ದೇವ್ ಕವಿಚ್ಯಾ ಭಾವನಾತ್ಮಕ್ ಸತಾಂ ಪಯ್ಕಿ ಎಕ್ಲೊ: ಎಂಡ್ರ್ಯೂ ಡಿಕುನ್ಹಾ
ಕವಿತಾ ಟ್ರಸ್ಟಾ ತರ್ಫೆನ್ ಹ್ಯಾ ವರ್ಸಾಚಿ ಪಾವ್ಸಾಡೆಚಿ ಕವಿಗೋಷ್ಟಿ ಕವಿತಾ ಟ್ರಸ್ಟಾಚೊ ಅಧ್ಯಕ್ಶ್ ಕವಿ ಮೆಲ್ವಿನ್ ರೊಡ್ರಿಗ್ಸಾಚ್ಯಾ ಘರಾ ಹ್ಯಾಚ್ ಜೂನ್ ಮ್ಹಯ್ನ್ಯಾಚೆ 28 ತಾರಿಕೆರ್ ಚಲ್ಲಿ. ಕವಿ ಆಂಡ್ರ್ಯೂ ಎಲ್ ಡಿಕೂನ್ಹಾನ್ ಅಧ್ಯಕ್ಷಪಣ್ ಘೆತಲ್ಲೆಂ. ಪಾವ್ಸಾಳೆ ದೀಸ್ ತರೀ ಶಿಜೊನ್ ಆಸ್ಚೆ ಧರ್ತೆವಿಶಿಂ ಆನಿ ಬದ್ಲುನ್ ವೆಚ್ಯಾ ಹವ್ಯಾವಿಶಿಂ ಉಲವ್ನ್ ನಾಮ್ಣೆಚೊ ಉರ್ದು ಆನಿ ಹಿಂದಿ ಕವಿ ಗುಲ್ಝಾರಾನ್ ತೀನ್ ವರ್ಸಾಂ ಆದಿಂ ಕವಿತಾ ಟ್ರಸ್ಟಾನ್ ಆಸಾ ಕೆಲ್ಲ್ಯಾ ಉಪನ್ಯಾಸಾಂತ್ ಸಾಂಗಲ್ಲ್ಯಾ ಉತ್ರಾಂಚೊ ಉಡಾಸ್ ಆಂಡ್ರ್ಯೂನ್ ಕಾಡ್ಲೊ "ಜಿಣಿ ಕಶಿ ಶಿಜೊನಚ್ ಆಸ್ತಾ, ತಶಿ ಕವಿತಾಯ್ ಶಿಜೊನಚ್ ಆಸ್ತಾ"
ಸುರ್ವೆರ್ ಕವಿ ಮೆಲ್ವಿನ್ ರೊಡ್ರಿಗ್ಸಾನ್ ಸರ್ವಾಂಕ್ ಯೆವ್ಕಾರ್ ಮಾಗುನ್, ಪಾಟ್ಲ್ಯಾ ಧಾ ವರ್ಸಾಂ ಥಾವ್ನ್ ಕೊಂಕ್ಣಿ ಕವಿತೆಚ್ಯಾ ಸಮಗ್ರ್ ವಾಡಾವಳಿಖಾತಿರ್ ಖಳ್ಮಿತ್ ನಾಸ್ತಾನಾ ವಾವುರ್‍ಚ್ಯಾ ಕವಿತಾ ಟ್ರಸ್ಟಾಚಿಂ ಕಾಮಾಂ ಆನಿ ಶೆವೊಟಾವಿಶಿಂ ಮಟ್ವ್ಯಾನ್ ಝಳಕ್ ದಿಲಿ.
ಕಾವ್ಯೆಂ ಏಕ್ ವಿಶಯ್, ಅತೀ ಉಂಚ್ಲೆ ರಿತಿನ್ ಅಭಿವ್ಯಕ್ತ್ ಕರ್‍ಚಿ ಕಲಾ ಮ್ಹಣ್ ಆಪ್ಲ್ಯಾ ಉಲೊವ್ಪಾಂತ್ ಸಾಂಗಲ್ಲ್ಯಾ ಆಂಡ್ರೂನ್, ಕಾವ್ಯೆಂ ಆನಿ ಭಾಸ್ ತಶೆಂ ಕವಿ ಆನಿ ರಸಿಕಾಂಚ್ಯಾ ಸಂಬಂಧಾಂವಿಶಿಂ ವೆವೆಗ್ಳೆ ವಿಚಾರ್ ಮಾಂಡುನ್ ಜಮಲ್ಲ್ಯಾ ಕವಿ ಆನಿ ರಸಿಕಾಂ ಮಧೆಂ ಭಾಸಾಭಾಸ್ ಕರುಂಕ್ ಆವ್ಕಾಸ್ ಕರ್ನ್ ದಿಲೊ. ಆಮ್ಚ್ಯಾ ಭೊಂವಾರಿಂ ಆಮಿ ಪಳೆಂವ್ಚ್ಯಾ ಸಂಗ್ತಿಂಕ್ ವಿಗ್ಯಾನ್ ಏಕಚ್ ಅರ್ಥ್ ಆನಿ ಏಕ್ ಸತ್ ಸಾಂಗ್ಚೆಂ ವಾಖ್ಯಾನ್ ದೀಂವ್ಕ್ ಸಕ್ತಾ ತರ್ ಕವಿ ತ್ಯಾಚ್ ಸಂಗ್ತಿಂಕ್ ಹಜಾರ್ ಅರ್ಥ್ ದೀಂವ್ಕ್ ಸಕ್ತಾ, ಹಜಾರ್ ಭಾವನಾತ್ಮಕ್ ಸತಾಂ ಕವಿ ಉಗ್ತಿಂ ಕರುಂಕ್ ಸಕ್ತಾ, ವಿಗ್ಯಾನಾಕ್ ಮಿಕ್ವಲ್ಲೊ ಆಮ್ಚೊ ದೇವ್‌ಯ್ ಅಸಲ್ಯಾ ಸತಾಂತ್ಲೊ ಎಕ್ಲೊ ಮ್ಹಣ್ ತಾಣೆಂ ಸಾಂಗ್ಲೆಂ.
ಏಕ್ ಕವಿ ಆನಿ ಕಾವ್ಯ ರಸಿಕ್ ಅಮ್ಚ್ಯಾ ಭೊಂವಾರಿ ಘಡ್ಚ್ಯಾ ಸಂಗ್ತಿಂಕ್ ಫಕತ್ ಪಳೆನಾ, ಪುಣ್ ಗುಮಾನ್ ದಿತಾ ಮ್ಹಣ್ ಸಾಂಗಲ್ಲ್ಯಾ ಆಂಡ್ರ್ಯೂನ್, ಕವಿ ಆನಿ ರಸಿಕ್ ಕೆದ್ನಾಂಯ್ ಜಾಗೆ ಆಸ್ತಾತ್ ಜಾಲ್ಲ್ಯಾನ್ ಕಾವ್ಯೆಂ ಜಾಗಿ ಸಮಾಜ್ ರಚುಂಕ್ ಸಕ್ತಾ ಮ್ಹಣಾಲೊ. ಕಾವ್ಯೆಂ ವೆಕ್ತಿಚೆಂ ಅಂತಸ್ಕರ್ನ್ ರೂಪಿತ್ ಕರುಂಕ್ ಸಕ್ತಾ ಆನಿ ಹ್ಯಾ ವರ್ವಿಂ ಆಮ್ಚ್ಯಾ ಅಂತಸ್ಕರ್ನಾಚೊ ತಾಳೊ ಆಮ್ಕಾಂ ಸ್ವಶ್ಟ್ ಆಯ್ಕೊಂಕ್ ಸಾಧ್ಯ್ ಜಾತಾ, ಪುಣ್ ಕೊಂಕ್ಣಿ ಲೊಕಾ ಮಧೆಂ ಕವಿತಾ ವಾಚ್ಚೊ ಲೋಕ್ ಥೊಡೊಚ್ - ಅಲ್ಫ್‌ಸಂಖ್ಯಾತ್, ಕೊಂಕ್ಣಿ ಸಮಾಜ್ ಕಾವ್ಯಾಥಾವ್ನ್ ಮೆಳ್ಚ್ಯಾ ಸುಖಾ ಥಾವ್ನ್ ವಂಚಿತ್ ಜಾಲ್ಯಾ, ಹ್ಯಾ ವರ್ವಿಂ ಆಮ್ಚ್ಯಾ ಸಮಾಜಾಕ್ ವ್ಹಡ್ ಲುಕ್ಸಾಣ್ ಜಾಲಾಂ ಮ್ಹಣ್ ಬೆಜಾರಾಯ್ ಉಚಾರಲ್ಲ್ಯಾ ಆಂಡ್ರ್ಯೂನ್ ಕವಿತಾ ಟ್ರಸ್ಟ್ ಕಾವ್ಯೆಂ ಲೊಕಾ ಮೆರೆನ್ ಪಾವಂವ್ಚೆಂ ಹರ್ ಪ್ರಯತ್ನ್ ಕರುನ್ ಆಸಾ ಮ್ಹಣ್ ಸಾಂಗಲಾಗ್ಲೊ.
ಕವಿ ಗುರು ಬಾಳಿಗಾನ್ "ಮಾಕಾ ಘರ್ ಆಟಯ್ತಾ" ಆನಿ "ಹಾಂವ್ ದೊನ್ಪಾರಾಂ ನಿದ್ತಾಂ" ಕವಿತಾ ವಾಚುನ್ ಆಯ್ಕೊಪ್ಯಾಂಕ್ ಧಾದೊಶಿ ಕೆಲೆಂ ತರ್, ತರ್ನೊ ಕವಿ ಜೇಸನ್ ಸಿಕ್ವೇರಾನ್ "ಯಾದಿಂಚಿ ಪೊಟ್ಲಿ" ನಾಂವಾಚಿ ಸಿಂತಿಮೆಂತಾಳ್ ಕವಿತಾ ವಾಚ್ಲಿ. ಕವಿ ಡೆನಿಸ್ ಮೊಂತೆರೊನ್ "ವಿಡೊ" ನಾಂವಾಚಿ ಕವಿತಾ ವಾಚುನ್ ಜಮಲ್ಲ್ಯಾಂಕ್ ರಮ್ಯ್ ಲೊಕಾಕ್ ಆಪವ್ನ್ ವೆಲೆಂ. ಕವಯತ್ರಿ ಫೆಲ್ಸಿ ಲೋಬೊನ್ ಸ್ತ್ರೀಯೆಚ್ಯಾ ತಳ್ಮಳ್ಯಾಂಚಿ "ಮೊಳಲ್ಲಿ ಮಾತಿ" ಏಕ್ ಗಂಭೀರ್ ಚಿಂತ್ಪಾಚಿ ಕವಿತಾ ವಾಚ್ಲಿ ಆನಿ ಉಪ್ರಾಂತ್ "ಕಾತ್ರಿಚೆಂ ಕಾರ್ಬಾರ್" ಕವಿತಾ ವಾಚುನ್ ಜಮಲ್ಲ್ಯಾಂಕ್ ಹಾಸಯ್ಲೆಂ. ಕವಿ ವಿನ್ಸಿ ಪಿಂಟೊನ್ ಆಪುಣ್ ಏಕ್ ರಸಿಕ್ ಜಾವ್ನ್ ಕಾವ್ಯಾಚೆಂ ಸುಖ್ ಚಡ್ ಆನಿ ಚಡ್ ಭೊಗುನ್ ಆಸಾಂ ಮ್ಹಣ್ ಸಾಂಗುನ್ ಆಪ್ಣಾಚಿಂ ಥೊಡಿಂ ಚುಟ್ಕುಲಾಂ ವಾಚುನ್ ಆಯ್ಕೊವ್ಪ್ಯಾಂಚಿಂ ಮನಾಂ ಧಾದೊಶಿ ಕೆಲಿಂ. ಕವಯತ್ರಿ ಸಿಲೆಸ್ತಿನ್ ಸಿಕ್ವೇರಾನ್ "ಸೆಜಾರಿ" ಆನಿ "ಆಜ್ಯಾಳ್" ಕವಿತಾ ಸಾದರ್ ಕೆಲ್ಯೊ. ಪಯ್ಲೆ ಪಾವ್ಟಿಂ ಕವಿತಾ ಟ್ರಸ್ಟಾಚ್ಯಾ ಕವಿ ಗೋಶ್ಟಿಕ್ ಹಾಜರ್ ಜಾಲ್ಲೊ ತರ್ನೊ ಕವಿ ಜೊಯೆರ್ ಡಿ ಸೋಜಾನ್ "ಅಮಾಲ್", "ವಾಟ್" ಆನಿ "ಯಾದ್" ನಾಂವಾಚಿಂ ತೀನ್ ಅಪುರ್ಬಾಯೆಚಿಂ ಚುಟ್ಕುಲಾಂ ವಾಚ್ಲಿಂ ಆನಿ ಆಜ್ ಜೊಡಲ್ಲೆ ಉಮೆದಿನ್ ಕೊಂಕ್ಣೆಂತ್ ಚಡಿತ್ ಬರಂವ್ಚಿ ಆಶಾ ಉಚಾರ್‍ಲಿ. ಕವಿ ಮೆಲ್ವಿನ್ ರೊಡ್ರಿಗ್ಸಾನ್ "ತೆಲಾಚೊ ವೆಪಾರ್" ಆನಿ "ಉಡಾಸ್" ನಾಂವಾಚ್ಯೊ ದೋನ್ ಕವಿತಾ ವಾಚ್ಲ್ಯೊ ತರ್ ನಿಮಾಣೆ ಆಂಡ್ರ್ಯೂನ್ "ಸುರ್ಯಾಕ್ ತಾಪ್ ಆಯ್ಲ್ಯಾರ್" ನಾಂವಾಚಿ ಸಿಂತಿಮೆಂತಾಳ್ ಕವಿತಾ ವಾಚ್ಲಿ.
ವಾಚಲ್ಲ್ಯಾ ಕವಿತೆಂಚ್ಯಾ ಗುಣಾಂವಿಶಿಂ ಭಾಸಾಭಾಸ್ ಚಲ್ಲಿ. ಆಂಡ್ರ್ಯೂನ್ ಏಕ್ ಕವಿ ಕಶೆಂ ವಾಚ್ಪ್ಯಾಂಚೆ ಮತಿಂತ್ ರುಪ್ಣಿಂ ಜೊಡಯ್ತಾ ಆನಿ ಉಪ್ರಾಂತ್ ರಸಿಕಾಂಚೆ ಮತಿಂತ್ ತಿಂ ರುಪ್ಣಿಂ ಘೊಂಟೆರ್ ಘಾಲ್ನ್ ರಾವ್ತಾತ್ ಆನಿ ಸಬ್ದ್ ಸವ್ಕಾಸ್ ಹೊಗ್ಡಾಯ್ತಾತ್ ಮ್ಹಣ್ ವಿವರಣ್ ದಿಲೆಂ. ಕವಿ ವಿಲ್ಸನ್ ಕಟೀಲಾಚೆಂ ಕವನ್ "ಹಿ ಕಸಲಿ ಧಾರುಣಾಯ್", ಕವಿ ಎಡ್ಡಿ ಸಿಕೇರಿಚೆಂ ಕವನ್ "ಪಣ್ತಿ" ಆನಿ ಕವಿ ಮೆಲ್ವಿನ್ ರೊಡ್ರಿಗ್ಸಾಚೆಂ ಕವನ್ "ಹಾರಿಂ ಹಾರಿಂನಿ" ಹ್ಯಾ ಕವಿತೆಂಚೊ ತಾಣೆ ಉಲ್ಲೇಖ್ ಕೆಲೊ. ಹಾಜರ್ ಆಸಲ್ಲ್ಯಾ ಥೊಡ್ಯಾಂನಿ ತಾಂಚೆ ಮತಿಂತ್ ಘೊಂಟೆರ್ ಘಾಲ್ನ್ ರಾವಲ್ಲ್ಯಾ ಕವಿತೆಂಚ್ಯಾ ರುಪ್ಣ್ಯಾಂ ವಿಶಿಂ ವಿವರಣ್ ದಿಲೆಂ. ತಶೆಂಚ್ ಕವಿ ಕಶೆಂ ಕಾವ್ಯ ವಸ್ತುಕ್ ಲವ್ಕಿಕ್ ದಿಶ್ಟಿನ್ ಪಳೆನಾಸ್ತಾಂ ಸುಖ್ ಆನಿ ವಿಶೇಸ್ ಸಂತೊಸ್ ಜೊಡ್ತಾ ಮ್ಹಳ್ಳ್ಯಾ ವಿಶಯಾಚೆರ್ ಚರ್ಚಾ ಚಲ್ಲಿ.
ಕವಿತಾ ವಾಚಲ್ಲ್ಯಾ ಕವಿಂಕ್ ಸೊಡ್ನ್ ಕಾವ್ಯ ರಸಿಕ್ ಜಾವ್ನ್ ಆಯಿಲ್ಲ್ಯಾ ನಾಮ್ಣೆಚೊ ನಾಟಕಿಸ್ತ್ ಜೊನ್ ಎಮ್ ಪೆರ್ಮನ್ನೂರ್, ಕರ್ನಾಟಕ ಕೊಂಕ್ಣಿ ಅಕಾಡೆಮಿಚೊ ರೆಜಿಸ್ಟ್ರಾರ್ ದೇವದಾಸ್ ಪೈ. ಸಂಗೀತ್‌ಗಾರ್ ಕೆವಿನ್ ಮಿಸ್ಕಿತ್, ಕವಿತಾ ಟ್ರಸ್ಟಾಚೊ ಟ್ರಸ್ಟಿ ವಿಲ್ಯಮ್ ಪಾಯ್ಸ್, ವಾಯ್ಲೆಟ್, ಟ್ರಸ್ಟಿ ಎವ್ರೆಲ್, ವಿತೊರಿ ಕಾರ್ಕಳ್ ಆನಿ ತರ್ನೊ ರಸಿಕ್ ಸಂತೋಶ್ ಹ್ಯಾ ಕವಿತಾಗೋಶ್ಟಿಕ್ ಹಾಜರ್ ಆಸುನ್, ಕವಿತೆವಿಶಿಂ ಉಲೊವ್ನ್ ಸಕ್ರೀಯ್ ರಿತಿನ್ ಭಾಗ್ ಘೆತ್ಲೊ.
ನಿಮಾಣೆಂ ತ್ಯಾ ದೀಸ್ ಜಲ್ಮಾ ದೀಸ್ ಆಚರಣ್ ಕೆಲ್ಲ್ಯಾ ಶ್ರೀ ದೇವದಾಸ್ ಪೈ ಹಾಂಕಾಂ ಹಾಜರ್ ಆಸಲ್ಲ್ಯಾಂನಿ ಜಲ್ಮಾದಿಸಾಚೆಂ ಗೀತ್ ಗಾವ್ನ್ ಉಲ್ಲಾಸಿಲೆಂ.
-ಭಾತ್ಮಿ
देव कविच्या भावनात्मक सतां पयकी एकलो: एंडऱ्यू डिकुन्हा
कविता ट्रसटा तर्फेन ह्या वर्साची पावसाडेची कविगोष्टी कविता ट्रसटाचो अध्यक्श कवी मेल्विन रोड्रिगसाच्या घरा ह्याच जून म्हयन्याचे २८ तारिकेर चल्ली. कवी आंडऱ्यू एल डिकूनहान अध्यक्षपण घेतल्लें. पावसाळे दीस तरी शिजोन आसचे धरतेविशीं आनी बदलून वेच्या हव्याविशीं उलवन नामणेचो उर्दू आनी हिंदी कवी गुलझारान तीन वर्सां आदीं कविता ट्रसटान आसा केल्ल्या उपन्यासांत सांगल्ल्या उतरांचो उडास आंडऱ्यून काडलो "जिणी कशी शिजोनच आस्ता, तशी कविताय शिजोनच " आस्ता"
सुर्वेर कवी मेल्विन रोड्रिगसान सरवांक येवकार मागून, पाटल्या धा वर्सां थावन कोंकणी कवितेच्या समग्र वाडावळिखातीर खळमित नासताना वावुरच्या कविता ट्रसटाचीं कामां आनी शेवोटाविशीं मटव्यान झळक दिली.
कावयें एक विशय, अती उंचले रितीन अभिवयक्त करची कला म्हण आपल्या उलोवपांत सांगल्ल्या आंडरून, कावयें आनी भास तशें कवी आनी रसिकांच्या संबंधांविशीं वेवेगळे विचार मांडून जमल्ल्या कवी आनी रसिकां मधें भासाभास करूंक आवकास कर्न दिलो. आमच्या भोंवारीं आमी पळेंवच्या संगतींक विग्यान एकच अर्थ आनी एक सत सांगचें वाख्यान दीवंक सक्ता तर कवी त्याच संगतींक हजार अर्थ दीवंक सक्ता, हजार भावनात्मक सतां कवी उगतीं करूंक सक्ता, विग्यानाक मिकवल्लो आमचो देवय असल्या सतांतलो एकलो म्हण ताणें सांगलें.
एक कवी आनी काव्य रसिक अमच्या भोंवारी घडच्या संगतींक फकत पळेना, पूण गुमान दिता म्हण सांगल्ल्या आंडऱ्यून, कवी आनी रसिक केदनांय जागे आसतात जाल्ल्यान कावयें जागी समाज रचूंक सक्ता म्हणालो. कावयें वेक्तिचें अंतसकर्न रूपीत करूंक सक्ता आनी ह्या वरवीं आमच्या अंतसकर्नाचो ताळो आमकां स्वश्ट आयकोंक साध्य जाता, पूण कोंकणी लोका मधें कविता वाच्चो लोक थोडोच - अलफसंख्यात, कोंकणी समाज कावयाथावन मेळच्या सुखा थावन वंचित जाल्या, ह्या वरवीं आमच्या समाजाक व्हड लुकसाण जालां म्हण बेजाराय उचारल्ल्या आंडऱ्यून कविता ट्रस्ट कावयें लोका मेरेन पावंवचें हर प्रयत्न करून आसा म्हण सांगलागलो.
कवी गुरू बाळिगान "माका घर आटयता" आनी "हांव दोनपारां निदतां" कविता वाचून आयकोप्यांक धादोशी केलें तर, तरनो कवी जेसन सिकवेरान "यादिंची पोटली" नांवाची सिंतिमेंताळ कविता वाचली. कवी डेनीस मोंतेरोन "विडो" नांवाची कविता वाचून जमल्ल्यांक रम्य लोकाक आपवन वेलें. कवयत्री फेल्सी लोबोन स्त्रीयेच्या तळमळ्यांची "मोळल्ली माती" एक गंभीर चिंतपाची कविता वाचली आनी उपरांत "कात्रिचें कारबार" कविता वाचून जमल्ल्यांक हासयलें. कवी विन्सी पिंटोन आपुण एक रसिक जावन काव्याचें सूख चड आनी चड भोगून आसां म्हण सांगून आपणाचीं थोडीं चुटकुलां वाचून आयकोवप्यांचीं मनां धादोशी केलीं. कवयत्री सिलेस्तीन सिकवेरान "सेजारी" आनी "आज्याळ" कविता सादर केल्यो. पयले पावटीं कविता ट्रसटाच्या कवी गोश्टीक हाजर जाल्लो तरनो कवी जोयेर डी सोजान "अमाल", "वाट" आनी "याद" नांवाचीं तीन अपुरबायेचीं चुटकुलां वाचलीं आनी आज जोडल्ले उमेदीन कोंकणेंत चडीत बरंवची आशा उचारली. कवी मेल्विन रोड्रिगसान "तेलाचो वेपार" आनी "उडास" नांवाच्यो दोन कविता वाचल्यो तर निमाणे आंडऱ्यून "सुर्याक ताप आयल्यार" नांवाची सिंतिमेंताळ कविता वाचली.
वाचल्ल्या कवितेंच्या गुणांविशीं भासाभास चल्ली. आंडऱ्यून एक कवी कशें वाचप्यांचे मतींत रुपणीं जोडयता आनी उपरांत रसिकांचे मतींत तीं रुपणीं घोंटेर घालन रावतात आनी सब्द सवकास होगडायतात म्हण विवरण दिलें. कवी विल्सन कटीलाचें कवन "ही कसली धारुणाय", कवी एड्डी सिकेरिचें कवन "पणती" आनी कवी मेल्विन रोड्रिगसाचें कवन "हारीं हारिंनी" ह्या कवितेंचो ताणे उल्लेख केलो. हाजर आसल्ल्या थोड्यांनी तांचे मतींत घोंटेर घालन रावल्ल्या कवितेंच्या रुपण्यां विशीं विवरण दिलें. तशेंच कवी कशें काव्य वस्तूक लवकीक दिश्टीन पळेनास्तां सूख आनी विशेस संतोस जोडता म्हळ्ळ्या विशयाचेर चर्चा चल्ली.
कविता वाचल्ल्या कवींक सोडन काव्य रसिक जावन आयिल्ल्या नामणेचो नाटकिस्त जोन एम पेर्मन्नूर, कर्नाटक कोंकणी अकाडेमिचो रेजिसट्रार देवदास पै. संगीतगार केविन मिसकित, कविता ट्रसटाचो ट्रसटी विल्यम पायस, वायलेट, ट्रसटी एवरेल आनी तरनो रसिक संतोश ह्या कवितागोश्टीक हाजर आसून, कवितेविशीं उलोवन सक्रीय रितीन भाग घेतलो.
निमाणें त्या दीस जल्मा दीस आचरण केल्ल्या श्री देवदास पै हांकां हाजर आसल्ल्यांनी जल्मादिसाचें गीत गावन उल्लासिलें.
-भातमी