ಬಾಕಿಬಾಬಾಚ್ಯಾ ಕಾವ್ಯಾಂತ್ಲೊ ಪ್ರತಿರೋಧಿ ಆನಿ ಉಪರೋಧಿ ಸ್ವರ್ - 1

- ರಾಜಯ್ ಪವಾರ್

(ಭಾರತ್ ಭುಂಯ್ಚೆರ್ ಜಲ್ಮೊನ್ ಗೆಲ್ಲೊ ಉಂಚ್ಲೊ ಕವಿ ಬಾಕಿಬಾಬ್ ಬೋರ್ಕರಾಚಿ ಜಲ್ಮಶತಾಬ್ದಿ ಆದ್ಲ್ಯಾ ವರ್ಸಾಚ್ಯಾ ನವೆಂಬ್ರಾಂತ್ ಸುರು ಜಾಲ್ಲಿ.  ಆಂವ್ದುಂ ನವೆಂಬ್ರಾ ಪಾಸುನ್ ತಿ ಮುಕಾರ್ ವೆತಲಿ. ಹೊ ಉತ್ಸವ್ ಗೊಂಯಾಂತ್ ಮಾತ್ರ್ ನ್ಹಯ್, ಆಯ್ಲೆವಾರ್ ಮಂಗ್ಳುರಾಂತಯ್ ಚಲ್ಲೊ.  ಕವಿತಾ ಟ್ರಸ್ಟಾನ್ ವಿಶ್ವ ಕೊಂಕಣಿ ಕೇಂದ್ರ್ ಹಾಂಚೆ ಸಾಂಗಾತಾ ಮೆಳೊನ್ ಎಕಾ ದಿಸಾಚೆಂ ಕಾರ್ಯೆಂ ಜೂನ್ ಮ್ಹಯ್ನ್ಯಾಚೆ ತೆರಾ ತಾರಿಕೆರ್ ಘಡೊವ್ನ್ ಹಾಡಲ್ಲೆಂ. ತ್ಯಾ ಸಂದರ್ಭಾರ್ ಪ್ರೊ. ನಾರಾಯಣ್ ದೇಸಾಯಿ ಹಾಚ್ಯಾ ಅಧ್ಯಕ್ಷಪಣಾಖಾಲ್ ಜೆಂ ವಿಚಾರ್ ಸಾತೆಂ ಚಲಲ್ಲೆಂ, ತ್ಯಾ ಸಂದರ್ಭಾರ್ ಗೊಂಯಾಂ ಥಾವ್ನ್ ಆಯಿಲ್ಲ್ಯಾ ದೊಗಾಂನಿ ಆಪ್ಲೆ ಪ್ರಬಂಧ್ ಮಾಂಡಲ್ಲೆ.  ತ್ಯಾ ಪಯ್ಕಿ ರಾಜಯ್ ಪವಾರಾಚೊ ಪ್ರಬಂಧ್ ಕಂತಾಂ ಕಂತಾಂನಿ ಹಾಂಗಾಸರ್ ಪರ್ಗಟ್ ಕರ್‍ತಾಂವ್ - ಸಂಪಾದಕ್)

ಪ್ರತಿರೋಧ್ ಮ್ಹಳ್ಯಾರ್ ಇಂಗ್ಲಿಷಾಂತ್ resistance ವಾ to resist. `ಪ್ರತಿರೋಧ್' ಮ್ಹಳ್ಯಾರ್ ಆಪ್ಲಿ ಭೂಮಿಕಾ, ಮತಾಂ ಮಾಂಡ್ಚೆ ಖಾತೀರ್ ವಿರೋಧ್ ಕರ್‍ಪಾಚಿ ತಾಂಕ್.  ಹಿ ತಾಂಕ್ ಕೆನ್ನಾಂ ಪ್ರತ್ಯಕ್ಷಪಣಾನ್ ವಾ ಕೆನ್ನಾಂ ಅಪ್ರತ್ಯಕ್ಷಪಣಾನ್ ವ್ಯಕ್ತ್ ಜಾತಾ.  ಕೊಣ್ ತಿ ಸಾಹಿತ್ಯಾಂತ್ಲ್ಯಾನ್ ವ್ಯಕ್ತ್ ಕರ್‍ತಾ ಜಾಲ್ಯಾರ್ ಕೊಣ್ ಪ್ರತ್ಯಕ್ಷ್ ಕೃತಿಂತ್ಲ್ಯಾನ್ ತಿ ದಾಕೊವ್ನ್ ದಿತಾ.  ಬಾಕಿಬಾಬಾ ಸಾರ್ಕ್ಯಾ ಕವಿನ್ ಮಾತ್ ತಿ ದೊನೂಯ್ ತರಾಂನಿ ದಾಕೊವ್ನ್ ದಿಲ್ಯಾ.  ಗೊಂಯ್ ಸುಟ್ಕೆ ಝುಜಾಚ್ಯಾ ಆಂದೋಲನಾಂತ್ ಪ್ರತ್ಯಕ್ಷ್ ವಾಂಟೊ ಘೆವ್ನ್ ತಶೆಂಚ್ ಕೊಂಕಣಿ-ಮರಾಠಿ ವಾದಾಂತ್ ಆಪ್ಲಿ ಭೂಮಿಕಾ ಜಾಹಿರ್‌‍ಪಣಾನ್ ಮಾಂಡುನ್, ಗೊಂಯ್-ಮಹಾರಾಷ್ಟ್ರ ವಿಲೀನಿಕರಣಾಂತ್ ಗೊಂಯ್ಚೊ ಪಾಖೊ ಘೆವ್ನ್ ತಾಂಣಿ ಆಪ್ಲೊ ಪ್ರತಿರೋಧ್ ಪ್ರತ್ಯಕ್ಷಾಂತ್ ದಾಕೊವ್ನ್ ದಿಲೊ.  ಆನಿ ತೆಚ್ ಬರಾಬರ್ ಏಕ್ ಸಂವೇದನ್‌ಶೀಳ್ ಕವಿ ಮ್ಹಣ್ ತಾಂಣಿ `ಕೊಂಕಣಿ ಆನಿ ಗೊಂಯ್' ಹಾಂಚೆವಿಶಿಂಚೊ ಸ್ವಾಭಿಮಾನ್ ವ್ಯಕ್ತ್ ಕರ್‍ತಾನಾಂಚ್ ಆಪ್ಲೊ ಪ್ರತಿರೋಧ್ ಖರ್ ಆನಿ ಸೂಚಕ್ ಉತ್ರಾಂತ್ಲ್ಯಾನ್ ಯೆಶಸ್ವಿಪಣಾನ್ ಮಾಂಡ್ಲೊ.  ಬಾಕಿಬಾಬಾಕ್ ಜೆನ್ನಾಂ ಗೊಂಯ್ಕಾರಾಂಚ್ಯಾ ಅವಿಚಾರಿ, ಅಬುದ್ಧಿ ಆನಿ ಆತ್ಮಹೀನಪಣಾಚ್ಯಾ ವಾಗ್ಣ್ಯಾಕ್ ಉದ್ದೇಸುನ್ ಕಿತೇಂಯ್ ಸಾಂಗ್ಪಾಚೆಂ ಆಶಿಲ್ಲೆಂ ತೆನ್ನಾಂ ತಾಂಣಿ ತೆಂ ಉಪರೋಧಿ ಸ್ವರಾನ್ ವ್ಯಕ್ತ್ ಕೆಲೆಂ.  `ಉಪರೋಧ್' ಮ್ಹಳ್ಯಾರ್ ಇಂಗ್ಲಿಷಾಂತ್ `satire' ವಾ `sarcasm'.  ಅಶೆ ತರೆಚೊ ಸ್ವರ್ ಮ್ಹಳ್ಯಾರ್ ಥೊಮ್ಣೆ ಮಾರಪ್ ವಾ ಉಪಹಾಸತ್ಮಕ್ ಪದ್ಧತೀನ್ ಉಲೊವ್ಪ್.  ಗೊಂಯ್ ಆನಿ ಕೊಂಕಣಿಚೆ ಬಾಬ್ತಿನ್ ಜೆನ್ನಾಂ ಗೊಂಯ್ಕಾರ್ ಆತ್ಮಹೀನಪಣ್ ಬಾಳ್ಗೂನ್ ವಾಗ್ಪಾಕ್ ಲಾಗ್ಲೆ ತೆನ್ನಾಂ ಬಾಕಿಬಾಬಾನ್ ತಾಂಕಾಂ ಉಪರೋಧಿಕ್ ಸ್ವರಾನ್ ಶಿಟ್ಕಾಯ್ಲೆಂ.

ಸಮಾಜಾಂತ್ಲ್ಯಾ ಅನಿಷ್ಟ್ ಆನಿ ಘಾತಕ್ ಪ್ರವೃತ್ತಿಂ ಆಡ್ ಆವಾಜ್ ಕಾಡ್ಪಾಚೆಂ, ತಾಕಾ ಆಡಾವ್ಪಾಚೆಂ, ಪ್ರತಿರೋಧ್ ಕರ್‍ಪಾಚೆಂ ಕಾಮ್ ಜಾಯ್ತ್ಯಾ ಸಮಾಜ್ ಸೆವಕಾಂನಿ ಕೆಲಾಂ.  ಹಾಂತುನ್ ಸಮಾಜಿಕ್ ಕಾರ್ಯಕರ್ತ್ಯಾಂ ವಾಂಗ್ಡಾ ಲೇಖಕಾಂಚೋಯ್ ಆಸ್ಪಾವ್ ಜಾತಾ.  ತಾಂತುಂತ್ಲೆ ತಾಂತುಂತ್ ಕವಿ ಹೊ ಚಡ್ `ದೃಶ್ಟೊ' ಆಶಿಲ್ಲ್ಯಾನ್ ಕಾವ್ಯಾಂತ್ ಹೊ `ಪ್ರತಿರೋಧ್' ಚಡ್ ಪ್ರಮಾಣಾಂತ್ ವ್ಯಕ್ತ್ ಜಾಲ್ಲೊ ಪಳೊಂವ್ಕ್ ಮೆಳ್ತಾ.  ಸಮಾಜಾಂತ್ಲೆ ಮರ್‍ಗಾಳೀಕ್ ಲಾಗೊನ್, ಅಂಧ್ ಶೃದ್ಧಾ - ಅಶಿಕ್ಷಿತಪಣಾಕ್ ಲಾಗೊನ್, ಜಾತಿಭೇದ್-ವರ್ಣಭೇದ್-ಧರ್ಮಭೇದ್ ಆದಿ ಭೆದಾಂಕ್ ಲಾಗೊನ್ ಕಾಂಯ್ ಘಟಕಾಂಕ್ ಸದಾಂಚ್ ಬಂದನಾಂಚ್ಯಾ ವೊಜ್ಯಾಖಾಲಾ ಚಿಡ್ಡುನ್ ರಾಂವ್ಚೆಂ ಪಡ್ಲಾಂ.  ಹೆಂ ವೊಜೆಂ, ಹಿಂ ಬಂದನಾಂ ಲಾದ್ಪಿ ಮಸ್ತೆಲ್ಲ್ಯಾ ಘಟಕಾಚೊ ವಿರೋಧ್ ಕರ್‍ತಾನಾ ಹೊ ಪ್ರತಿರೋಧಿ ಸ್ವರ್ ಸಾಹಿತ್ಯಾಂತ್ ವ್ಯಕ್ತ್ ಜಾಲಾ.  ಮುಕ್ತಿಚೊ ಧ್ಯಾಸ್ ಧರ್‍ಪಿ, ಸ್ವಾಭಿಮಾನಾಚಿ ಭಾಸ್ ಉಲೊವ್ಪಿ ಜಾಗರೂಕ್ ನಾಗರಿಕೂಯ್ ಹ್ಯಾ ವಾವ್ರಾಂತ್ ಮುಖೆಲ್ಪಣಾನ್ ದಿಶ್ಟಿ ಪಡ್ಲಾ.  ದರೆಕಾ ಸಮಾಜಾಂತ್ ಹೊ ಪ್ರತಿರೋಧಿ ಸ್ವರ್ ಪಯ್ಲ್ಯಾಪಯ್ಲೊ ಆನಿ ಪ್ರಭಾವಿಪಣಾನ್ ಮಾಂಡ್ಲಾ ತೊ ತೆ ತೆ ಭಾಷೆಂತ್ಲ್ಯಾ ಕವಿನೀಂಚ್.

ಬಾಕಿಬಾಬಾಂಚಿ ಥೊಡಿಶಿ ವೊಳಕ್:

ತಾಂಚೊ ಜಲ್ಮ್ ತಾಂಚ್ಯಾ ಮಾಮಾಗೆರ್ ಮ್ಹಳ್ಯಾರ್ ಕುಡ್ಚಡೆಂ ಹ್ಯಾ ಗಾಂವಾಂತ್ 30 ನವೆಂಬರ್ 1910 ಹ್ಯಾ ದಿಸಾ ಜಾಲೊ.  ಉಪ್ರಾಂತ್ ತೆ ಆಪ್ಲ್ಯಾ ಆವಯ್-ಬಾಪಾಯ್ಚ್ಯಾ ಘರಾ, ಮ್ಹಳ್ಯಾರ್ ಬೊರಿಯೆ ಲ್ಹಾನಾಚೆ ವ್ಹಡ್ ಜಾಲೆ.  ತಾಂಚೆಂ ನಾಂವ್ ಬಾಳಕೃಷ್ಣ ಜಾಲ್ಲ್ಯಾನ್ ತಾಂಚಿ ಆತ್ಯಾ ತಾಕಾ `ಬಾಕೀಟ್' ಮ್ಹಣ್ ಉಲೊ ಮಾರ್‍ತಾಲಿ.  ಮುಖಾರ್ ತಾಂತುಂತ್ಲೆಂ `ಟ'  ಗಳ್ಳೆಂ ಆನಿ ಸಗ್ಳಿಂ ತಾಕಾ `ಬಾಕಿ' ಮ್ಹಣ್ ಉಲೊ ಮಾರ್‍ಪಾಕ್ ಲಾಗ್ಲಿಂ.  ತಾಂಚೆಂ ಮುಳಾವೆಂ ಶಿಕಪ್ ಮರಾಠಿಂತ್, ಜಾಲ್ಯಾರ್ ಮೆಟ್ರಿಕ್ ಇಂಗ್ಲಿಷಿಂತ್ಲ್ಯಾನ್ ಜಾಲ್ಲಿ.  ಪುರ್ತುಗೆಜಿಂತ್ಲ್ಯಾನ್, `ಲಿಸೆಂವ್' ಮೆರೆನ್ಚೆಂ ಶಿಕಪ್ ಘೆವ್ನ್ ತಾಂಣಿ ಮುಖಾರ್ ಪ್ರಾಥಮಿಕ್ ಶಿಕ್ಷಕ್ ಮ್ಹಣ್ ವ್ಯವಸಾಯ್ ಸ್ವೀಕಾರ್ ಕಾಂಯ್ ತೇಂಪ್ ತಾಂಣಿ ಮುಂಬಯ್, ಪಣ್ಜೆ ಆಕಾಶ್‌ವಾಣಿಚೆರ್ ನೋಕ್ರಿ ಕೆಲಿ.  ಪಿರಾಯೆಚ್ಯಾ ೧೩ವ್ಯಾ ವರ್ಸಾ ಸಾವ್ನ್ ಜಾಯ್ತೊ ತೇಂಪ್ ತೆ ಗೊಂಯಾಭಾಯ್ರೂಚ್ ಉಲ್ಲೆ.  ಪಿರಾಯೆಚಿ ಸಾಠಿ ಹುಪ್ತಾನಾ, ತೆ ಆಪ್ಲ್ಯಾ ಮೂಳ್ ಘರಾ ಬೊರಿಯೆ ಆಯ್ಲೆ.  ಥಂಯ್ ಸ ವರ್ಸಾಂ ರಾವ್ಲ್ಯಾ ಉಪ್ರಾಂತ್ ತೆ ಪರ್ವರಿಂ ಆಪ್ಲೆ ಧುವೆಚ್ಯಾ ಶೆಜ್ರಾ ರಾವ್ಪಾಕ್ ಗೆಲೆ.  ಆಪ್ಲಿ ಬಾಯ್ಲ್, ಸ ಚಲಿಯೊ ಆನಿ ದೋನ್ ಚಲೆ ಅಸೊ ತಾಂಚೊ ಘರಾಂಬೊ.  ಭುರ್ಗಿಂ ತಾಕಾ `ಆಬಾ' ಮ್ಹಣ್ ಉಲೊ ಮಾರಿ.  ತಾಂಚ್ಯಾ ಘರಾಣ್ಯಾಂತ್ ತಶೆಂಚ್ ಭೊಂವ್ತಣಿ ಚಲ್ಪಿ ಕೀರ್ತನಾಂ, ಪ್ರವಚನಾಂ ಆದಿಂಚ್ಯಾ ಮಾಧ್ಯಮಾಂತ್ಲ್ಯಾನ್ ಅಭಂಗ್, ವೊವಿ, ಶ್ಲೋಕ್ ಹ್ಯಾ ಕಾವ್ಯಪ್ರಕಾರಾಂಚೊ ಪ್ರಭಾವ್ ನಕಳ್ಟಾಂ ತಾಂಚೆರ್ ಪಡ್ಲೊ.  ತಾಚ್ಯಾಚ್ ಸಾಂಗಾತಾಕ್ ಮಾಡಾರ್ ಚಡ್ಪಿ `ಪಾತ್ರಿಸ್' ರೆಂದೆರಾಚ್ಯಾ ಕಾಂತಾರಾ ವಾಟೆನೂಯ್ ತೊ ಆಕರ್ಶಿತ್ ಜಾಲೊ. ಬಾಕಿಬಾಬಾನ್ ಜರಿ ಸ್ವತಂತ್ರ್ ಆನಿ ಆಣ್ಕಾರೀತ್ ಗದ್ಯ್ ಜಾಯ್ತೆಂ ಬರಯಿಲ್ಲೆಂ ಆಸ್ಲೆಂ ತರೀ ತಾಂಚೊ ಮೂಳ್ ಪೀಂಡ್ ಹೊ ಕವಿಚೋಚ್.  ನಿಮಾಣೆಂ ಹೊಸ್ಪಿಟಲಾಂತ್ ವೆಲ್ಲೆಕಡೆನ್ ಸುಮಾರ್ 12 ದೀಸ್ ಕೊಮಾಂತ್ ಉರ್‍ಲ್ಯಾ ಉಪ್ರಾಂತ್ ೮ ಜುಲಾಯ್ 1984 ಹ್ಯಾ ದಿಸಾ ಸಕಾಳ್ಚ್ಯಾ ಧಾ ವೊರಾಂಚೆರ್ ತೆ ಹ್ಯಾ ಸಂಸಾರಾಕ್ ಅಂತರ್‍ಲೆ.

- ಆನಿಕಯ್ ಆಸಾ....

• ವಿಶ್ವ ಕೊಂಕಣಿ ಕೇಂದ್ರಾಂತ್ ಬಾಕಿಬಾಬ್ ಜಲ್ಮಾಶತಾಬ್ದಿ ಸ್ಮರಣ್