ಬಾರ್ಕೂರ್ಗಾರಾಂಚಿಂ ಕಾಳ್ಜಾಂ ಫಾರಲ್ಲಿ ಕವಿಗೋಷ್ಠಿ
ಜೂನ್ 8: ಶಿರಾಂಧಾರಿಂನಿ ವೊತ್ಚ್ಯಾ ಪಾವ್ಸಾಚಿ ಪರ್ವಾ ನಾಸ್ತಾಂ ಮೂಢಾಡು ಸೀತಾ ನ್ಹಂಯ್ಚೆ ತಡಿರ್ ಪ್ರಕೃತೆಚ್ಯಾ ಅಪ್ರೂಪ್ ಉಸ್ಕ್ಯಾ ಮಧೆಗಾತ್ ಸೊಭ್ಚ್ಯಾ ರಿಪ್ಪನ್ ಡಿ’ಸೋಜಾಚ್ಯಾ ಮ್ಹಾಲ್ಘಡ್ಯಾ ಘರ್ಚ್ಯಾ ಪೊರ್ಟಿಕೊಂತ್ ಹ್ಯಾಚ್ ಜುನಾಚೆ 7 ತಾರಿಕೆರ್ ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲಿ ಕವಿಗೋಷ್ಠಿ ಬಾರ್ಕೂರ್ಗಾರಾಂಚಿಂ ಮಾತ್ರ್ ನ್ಹಯ್ ಆಸ್ಪಾಸ್ಚ್ಯಾ ಗಾಂವಾಂ ಥಾವ್ನ್ ಆಯಿಲ್ಲ್ಯಾ ರಸಿಕಾಂಚಿಂ ಕಾಳ್ಜಾಂ ಜಿಕ್ಚ್ಯಾಂತ್ ಯಶಸ್ವಿ ಜಾಲಿ.
ದಕ್ಷಿಣ ಕನ್ನಡ ತಶೆಂ ಉಡುಪಿ ಜಿಲ್ಲ್ಯಾಂ ಥಾವ್ನ್ ಆಯಿಲ್ಲ್ಯಾ ಕೊಂಕಣಿ ಕವಿಂಕ್ ಆಯ್ಕೊಂಚೊ ಅಪ್ರೂಪ್ ಸುಯೋಗ್ ಜೊಡಲ್ಲ್ಯಾ ಲೊಕಾನ್ ಪಾಟಾಪಾಟ್ ದುಸ್ರ್ಯಾ ವರ್ಸಾ ಹ್ಯಾ ಗಾಂವಾಂತ್ ಚಲ್ಚೆ ಹೆ ಕವಿಗೋಶ್ಠಿಚೊ ಆನಂದ್ ಚಾಕ್ಲೊ ಮಾತ್ರ್ ನ್ಹಯ್, ಕವಿತೆಂಚಿ ತಾಕತ್ ಪಾರ್ಕಿಲಿ.
ಕವಿತಾ ಟ್ರಸ್ಟ್ ಕಾರ್ಯದರ್ಶಿ ಕಿಶೂ ಬಾರ್ಕೂರಾನ್ ಸುರ್ವೆರ್ ಸರ್ವಾಂಕ್ ಸ್ವಾಗತ್ ಕರ್ತಚ್, ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಕವಿಗೋಷ್ಟಿಚೆಂ ಸುಂಕಾಣ್ ಸಾಂಬಾಳ್ಳೆಂ. ಆಪ್ಲ್ಯಾ ಅಧ್ಯಕ್ಷೀಯ್ ಭಾಷಣಾಂತ್ ‘ಆಯ್ಚ್ಯಾ ಸಂಸಾರಾಂತ್ಲ್ಯಾ ಖಳನಾತಲ್ಲೆ ರಾಟಾವಳಿಂಕ್ ಮನ್ಶಾ ಮನಾಂ ಮಾತಿ ಖಾವ್ನ್ ವೆತಾತ್ ಆನಿ ತ್ಯಾ ವರ್ವಿಂ ಮನ್ಶಾಚಿ ಸೃಜನಾತ್ಮಕ್ ಸಕತ್ ಆರಿಚೆ ಪಿಡೆಸ್ತಾಬರಿ ಮುಟ್ಟೆವ್ನ್ ಗೆಲ್ಯಾ’ ಮ್ಹಣೊನ್ ಸಾಂಗ್ಲೆಂ. ಬಾರ್ಕೂರ್ಗಾರಾಂನಿ ಕವಿತೆಚೊ ವ್ಹಾಳೊ ಜಿವಾಳ್ ದವರಲ್ಲ್ಯಾ ಖಾತೀರ್ ತಶೆಂಚ್ ಕವಿಂಚ್ಯಾ ಸೃಜನಾತ್ಮಕ್ ಪ್ರೇತನಾಂಕ್ ಪಾಟಿಂಬೊ ದಿಲ್ಲ್ಯಾ ಖಾತೀರ್ ಬಾರ್ಕೂರ್ಗಾರಾಂಚಿ ತಾಣೆ ತೋಖ್ಣಾಯ್ ಕೆಲಿ.
ಕ್ಯಾಥರಿನ್ ರೊಡ್ರಿಗಸ್, ಕಟ್ಪಾಡಿ, ಕಿಶೂ ಬಾರ್ಕೂರ್, ಗ್ಲೇಡಿಸ್ ರೇಗೊ, ಮಹೇಶ್ ನಾಯಕ್, ಕ್ಲೋಡಿ ಬ್ರಹ್ಮಾವರ್, ಎಚ್ಚೆಮ್ ಪೆರ್ನಾಲ್, ರಿಚ್ಚಿ ಪಿರೇರ್, ಆಂದ್ರು ಡಿ’ಕುನ್ಹಾ, ಪಿ ಜೆ ಕರುಗಳ್ನಾಡೆ, ಎರಿಕ್ ಸೋನ್ಸ್ ಬಾರ್ಕೂರ್ ಆನಿ ಮೆಲ್ವಿನ್ ರೊಡ್ರಿಗಸ್ - ಹಾಂಣಿ ವೆವೆಗ್ಳ್ಯಾ ಠರಾವಣೆಂಚ್ಯೊ ಆಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ. ಆಂತೊನಿ ಬಾರ್ಕೂರ್ ಆನಿ ನೆಲ್ಸ್ ಬಾರ್ಕೂರ್ ಹಾಂಚ್ಯೊ ಕವಿತಾ ಹ್ಯಾ ಸಂದರ್ಭಾರ್ ಕಿಶೂ ತಶೆಂ ಎರಿಕಾನ್ ಪೇಶ್ ಕೆಲ್ಯೊ.
ಆಲ್ವಿನ್ ಆಂದ್ರಾದೆನ್ ಕಾಂಯ್ ಅಪ್ರೂಪ್ ಫೊಕಣಾಂ ಸಾಂಗೊನ್ ಮನಾಂ ದಾಧೊಸ್ ಕೆಲಿಂ ತರ್ ‘ಎಕ್ಸಪ್ರೆಶನ್ಸ್’ ಪಂಗ್ಡಾಚ್ಯಾಂನಿ ಸುಮಧುರ್ ಪದಾಂ ಗಾಯ್ಲಿಂ.
ಆಂದ್ರು ಡಿ’ಕುನ್ಹಾನ್ ಉಪ್ಕಾರ್ ಆಟಯ್ಲೆ. ಉರ್ಬಾನ್ ಡಿ’ಸೋಜಾ, ರಿಚರ್ಡ್ ಡಿ’ಸೋಜಾ, ಫ್ರೆಡರಿಕ್ ಡಿ’ಸೋಜಾ ತಶೆಂ ‘ಎಕ್ಸಪ್ರೆಶನ್ಸ್’ ಸಾಂದ್ಯಾಂನಿ ಹೆ ಕವಿಗೋಷ್ಠಿಚಿ ಥಳೀಯ್ ಮಾಂಡಾವಳ್ ಕೆಲ್ಲಿ.
ತಸ್ವೀರ್ ಕುರ್ಪಾ: ವಿಲಿಯಮ್ ಪಾಯ್ಸ್