವ್ಯಾರೇಲಿ ಜಾಗ ಜಾತಾ
ಆನಿ ಕವಿ ಪರತೂನ ನಿಪೋನ ಬಸತಾ
ಮೆಗೆಲೆ ಆಂಗಾಂತ

         -ಬಿ. ಸುರೇಶ ಬಾಳಿಗಾ

ಕವಿ ಮ್ಹಳ್ಯಾರ್ ಸೃಜನಶೀಳತಾ ತಶೆಂ ವ್ಯಾರೆಲಿ ಮದ್ಲ್ಯಾ ದ್ವಂದ್ವಾಂ ವಿಶಿಂ ಚರ್ಚಾ ಚಲುನ್, ಹಿ ಕವಿತಾ ಬರಯ್ತಲ್ಯಾಕ್ ಕೊಣ್ ಪ್ರಮುಕ್ ಮ್ಹಳ್ಳೆವಿಶಿಂ ಸವಾಲಾಂ ಉಬ್ಜಾಲಿಂ. ಸುಣ್ಯಾಕ್, ಮಾಜ್ರಾಕ್, ಸುಕ್ಣ್ಯಾಂಕ್, ದಿವ್ಡಾಕ್ ಕಾನ್ ದಿಂವ್ಚಿ, ದೊಳ್ಯಾಂನಿ ದೆಖ್ಚಿ ತಾಂಕ್ ಹ್ಯಾ ವ್ಯಾರೆಲಿಕ್ ಆಸಾ ಖರೆಂ.  ಪುಣ್ ಗಿರಾಯ್ಕಿಂಕ್ ಪಳೆತಾನಾ ತೊ ಸಿ.ಸಿ. ಕೆಮರಾಬರಿ ಪರ್ತ್ಯಾನ್ ಲಿಪುನ್ ಬಸ್ತಾ ಯಾ ಕ್ರಮೇಣ್ ಮರಣ್ ಪಾವ್ತಾ ಕಾಂಯ್ ಮ್ಹಳ್ಳಿ ಅಭಿಪ್ರಾಯ್ ಥೊಡ್ಯಾಂನಿ ಉಚಾರ್‍ತಾನಾ, ಹಿ ಏಕ್ ಕವಿ ಕುಳಾಕ್ ಭಿರಾಂತೆಚಿ ಗಜಾಲ್ ನ್ಹಯ್‍ಮೂ? ಆಮ್ಚೆ ಭಿತರ್‍ಲಿ ಕ್ರಿಯೇಟಿವಿಟಿ ಸಂಸಾರಿ ಸುಖಾಕ್ ಲಾಗುನ್ ನಾಸ್ ಜಾವ್ನ್ ವಚನಾಂಮೂ, ಆಮಿ ದೊಳೆ ಆಸುನ್ ಕುರ್ಡೆ ಆನಿ ಕಾನ್ ಆಸುನ್ ಕೆಪ್ಪೆ ಜಾವ್ನ್ ಬದ್ಲುಂಕ್ ನಾಮೂ? ಮ್ಹಳ್ಳಿಂ ನಾನಾಂತಿಂ ಸವಾಲಾಂ ಸಭೆಚೆರ್ ವ್ಯಕ್ತ್ ಜಾಲಿಂ.

ಕವಿ, ಜ್ಯಾ ಸಮಾಜಾ ಥಾವ್ನ್ ಆಯ್ಲಾ, ತ್ಯಾ ಸಮಾಜಾಂತ್ ಸೃಜನಶೀಳತೆಚ್ಯಾಕೀ ವ್ಯಾಪಾರ್-ದಂಧೊ ಕಸೊ ಪ್ರಮುಕ್ ಸ್ಥಾನ್ ಘೆವ್ನ್ ಆಸಾ ಆನಿ ಕಾಂಯ್ ಥೊಡೆಕಡೆ ಕಿಯೇಟಿವಿಟಿ ಭಾಯ್ರ್ ಯೇಂವ್ಕ್ ಉಸ್ಮಡ್ತಾನಾ, ಕಶಿ ತಿಕಾ ಧಾಂಪುನ್ ಘಾಲ್ಚೆಂ ಪ್ರೇತನ್ ಚಲ್ತಾ ಮ್ಹಳ್ಳಿಂ ಸಾಮಾಜಿಕ್ ಕಾರಣಾಂಯ್ ಹ್ಯಾ ಸಂದರ್ಭಾರ್ ಆಯ್ಕುಂಕ್ ಮೆಳ್ಳಿಂ.

ಸುರೇಶ್ ಬಾಳಿಗಾಚ್ಯಾ ಕವಿ ಮನಾವಿಶಿಂ ಸರ್ವಾಂನಿ ತೋಕ್ಣಾಯ್ ಕೆಲಿ.

ಮಾರ್ಚ್ ಮ್ಹಯ್ನ್ಯಾಂತ್ ಚಲುಂಕ್ ಆಸ್ಚ್ಯಾ 'ಎ. ಟಿ. ಲೋಬೊಚ್ಯಾ ಜಿವಿತಾಚೆರ್ ಏಕ್ ಪಯ್ಣ್' ದಿಸಾವಿಶಿಂ ಮೆಲ್ವಿನ್ ರೊಡ್ರಿಗಸಾನ್ ಮ್ಹಾಯೆತ್ ದಿಲಿ ಆನಿ ಸರ್ವಾಂಕ್ ಆಪೊವ್ಣೆಂ ದಿಲೆಂ.

ಹ್ಯಾ ಕಾರ್ಯಾಕ್ ಹೇಮಾಚಾರ್ಯ, ಎವ್ರೆಲ್ ರೊಡ್ರಿಗಸ್, ರೊನಿ ಅರುಣ್, ಎ. ಟಿ. ಲೋಬೊ ಫೌಂಡೇಶನಾಚಿ ಆಲಿಸ್ ಲೋಬೊ ಮ್ಹಣುನ್ ಜಾಯ್ತಿಂ ಜಣಾಂ ಹಾಜರ್ ಆಸಲ್ಲಿಂ.

मंगळूरांत 'आंगांत कवी रिगला' कवितेचेर भासाभास आनी कवीगोश्टी

कविता ट्रस्टाचें ह्या वर्साचें दुसरें कारयें जावन, एक कविगोष्टी ह्याच फेब्रेर म्हयन्याचे १ तारिकेर मंगळूर बल्मठांत आसच्या ऑर्कीड आर्ट गॅलरींत चल्ली. गॅलरीचो येजमानी तशें कविता ट्रस्टाचो ट्रस्टी विलियम पायसान हाजर आसल्ल्या सरवांक येवकार मागतच ट्रस्टाचो अध्यक्ष मेल्विन रोड्रीगसान ट्रस्टाचें मिसांव सांगलें.

आपल्या उलोवपांत तो म्हणालोकी "आयलेवार कोंकणी कवितेक बरे दीस आयल्यातशें दिसता. फाटल्या दोन म्हयन्यांनी विल्मा बंटवाळ हिचो "मुकडीं", एंडऱ्यु एल. डिकुन्हाचो "आयेराचो बूक", विल्सन कटीलाचो "पीक आनी दीक", विल्सन कय्यार् आनी विल्सन कटीलाचो "तस्वींत", प्रकाश नायकाचो "कुत्तळ", मॅक्सीम लोबोचें प्रबंधांचें पुस्तक "कवित्वाचें नंदनावन", वालावलिकाराचो अनुवाद "मेघदूत" आनी जायतीं हेर कवितेचीं पुस्तकां परगट जाल्यांत.

"डो. नागेशकुमार राव, एंडऱ्यु एल डिकुन्हाच्या पुस्तकांक तशें कोंकणी कवी रमेश वेळुसकारान हिंदींत बरयिल्ल्या कविता पुस्तकाक मान फावो जाला.

"कविता ट्रस्ट, युव साहित्य सम्मेळन, गोंय विश्वविद्यालयांनी कविता वाचनाच्यो, बरोंवच्यो सर्ती चलयल्यात. युव महोत्सवा वेळार कविता सादरीकरण सर्त चल्ल्या. विश्व कोंकणी केंद्रांत इंजिनियरींग तशें दाक्तेरगी शिकच्या विद्यार्थीं खातीर कविगोष्टी चलतात. हो काव्यशेतांत सदां आसच्या आमकां संभ्रमाचो काळ" अशें ताणे सांगलें. मुकार उलोवन "कवितेक आपुरबायेचो भोंवार निर्माण जाला खरें. पूण आमी आतां आमचे कवितेचो साहितीक पांवडो बळवंत करचे दीस आयल्यात" म्हणून ताणें सांगलें.

उपरांत चलल्ले कविगोष्टींत एकुणवीस कविंनी आपापल्यो कविता सादर केल्यो. एच्चेम पेरनाळान 'म्हाका दोळे आसात', गीता किणीन 'स्वपण', लेसली रेगोन 'म्हजी विसर', स्टेनी बेळान 'दोरो', स्मिता शेणैन 'आयतार दोनपारां', जेरी रासकिन्हान 'गायान रुकांचें', 'फेल्सी लोबोन 'विनाश काळ', एल्येर ताकोडेन 'एका उश्याची कथा', पावल मोरासान 'लोक येंवचोच उणो खंय', टैटस नोरोन्हान 'धनी आनी चाकोर', स्टीवन क्वाड्रसान 'ही एक म्हजी काणी', एड्डी सिकेरिन 'कित्याक म्हणतायरे कवी म्हाका?', एंडऱ्यू एल डिकुन्हान 'मऱ्यादिचें झुज', जे. एफ. डिसोजान 'हांव कुरडो', जूलियेट मोरासान 'चिकुमाम खुशी जालो', मार्टिनान 'म्हजो गांव', सुरेश बाळिगान 'आंगांत कवी रिगला', रोहन अडकबारेन 'वात' आनी मेल्विन रोडरिगसान 'पांच बायलांचो दादलो' कविता वाचल्यो.

उपरांत मेल्विन रोडरिगसान सुरेश बाळिगाचे 'आंगांत कवी रिगला' कवितेचेर भासाभास चलोवन वेली. हे चरचेंत सरवांनी हुमेदिन वांटो घेतलो. सुरेश बाळिगान, वेदिचेर हाजर आसून सरवांक जापी दिल्यो. ताची कविता हांगासर दिल्या:

आंगांत कवी रिगला

मेगेले आंगांत एक कवी येवन रिगला
हांव व्यारेली फुरसत नातिलो
हें कशी जाल्ले म्हणू कळना
व्याराक कांय बाधक ना.
जाल्यार फायदोय बिल्कुल ना.
हांव नुत बसल्यार तो भायर येता
गिचिता, बरयता आनी सांगता
ही एकी कविता.

आमी गांव सोण
फ्ल्याटांत येवन राबतरी
पोशिल्या पेट्याक घर ना जाल्ले.
तो वाटेर पळ्ळा
मुखारचे डाभाचे जगलेर
दीस काडता
म्हाका पळयल्यार भोंकता
दुसऱ्यांक बाल हालयतच
कवी लागीं नाखुशी दाकयता.

लागी गेल्यार खेळतलीँ
सुकण्यांची जोडी
आतां मोबायल टवरार बसताती
रूक कातरलेले परांत
तानीं पाक मार्न उबताना
विंगड विंगड रिंगटोन
आयकता कविलें कानांक

दिवोड एक विंदुर खावचे
नेवनार बंडसाळ्यांत आयला
पयलें आमी एकामेकांक बितालें
आता ताका भायर सरूंक मनच ना
सी.सी. क्यामरशें मुल्यांत बयसून
येता वतल्यांचेर दृषटी घालता
कवीक मात दिसता
चिंता, तागेले दोळ्यांत

तांका कोणाकय कविलीँ
जवाब मेळना
तोच येवन बसला
दुसर्याले आंगांत
ना नातिले खंचेय संबंधू
एक दीस सोडका पडतलें की
म्हणू ताकाय चिंता

आयलले दोन गिरायकी पळयतर
व्यारेली जाग जाता
आनी कवी परतून निपोन बसता
मेगेले आंगांत

-बी. सुरेश बाळिगा

कवी म्हळ्यार सृजनशीळता तशें व्यारेली मदल्या द्वंदवां विशीं चर्चा चलून, ही कविता बरयतल्याक कोण प्रमुक म्हळ्ळेविशीं सवालां उबजालीं. सुण्याक, माजराक, सुकण्यांक, दिवडाक कान दिंवची, दोळ्यांनी देखची तांक ह्या व्यारेलीक आसा खरें. पूण गिरायकींक पळेताना तो सी.सी. केमराबरी पर्त्यान लिपून बसता या क्रमेण मरण पावता कांय म्हळ्ळी अभिपराय थोड्यांनी उचारताना, ही एक कवी कुळाक भिरांतेची गजाल न्हयमू? आमचे भितरली क्रियेटिविटी संसारी सुखाक लागून नास जावन वचनांमू, आमी दोळे आसून कुरडे आनी कान आसून केपपे जावन बदलूंक नामू? म्हळ्ळीं नानांतीं सवालां सभेचेर व्यक्त जालीं.

कवी, ज्या समाजा थावन आयला, त्या समाजांत सृजनशीळतेच्याकी व्यापार-दंधो कसो प्रमुक स्थान घेवन आसा आनी कांय थोडेकडे कियेटिविटी भायर येवंक उस्मडताना, कशी तिका धांपून घालचें प्रेतन चलता म्हळ्ळीं सामाजीक कारणांय ह्या संदरभार आयकूंक मेळ्ळीं.

सुरेश बाळिगाच्या कवी मनाविशीं सरवांनी तोकणाय केली.

मार्च म्हयन्यांत चलूंक आसच्या 'ए. टी. लोबोच्या जिविताचेर एक पयण' दिसाविशीं मेल्विन रोडरिगसान म्हायेत दिली आनी सरवांक आपोवणें दिलें.

ह्या कार्याक हेमाचार्य, एवरेल रोडरिगस, रोनी अरूण, ए. टी. लोबो फौंडेशनाची आलीस लोबो म्हणून जायतीं जणां हाजर आसल्लीं.