‘ಕೀರ್ ತುಂ ಮ್ಹಜೊ’ ಖ್ಯಾತೆಚೊ ಡೊ. ಎಡ್ವರ್ಡ್ ನೊರೊನ್ಹಾ ಆನಿ ನಾ
ಮೈಸೂರ್, ಒಕ್ಟೋಬರ್ 8: ಡೊ. ಎಡ್ವರ್ಡ್ ರೊಬರ್ಟ್ ಜೂಡ್ ಥಾದ್ದೆಯುಸ್ ನೊರೊನ್ಹಾ, ಜೊ ಕೊಂಕಣಿ ಸಂಸಾರಾಂತ್, ಪ್ರತ್ಯೇಕ್ ಕರುನ್ ಕಾವ್ಯಶೆತಾಂತ್ ಎಡ್ವರ್ಡ್ ನೊರೊನ್ಹಾ ಮ್ಹಣೊನಚ್ ಫಾಮಾದ್ ಆಸಲ್ಲೊ, ತೊ ಹ್ಯಾಚ್ ಒಕ್ಟೋಬ್ರಾಚೆ 8 ತಾರಿಕೆರ್ ಫಾಂತ್ಯಾಫುಡೆಂ ಮೈಸೂರಾಂತ್ಲ್ಯಾ ವಿಕ್ರಮ್ ಆಸ್ಪತ್ರೆಂತ್ ಅಂತರ್ಲೊ. ಒಕ್ಟೋಬ್ರಾಚೆ 13 ತಾರಿಕೆರ್ ತಾಕಾ 63 ವರ್ಸಾಂ ಭರ್ತಿಂ.
ಡೊ. ಎಡ್ವರ್ಡ್ ನೊರೊನ್ಹಾನ್ ಕೊಂಕಣಿ ಕವಿತಾಶೆತಾಕ್ ಕಾಂಯ್ ಅಪ್ರೂಪಾಚಿ ದೇಣ್ಗಿ ದಿಲ್ಯಾ. ‘ಕೀರ್ ತುಂ ಮ್ಹಜೊ’ ತಾಚೊ ಕಾವ್ಯ ಸಂಗ್ರಹ್. ಗೋವಿಂದ ಪೈನ್ ಬರಯಿಲ್ಲೆಂ ‘ಗೊಲ್ಗೊಥಾ’ ನೀಳ್ಗವನ್ ತಾಣೆಂ ಕೊಂಕಣಿಕ್ ಅಣ್ಕಾರ್ ಕೆಲಾಂ. ಕನ್ನಡಾಂತ್ ತಾಚಿಂ ನೋವ್ ಪುಸ್ತಕಾಂ ಪರ್ಗಟ್ ಜಾಲ್ಯಾಂತ್. ತಿತ್ಲೆಂಚ್ ನ್ಹಯ್ ಆಸ್ತಾಂ ಶೆಂಭರಾಂನಿ ಸಂಸೊಧಾಚಿಂ ಲೇಖನಾಂ ರಾಷ್ಟ್ರೀಯ್ ತಶೆಂ ಅಂತರಾಷ್ಟ್ರೀಯ್ ನೆಮಾಳ್ಯಾಂನಿ ಪರ್ಗಟ್ ಜಾಲ್ಯಾಂತ್.
ಡೊ. ಎಡ್ವರ್ಡ್, ಮೈಸೂರ್ ವಿಶ್ವವಿದ್ಯಾನಿಲಯಾಂತ್ ಕನ್ನಡಾಚೊ ಪ್ರೊಫೆಸರ್ ಜಾವ್ನ್ ವಾವುರ್ತಾಲೊ. ಮೈಸೂರ್ ಮಾತ್ರ್ ನ್ಹಯ್ ಮಂಡ್ಯ, ಹಾಸನಾಂತ್ ತಾಣೆಂ ವಾವ್ರ್ ಭೆಟಯ್ಲಾ. ಪ್ರೊಫೆಸರ್ ಜಾಂವ್ಚ್ಯಾ ಆದಿಂ ಕುವೆಂಪು ವಿಶ್ವವಿದ್ಯಾನಿಲಯಾಂತ್, ಸೈಂಟ್ ಫಿಲೊಮೆನಾ ಕೊಲೆಜ್, ಮೈಸೂರ್, ಸೈಂಟ್ ಜೋಸೆಫ್ಸ್ ಹೈಸ್ಕೂಲ್ ಹಾಸನ್ ಆನಿ ಹೆರೆಕಡೆಂ ತೊ ವಾವುರ್ಲಾ.
ಬೆಂದುರ್ ಸೈಂಟ್ ಸೆಬಾಸ್ಟಿಯನ್ ಶಾಳೆಂತ್ ಪ್ರಾಥಮಿಕ್ ಶಿಕಪ್ ಸಂಪಯ್ತಚ್ ಸಾಂ. ಲುವಿಸ್ ಕೊಲೆಜಿ ಥಾವ್ನ್ ಬಿ. ಎಸ್ಸಿ, ಸನದ್ ತಾಣೆಂ ಆಪ್ಣಾಯಿಲ್ಲಿ. ಪುಣೆಚ್ಯಾ ಜ್ಞಾನದೀಪ ವಿದ್ಯಾಪೀಠ ಥಾವ್ನ್ ಫಿಲೊಸೊಫಿ ತೊ ಶಿಕ್ಲೊ. ದೇವಶಾಸ್ತ್ರಾಂತ್ ಸಯ್ತ್ ತಾಣೆ ಗಿನ್ಯಾನ್ ಜೊಡ್ಲೆಂ. ಉಪ್ರಾಂತ್ ಮೈಸೂರ್ ವಿಶ್ವವಿದ್ಯಾನಿಲಯಾ ಥಾವ್ನ್ ಕನ್ನಡಾಂತ್ ಎಮ್. ಎ. ತೊ ಶಿಕ್ಲೊ. ಕನ್ನಡ ಸಾಹಿತ್ಯ್, ಭಾಶಾಶಾಸ್ತ್ರ್, ಯೆರೊಪಿ ಸಾಹಿತ್ಯ್, ನಾಟಕ್ ಆನಿ ಕವಿತಾ - ಹಾಂತುಂ ತಾಕಾ ವಿಶೇಸ್ ಜಾಣ್ವಾಯ್ ಆಸಲ್ಲಿ. ಕೊಂಕಣಿ, ಕನ್ನಡ, ತುಳು, ಇಂಗ್ಲಿಷ್, ಜರ್ಮನ್, ಲ್ಯಾಟಿನ್ ಅಶೆಂ ಸಭಾರ್ ಭಾಸೊ ತಾಕಾ ಉಲೊಂವ್ಕ್ ಯೆತಾಲ್ಯೊ.
ಭಾಶೆಕ್ ಲಗ್ತಿ ಜಾಲ್ಲ್ಯಾ ಜಾಯ್ತ್ಯಾ ಸಂಸ್ಥ್ಯಾಂನಿ ತಾಣೆಂ ಮರ್ಯಾದೆಚೆ ಹುದ್ದೆ ಸಾಂಬಾಳ್ಳ್ಯಾತ್.
ತಾಚೊ ಬಾಪಯ್ ಫೆಲಿಕ್ಸ್ ಪಾವ್ಲ್ ನೊರೊನ್ಹಾ ಪ್ರಖ್ಯಾತ್ ಕೊಂಕಣಿ ಕವಿ. ತಾಚಿ ಆವಯ್ ಮಾಗ್ದಲೆನ್ ಪಿರೇರಾ ಥೊಡ್ಯಾಚ್ ವರ್ಸಾಂ ಆದಿಂ ಅಂತರಲ್ಲಿ. ತಾಂಚೆಂ ಕುಟಮ್ ಬೆಂದುರ್ ಕದ್ರಿ ಲಾಗ್ಸಾರ್ ವಸ್ತಿ ಕರ್ತಾಲೆಂ. ತಾಚಿ ಪತಿಣ್ ಮಿನೆಟ್ ಪಿಂಟೊ. ತಾಂಕಾಂ ದೊಗಾಂ ಭುರ್ಗಿಂ - ಇಮ್ಮಾನುವೆಲ್ ಮೇರಿಯನ್ ಆನಿ ವಿಲಿಯಮ್.