ದುಬಾಯ್ ಶೆರಾಂತ್ ‘ಲಜೆಲ್ಲ್ಯಾ ಲ್ಹಾರಾಂಕ್’ ಧೈರ್ ದಿಂವ್ಚೆಂ ಕಾರ್ಯಾಗಾರ್

ದುಬಾಯ್ ಶೆರಾಂತ್ ‘ಲಜೆಲ್ಲ್ಯಾ ಲ್ಹಾರಾಂಕ್’ ಧೈರ್ ದಿಂವ್ಚೆಂ ಕಾರ್ಯಾಗಾರ್

ಜೂನ್ 6: ‘ಕವಿತಾ ಟ್ರಸ್ಟ್’ ತಶೆಂ ‘ದಾಯ್ಜಿ ದುಬಾಯ್’ ಹಾಂಚ್ಯಾ ಜೋಡ್ ಆಶ್ರಯಾಖಾಲ್ ಹ್ಯಾಚ್ ಜುನಾಚೆ 5 ತಾರಿಕೆರ್ ದುಬಾಯ್ ಕರಾಮಾಂತ್ಲ್ಯಾ ವಿನ್ನೀಸ್  ರೆಸ್ಟೋರೆಂಟಾಂತ್ ಚಲಲ್ಲ್ಯಾ ಕವಿಂಚ್ಯಾ ಮೆಳಾವ್ಯಾಕ್ ಚಡುಣೆ 35 ಕವಿತಾ ಮೋಗಿ ಹಾಜರ್ ಆಸಲ್ಲೆ.

ಮ್ಹಾಲ್ಘಡೊ ಲೇಖಕ್ ಆಂತೊನ್ ಮೆಂಡೊನ್ಸಾ, ನಿಡ್ಡೋಡಿನ್ ಕಾಗ್ದಾಚೆರ್ ಬರಯಿಲ್ಲಿ ಕವಿತಾ ಅನಾವರಣ್ ಕರ್‍ತಚ್ ಕೆಲ್ಲ್ಯಾ ಆಪ್ಲ್ಯಾ ಉಲೊವ್ಪಾಂತ್ ಆಯ್ಲೆವಾರ್ ಕೊಂಕಣಿ ಕವಿತಾ ಶೆತಾಂತ್ ಜಾವ್ನಾಸ್ಚ್ಯಾ ವಾವ್ರಾವಿಶಿಂ ಸಾಂಗ್ಲೆಂ.

ಆಯ್ಲೆವಾರ್ ಮೊಕ್ಳೀಕ್ ಜಾಲ್ಲ್ಯಾ ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್ ಹಾಚ್ಯಾ ‘ಲ್ಹಾರಾಂ ಲಜೆಲಿಂ’ ಪುಸ್ತಕಾಚೆರ್ ಹಾಜರ್ ಆಸಲ್ಲ್ಯಾ ಕವಿಂನಿ ತಶೆಂ ಹೆರಾಂನಿ ವಿಮರ್ಶಾತ್ಮಕ್ ನದ್ರೆನ್ ಉಲೊವ್ಪಾಂ ಸಾದರ್ ಕೆಲಿಂ.  ಕವಿ ಎಡ್ಮಂಡ್ ನೊರೊನ್ಹಾ (ಪ್ರೀತಮ್ ಕಿರೆಂ) ರೊಬರ್ಟಾಚೆ ಕವಿತೆಂನಿ ಪಾಸಾಯೊ ಮಾರ್‍ಚ್ಯಾ ಧರ್ಮ್ ಆನಿ ಭೊಗ್ಣಾಂ ವಿಶಿಂ ಉಲಯ್ಲೊ ತರ್, ಕವಿ ವಿನ್ಸಿ ಪಿಂಟೊ ಆಂಜೆಲೊರ್ ಹಾಸ್ಯ್ ಆನಿ ವೆಂಗ್ಯಾ ವಿಶಿಂ ಉಲಯ್ಲೊ.

ನಾನು ಮರೋಳ್ ಸಗ್ಳ್ಯಾ ಪುಸ್ತಕಾಚ್ಯಾ ಬಳಾವಿಶಿಂ ತಶೆಂ ಅಸ್ಕತ್ಕಾಯೆವಿಶಿಂ ಸುಕ್ಷೀಮ್ ನದ್ರೆನ್ ಉಲಯ್ಲೊ. ಕವಿತಾ ಟ್ರಸ್ಟಾಚಿ ಖಜಾನಿ ಎವ್ರೆಲ್ ರೊಡ್ರಿಗಸಾನ್ ರೊಬರ್ಟಾಚ್ಯಾ ಕಾವ್ಯಾಂತ್ಲಿಂ ತತ್ವಾಂ ಆನಿ ಆಪುರ್ಬಾಯೆಚ್ಯೊ ಗಜಾಲಿ ಉದಾರಣಾಂ ದೀವ್ನ್ ಸಾಂಗ್ಲ್ಯೊ.

ಉಪ್ರಾಂತ್ ಚಲಲ್ಲೆ ಕವಿಗೋಷ್ಠಿಂತ್ ಆಲ್ವಿನ್ ಪಿಂಟೊ, ಅಶೋಕ್ ಡಾಯಸ್, ಜೆ ಜೆ ಡಾಯಸ್, ಸ್ಟೇನಿ ಬೆಳಾ, ಸನ್ನು ಮೊನಿಸ್, ಜೊಸ್ಸಿ ಬಜ್ಜೋಡಿ, ಸ್ಟೇನ್ ಅಗೇರಾ, ವಿನ್ಸಿ ಪಿಂಟೊ ಆಂಜೆಲೊರ್, ಎಡ್ಮಂಡ್ ನೊರೊನ್ಹಾ, ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ, ಆರ್ಥರ್ ಪಿರೇರಾ ಆನಿ ಟೊನಿ ಮೆಂಡೊನ್ಸಾನ್ ಭಾಗ್ ಘೆತ್ಲೊ.  ವಿನ್ಸಿ ಪಿಂಟೊ ಆಂಜೆಲೊರಾನ್ ಕವಿಗೋಷ್ಠಿ ಚಲೊವ್ನ್ ವೆಲಿ.

ಅಶೋಕ್ ಡಾಯಸಾನ್ ಸಗ್ಳ್ಯಾ ಕಾರ್ಯಾಚೆಂ ಸುಂಕಾಣ್ ಧರಲ್ಲೆಂ.