ಕಾರ್ಮೆಲ್ ಮೊಳ್ಯಾಂತ್ ಕೊಗ್ಳೆಚೆಂ ಗಾಯಾನ್: ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾಚ್ಯಾ ಪದಾಂಚೆರ್ ವಿಚಾರ್ ಸಾತೆಂ
‘ನಮಾನ್ ಬಾಳೊಕ್ ಜೆಜು’ ಕೊಂಕ್ಣಿ ಮ್ಹಯ್ನ್ಯಾಳ್ಯಾಕ್ ತೀನ್ ವರ್ಸಾಂ ಭರ್ಚೆ ಸಂಧರ್ಬಿಂ ಹ್ಯಾಚ್ ದಸೆಂಬ್ರಾಚೆ 4 ತಾರಿಕೆರ್ ಬಿಕರ್ನಕಟ್ಟೆ ಕಾರ್ಮೆಲ್ ಗುಡ್ಯಾರ್ ‘ಕಾರ್ಮೆಲ್ ಮೊಳ್ಯಾಂತ್ ಕೊಗುಳೆಚೆಂ ಗಾಯಾನ್’ ಮ್ಹಳ್ಳೆಂ ವಿಲ್ಫಿಚ್ಯಾ ಪದಾಂಚೆರ್ ವಿಚಾರ್ ಸಾತೆಂ ಮಾಂಡುನ್ ಹಾಡ್ಲ್ಲೆಂ.
‘ಕೊಂಕಣ್ ಮೈನಾ’ ಶ್ರೀಮತಿ ಮೀನಾ ರೆಬಿಂಬಸ್ ಮುಕೆಲ್ ಸಯ್ರಿಣ್ ಜಾವ್ನ್ ಆನಿ ಕಾರ್ಮೆಲಿತ್ ಪ್ರೊವಿನ್ಸಿಯಲ್ ಮಾ ಬಾ ಆರ್ಚಿ ಗೊಸಾಲ್ ಅಧ್ಯಕ್ಷ್ ಜಾವ್ನಾಸ್ಲ್ಲ್ಯಾ ಹ್ಯಾ ವಿಚಾರ್ ಸಾತ್ಯಾಚೆಂ ಫುಡಾರ್ಪಣ್ ನಾಮ್ಣೆಚೊ ಕವಿ ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸಾನ್ ಘೆತ್ಲ್ಲೆಂ.
ಪ್ರಾರ್ಥನ್ ನಾಚಾ ಉಪ್ರಾಂತ್ ಕೊಂಕಣ್ ಕೊಗುಳ್ ದೆ. ವಿಲ್ಫಿ ರೆಬಿಂಬಸಾಚ್ಯಾ ತಸ್ವಿರೆಕ್ ಫುಲಾಂ ಅರ್ಪುನ್ ಶೃದ್ದಾಂಜಲಿ ದಿಂವ್ಚೆ ಸಂಗಿಂ ಕಾರ್ಯಾಚಿ ಸುರ್ವಾತ್ ಜಾಲಿ.
ಕಾರ್ಯಾಕ್ ಹಾಜರ್ ಆಸ್ಲ್ಲ್ಯಾಂಕ್ ಬರೊ ಯೆವ್ಕಾರ್ ಮಾಗೊನ್ ‘ನಮಾನ್ ಬಾಳೊಕ್ ಜೆಜು’ ಕೊಂಕ್ಣಿ ಮ್ಹಯ್ನ್ಯಾಳ್ಯಾಚೊ ಸಂಪಾದಕ್ ಮಾ. ಬಾ. ಸ್ಟೀಫನ್ ಪಿರೇರ್ ಹಾಣಿಂ ಮ್ಹಳೆಂ ‘ವಿಲ್ಫಿಚ್ಯಾ ಸಾಹಿತ್ಯಾಚೆರ್ ವ್ಹಡ್ ಮಾಪಾನ್ ಅಧ್ಯಯನ್ ಜಾವ್ನಾ ಮ್ಹಳ್ಳೊ ಊಣ್ ಭರ್ತಿ ಕರ್ಚೆ ಖಾತಿರ್ ಕಾರ್ಮೆಲ್ ಭಾವಾಂನಿ ಹೆಂ ಕಾರ್ಯೆಂ ಮಾಂಡುನ್ ಹಾಡ್ಲಾಂ’
ಪತ್ರಕಾರ್, ಸಾಹಿತಿ ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾನ್ ‘ವಿಲ್ಫಿಚ್ಯಾ ಪದಾಂನಿ ಸಾಮಾಜಿಕ್ ಹುಸ್ಕೊ ಆನಿ ಕ್ರಾಂತಿಕಾರಿ ಚಿಂತಪ್’ ಮ್ಹಳ್ಳ್ಯಾ ವಿಶಯಾಚೆರ್ ಪಯ್ಲೊ ಪ್ರಬಂಧ್ ಮಾಂಡ್ಲೊ. ವಿಲ್ಫಿ ಆಪ್ಲ್ಯಾ ಪದಾಂ ದ್ವಾರಿಂ ಯೇರ್ ಆಯಿಲ್ಲೆ ಕುಶೀನ್ ಸಮ್ಜಣೆಚೆಂ ಮುಲಾಮ್ ಲಾವ್ನ್ ಪರಿಹಾರ್ ಸಾಂಗ್ತಾಲೊ; ನಾಜುಕಾಯೆನ್ ಬೆಂಡ್ತಾಲೊ; ರಶೀಮ್ ಲುಗಟ್ ರೆವ್ಡಾವ್ನ್ ಮುಸ್ಕರಾಕ್ ಮಾರ್ಚೆಪರಿಂ ಖಂಡನ್ ಕರ್ತಾಲೊ. ತೊ ಖಂಡನ್ ಕರ್ತಾಲೊ ಜಾಲ್ಯಾರಿ ಶೀದಾ ಸಾಂಗನಾತಲ್ಲೊ ಅಶೆಂ ಡೊಲ್ಫಿನ್ ವಾದ್ ಮಾಂಡ್ಲೊ. ಕ್ರಾಂತಿವಿಶಿಂ ಉಲೊವ್ನ್ ದೊತಿಚೆಂ ಖರ್ಗ್ ನಿವಾರಣ್, ಕೊಂಕಣೀ ಭಾಸ್ ಉದರ್ಗತಿ ಆನಿ ಕೊಂಕಣಿ ಸಂಗೀತ್ ಏಕ್ ಉದ್ಯಮ್ ಜಾವ್ನ್ ಪರಿವರ್ತನ್ - ಹ್ಯಾ ಮುದ್ದ್ಯಾಂಚೆರ್ ತಾಂಣಿ ಭೊರ್ ಘಾಲೊ.
ದುಸ್ರೊ ವಿಶಯ್ ‘ವಿಲ್ಫಿಚ್ಯಾ ಪದಾಂನಿ ಸ್ತ್ರೀಯೆಚೆಂ ಚಿತ್ರಣ್’ ಜಾವ್ನಾಸೊನ್ ಹಾಚೆರ್ ಪ್ರಬಂದ್ ಮಂಡನ್ ಕೆಲ್ಲಿ ಶ್ರೀಮತಿ ಕನ್ಸೆಪ್ಟಾ ಆಳ್ವ ಹಿಣೆ ‘ವಿಲ್ಫಿ ಏಕ್ ದಾದ್ಲೊ ಜಾವ್ನ್ಯಿ ಆಪ್ಲ್ಯಾ ಜಾಯ್ತ್ಯಾ ಪದಾಂನಿ ತೊ ಸ್ತ್ರೀ ಪರ್ಚ್ ಆಸ್ಲೊ. ಸ್ತ್ರೀಯಾಂಕ್ ತಾಣೆ ತಾಚ್ಯಾ ಪದಾಂನಿ ಬೋವ್ ಉಂಚ್ಲ್ಯಾ ಸ್ಥಾನಾರ್ ದವರ್ಲಾಂ’ ಮ್ಹಳೆಂ. ವಿಲ್ಫಿಚ್ಯಾ ಪದಾಂನಿ ಯೆಂವ್ಚ್ಯಾ ಗಾಂವ್ಚ್ಯಾ ತಶೆಂ ಶ್ಯೆರಾಂತ್ಲ್ಯಾ ಸ್ತ್ರೀಯಾಂಚೆಂ ವಿಶ್ಲೇಶಣ್ ಕೆಲ್ಲ್ಯಾ ತಿಣೆ ‘ಮಾಯ್ಭಾಸ್ ತಶೆಂ ಮಾಯ್ಗಾವಾಕ್ ವಿಲ್ಫಿನ್ ಆಪ್ಲ್ಯಾ ಪದಾಂನಿ ಸ್ತ್ರೀಯೆಕ್ ಸರ್ ಕೆಲಾಂ. ವಿಲ್ಫಿಚ್ಯಾ ಪದಾಂನಿ ಸ್ತ್ರೀ ವೆವೆಗ್ಳ್ಯಾ ನಾಂವಾಂನಿ, ವೆವೆಗ್ಳಿಂ ರುಪಾಂ ಘೆವ್ನ್ ಯೆತಾ. ವಿಲ್ಫಿ ಸ್ತ್ರೀಯೆಚೆ ಪಕ್ಷೆನ್ ಆಸಾ ಮ್ಹಣ್ ಭೊಗ್ತಾ’ ಅಶೆಂ ಸಾಂಗೊನ್ ತಿಣೆಂ ತಾಚ್ಯಾ ಪದಾಂಚೆ ದಾಕ್ಲೆ ದಿಲೆ. ಮುಕಾರಿಂ ಉಲೊವ್ನ್ ಇತ್ಲ್ಯಾ ದಡಂಗ್ ದಾದ್ಲ್ಯಾಚೆ ಕುಡಿಭಿತರ್ ದೆವಾನ್ ಮೊವಾಳ್ ಮೈಪಾಸಿ ಕಾಳೀಜ್ ಕಶೆಂ ರಚ್ಲಾಂ ಮ್ಹಣೊನಯ್ ವಿಚಾರ್ಲೆಂ.
ತಿಸ್ರೊ ಪ್ರಬಂದಾಂತ್ ‘ ವಿಲ್ಫಿಚ್ಯಾ ಗಿತಾಂನಿ ಪವಿತ್ರ್ ಪುಸ್ತಕ್’ ಹ್ಯಾ ವಿಶಿಂ ಬಾ. ಪಿಯುಸ್ ಸೊಜ್ ಹಾಂಣಿ ಬೋವ್ ಆಪುರ್ಬಾಯೆನ್ ವಿಚಾರ್ ಮಂಡನ್ ಕರ್ನ್ ಮ್ಹಣಾಲೊ " ಏಕ್ ಗಾವ್ಪಿ ಜಾವ್ನಾಸ್ಲ್ಲ್ಯಾ ತಾಂಣಿ ಆಪ್ಲ್ಯಾ ಉಲವ್ಪಾ ಮದೆಂ ವಿಲ್ಫಿಚಿಂ ಪದಾಂ ಗಾವ್ನ್ ಆಪ್ಲೆಂ ಉಲವ್ಪ್ ಚಡ್ ಆಕರ್ಶಿಕ್ ಕೆಲೆಂ. ವಿಲ್ಫಿನ್ ಬೈಬಲಾಂತ್ಲ್ಯಾ ಕೀರ್ತನ್ಗಾರಾಕ್ ಸರ್ ಕೆಲ್ಲ್ಯಾ ತಾಂಣಿ ತಾಕಾ ಉತ್ಪತ್ತಿ ಗೃಂಥಾಂತ್ಲೆ ತೀನ್ ಅಧ್ಯಾಯ್ ಬೋವ್ ಮೊಗಾಚೆ ಜಾವ್ನಾಸಲ್ಲೆ. ತಾಚಿಂ ಪದಾಂ ಮಾಗ್ಣ್ಯಾಚೆಂ ಮಹತ್ವ್ ಸಾಂಗ್ತಾತ್ ಮಾತ್ರ್ ನ್ಹಯ್ ಶೆಜಾರ್ಯಾಚೊ ಮೋಗ್ ಕರುಂಕ್ ಉಲೊ ದಿತಾತ್ ಮ್ಹಣೊನ್ ಬಾ ಪಿಯುಸ್ ಸೊಜಾನ್ ದಾಕ್ಲ್ಯಾ ಮಾರಿಫಾತ್ ಆಪ್ಲ್ಯಾ ಅಧ್ಯಯನಾಚೆಂ ಪೇಪರ್ ಸಾದರ್ ಕೆಲೆಂ.
ವಿಚಾರ್ ಸಾತ್ಯಾಚೆಂ ಫುಡಾರ್ಪಣ್ ಘೆತ್ಲ್ಲೊ ನಾಮ್ಣೆಚೊ ಕವಿ, ದಾಯ್ಜಿ ವಲ್ಡ್ ಹಾಚೊ ನಿರ್ದೇಶಕ್ ಆನಿ ಕವಿತಾ ಟ್ರಸ್ಟ್ ಅಧ್ಯಕ್ಶ್ ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸ್ ಉಲವ್ನ್ ಮಂಗ್ಳುರಾಂತ್ ನವ್ಯಾ ಕ್ರಿಸ್ತಾಂವಾಂಚೊ ಘೆಟ್ಟೊ ಜಾವ್ನಾಸಲ್ಲ್ಯಾ ಜೆಪ್ಪು ಕಾಂಪಾಂವ್ಡಾಚ್ಯಾ ಲೊಕಾಕ್ ವಿಲ್ಫಿನ್ ಆಪ್ಲ್ಯಾ ಪದಾಂ ಮಾರಿಫಾತ್ ಕಶೆಂ ಮರ್ಯಾದ್ ಮೆಳಶೆಂ ಕೆಲೆಂ ಮ್ಹಣೊನ್ ವಿವರ್ ದಿಲೊ. ಜಮೈಕಾಚೊ ನೀಗ್ರೊ ಸಂಗೀತ್ಗಾರ್ ಬೊಬ್ ಮಾರ್ಲಿನ್ ಕಾಳ್ಯಾಂಕ್ ಭರ್ಮಾನ್ ಜಿಯೆಂವ್ಚ್ಯಾಕ್ ಕಾಳ್ಯಾ ದೆವಾಚಿ ಸೃಷ್ಟಿ ಕೆಲಿ ತರ್, ವಿಲ್ಫಿನ್ ಹ್ಯಾ ನವ್ಯಾ ಕ್ರಿಸ್ತಾವಾಂಕ್ ವೆಗ್ಳೊ ದೇವ್ ದೀನಾಸ್ತಾಂ ಬಹುಸಂಕ್ಯಾತಾಂಚ್ಯಾ ದೆವಾಸರ್ಶಿಂ ತಾಂಕಾಂ ಆಪೊವ್ನ್ ವೆಲ್ಲೆಂ ಏಕ್ ಅಪ್ರೂಫಾಚಿ ಕ್ರಾಂತಿ ಮ್ಹಣೊನ್ ಸಾಂಗ್ಲೆಂ. ವಿಲ್ಫಿಕ್, ನೋಬೆಲ್ ಪ್ರಶಸ್ತಿ ವಿಜೇತ್ ಗಾಬ್ರಿಯೆಲಾ ಮಿಸ್ತ್ರಾಲಾಕ್ ಸರ್ ಕೆಲ್ಲ್ಯಾ ತಾಣೆ ದೊಗಾಂಯ್ಚ್ಯಾ ಬಹುತೇಕ್ ಪದಾಂಚೆ ವಿಸಯ್ ಆನಿ ಆಶಯ್ ಚಡುಣೆಂ ಏಕಚ್ ಮ್ಹಣೊನ್ ಸಾಂಗೊನ್ ತಾಂಚ್ಯಾ ಪದಾಂತ್ಲ್ಯಾ ಸಾಮ್ಯತೆವಿಶಿಂ ಅಧ್ಯಯನ್ ಕಲೆಂ ಜಾಲ್ಯಾರ್ ತೆಂ ಏಕ್ ಉತ್ಕೃಷ್ಟ್ ಅಧ್ಯಯನ್ ಜಾಂವ್ಕ್ ಪಾವ್ತಲೆಂ ಮ್ಹಣೊನ್ ಸಾಂಗ್ಲೆಂ.
ಹರ್ಯೆಕಾ ಪೇಪರಾ ಉಪ್ರಾಂತ್ ಯುನಾಯ್ಟೆಡ್ ಯಂಗಸ್ಟರ್ಸ್ ಥಾವ್ನ್ ವಿಲ್ಫಿಚೆಂ ಎಕೇಕ್ ಪದ್ ಸಾದರ್ ಜಾಲೆಂ. ಮೀನಾ ರೆಬಿಂಬಸ್ ಪದ್ ಗಾವ್ನ್ ಆಪ್ಲೆಂ ಭಾಷಣ್ ಕೆಲೆಂ ತರ್ ರೆಬಿಂಬಸ್ ಕುಟ್ಮಾ ತರ್ಫೆನ್ ವಿಶ್ವಾಸ್ ರೆಬಿಂಬಸಾನ್ ಉಪ್ಕಾರ್ ಆಟಯ್ಲೆ.
ತೀನ್ ಉಲವ್ಪಾಚೆರ್ ಕೊಂಕ್ಣೆಂತ್ಲೆ ತೇಗ್ ಸಾಹಿತಿ ಹೆರೊಲ್ಪಿಯುಸ್, ಶ್ರೀ ಎಡಿ ನೆಟ್ಟೊ ಆನಿ ಶ್ರೀ ಎಡ್ಡಿ ಸಿಕೆರ್ ಹಾಂಣಿ ಆಪ್ಲಿಂ ಭೊಗ್ಣಾಂ ಉಚಾರ್ಲಿಂ. ವಿಲ್ಫಿ ‘ಉಚಾಂಬಳಿ ತರ್ನಾಟೊ’ ಆಸಲ್ಲೊ ಮ್ಹಣೊನ್ ಎಡಿ ನೆಟ್ಟೊನ್ ದಾಕ್ಲೊ ದಿಲೊ ತರ್, ವಿಲ್ಫಿಕ್ ದಿಯೆಸೆಜಿಚೊ ಕಲಾಕಾರ್ ಮ್ಹಣೊನ್ ವೊಲಾಯ್ಜೆ ಆಸಲ್ಲೆಂ ಅಶೆಂ ಎಡ್ಡಿ ಸಿಕೆರ್ ಮ್ಹಣಾಲೊ. ಕಾರ್ಯಾಚ್ಯಾ ನಿಮಾಣ್ಯಾ ಹಂತಾರ್ ‘ನಮಾನ್ ಬಾಳೊಕ್ ಜೆಜು’ ಸಾಹಿತ್ಯ್ ಸ್ಪರ್ಧ್ಯಾಂತ್ ಜಿಕ್ಲ್ಲ್ಯಾಂಕ್ ಇನಾಮಾಂ ವಾಂಟ್ಲಿಂ. ಸಹ-ಸಂಪಾದಕ್ ಜೊ.ಸಿ. ಸಿದ್ದಕಟ್ಟೆ ಹಾಂಣಿ ಧನ್ಯವಾದ್ ಸಮರ್ಪಿಲೆ. ದಿಯಾಕೊನ್ ರಾಜೇಶಾನ್ ಸಗ್ಳೆಂ ಕಾರ್ಯೆಂ ಚಲೊವ್ನ್ ವೆಲೆಂ. ಆದ್ಲೊ ಸಂಪಾದಕ್ ಮಾ. ನೆಲ್ಸನಾಕ್ ಹ್ಯಾ ಸಂದರ್ಭಾರ್ ಸನ್ಮಾನ್ ಕೆಲೊ.
ವಿಚಾರ್ ಸಾತ್ಯಾ ಉಪ್ರಾಂತ್ ಯುನಾಯ್ಟೆಡ್ ಯಂಗ್ಸ್ಟರ್ಸ್ ಪಂಗ್ಡಾ ಥಾವ್ನ್ ಆನಿ ಕಾರ್ಮೆಲಿತ್ ಭಾವಾಂ ಥಾವ್ನ್ ಮನೊರಂಜನ್ ಕಾರ್ಯಕ್ರಮ್ ಆಸ್ಲೆಂ.
ಕಾದಂಬರಿಕಾರ್ ಎಡ್ವಿನ್ ಜೆ ಎಫ್ ಡಿಸೋಜಾ, ಐರಿನ್ ಪಿಂಟೊ, ಜೊನ್ ಎಮ್ ಪೆರ್ಮನ್ನೂರ್, ಮನು ಬಾಹ್ರೇನ್, ರೊನ್ ರೊಚ್ ಕಾಸ್ಸಿಯಾ, ಫೆಲಿಕ್ಸ್ ಲೋಬೊ ಖಟಾರ್, ಹೇಮಾಚಾರ್ಯ, ಲೆಸ್ಲಿ ರೇಗೊ, ರೊಯ್ ಕಾಸ್ತೆಲಿನೊ, ಮಾಚ್ಚಾ ಮಿಲಾರ್, ಎಚ್ಚೆಮ್ ಪೆರ್ನಾಳ್, ನವೀನ್ ಕುಲ್ಶೇಕರ್, ರಿಚ್ಚಿ ಆಲ್ವರಿಸ್, ರಿಚ್ಚಿ ಜೊನ್ ಪಾಯ್ಸ್, ಜೊನ್ ಮೊನಿಸ್, ಗ್ಲೇಡಿಸ್ ರೇಗೊ, ಎಮ್ ಪೆಟ್ರಿಕ್, ಚಾರ್ಲಿ ಸೊಜ್ ಯೆಯ್ಯಾಡಿ, ಬಾ ಆಲ್ವಿ ಕಾರ್ಮೆಲಿತ್ ತಶೆಂ ಜಾಯ್ತೆ ಯಾಜಕ್ ಆನಿ ಧಾರ್ಮಿಕ್ ಭಯ್ಣಿ ಹ್ಯಾ ಕಾರ್ಯಾಕ್ ಹಾಜರ್ ಆಸಲ್ಲಿಂ.
ತಸ್ವೀರ್ ಕುರ್ಪಾ: ಸ್ಟೇನ್ಲಿ ಬಂಟ್ವಾಳ್