ಸಂಪಾದ್ಪಿಚ್ಯಾ ತಿಂತೆರಾ ಥಾವ್ನ್
ಭಾಸಾಯಿಲ್ಲೆಂ ಮ್ಹಜೆಂ ಯೆಣೆಂ ಹೆ ವೇದಿರ್
ವಿಯೊಲಾಂ ಸರಿಯೆ ಸವೆಂ ಪಾಸ್ಖಾಂ ಕಾಳಾರ್...
ಪಾವೊಂಕ್ ಸಲ್ವಲೊಂ ಆಯಿನ್ನ್ ವೆಳಾರ್
ಆಸ್‌ಲ್ಲ್ಯಾನ್ ಜಿಣ್ಯೆ ವೊಜೆಂ ಹ್ಯಾ ಮಾತ್ಯಾರ್...
ಸಂಗೀತಾಚೆಂ ಸದಾಂಚೆಂ ಸಮರಾಣ್ ಕರುನ್
ಸಕಾಳ್ ಸಗ್ಳೊ ತಾಚೆಚ್ ಸದ್ರೆಂತ್ ಜಿಯೆವ್ನ್
ಸೊಭಾಯೆಚಿ ಸರ್ಪಳಿ ಗಳ್ಯಾಂತ್ ಗುಂತುನ್
ವಿಯೊಲಾಂ ಖೆಳ್ತಾಂ ತುಮ್ಕಾಂ ಸಂಗಿಂ ಘೆವುನ್
ಉಮಾಳ್ಯಾಂಚೆಂ ಕೀರ್ಣ್ ಪುಟ್ಲಾಂ ಕಾಳ್ಜಾಂತ್
ಕಿರಾ ನಾದ್ ಭರ್‍ಲಾ ಮನಾ ಘೊಂಟೆರಾಂತ್
ತುಜ್ಯಾ ದೊಳ್ಯಾಂ ಹುಜಿರ್ ಸಾದರ್ ಕರ್‍ತಾಂ
ನವಿ ವಿಯೊಲಾಂ ಸರಿ ಮಾಂಡುನ್ ಹಾಡ್ತಾಂ..
ನಮಸ್ಕಾರ್ ಆನಿ ಕಾಳ್ಜಾಗುಂಡಾಯೆಚೊ ಪ್ರಣಾಮ್ ತುಕಾ ಮೊಗಾಳ್ ಸಂಗೀತ್ ಪ್ರೇಮಿ!
ಕೊಗ್ಳೆಚ್ಯಾ ಸೊಭಿತ್ ತಾಳ್ಯಾ ನಾದಾಕ್ ವಿಯೊಲಾಚೆ ಸರಿಯೆಚಿ ಮಿಲಾಗತ್ ಜಾಂವ್ಚ್ಯಾ ವೆಳಿಂ ಉಬ್ಜಲ್ಲ್ಯಾ ಅನಂತ್ ಸೊಭಾಯೆಚ್ಯಾ ಸಂಪೂರ್ಣ್ ಗಾಯಾನಾಕ್ ಆಯ್ಕತಾಂ, ಹ್ಯಾ ಕವಿತಾಚಿ ಬುನ್ಯಾದ್ ಘಾಲುನ್, ನವೆ ಸರಿಯೆಕ್ ಸಜವ್ನ್ ಹಾಂವ್ ತುಮ್ಚ್ಯಾ ಹುಜಿರ್ ಆಸಾಂ. ಹೊ ಕಾಳ್ಜಾಂತ್ ಭೊಗ್ಚೊ ಯಾ ಮ್ಹಜ್ಯಾ ಮನಾಂತ್ ಭರೊನ್ ಯೆಂವ್ಚೊ ಉಮಾಳೊ ಸಾನ್ ಕವಿತಾ ಫಂಗ್ತ್ಯಾಂನಿ ಗುಂತುನ್ ಆಜ್ ತಯಾರ್ ಜಾಲಾಂ ನವಿ ವಿಯೊಲಾಂ ಸರಿಯೆಚೊ ನಾದ್ ತುಜ್ಯಾ ಸಾಮ್ಕಾರ್ ಗಾಜಂವ್ಕ್. ವೆಳಾರ್ ಪಾವೊಂಕ್ ಗಳಾಯ್ ಜಾಲಿ ಮ್ಹಳ್ಳಿ ಬೆಜಾರಾಯ್ ಕಾಳ್ಜಾಂತ್ ಭೊಗ್ತಾ ತರೀ ಆಜ್ ತುಜ್ಯಾ ಸಮೊರ್ ಸಾದರ್ ಜಾಂವ್ಚ್ಯಾ ಸುಮಧುರ್ ಸಂಗೀತಾಚೊ ನಾದ್ ಹಾಂವ್ ವ್ಹಾಜಂವ್ಕ್ ಆಯ್ತೊ ಜಾತಾನಾ ಮ್ಹಜ್ಯಾ ಕಾಳ್ಜಾ ಗುಂಡಾಯೆಂತ್ ಸಂತೊಸಾಚೆ ಖಜ್ನೆ ಫುಟ್ತಾತ್.
ಕೊಂಕಣ್ ಕರಾವಳೆರ್ ಕೊಂಕ್ಣಿ ಮಾತೆಚ್ಯಾ ಆಂಗ್ಣಾಂತ್ ಕೊಂಕ್ಣಿ ಸಂಗೀತಾಚ್ಯಾ ಮೊತಿಯಾಂಕ್‌ಚ್ ಆರಾವ್ನ್ ವೆತಾನಾ ಆಜ್ ತುಜ್ಯಾ ಸಮೊರ್ ಸಾದರ್ ಕರುಂಕ್ ಮೆಳ್ತಾ ಆನಿ ಏಕ್ ಕೊಂಕ್ಣಿಚೆಂ ಅಪೂರ್ವ್ ಮೊತಿಂ. ಅಖಂಡ್ ತಾಲೆಂತಾಂಚೆಂ ಖಜಾನ್. ಕೊಂಕ್ಣಿಂತ್ ಚಾರಿತ್ರಿಕ್ ದಾಕ್ಲೊ ರಚ್‌ಲ್ಲ್ಯಾ ವಿಲ್ಫಿ ನಾಯ್ಟ್ ಸಂಗೀತ್ ಕಾರ್ಯಾವಳಿಂನಿ ಸುರ್‍ವೆರ್ ಥಾವ್ನ್ ಆಜ್ ಪರ್‍ಯಾಂತ್ ಖಳನಾಸ್ತಾಂ ಗಾವುನ್ ಸಂಗೀತ್ ಪ್ರೇಮಿಂಕ್ ಸಂಗೀತ್ ಲ್ಹಾರಾಂನಿ ಧಲಯಿಲ್ಲೊ ಮಹಾಶಯ್ ಹೊ! ಆಪ್ಲ್ಯಾ ಅಪೂರ್ವ್ ನಟನಾನ್ ನಾಟಕ್ ಪ್ರೇಮಿಂಚ್ಯಾ ಕಾಳ್ಜಾ ಮನಾಂತ್ ಥಿರ್ ಜಾಲ್ಲೊ ನಟ್ ಹೊ. ಸಾಟಾಂ ವಯ್ರ್ ಕವಿತಾ ವಿಣ್‌ಲ್ಲೊ ಕವಿ ಮಹಾಶಯ್... ಕಾದಂಬರಿಕರ್ತ್ ತಶೆಂಚ್ ಕುರ್ಕುರಿತ್ ಮಟ್ವ್ಯಾ ಕಾಣಿಯಾಂಕ್ ಫಾಮಾದ್ ಜಾಲ್ಲೊ ಲೇಖಕ್. ಆನಿ ಆಜ್ ತುಜ್ಯಾ ಸಮೊರ್ ಸಾದರ್ ಜಾತಾ ಮ್ಹಜ್ಯಾ ಆನಿ ತುಜ್ಯಾ ಮೊಗಾಚೊ..... ಪ್ರೇಮ್ ಲೋಬೊ ನಂದಿಗುಡ್ಡಾ!
ಖರೆಂಚ್ ಜಾವ್ನ್ ಹೊ ಸುವಾದಿಕ್ ಸ್ವರ್ ತುಜ್ಯಾ ಕಾಳ್ಜಾ ಮನಾಂನಿ ಸಂತೊಸಾಚಿಂ ಲ್ಹಾರಾಂ ವ್ಹಾಳಯ್ತಲೊ ಮ್ಹಣ್ಚ್ಯಾಕ್ ಕಾಂಯಿಂಚ್ ದುಬಾವ್ ನಾ.... ತಶೆಂಚ್ ಜಾಂವ್!
ಬರೆಂ ತರ್.. ಪರತ್ ಮೆಳ್ಯಾಂ.. ಯೆಂವ್ಚ್ಯಾ ಮ್ಹಯ್ನ್ಯಾಂತ್... ಹ್ಯಾಚ್ ಜಾಗ್ಯಾರ್!
ತೆದೊಳ್ ಪರ್‍ಯಾಂತ್... ಅಲ್ವಿದಾ....
- ಜೆರಿ ಡಿ’ಮೆಲ್ಲೊ, ಬೆಂದುರ್
ಕೊಂಕ್ಣಿ ಸಂಗೀತ್ ಕುಂವರ್... ಶ್ರೀ ಪ್ರೇಮ್ ಕುಮಾರ್
"ಪ್ರೇಮ್ ಕುಮಾರ್" ಏಕ್ ಸುಂದರ್ ಆನಿ ಮೊಗಾಳ್ ಲಿಕ್ಣೆ ನಾಂವ್ ಕೊಂಕ್ಣಿ ಸಂಗೀತ್ ಆನಿ ಕಲಾಕ್ಷೇತ್ರಾಂತ್ ಫಾಮಾದ್ ಜಾಲ್ಲ್ಯಾ ಶ್ರೀ ಪ್ರೇಮ್ ಲೋಬೊ ಹಾಚೆಂ. ತಾಚೆಂ ಲೊಕಾಮೊಗಾಳ್ ಲಿಕ್ಣೆ ನಾಂವ್‌ಚ್ ಕೊಂಕ್ಣಿ ಸಂಗೀತಾಚೆರ್ ತಾಕಾ ಆಸ್ಚೊ ಅಪ್ರತಿಮ್ ಮೋಗ್ ವೆಕ್ತ್ ಕರ್‍ತಾ. ಆಪ್ಣಾಚೊ ತಾಳೊ ಆಪ್ಣಾಕ್ ಸಾಂಗಾತ್ ದಿತಾ ವರೇಗ್ ಕೊಂಕ್ಣಿ ಪದಾಂಕ್ ಆಪ್ಲೊ ತಾಳೊ ದಿಂವ್ಚೊ ಆಪ್ಣಾಚೊ ಧೃಡ್ ನಿರ್ಧಾರ್ ಮ್ಹಣ್ಚೊ ಪ್ರೇಮ್ ಆಪ್ಲ್ಯಾಚ್ ಉತ್ರಾಂನಿ ಸಾಂಗ್ತಾ. "ಮ್ಹಜೊ ತಾಳೊ ಆಸ್ತಾಂ ಪಾಸುನ್ ಹಾಂವ್ ಮ್ಹಜ್ಯಾ ಅಭಿಮಾನಿ ಖಾತಿರ್ ಗಾಯ್ತಲೊಂ.." ಆನಿ ತಾಚೆ ಅಭಿಮಾನಿ ಎಕಾ ತಾಳ್ಯಾನ್ ಜಾಪ್ ದಿತಾತ್,, "ಗಾಯ್ತಚ್ ತುಂ ರಾವ್ ಪ್ರೇಮ್ ಕುಮಾರ್... ಗಾಯ್ತಚ್ ತುಂ ರಾವ್...".
ಬಾಳ್‌ಪಣ್ ಆನಿ ಕುಟ್ಮಾ-ಘೊಂಟೆರ್:
1950 ಇಸ್ವೆಚ್ಯಾ ಒಕ್ಟೋಬರ್ 27 ವೆರ್ ಮಂಗ್ಳುರಾಂತ್ಲ್ಯಾ ಮಿಲಾರ್ ಫಿರ್ಗಜೆಂತ್ ಪ್ರೇಮ್ ಲೋಬೊಚೊ ಜಲ್ಮ್ ಜಾಲೊ. ದೆವಾಧಿನ್ ಸಿಲ್ವೆಸ್ಟರ್ ಆನಿ ತೆರೆಜಾ ಲೊಬೊ ತಾಚಿಂ ಜಲ್ಮ್-ದಾತಾರಾಂ. ಸಂಗೀತಾಚೆಂ ವಾರೆಂ ವ್ಹಾಳ್ಚ್ಯಾ ಲೋಬೊ ಕುಟ್ಮಾ ಪರಿಸರಾಂತ್ ಏಕ್ ಭಾವ್ ಆನಿ ಚಾರ್ ಭಯ್ಣಿಂಚ್ಯಾ ಮೊಗಾಂತ್ ಉತ್ತೀಮ್ ಗಾವ್ಪಿ ಜಾವ್ನ್ ಪ್ರೇಮ್ ಕುಮಾರ್ ವಾಡೊಂಕ್ ಲಾಗ್ಲೊ.
ಮಂಗ್ಳುರಾಂತ್ಲ್ಯಾ ಫಾಮಾದ್ ಸಾಂ ಲುವಿಸ್ ಶಿಕ್ಪಾ ಸಂಸ್ಥ್ಯಾಂತ್ ಶಿಕಪ್ ಜೊಡ್ಲೆಲ್ಯಾ ಪ್ರೇಮ್ ಕುಮಾರಾನ್ ಬಿಕೊಮ್ ಸನದ್ ಆಪ್ಣಾಯ್ಲ್ಯಾ. ಭಾರತಾಂತ್ ಉಂಚ್ಲ್ಯಾ ಬೆಂಕಾಂ ಪಯ್ಕಿ ಏಕ್ ಜಾವ್ ಆಸ್ಲೆಲ್ಯಾ ಬೆಂಕಾಂತ್ ಉಂಚ್ಲ್ಯಾ ಹುದ್ದ್ಯಾರ್ ಸೆವಾ ಅರ್ಪುನ್ ಆಸ್ಚೊ ಪ್ರೇಮ್ ಲಿನೆಟ್ ಹಿಚೆಲಾಗಿಂ ಲಗ್ನಾಂತ್ ಎಕ್ವಟೊನ್ ತಾಂಚ್ಯಾ ಸುಖಿ ಕಾಜಾರಿ ಜಿವಿತಾಂತ್ ದೆವಾನ್ ಫಾವೊ ಕೆಲ್ಲಿಂ ದೋನ್ ಪಳಾಂ... ಪ್ರಶುಭಾ ಆನಿ ಪ್ರಥಮ್. ಪ್ರಸ್ತುತ್ ಹೆಂ ಕುಟಮ್ ಮಂಗ್ಳುರಾಂತ್ಲ್ಯಾ ಬಾಬುಗುಡ್ಡಾಂತ್ "ಪ್ರೇಮ್-ಲಿನ್" ನಿವಾಸಾಂತ್ ಸಂತೊಸಾನ್ ವಸ್ತಿ ಕರುನ್ ಆಸಾ.
ಸಂಗೀತ್ ಶೆತಾಂತ್ ಪ್ರೇಮ್‌ಕುಮಾರಾಚಿಂ ಪಾವ್ಲಾಂ:
ಬಾಳ್‌ಪಣಾಂತ್ಲೆಂ ತೆಂ ಏಕ್ ಘಡಿತ್ ಪ್ರೇಮ್ ಕುಮಾರ್ ಕೆದಿಂಚ್ ವಿಸ್ರೊಂಕ್ ಸಕ್ಚೊನಾ. ತೆದ್ನಾಂ ತೊ ನೊವೆ ಕ್ಲಾಶಿಂತ್ ಶಿಕೊನ್ ಆಸ್ತಾನಾ ಗಲ್ಫಾಂತ್ಲ್ಯಾ ದೊಹಾ-ಖಟಾರಾಂತ್ ವಾವ್ರ್ ಕರುನ್ ಆಸ್ಲೆಲ್ಯಾ ತಾಚ್ಯಾ ಬಾಪಾಯ್ನ್ ಏಕ್ ‘ಸ್ಪೂಲ್ ರೆಕೊರ್ಡರ್’ ಗಾಂವಾಕ್ ಹಾಡ್‌ಲ್ಲೊ.... ತೆಂ ಏಕ್ ನವೆಸಾಂವ್ ಮಂಗ್ಳುರಾಂತ್. ತ್ಯಾ ಕಾಳಾರ್ ಸಂಗೀತ್ ಶಿಖರಾ ತೆವ್ಶಿಂ ಭರ್ಮಾಚಿಂ ಮೆಟಾಂ ಕಾಡುನ್ ಆಸ್ಲೆಲ್ಯಾ ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾಕ್ ತಾಚಿಂ ವಿಂಚ್ಣಾರ್ ಪದಾಂ ಸ್ಪೂಲ್ ರೆಕೊರ್‍ಡರಾಂತ್ ಮುದ್ರಿತ್ ಕರುಂಕ್ ತಾಂಚ್ಯಾ ಘರಾ ಆಪವ್ಣೆಂ ದಿಲೆಂ. ಪದಾಂ ರೆಕೊರ್ಡ್ ಕರ್‍ತಾನಾ ವಿಲ್ಫಿಚ್ಯಾ ಪದಾಂನಿ ಕೊಂಕ್ಣಿ ಪದಾಂಚಿ ಪಿಸಾಯ್ ಆಸ್ಲೆಲ್ಯಾ ಪ್ರೇಮ್‌ಕುಮಾರಾಚೆರ್ ಭುಲ್ ಘಾಲಿ.
ಹೆ ಆಯಿನ್ನ್ ಘಡ್ಯೆ ದೆವಾನ್ ದಿಲ್ಲೆಂ ಸಂಗೀತ್ ದೆಣೆಂ ತಾಚೆಂ ಥಂಯ್ ಜಾಗೃತ್ ಜಾಲೆಂ. ಹಾಚೆ ಉಪ್ರಾಂತ್ ತಾಣೆಂ ಕೆದಿಂಚ್ ಪಾಟಿಂ ಪಳೆಲ್ಲೆಂ ನಾ. ಕೊಂಕ್ಣಿ ಸಂಗೀತ್ ಆನಿ ಕಲೆಕ್ ಆಪ್ಲಿ ಜಿಣಿ ಆಡವ್ ದವರ್‌ಲ್ಲೊ ಪ್ರೇಮ್ ಲೋಬೊ ‘ಪ್ರೇಮ್ ಕುಮಾರ್’ ಮ್ಹಳ್ಳೆಂ ಲಿಕ್ಣೆನಾಂವ್ ಆಪ್ಣಾವ್ನ್ ಕೊಂಕ್ಣಿ ಕಲಾರಸಿಕಾಂಚ್ಯಾ ಕಾಳ್ಜಾಂತ್ ಥಿರ್ ಜಾಲೊ. ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾಚ್ಯಾ ಗಾಯಾನ್ ಪಂಗ್ಡಾಂತ್ ಭರ್‍ತಿ ಜಾವ್ನ್ ವಿಲ್ಫಿಚ್ಯಾ ಗಾಯಾನ್ ಪಂಗ್ಡಾಂತ್ ತಾಳೊ ದಿಲ್ಲ್ಯಾ ಪ್ರಪ್ರಥಮ್ ಗಾವ್ಪ್ಯಾಂ ಪಯ್ಕಿ ಎಕ್ಲೊ ಜಾಲ್ಲೊ ತೊ ಆಜೂನ್ ಪರ್‍ಯಾಂತ್ ಆಪ್ಲೊ ಸುಮಧುರ್ ತಾಳೊ ವಿಲ್ಫಿ ನಾಯ್ಟಾಂನಿ ನಿರಂತರಿ ಗಾಜವ್ನ್ ರಚ್‌ಲ್ಲೊ ದಾಕ್ಲೊ ಪ್ರೇಮ್ ಕುಮಾರಾಚ್ಯಾ ವಾಂಟ್ಯಾಕ್ ವೆತಾ.
ಆಪ್ಲ್ಯಾ ತಾಲೆಂತಾಕ್ ವ್ಹರ್‍ತೆ ರಿತಿನ್ ಪ್ರೋತ್ಸಾಹ್ ದಿಲ್ಲ್ಯಾ ಆಪ್ಲ್ಯಾ ಕುಟ್ಮಾಚೊ ಆನಿ ಮೊಗಾಳ್ ಇಷ್ಟಾಂಚೊ ತೊ ಕಾಳ್ಜಾಥಾವ್ನ್ ಆಭಾರ್ ಮಾಂದ್ತಾ ತರೀ ಆಪ್ಣಾಕ್ ಹ್ಯಾ ವ್ಹರ್‍ತ್ಯಾ ಸ್ಥಾನಾರ್ ಪಾವಯ್ಲೆಲ್ಯಾ ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾಕ್ ತೊ ಖಾಲ್ತ್ಯಾ ಕಾಳ್ಜಾನ್ ಮಾನ್ ಬಾಗಾಯ್ತಾ ಆನಿ ತಾಕಾ ಆಪ್ಲೊ ಎಕ್ಲೊಚ್ ಆನಿ ಮಹಾನ್ ಸಂಗೀತ್ ಗುರು ಮ್ಹಣ್ ಮಾಂದ್ತಾ.
ಸಂಗೀತ್ ಸಾಧನಾಂ:
1. ಕೊಂಕ್ಣಿ ಆನಿ ತುಳು ಭಾಸಾಂನಿ ಹಜಾರೊಂ ಪದಾಂ ಗಾವ್ನ್ ಸಂಗೀತ್ ಪ್ರೇಮಿಂಚಿಂ ಕಾಳ್ಜಾಂ ಧಲಯಿಲ್ಲೊ ಪ್ರೇಮ್ ಕುಮಾರ್ ಆಪ್ಣೆಂ ಗಾಯ್ಲೆಲ್ಯಾ ಪದಾಂಚೆಂ ಲೇಕ್ ದವರ್‍ಚೆಂ ಸಾಧನ್ ಕೆದಿಂಚ್ ಕೆಲ್ಲೆಂನಾ ಮ್ಹಳ್ಳೆಂ ಸತ್ ಉಚಾರುನ್ ಸಾಂಗ್ತಾ.
2. ಪ್ರೇಮ್ ಕುಮಾರಾಚ್ಯಾ ಹಾಸ್ತ್ಯಾ ಉಡ್ತ್ಯಾ ಪದಾಂನಿ ಗುಂತುಲ್ಲ್ಯೊ ಕೊವ್ಳ್ಯೊ ಶೆಂಭರಾಂನಿ ಆಸಾತ್ ತರೀ... ಥೊಡೊ ವಿವರ್ ದಿಂವ್ಚೊ ತರ್...
- ಕೊಂಕಣ್ ಕೊಗುಳ್ ವಿಲ್ಫಿ ರೆಬಿಂಬಸಾಚ್ಯೊ ೩೭ ಕೊವ್ಳ್ಯೊ/ಸಿ.ಡಿ.
- ಕೊಂಕಣ್ ಕಲಾಶ್ರೀ ಕ್ಲೋಡ್ ಡಿಸೊಜಾಚ್ಯೊ ೨ ಬೈಲಾ ಕೊವ್ಳ್ಯೊ/ಸಿ.ಡಿ.
- ಧವಿ ಕೊಗುಳ್ ಬಾಪ್ ವೊಲ್ಟರ್ ಅಲ್ಬುಕೆರ್ಕ್, ಫಾಮಾದ್ ಸಂಗೀತ್ಗಾರ್ ಶ್ರೀ ಹೆರಿ ರಾಸ್ಕಿನ್ಹಾ, ಸಿಪ್ರಿಯನ್ ವಾಸ್ ಆನಿ ವಿಲ್ಫಿ ರೆಬಿಂಬಸ್ ಹಾಂಚ್ಯೊ ಭಕ್ತಿಕ್ ಗಿತಾಂಚ್ಯೊ ಕೊವ್ಳ್ಯೊ.
- ಕೊಂಕ್ಣಿ ಚಲನ್-ಚಿತ್ರಾಂ ಭೊಗ್ಸಾಣೆಂ ಆನಿ ಪಾದ್ರಿ ಫಿಲ್ಮಾಂಚ್ಯಾ ಪದಾಂನಿ ಪ್ರೇಮ್ ಕುಮಾರಾಚೊ ಮಧುರ್ ತಾಳೊ ಆಯ್ಕೊಂಕ್ ಮೆಳ್ತಾ.
- ಆಲ್ ಇಂಡಿಯಾ ರೇಡಿಯೊ ಆನಿ ದೂರ್‌ದರ್ಶನ್ ಮಾಧ್ಯಮಾಂನಿ ಪ್ರೇಮ್ ಕುಮಾರಾಚಿಂ ಪದಾಂ ಸಬಾರ್ ಪಾವ್ಟಿಂ ಪ್ರಸಾರ್ ಕೆಲ್ಯಾಂತ್.
3. ಪ್ರೇಮ್ ಕುಮಾರಾನ್ ಭಾರತಾಚ್ಯಾ ಕೊನ್ಶಾ-ಕೊನ್ಶಾಂತ್ ಸಾದರ್ ಜಾಲ್ಲ್ಯಾ ಸಂಗೀತ್ ಕಾರ್ಯಾವಳಿಂನಿ ತಶೆಂಚ್ ಗಲ್ಫಾಂತ್ಲ್ಯಾ ಸಬಾರ್ ಗಾಂವಾಂನಿ ಪದಾಂ ಗಾವ್ನ್ ಕೊಂಕ್ಣಿ ಸಂಗೀತ್ ಪ್ರೇಮಿಂಕ್ ಸಂಗೀತಾಚೆಂ ರುಚಿಕ್ ಪಕ್ವಾನ್ ದಾಧೊಶಿ ಮಾಪಾನ್ ವಾಂಟ್ಲಾಂ ಮಾತ್ರ್ ನ್ಹಯ್ ಪಯ್ಶಿಲ್ಯಾ ಕೆನಡಾಂತ್ ಸಾದರ್ ಜಾಲ್ಲ್ಯಾ ವಿಲ್ಫಿ ನಾಯ್ಟಾಂತ್ ಉಂಚ್ಲಿಂ ಪದಾಂ ಗಾವ್ನ್ ಕೆನಡಾಂತ್ಲ್ಯಾ ಕೊಂಕ್ಣಿ ಸಂಗೀತ್ ಪ್ರೇಮಿಂಕ್ ಖುಶ್ ಕೆಲ್ಲೆಂ ಘಡಿತ್ ಪ್ರೇಮ್ ಕುಮಾರ್ ಕೆದಿಂಚ್ ವಿಸ್ರೊಂಕ್ ಸಕ್ಚೊನಾ.
ಕೊಂಕ್ಣಿ ಕಲಾ ಕ್ಷೇತ್ರಾಂತ್ ಪ್ರೇಮ್ ಕುಮಾರಾಚಿಂ ಪಾವ್ಲಾಂ:
ಪ್ರೇಮ್ ಕುಮಾರ್ ಏಕ್ ಫಾಮಾದ್ ಗಾವ್ಪಿ ಮಾತ್ರ್ ನ್ಹಯ್, ಸಭಾರ್ ತಾಲೆಂತಾಂಚೊ ಪುಂಜೊಯಿ ಜಾವ್ನಾಸಾ. ತಾಚ್ಯಾ ಹೆರ್ ಸಾಧನಾಂ ವಿಶಿಂ ಥೊಡೆಂ ಸಾಂಗ್ಚೆಂ ತರ್...
- ಸುಮಾರ್ 60 ಕವನಾಂ ಕೊಂಕ್ಣಿ ಪತ್ರಾಂನಿ ಪ್ರಕಟ್ ಜಾಲ್ಯಾಂತ್.
- ಚಾರ್ ಕೊಂಕ್ಣಿ ಕಾದಂಬರಿಯೊ ಆನಿ ೭೦ ವಯ್ರ್ ಮಟ್ವ್ಯೊ ಕಾಣಿಯೊಂ ತಾಚ್ಯಾ ತಿಂತೆರಾ ಥಾವ್ನ್ ಉದೆಲ್ಯಾತ್.
- ಏಕ್ ಉತ್ತೀಮ್ ರಂಗಮಂಚ್ ನಟ್ ಜಾವ್ನ್ ಪರ್ಜಳ್‌ಲ್ಲೊ ಪ್ರೇಮ್ ಸಬಾರ್ ನಾಟಕಾಂನಿ ಪಾತ್ರ್ ಘೆವ್ನ್ ಸಬಾರ್ ಇನಾಮಾಂ ಆಪ್ಣಾಂವ್ಕ್ ಸಕ್ಲಾ.
- ಪದಾಂ ರಚ್ಪಿ ಜಾವ್ನ್ ಸಬಾರ್ ಕೊಂಕ್ಣಿ ಪದಾಂಕ್ ಆನಿ ಭಕ್ತಿಕ್ ಗಿತಾಂಕ್ ಸೊಲ್ಫಾಂ ಗುಂತುನ್ ತಾಳೊ ಬಸಯ್ಲಾ.
- ಪಾಟ್ಲ್ಯಾ ತೀನ್ ಧಾಕ್ಡ್ಯಾಂ ಥಾವ್ನ್ ಮಿಲಾರ್ ಇಗರ್ಜೆಚ್ಯಾ ಕೊಯರ್ ಪಂಗ್ದಾಚೊ ಕಾರ್ಯಾಳ್ ಸಾಂದೊ.
- ಮಂಗ್ಳುರಾಂತ್ ತೊ ಉತ್ತೀಮ್ ಕಾರ್ಯನಿರ್ವಾಹಕ್ ಪರ್ಜಳ್ಳಾ ಮಾತ್ರ್ ನ್ಹಯ್ ತೊ ಕಾರ್ಯೆಂ-ಸೊಭಾಣಾಕ್ ಭಲಾಯ್ಕಿ ಮಾಗ್ಚ್ಯಾಂತ್ ತೊ ಪ್ರವೀಣ್.
ಸನ್ಮಾನ್... ಸ್ವಪಣ್... ಸಂದೇಶ್:
ಮಾನ್-ಸನ್ಮಾನಾಂಚ್ಯಾ ಪಾಟ್ಲ್ಯಾನ್ ಧಾಂವ್ಚ್ಯಾ ಪಯ್ಕಿ ತೊ ಎಕ್ಲೊ ನ್ಹಯ್ ತರೀ ತಾಚ್ಯಾ ಉಂಚ್ಲ್ಯಾ ತಾಲೆಂತಾಂಕ್ ಮೆಚ್ವೊನ್ ಮಂಗ್ಳುರಾಂತ್ಲ್ಯಾ ಯುನೈಟೆಡ್ ಯಂಗ್‌ಸ್ಟರ್‍ಸ್, ಮೈಸೂರಾಂತ್ಲ್ಯಾ ಕೊಂಕಣಿ ಸಂಘ್, ತಶೆಂಚ್ ದುಬಾಯಾಂತ್ಲ್ಯಾ ದಾಯ್ಜಿ ದುಬಾಯ್ ಹಾಂಣಿ ಪ್ರೇಮ್ ಕುಮಾರಾಕ್ ಉಗ್ತ್ಯಾನ್ ಸನ್ಮಾನ್ ಕೆಲಾ.
ಜಿಣ್ಯೆಂತ್ ಆಪ್ಲ್ಯಾ ಉಂಚ್ಲ್ಯಾ ತಾಲೆಂತಾ ದ್ವಾರಿಂ ಆಪ್ಣಾಯ್ಲೆಲ್ಯಾ ಖ್ಯಾತೆ ವಯ್ರ್ ತೃಪ್ತಿ ಆಸ್ಚೊ ಪ್ರೇಮ್ ಕುಮಾರ್ ಆಪ್ಲ್ಯಾಚ್ ಪದಾಂನಿ ವಿಣ್ಲೆಲಿ ‘ಪ್ರೇಮ್-ಕುಮಾರ್ ನಾಯ್ಟ್’ ಮಂಗ್ಳುರಾಂತ್ ಸಾದರ್ ಕರ್‍ಚೆಂ ತಶೆಂಚ್ ಆಪ್ಲ್ಯಾಚ್ ಪದಾಂಚಿ ಸಂಗೀತ್ ಕೊವ್ಳಿ/ಸಿ.ಡಿ. ಸಾದರ್ ಕರ್‍ಚೆಂ ಸಪಣ್ ನೀಜ್ ಕರ್‍ಚೆಂ ಆಟ್ಟಾಣೆಂ ಕರುನ್ ಆಸಾ. ತಾಚೆ ಸರ್ವ್ ಅಭಿಮಾನಿ ತಾಚೆಂ ಸಬಾರ್ ವರ್ಸಾಂಚೆಂ ಸ್ವಪಣ್ ನೀಜ್ ಜಾಂವ್ದಿ ಮ್ಹಣೊನ್ ಆಂವ್ಡೆತಾತ್ ಆನಿ ತಾಚ್ಯಾ ಯೋಜನಾಕ್ ಯಶ್ ಆಶೆತಾತ್. ಪ್ರೇಮ್ ಕುಮಾರ್ ಆಪ್ಲ್ಯಾ ಅಭಿಮಾನಿಂಕ್ ಸಂದೇಶ್ ದೀವ್ನ್ ಭಾಸಾಯ್ತಾ... "ಮ್ಹಜೊ ತಾಳೊ ಆಸ್ತಾ ಪಾಸುನ್ ಹಾಂವ್ ಮ್ಹಜ್ಯಾ ಅಭಿಮಾನಿಂ ಖಾತಿರ್ ಗಾಯ್ತಲೊಂ...".
ಗಾವುನ್ ರಾವ್.. ಗಾವುನ್ ರಾವ್.. ಪ್ರೇಮ್ ಕುಮಾರ್..!
ಕೊಂಕ್ಣಿ ಸಂಗೀತಾಚೊ ತುಂ ನೀಜ್ ರಾಯ್ ಕುಂವರ್...!!
-ಜೆರಿ ಡಿ’ಮೆಲ್ಲೊ, ಬೆಂದುರ್
ವಿಯೊಲಾಂ:
ಪಯ್ಲಿ ಸರಿ: ಸಂಗೀತ್ ಘರಾಣ್ಯಾಚೊ ಶ್ರೀ ಡೆನಿಸ್ ಪೆರಿಸ್
ಸುರ್‍ವಾತೆಚಿಂ ಉತ್ರಾಂ