ಪಿ. ಜಿ. ಕಾಮತ್ ಕೊಂಕಣಿಚೊ ಚಾಬೂಕ್ ಕವಿ: ಎಚ್ಚೆಮ್ ಪೆರ್ನಾಲ್
ಕವಿತಾ ಟ್ರಸ್ಟ್ ಹಾಂಣಿ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನ್ ಹಾಂಚೆ ಸಾಂಗಾತಾ ಮೆಳುನ್ ಹ್ಯಾಚ್ ಮಾಯ್ 17, 2026 ತಾರಿಕೆರ್ ದೊನ್ಪಾರಾಂ ವಿಶ್ವ ಕೊಂಕಣಿ ಕೇಂದ್ರ್, ಶಕ್ತಿನಗರ್ ಮಂಗ್ಳುರ್ ಹಾಂಗಾಸರ್ ಕವಿ ಪಿ. ಜಿ. ಕಾಮತ್ ಹಾಂಚಿ ಜಲ್ಮಾಶತಾಬ್ದಿ ಆಚರಣ್ ಕೆಲಿ.
ಹ್ಯಾ ಸಂದರ್ಭಾರ್ ಯೆವ್ಕಾರ್ ಉಲೊವ್ಪ್ ಕೆಲ್ಲ್ಯಾ ಕವಿತಾ ಟ್ರಸ್ಟ್ ಕಾರ್ಯದರ್ಶಿ ಆಂಡ್ರ್ಯೂ ಎಲ್ ಡಿಕುನ್ಹಾನ್ "ಕವಿ ಪಿ. ಜಿ ಕಾಮತ್ ಏಕ್ ದಾಕ್ಷೆಣ್ ನಾತಲ್ಲೊ ಧಯ್ರಾದಿಕ್ ಕವಿ. ತಾಂಚ್ಯಾ ಕವಿತೆಂಚೊ ಕೇಂದ್ರ್ ಬಿಂದು ಮನಿಸ್ . ತಾಂಣಿ ಮನ್ಶಾಕ್ ದೋನ್ ಥರಾನ್ ಪಳೆಯ್ಲೆಂ: ನೀಚ್ ಮನಿಸ್ ಆನಿ ನೀಜ್ ಮನಿಸ್. ತಾಂಚ್ಯಾ ಕವಿತೆಂಚೆ ವಿಶಯ್ ಆಸಾತ್, ಮನ್ಶಾಪಣ್ ಆನಿ ಮನ್ಶಾಗೂಣ್. ಪುಣ್ ಕವಿತೆಂಚೊ ಖರೊ ಆಶಯ್ ಆಸಾ - ಸಂಸಾರಾಚ್ಯಾ ಬರ್ಯಾ ಫಾಲ್ಯಾಚಿ ಆಕಾಂಕ್ಶಾ" ಅಶೆಂ ಮ್ಹಳೆಂ.
ಮುಕಾರಿಂ ಉಲೊವ್ನ್ "ಆಯ್ಚ್ಯಾ ಕಾಳಾರ್, ಮನಿಸ್ ಆಪ್ಲ್ಯಾ ಸ್ವಾರ್ಥಾಚ್ಯಾ ಭೃಶ್ಟ್ ಆಚಾರಾಂನಿ, ಆಪ್ಲ್ಯಾಚ್ ಊಂಚ್ ವಿಚಾರಾಂಚ್ಯಾ ಉಜ್ವಾಡಾಚೆರ್ ಗ್ರಹಣ್ ಹಾಡ್ತಾನಾ, ತಾಂಚ್ಯಾ ಅಂತಸ್ಕರ್ನಾಕ್ ಸರ್ಸರಿತ್ ಪ್ರಹಾರ್ ಕರ್ಚೆಂ ಚಾಬೂಕ್ ಜಾವ್ನ್ ರಾವ್ಲ್ಯಾಂತ್ ಕಾಮತ್ ಮಾಮಾಚಿಂ ಕವಿತಾಂ."
ಪಿ. ಜಿ. ಕಾಮತ್ ಹಾಂಚೆಂ ಜಿವಿತ್ ಆನಿ ಕವಿತೆಚೊ ಆಜ್ ಆಮಿ ಸಂಭ್ರಮ್ ಕರ್ತಾನಾ, ಖರೆಂ ಜಾವ್ನ್ ಆಮಿ ಮನ್ಶಾಪಣಾಚೊ ಆನಿ ಸತಾಚೊ ಉತ್ಸವ್ ಮನಾಯ್ತಾಂವ್. ತಾಂಚ್ಯಾ ಕವಿತೆಂಚೊ ಉಜ್ವಾಡ್ ಆಮ್ಚಾ ಭಿತರ್ ಪಡ್ತಾನಾ, ಆಮ್ಚ್ಯಾ ಭಿತರ್ಲ್ಯಾ ‘ನೀಜ್ ಮನ್ಶಾಕ್’ ಚಡ್ ಗುಂಡಾಯೆನ್ ವಳ್ಕೊಂಕ್ ಆನಿ ಸಂಸಾರಾಚ್ಯಾ ಬರ್ಯಾಫಾಲ್ಯಾಚಿ ಆಕಾಂಕ್ಷಾ ಕರುಂಕ್ ಏಕ್ ಬರೊಚ್ ಆವ್ಕಾಸ್ ಜಾತಲೊ" ಅಶೆಂ ಆಂಡ್ರ್ಯೂ ಡಿಕುನ್ಹಾ ಮ್ಹಣಾಲೊ.
ಹ್ಯಾ ಸಂದರ್ಭಾರ್ ಪ್ರಾಸ್ತಾವೀಕ್ ಉಲೊವ್ಪ್ ಕೆಲ್ಲ್ಯಾ ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಮ್ಹಳೆಂಕಿ "ಎಕಾ ಕೊಂಕಣಿ ಭೊಂವಾರಾಂತ್ ಜಲ್ಮುನ್, ಮೊವಾಳ್ ಉತ್ರಾಂ ಉಲೊವ್ಪಿ, ಭೊಂವ್ತಣಿ ತಶೆಂ ಘರಾಂತ್ ಜಾಯ್ತೆ ಆಸುನೀ, ಹಿತಾಚಿಂ ಉತ್ರಾಂ ಸಾಂಗ್ಚ್ಯಾ ಮನ್ಶಾಂಕ್ ಸೊದುನ್ ವಚುನ್, ತಾಂಚೆ ಥಾವ್ನ್ ತಿಂ ಆಯ್ಕುನ್, ಸಮ್ಜುನ್ ಘೆವ್ನ್ -ತಿಂ ಉತ್ರಾಂಚ್ ಆಪ್ಲೆಂ ಜಿವಿತ್ ಜಾವ್ನ್ ಪಿ. ಜಿ. ಕಾಮತಾನ್ ಬದ್ಲುನ್ ಘೆತ್ಲೆಂ" ಅಶೆಂ ಸಾಂಗ್ಲೆಂ ಆನಿ ಕವಿಚಿ ಸವಿಸ್ತಾರ್ ವಳಖ್ ಕರುನ್ ದಿಲಿ.
"ತಾಚ್ಯಾ ಮರ್ಣಾ ಉಪ್ರಾಂತ್ ಪರ್ಗಟ್ ಜಾಲ್ಲ್ಯಾ ’ವಳಖ್’ ಕವಿತಾ ಸಂಗ್ರಹಾ ಮಾರಿಫಾತ್, ಮನ್ಶಾಚ್ಯಾ ಅಣ್ಭವಾಕ್ ಆನಿ ಆತ್ಮನಿರೀಕ್ಷಣೆಕ್ ಖೊಲಾಯೆನ್ ಸಮ್ಜುಂಚೊ ಏಕ್ ಕವಿ ಜಾವ್ನ್ ತೊ ಉಗ್ತೊ ಜಾಲೊ. ಪಿ. ಜಿ. ಕಾಮತ್ ಹಾಂಚೊ ವಾರ್ಸೊ, ವಾ ತಾಂಚೆಂ ದಾಯ್ಜ್ ಜೆಂ ಆಸಾ, ತೆಂ ಪುಸ್ತಕಾಂ ಆನಿ ಕವಿತಾಂ ಪರಸ್ ಚಡ್. ತೊ ಕೊಂಕಣಿ ಅಸ್ಮಿತಾಯೆಚಿ ಪರಂಪರಾ ಜಿ ಆಸಾ, ತಾಂತ್ಲೊ ಏಕ್ ಬಳ್ವಂತ್ ಗಾಂಚ್" ಅಶೆಂ ಮೆಲ್ವಿನ್ ಮ್ಹಣಾಲೊ.
ಹ್ಯಾ ಸಂದರ್ಭಾರ್ ಹಾಜರ್ ಆಸಲ್ಲ್ಯಾ ಸೈರ್ಯಾಂನಿ ಪಿ.ಜಿ. ಕಾಮತ್ ಹಾಂಚೆ ತಸ್ವೀರೆಕ್ ಫುಲಾಂ ದವ್ರುನ್ ತಾಂಕಾಂ ನಮನ್ ಕೆಲೆಂ. ಪಿ. ಜಿ. ಕಾಮತಾಚೊ ಪೂತ್ ಆನಂದ್ ಕಾಮತ್ ತಶೆಂ ತಾಂಚಿ ಪತಿಣ್ ಆನಿ ಧುವ್ ಹ್ಯಾ ಸಂದರ್ಭಾರ್ ವೇದಿರ್ ಆಸಲ್ಲಿಂ.
ಮುಕೆಲ್ ಸೈರೊ ಜಾವ್ನ್ ಆಯಿಲ್ಲ್ಯಾ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನಾಚೊ ಅಧ್ಯಕ್ಶ್ ಸಿ.ಎ. ನಂದಗೋಪಾಲ್ ಶೆಣೈ ಹಾಂಣಿ ಕವಿತಾ ಟ್ರಸ್ಟಾ ಸಾಂಗಾತಾ ಪಿ.ಜಿ. ಕಾಮತ್ ತಸಲ್ಯಾ ಕವಿಚೆಂ ಜಲ್ಮಾಶತಾಬ್ದಿ ಆಚರಣ್ ಕರುಂಕ್ ಯೋಗ್ಯ್ ಮೆಳಲ್ಲ್ಯಾಕ್ ದೇವ್ ಬರೆಂ ಕರುಂ ಮ್ಹಣ್ಟಾನಾ ದರೆಕಾ ಮ್ಹಯ್ನ್ಯಾಂತ್ ಅಸಲ್ಯಾ ಕವಿ ಆನಿ ಕವಿತಾ ಆಚರಣಾಂಚ್ಯೊ ಕಾರ್ಯಾವಳಿ ವಿಶ್ವ ಕೊಂಕಣಿ ಕೇಂದ್ರಾಂತ್ ಚಲೊವ್ನ್ ವ್ಹರ್ಚ್ಯಾಕ್ ಉಲೊ ದಿಲೊ.
ಆನಂದ್ ಜಿ. ಕಾಮತ್ ಉಲೊವ್ನ್ "ಬಾಪ್ಪಾ ಉಣ್ಯಾ ಉಲೊವ್ಣ್ಯಾಚೊ ಮನೀಸ್ ಆಸಲ್ಲೊ. ಆಮಿ ಚಿಂತಲ್ಲೆಬರಿಂ ಜಿವಿತ್ ಜಿಯೆಂವ್ಚ್ಯಾಕ್ ತಾಂಣಿ ಆಮ್ಕಾಂ ಧೈರ್ ದಿಲೆಂ. ಚೂಕ್ ಕರ್ತಾನಾ, ಸಾರ್ಕೆಂ ಕೆಲೆಂ" ಮ್ಹಣುನ್ ಬಾಪಯ್ ಜಾವ್ನ್ ಪಿ. ಜಿ. ಕಾಮತಾನ್ ಕುಟುಂಬಾ ಥಂಯ್ ದಾಕಯಿಲ್ಲಿ ಕಾಳ್ಜಿ ವಿಸ್ತಾರಾಯೆನ್ ಕಳಯ್ಲಿ.
ಪ್ರಮುಖ್ ಉಲೊವ್ಪ್ ಕೆಲ್ಲ್ಯಾ ಎಚ್ಚೆಮ್ ಪೆರ್ನಾಲ್ ಹಾಂಣಿ "ಸಮಾಜಿಕ್ ಅನಿಶ್ಟಾಂಚೇರ್ ಆಪ್ಲ್ಯಾ ಕಾವ್ಯಾಂತ್ ನಿರ್ದಾಕ್ಷಿಣೆನ್ ಬೊಡಿ ಮಾರಲ್ಲೊ ಕವಿ ಜಾವ್ನಾಸಾ ಪಿ. ಜಿ. ಕಾಮತ್. ವೃತ್ತೆನ್ ಶಿಕ್ಷಕ್ ಜಾಲ್ಲ್ಯಾನ್ ತಾಚೆಥಂಯ್ ಅಗಾದ್ ವಾಚನ್ ಆನಿ ಅಪಾರ್ ಅನ್ಭೊಗ್ ಆಸ್ಲೊ. ಶಿಕ್ಶಣ್ ಆನಿ ಪ್ರಶಿಕ್ಷಣಾನ್ ಗಿರೇಸ್ತ್ ಕಾವ್ಯಾದ್ವಾರಿಂ ತಾಣೆಂ ಲೊಕಾಕ್ ಶಿಕ್ಷಿತ್ ಆನಿ ಪ್ರಶಿಕ್ಷಿತ್ ಕರ್ಚೆಂ ಕಾಮ್ ಕೆಲೆಂ ದೆಕುನ್ ತಾಚ್ಯಾ ಕಾವ್ಯಾಂತ್ ಟೀಚರ್ ಆನಿ ಪ್ರೀಚರ್ ದೋನೂಯ್ ಗೂಣ್ ಉಪ್ಜಲ್ಲೆ ದಿಸ್ತಾತ್. ತಾಕಾ ಜಾಯ್ತ್ಯೊ ಭಾಸೊ ಯೆತಾಲ್ಯೊ ಮಾತ್ ನ್ಹಯ್, ಸರ್ವ್ ಧರ್ಮ್ಗ್ರಂಥಾಂ ತಾಣೆ ಖೊಲಾಯೇನ್ ಅಧ್ಯಯನ್ ಕೆಲ್ಲಿಂ ದಿಸುನ್ ಯೆತಾತ್. ಹ್ಯಾಚ್ ಕಾರಣಾಕ್ ಲಾಗೊನ್ ಜೆಜು, ಬುದ್ದ, ಗಾಂಧಿ, ಅಂಬೇಡ್ಕರ್ ಸಗ್ಳ್ಯಾಂಚೆ ಉಪದೇಸ್ ತಾಚ್ಯಾ ಕಾವ್ಯಾಂತ್ ದಿಸ್ತಾತ್. ಸಂಯ್ಭಾನ್ ಸುಧಾರಣ್ವಾದಿ ಚಿಂತ್ಪಾಚೊ ಜಾಲ್ಲ್ಯಾನ್ ತಾಕಾ ಕೊಂಕ್ಣೆಚೊ ಚಾಬೂಕ್ ಕವಿ ಮ್ಹಳ್ಯಾರೀ ಚೂಕ್ ಜಾಂವ್ಚೆಂ ನಾ" ಅಶೆಂ ಸಾಂಗ್ಲೆಂ.
ಹ್ಯಾ ಉಪ್ರಾಂತ್ ಕವಿ ಪಿ. ಜಿ. ಕಾಮತ್ ಹಾಂಚ್ಯಾ ವೆಂಚೀಕ್ ಕವಿತಾಂಚೆಂ ಸಾದರೀಕರಣ್ ಜಾಲೆಂ. ಎಮ್. ಆರ್. ಕಾಮತ್, ನಿನಿಶಾ ಮೊಂತೇರೊ, ವೆಂಕಟೇಶ್ ನಾಯಕ್ ಆನಿ ಸ್ಮಿತಾ ಶೆಣೈ ಹಾಂಣಿ ಬೋವ್ ಆಪುರ್ಬಾಯೆನ್ ಕವಿತಾ ಸಾದರ್ ಕೆಲ್ಯೊ.
ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ಸಾದರ್ ಕೆಲ್ಲ್ಯಾಂಕ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ. ಸ್ಟೇನಿ ಬೆಳಾನ್ ಸೂತ್ರ್ ಸಂಚಾಲನ್ ಕೆಲ್ಲೆಂ.
पी. जी. कामत कोंकणीचो चाबूक कवी: एच्चेम पेर्नाल
कविता ट्रस्ट हांणी कोंकणी भास आनी संस्कृती प्रतिष्ठान हांचे सांगाता मेळून ह्याच माय 17, 2026 तारकेर दोनपारां विश्व कोंकणी केंद्र, शक्तीनगर मंगळूर हांगासर कवी पी. जी. कामत हांची जल्माशताब्दी आचरण केली.
ह्या संदर्भार येवकार उलोवप केल्ल्या कविता ट्रस्ट कार्यदर्शी आंड्र्यू एल डिकुन्हान "कवी पी. जी कामत एक दाक्षेण नातल्लो धयरादीक कवी. तांच्या कवितेंचो केंद्र बिंदू मनीस. तांणी मनशाक दोन थरान पळेयलें: नीच मनीस आनी नीज मनीस. तांच्या कवितेंचे विशय आसात, मनशापण आनी मनशागूण. पूण कवितेंचो खरो आशय आसा - संवसाराच्या बर्या फाल्याची आकांक्षा" अशें म्हळें.
मुकारीं उलोवन "आयच्या काळार, मनीस आपल्या स्वार्थाच्या भृश्ट आचारांनी, आपल्याच ऊंच विचारांच्या उजवाडाचेर ग्रहण हाडताना, तांच्या अंतस्कर्नाक सर्सरीत प्रहार करचें चाबूक जावन रावल्यांत कामत मामाचीं कवितां."
पी. जी. कामत हांचें जिवीत आनी कवितेचो आज आमी संभ्रम करताना, खरें जावन आमी मनशापणाचो आनी सताचो उत्सव मनायतांव. तांच्या कवितेंचो उजवाड आमचे भितर पडताना, आमच्या भितरल्या ’नीज मनशाक’ चड गुंडायेन वळकोंक आनी संवसाराच्या ब्र्याफाल्याची आकांक्षा करुंक एक बरोच आवकास जातलो" अशें आंडऱ्यू डिकुन्हा म्हणालो.
ह्या संदर्भार प्रास्तावीक उलोवप केल्ल्या कविता ट्रस्टाचो अध्यक्ष मेल्विन रोड्रिगसान म्हळेंकी "एका कोंकणी भोंवारांत जल्मून, मोवाळ उत्रां उलोवपी, भोंवतणी तशें घरांत जायते आसुनी, हिताचीं उत्रां सांगच्या मनशांक सोदून वचून, तांचे थावन तीं आयकून, समजून घेवन -तीं उत्रांच आपलें जिवीत जावन पी. जी. कामतान बदलून घेतलें" अशें सांगलें आनी कविची सविस्तार वळख करून दिली.
"ताच्या मर्णा उपरांत पर्गट जाल्ल्या ’वळख’ कविता संग्रहा मारीफात, मनशाच्या अणभवाक आनी आत्मनिरीक्षणेक खोलायेन समजुंचो एक कवी जावन तो उगतो जालो. पी. जी. कामत हांचो वारसो, वा तांचें दायज जें आसा, तें पुस्तकां आनी कवितां परस चड. तो कोंकणी अस्मितायेची परंपरा जी आसा, तांतलो एक बळवंत गांच" अशें मेल्वीन म्हणालो.
ह्या संदर्भार हाजर आसल्ल्या सोयर्यांनी पी.जी. कामत हांचे तस्वीरेक फुलां दवरून तांकां नमन केलें. पी. जी. कामताचो पूत आनंद कामत तशें तांची पतीण आनी धूव ह्या संदर्भार वेदीर आसल्लीं.
मुकेल सोयरो जावन आयल्ल्या कोंकणी भास आनी संस्कृती प्रतिष्ठानाचो अध्यक्ष सी.ए. नंदगोपाल शेणै हांणी कविता ट्रस्टा सांगाता पी.जी. कामत तसल्या कविचें जल्माशताब्दी आचरण करुंक योग्य मेळल्ल्याक देव बरें करूं म्हणटाना दरेका म्हयन्यांत असल्या कवी आनी कविता आचरणांच्यो कार्यावळी विश्व कोंकणी केंद्रांत चलोवन व्हरच्याक उलो दिलो.
आनंद जी. कामत उलोवन "बाप्पा उण्या उलोवण्याचो मनीस आसल्लो. आमी चिंतल्लेबरीं जिवीत जियेंवच्याक तांणी आमकां धैर दिलें. चूक करताना, सारकें केलें" म्हणून बापय जावन पी. जी. कामतान कुटुंबा थंय दाकयिल्ली काळजी विस्तारायेन कळयली.
प्रमूख उलोवप केल्ल्या एच्चेम पेर्नाल हांणी "समाजीक अनिश्टांचेर आपल्या काव्यांत निर्दाक्षिणेन बडी मारल्लो कवी जावनासा पी. जी. कामत. वृत्तेन शिक्षक जाल्ल्यान ताचेथंय अगाद वाचन आनी अपार अनभोग आसलो. शिक्षण आनी प्रशिक्षणान गिरेस्त काव्याद्वारीं ताणें लोकाक शिक्षीत आनी प्रशिक्षीत करचें काम केलें देकून ताच्या काव्यांत टीचर आनी प्रीचर दोनूय गूण उपजल्ले दिसतात. ताका जायत्यो भासो येताल्यो मात न्हय, सर्व धर्मग्रंथां ताणे खोलायेन अध्ययन केल्लीं दिसून येतात. ह्याच कारणाक लागोन जेजू, बुद्द, गांधी, अंबेडकर सगळ्यांचे उपदेस ताच्या काव्यांत दिसतात. संयभान सुधारणवादी चिंतपाचो जाल्ल्यान ताका कोंकणेचो चाबूक कवी म्हळ्यारी चूक जांवचें ना" अशें सांगलें.
ह्या उपरांत कवी पी. जी. कामत हांच्या वेंचीक कवितांचें सादरीकरण जालें. एम. आर. कामत, निनिशा मोंतेरो, वेंकटेश नायक आनी स्मिता शेणै हांणी बोव आपुरबायेन कविता सादर केल्यो.
मेल्विन रोड्रीगसान कविता सादर केल्ल्यांक प्रमाण पत्रां वांटलीं. स्टेनी बेळान सूत्र संचालन केल्लें.