ಜುಲಾಯ್ ಪಾಂಚ್ ತಾರಿಕೆರ್ ಕೊಂಕಣಿ ಕವಿತೆಚೆರ್ ವಿಚಾರ್ ಸಾತೆಂ
ಕವಿತಾ ಟ್ರಸ್ಟ್ ಆನಿ ಕೇಂದ್ರ್ ಸಾಹಿತ್ಯ ಅಕಾಡೆಮಿ ನವಿ ಡಿಲ್ಲಿ - ಹಾಂಣಿ ಸಾಂಗಾತಾ ಮೆಳೊನ್ ಕೊಂಕಣಿ ಕವಿತೆಚೆರ್ ಎಕಾ ದಿಸಾಚೆಂ ವಿಚಾರ್ ಸಾತೆಂ ಮಂಗ್ಳುರಾಂತ್ ಘಡೊವ್ನ್ ಹಾಡ್ಲಾಂ.
ಹ್ಯಾಚ್ ಜುಲಾಯ್ ಮ್ಹಯ್ನ್ಯಾಚೆ ಪಾಂಚ್ ತಾರಿಕೆರ್ ಮಂಗ್ಳುರ್ ಬಲ್ಮಠಾಂತ್ಲ್ಯಾ ಸಹೋದಯ ಸಭಾ ಸಲಾಂತ್ ಚಲ್ಚ್ಯಾ ಹ್ಯಾ ವಿಚಾರ್ ಸಾತ್ಯಾ ಸಂದರ್ಭಾರ್ ಗೊಂಯ್ಚೊ ಸುಟ್ಕೆ ಝುಜಾರಿ ತಶೆಂ ಕೇಂದ್ರ ಸಾಹಿತ್ಯ ಅಕಾಡೆಮಿ ಥಾವ್ನ್ ಪುರಸ್ಕಾರ್ ಜೊಡ್ಪಿ ಕವಿ ನಾಗೇಶ್ ಕರ್ಮಲಿ ಮುಕೆಲ್ ಉಲೊವ್ಪಿ ಜಾವ್ನ್ ಯೆತಲೆ.
ನಾಮ್ಣೆಚೊ ನಾಟಕಕಾರ್ ತಶೆಂ ಕೊಂಕಣಿ ಸಾಹಿತ್ಯ ಅಕಾಡೆಮಿ ಗೊಂಯ್ ಹಾಂಗಾಚೆ ಆದ್ಲೆ ಅಧ್ಯಕ್ಷ್ ಪುಂಡಲೀಕ್ ನಾರಾಯಣ ನಾಯ್ಕ್ ಹ್ಯಾ ವಿಚಾರಸಾತ್ಯಾಚೆಂ ಅಧ್ಯಕ್ಷಪಣ್ ಘೆತಲೆ.
‘ಆಯ್ಚ್ಯಾ ಕಾಳಾಚಿಂ ಸವಾಲಾಂ : ಕೊಂಕಣಿ ಕಾವ್ಯಾಂತ್ಲ್ಯೊ ಜಾಪಿ’ ವಿಷಯಾಚೆರ್ ಚಲ್ಚ್ಯಾ ಹ್ಯಾ ವಿಚಾರಸಾತ್ಯಾಂತ್ ಗೊಂಯ್ಚೊ ರಾಜಯ್ ಪವಾರ್ ತಶೆಂ ಮಂಗ್ಳುರ್ಚೊ ಹೆನ್ರಿ ಎಮ್.ಪೆರ್ನಾಲ್ - ಗೊಂಯ್ ತಶೆಂ ಕರ್ನಾಟಕಾಚ್ಯಾ ಕಾವ್ಯಶೆತಾಂತ್ಲೊ ವಾವ್ರ್ ಮನಾಂತ್ ಘೆವ್ನ್ ಆಪ್ಲೆ ವಿಚಾರ್ ಮಾಂಡ್ತಲೆ. ಹ್ಯಾ ಚರ್ಚಾ ಗೋಷ್ಠಿಚೆಂ ಅಧ್ಯಕ್ಷಪಣ್ ‘ರಾಕ್ಣೊ’ ಪತ್ರಾಚೊ ಸಂಪಾದಕ್ ಫಾ.ಫ್ರಾನ್ಸಿಸ್ ರೊಡ್ರಿಗಸ್ ಘೆತಲೆ.
ಹ್ಯಾಚ್ ಸಂದರ್ಭಾರ್ ಚಲ್ಚ್ಯಾ ಕವಿಗೋಷ್ಠಿಚೆಂ ಅಧ್ಯಕ್ಷಪಣ್ ಕವಿ ಆಂದ್ರು ಡಿ’ಕುನ್ಹಾ ಸಾಂಬಾಳ್ತಲೊ. ಕವಿಗೋಷ್ಟಿಂತ್ ಭಾಗ್ ಘೆಂವ್ಚ್ಯಾ ಕವಿಂಚಿಂ ನಾಂವಾಂ ಹೆಪರಿಂ ಆಸಾತ್: ಎರಿಕ್ ಸೋನ್ಸ್, ಬಾರ್ಕೂರ್; ವಿಲ್ಸನ್ ಕಟೀಲ್; ಡಿಂಪಲ್ ಫೆರ್ನಾಂಡಿಸ್; ಮಹೇಶ್ ನಾಯಕ್; ಎಮ್. ಪಿ. ರೊಡ್ರಿಗಸ್; ಶಕುಂತಲಾ ಆರ್.ಕಿಣಿ; ರೊಬರ್ಟ್ ಫೆರ್ನಾಂಡಿಸ್, ಉದ್ಯಾವರ್.
ಕವಿ ಎಮ್. ಪಿ. ರೊಡ್ರಿಗಸಾಚೊ ಫುಡ್ಲದ್ ಕಾವ್ಯಾಂ ಝೆಲೊ ‘ರುಮ್ಡಿ ಫುಲಾಂ’ ಹ್ಯಾ ವೆಳಾ ಮೊಕ್ಳೀಕ್ ಜಾತಲೊ.