`ದಿಲ್ಲ್ಯೆ ಕವಿತೆಚೆಂ ವಿಶ್ಲೇಷಣ್' : ಘುಟ್, ಘುಸ್ಪಡ್, ಗೊಂದೊಳ್
`ಕವಿತೆಚೊ ಸಂಸಾರ್ ವೆಗ್ಳೊಚ್. ಮನಾಂ ನಿತಳ್ ಕರ್ತಾ, ಕಾಳ್ಜಾಕ್ ಥಂಡಾಯ್ ದಿತಾ, ಭುಕೆಕ್ ಜೆವಣ್ ದಿತಾ, ಪಿಡೆಕ್ ವಕತ್ ಜಾತಾ ಆನಿ ಸುಶೆಗಾಚೊ ನವೊ ಭೊಂವಾರ್ ನಿರ್ಮಾಣ್ ಕರುಂಕ್ ಸಕ್ತಾ' ಅಶೆಂ ಮ್ಹಣಾಲೊ ಮಾಚ್ಚಾ ಮಿಲಾರ್, ಕೊಂಕ್ಣಿ ಲೇಖಕಾಂಚೊ ಎಕ್ವಟ್, ಕರ್ನಾಟಕ್ (ರಿ) ಮಂಗ್ಳುರ್ ಹಾಚೊ ಅಧ್ಯಕ್ಷ್, ಆಯ್ತಾರ್ 8 ನವೆಂಬರ್ 2009ವೆರ್ ಕೊಡಿಯಾಳ್ಬೈಲ್ ಬಿಸ್ಪಾಚ್ಯಾ ಘರ್ಚ್ಯಾ ಸಭಾಸಾಲಾಂತ್ ಕೊಂಕ್ಣಿ ಲೇಖಕಾಂಚೊ ಎಕ್ವಟ್ ಕರ್ನಾಟಕ್ (ರಿ), `ರಾಕ್ಣೊ' ಹಫ್ತ್ಯಾಳೆಂ ಆನಿ ಪುನವ್ ಪ್ರಕಾಶನ್ ಹಾಂಣಿ ಧರ್ಮಜ್ಯೋತಿ ಕೊವೆಂತ್ ವಾಮಂಜೂರ್ ಹಾಂಚ್ಯಾ ಪ್ರಾಯೋಜಕ್ಪಣಾಖಾಲ್ ಮಾಂಡುನ್ ಹಾಡಲ್ಲ್ಯಾ ಅರ್ಧ್ಯಾ ದಿಸಾಚೆಂ `ದಿಲ್ಲ್ಯೆ ಕವಿತೆಚೆಂ ವಿಶ್ಲೇಷಣ್' ಕಾರ್ಯಕ್ರಮ್ ಉಗ್ತಾವ್ನ್. ಮುಕಾರುನ್ ತೊ ಮ್ಹಣಾಲೊ `ಕವಿತಾ ಭಾಶೆಚೆಂ, ಸಬ್ದಾಂಚೆಂ, ಭಾವನಾಂಚೆಂ ಏಕ್ ಅಪೂರ್ಣ್ ಮಿಶ್ರಣ್. ಹಾಚೆ ಆದಿಂ ಎಕ್ವಟಾನ್ ಕೆಲ್ಲ್ಯಾ ಕಾರ್ಯಕ್ರಮಾಂನಿ ಸಾಹಿತಿಕ್ ಮಟ್ಟ್ ನಾತಲ್ಲೆಂ ದೆಕುನ್ ಆಜ್ ಆಮಿ ಏಕ್ ಹೊ ನವೊ ಪ್ರಯೋಗ್ ಕೆಲಾ, `ದಿಲ್ಲ್ಯೆ ಕವಿತೆಚೆಂ ವಿಶ್ಲೇಷಣ್''. ವಿಮರ್ಸೊ ಪಯ್ಲೆಂ ಮೇಟ್ ಮಾತ್. ಹಾಂಗಾ ವಿಂಚ್ಲ್ಲಿ ಕವಿತಾ ಆಧುನಿಕ್ ಕಾವ್ಯಾಂತ್ಲಿ ನ್ಹಯ್ ತರೀ ಹಾಂತುಂ ಬರೋಚ್ ಚಿಂತ್ಪಾಚೊ ವ್ಹಾಳೊ ಆಸಾ' ಆನಿ ದಿಲ್ಲ್ಯೆ ಕವಿತೆಚ್ಯೊ ಪ್ರತಿಯೊ ಅನಾವರಣ್ ಕರುನ್ ವಾಂಟ್ಲ್ಯೊ.
ಉಪ್ರಾಂತ್ ಉಲಯಿಲ್ಲ್ಯಾ ಡೊಲ್ಫಿ ಕಾಸ್ಸಿಯಾನ್ 1977 ತ್, ಬೆನಾಮಿ ಬರೊವ್ಪ್ಯಾನ್ ಬರಯಿಲ್ಲ್ಯಾ ಜೆಜು ಆನಿ ಪಾತ್ಕಿ ಸ್ತ್ರೀಯೆಚ್ಯಾ ಗೀತ್ ನಾಟಕಾಚೆಂ ಏಕ್ ದೃಶ್ಯ್ ದೀವ್ನ್, `ಹಿ ಕವಿತಾ. ಹಾಕಾ ತಕ್ಲೆನಾಂವ್ ನಾ. ಹಾಂತುಂ ಮನೀಸ್ ನಾ. ಗಾಂವ್ ನಾ. ಕಾಳ್ ನಾ. ಹಾಚೊ ಕಚ್ರೊ ಕರ್ಯೆತ್. ತೋಡ್ಫೊಡ್ ಕರ್ಯೆತ್. ಪುಣ್ ಉದ್ದೇಶ್ ಮಾತ್ ಫಕತ್ ಖರೊ ಆನಿ ಬರೊ ಆಸಜೆ' ಮ್ಹಳೆಂ. `ಹೆಂ ಲಾಂಬಾಯೆಚ್ಯಾ ಪಯ್ಣಾಕ್ ಏಕ್ ಮೇಟ್. ಹೆ ಕವಿತೆಕ್ ರೂಪ್ ಆಸಾ. ರೂಚ್ ಆಸಾಗೀ ನಾ ಮ್ಹಣ್ ಕವಿತೆಚೆ ಪಂಡಿತ್ ದಾಕೊವ್ನ್ ದೀಂವ್ದಿತ್ ಆನಿ ಆಪ್ಲ್ಯಾ ವಿಮರ್ಶೆಚಿ ಖರಿ ತಾಂಕ್ ದಾಕಂವ್ದಿತ್. ಹೆಂ ವಿಮರ್ಶಕಾಂಕ್ ಏಕ್ ಉಗ್ತೆಂ ಪಂಥಾಹ್ವಾನ್, ಕಿತ್ಯಾಕ್ ಮ್ಹಳ್ಯಾರ್ ಪಿಎಚ್ಡಿ ಕೆಲ್ಲೆ ಸಗ್ಳೆ ಬರೆ ಮೆಸ್ತ್ರಿ ನ್ಹಯ್'.
ಉಪ್ರಾಂತ್ ಉಲಯಿಲ್ಲ್ಯಾ ಲಿಯಾಬಾನ್ `ಹಾಚೆಂ ವಿಶ್ಲೇಷಣ್ ಮ್ಹಣ್ಜೆ ಪ್ರಾಸ್ ಅಧ್ಯಯನ್ ಕರ್ಚೆಂ ಮ್ಹಳ್ಯಾರ್ ಸಾರ್ಕೆಂ. ವಿಮರ್ಶ್ಯಾ ವರ್ವಿಂ ಸಾಹಿತ್ಯಾಂತ್ ಪ್ರಗತಿ ಜಾಯ್ಜೆ. ವಿಮರ್ಸೊ ಚಡ್ ಆನಿ ಚಡ್ ಯೇಜಾಯ್. ಪುಣ್ ಸಾಹಿತ್ಯ್ ಎಕಾಮೆಕಾ ಸರ್ ಕರ್ಚೆಂ ಆನಿ ತುಲನಾತ್ಮಕ್ ಅಧ್ಯಯನ್ ನಾಕಾ' ಮ್ಹಳೆಂ. ಎಕೆ ಕವಿತೆನ್ ಸಾಂಗ್ಚೆಂ ಉಣೆಂ, ಸಾಂಗೊಂಕ್ ಆಸ್ಚೆಂ ಚಡ್ ಮ್ಹಳ್ಳ್ಯಾ ತಾಣೆಂ ಹೆಂ ಗೀತ್ ನಾಟಕ್ ವಾಂಜೆಲಾಂತ್ಲ್ಯಾ ಘಡಿತಾಚೆರ್ ಆಸೊನ್ ವಾಂಜೆಲಾಂತ್ಲಿ ಸ್ತ್ರೀ ಹಾಂಗಾ ಕಶಿ ಚಲಿ ಜಾಲಿ ಮ್ಹಣ್ ಸವಾಲ್ ಕೆಲೆಂ. ಪ್ರಾಸ್ ಜಾಯ್ಜೆ, ಪುಣ್ ಪ್ರಾಸಾ ಖಾತೀರ್ ಅಶೇಯ್ ತ್ರಾಸ್ ಘೆವ್ನ್ ಸರ್ಕಸ್ ಕೆಲ್ಲೆಂ ಕಿತ್ಲೆಂ ಸಾರ್ಕೆಂ? ಫಕತ್ ಪ್ರಾಸಾ ಖಾತೀರ್ ಆಂಬ್ಯಾ ಥಾವ್ನ್ ಕುಂಬ್ಯಾಕ್ ಉಡ್ಲಲೆಂ ಹಾಂಗಾ ಧರ್ ಧರ್ ಮ್ಹಣ್ ದಿಸ್ತಾ' ಮ್ಹಳೆಂ. ಕವಿತಾ ಮ್ಹಳ್ಯಾರ್ ಪ್ರತಿಮಾಚಿ ಗರ್ಜ್ ಆಸಾ ಆನಿ ಪ್ರತಿಮಾ ಕವಿತೆಚಿ ಸೊಭಾಯ್ ದೊಡ್ತಿ ಕರ್ತಾ ಮ್ಹಳ್ಳ್ಯಾ ಲಿಯಾಬಾನ್ `ಹಿ ಮ್ಹಜಿ ಖಾಸ್ಗಿ ಅಭಿಪ್ರಾಯ್ ಮಾತ್ ಆನಿ ಹಾಂತುಂ ಹಾಂವ್ ಸೊಡ್ದೊಡಿಕ್ ತಯಾರ್ ಆಸಾಂ' ಮ್ಹಳೆಂ.
ಉಪ್ರಾಂತ್ ಉಲಯಿಲ್ಲ್ಯಾ ವಲ್ಲಿ ವಗ್ಗಾನ್ `ಹಿ ಕೃತಿ ವಾಚ್ತಾನಾ ಸಭಾರ್ ಚಿಂತ್ನಾಂ ಉದೆತಾತ್. ಹಾಚೆವಿಶ್ಯಾಂತ್ ಬರೊಂವ್ಕ್ ಬಾರಿಚ್ ಕಷ್ಟಲೊಂ. ತೀಸ್ ವರ್ಸಾಂ ಆದ್ಲಿ ಹಿ ಸಾಹಿತಿಕ್ ಕೃತಿ ಜುವಾಂವ್ಚ್ಯಾ ಬೈಬಲಾಂತ್ಲ್ಯಾ 8ವ್ಯಾ ಅಧ್ಯಾಯಾಚೆರ್ ಬರಯ್ಲ್ಯಾ. ಹಾಂತುಂ ಸಭಾರ್ ಸವಾಲಾಂ ಉಟೊಂವ್ಚಿ ತಾಂಕ್ ಆಸಾ. ಪುಣ್ ತೀರ್ಲ್ ಕಿತ್ಲೆಂ ಆಸಾ ತೆಂ ಕಳಿತ್ ನಾ. ಹೊ ಫಕತ್ ಏಕ್ ಮನೋರಂಜನಾಚೊ ಗೀತ್ ನಾಟಕ್ ಮಾತ್. ಶಾಸ್ತ್ರೀಯ್ ಕವಿತಾಂಕ್ ಆನಿ ಆಧುನಿಕ್ ನವ್ಯ್ ಕವಿತಾಂಕ್ ತಫಾವತ್ ಆಸಾ. ಸಾಂಪ್ರದಾಯಿಕ್ ಕವಿತಾಂಕ್ ಪ್ರಾಸಚ್ ಗರ್ಜ್. ಆಧುನಿಕ್ ಕವಿತಾಂಕ್ ಪ್ರಾಸಾಚೆ ತ್ರಾಸ್ ನಾಂತ್, ತರೀ ಆಜ್ ಪ್ರಾಸಾಂಚೆರ್ ಬರೊಂವ್ಚ್ಯಾ ಕವಿಂಕ್ ಹಲ್ಕ್ ಕರುಂಕ್ ಸಾಧ್ಯ್ ನಾ' ಮ್ಹಳೆಂ. ತರೀ ಹೆ ಕವಿತೆಂತ್ ಅನಾಮಿಕ್ ಕವಿ ಸಲ್ವಲಾ' ಮ್ಹಣ್ ತಾಣೆ ಸಾಂಗ್ಲೆಂ.
ಉಪ್ರಾಂತ್ಲಿ ಭಾಸಾಭಾಸ್ ಮಾಚ್ಚಾ ಮಿಲಾರ್ ಹಾಣೆಂ ಚಲೊವ್ನ್ ವೆಲಿ. ಪಾವ್ಲ್ ಮೊರಾಸಾನ್ ಕವಿತೆಂತ್ ಮೀಟರ್ ಸಾರ್ಕೆಂ ನಾ, ಕವಿತೆಕ್ ರೆಗ್ರ್ ಕಿತ್ಯಾಕ್ ನಾ? ಮ್ಹಣ್ ಆಪ್ಲಿ ಅಭಿಪ್ರಾಯ್ ಉಚಾರ್ತಾನಾ ಡೊಲ್ಫಿ ಕಾಸ್ಸಿಯಾನ್ ಮಧೆಂಚ್ ರಿಗೊನ್ `ಜೊ ಕೊಣ್ ಮೀಟರ್ ಸಾರ್ಕೆಂ ನಾ ಮ್ಹಣ್ತಾ, ತಾಣೆಂ ಮೀಟರ್ ಕಿತೆಂ ಮ್ಹಣ್ ಸಾಂಗಜಾಯ್ ಆನಿ ಕೊಣ್ ಕವಿತಾ ಬರಿ ನಾ ಮ್ಹಣ್ತಾ ತಾಣೆಂ ಬರಿ ಕವಿತಾ ಕಿತೆಂ ಮ್ಹಣೊನ್ಯ್ ಸಾಂಗಜಾಯ್, ನ್ಹಯ್ ತರ್ ಅಭಿಪ್ರಾಯ್ ದೀಂವ್ಕ್ ನಜೊ' ಮ್ಹಳೆಂ. ಜೊನ್ ಮೊನಿಸಾನ್ `ಗೀತ್ ನಾಟಕ್ ಕವಿತಾ ಮ್ಹಣ್ ಕಸೊ ಘೆವ್ಯೆತ್?' ಮ್ಹಣ್ ಸವಾಲ್ ಉಟಯ್ಲೆಂ. ಎಡ್ವಿನ್ ಜೆ ಎಫ್ ಡಿ'ಸೋಜಾನ್ `ಜೆಂ ಕೊಣೇಂಯ್ ಹೆಂ ಬರಯ್ಲಾಂ ತಾಣೆಂ ಬೈಬಲ್ ಸಾರ್ಕೊ ವಾಚುನ್ ಸಮ್ಜೊಂಕ್ ನಾ ಮ್ಹಳೆಂ. ಕಾರಣ್ ಜೆಜುನ್ ಕೆದ್ನಾಂಯ್ ರುಕಾಮುಳಾಂತ್ ಭುರ್ಗ್ಯಾಂಕ್ ಆಮ್ಚ್ಯಾ ಬಾಪಾ ಮಾಗ್ಣೆಂ ಶಿಕೊಂವ್ಕ್ ನಾ, ತೆಂ ತಾಣೆಂ ಆಪ್ಲ್ಯಾ ಶಿಸಾಂಕ್ ಶಿಕಯಿಲ್ಲೆಂ' ಮ್ಹಳೆಂ. ತಶೆಂಚ್ `ಚಲಿಯೆಕ್ ಪಳೆಲ್ಲೆಂಚ್ ಜೆಜುಕ್ ಕಶೆಂ ತಿಣೆಂ ಚೂಕ್ ಕೆಲ್ಯಾ ಮ್ಹಣ್ ಕಳ್ಳೆಂ' ಮ್ಹಣ್ ವಿಚಾರ್ಲೆಂ. ಹೆರೊಲ್ಪಿಯುಸಾನ್ `ಬೈಬಲಾಂತ್ ಗುರ್ಕಾರ್ ಆನಿ ಪಾಸ್ಕು ಆಸಲ್ಲೆಗಿ?' ಮ್ಹಣ್ ಸವಾಲ್ ಕೆಲೆಂ. ತರ್ ಸಿಜ್ಯೆಸಾನ್ `ಸಗ್ಳೆ ಕವಿತೆಂತ್ ಸ್ತ್ರೀಯೆಕ್ ಮಾತ್ ಖುರ್ಸಾಂವ್ಚೆಂ ದಿಸ್ತಾ, ಗಾಂವ್ಚೆ ಚಲೆ ಕಶೆ ನಿಸ್ಕಳ್' ಮ್ಹಣ್ ವಿಚಾರ್ಲೆಂ. ಟೊನಿ ಫೆರೊಸಾನ್ ಹೊ ನಾಟಕ್ ಶುಷ್ಕ್ ಸ್ತ್ರೀವಾದ್ ಸೊಡ್ನ್ ದುಸ್ರೆಂ ಕಿತೇಂಯ್ ನ್ಹಯ್ ಮ್ಹಳೆಂ. ವಿನೋದ್ ಕುಲಾಸೊ, ಗ್ಲೇಡಿಸ್ ರೇಗೊ, ವಿತೊರಿ ಕಾರ್ಕೊಳ್, ಆಲ್ವಿ ಕಾರ್ಮೆಲಿತ್, ಲಿಲ್ಲಿ ಮಿರಾಂದಾ, ಡೋರಾ ರೊಡ್ರಿಗಸ್, ಚಾರ್ಲಿ ದೆರೆಬೈಲ್, ಯಶವಂತ್ ಡಿ ಎಸ್, ಎಚ್ಚೆಮ್ ಪೆರ್ನಾಲ್ ಹಾಂಣೀಂಯ್ ಕವಿತೆಚೆರ್ ಆಪಾಪ್ಲಿ ಅಭಿಪ್ರಾಯ್ ಮಾಂಡ್ಲಿ.
ಉಪ್ರಾಂತ್ ಅಭಿಪ್ರಾಯಾಂಕ್ ಪ್ರತಿಸ್ಪಂದನ್ ದಿಲ್ಲ್ಯಾ ಡೊಲ್ಫಿ ಕಾಸ್ಸಿಯಾನ್ ಸಗ್ಳೆಯ್ ವಿಶ್ಲೇಷಣಾಂತ್ ಸಲ್ವಲ್ಯಾತ್. ಕೊಣೇಂಯ್ ಹೋಮ್ ವರ್ಕ್ ಕರುನ್ ಯೇಂವ್ಕ್ ನಜೊ ಮ್ಹಣ್ ಹಾಂವೆಂ ಕವಿತಾ ಪಯ್ಲಿಚ್ ದೀಂವ್ಕ್ ನಾ. ಸಾಹಿತ್ಯ್ ವಿಮರ್ಸೊ ಕರುಂಕ್ ಹೋಮ್ ವರ್ಕ್ ಕರ್ಚೆಂ, ತಶೆಂ ತುಲನಾತ್ಮಕ್ ಅಧ್ಯಯನ್ ಕರ್ಚೆಂ ಚೂಕ್. ಕೊಣೇಂಯ್ ಕವಿತೆಚೊ ಅತ್ಮೊ ಆಪಡ್ಲೊನಾ. ಹಾಂತ್ಲೆ ವಿಚಾರ್ ಪಳಯ್ಲೆನಾಂತ್. ಭಾಸ್ ಪಾರ್ಕಿಲಿ ನಾ - ಮ್ಹಣ್ ತಳ್ಮಳೆ ಉಚಾರ್ಲೆ. ಶೈಲಿ ಕವಿತೆಚೆಂ ನ್ಹೆಸಣ್, ಹೆಂ ಕವಿತೆಂತ್ ಶೈಲಿ ಆಸಾ, ರೂಪ್ ಆಸಾ, ಮೌಲ್ಯಾಂ ಆಸಾತ್ ಮ್ಹಳೆಂ. ತಶೆಂಚ್ ಕವಿತೆಕ್ ವ್ಯಾಕರಣ್ಯ್ ಗರ್ಜ್ ಮ್ಹಳೆಂ. ಅಭಿಪ್ರಾಯ್ ದಿತೆಲ್ಯಾಂನಿ ಭಿಯೆಂವ್ಕ್ ನಜೊ. ದಾಕ್ಷೆಂವ್ಕ್ ನಜೊ ಮ್ಹಣ್ ಹಾಂವೆಂ ಕವಿಚೆಂ ನಾಂವ್ ಸಾಂಗೊಂಕ್ ನಾ. ಚಾಫ್ರಾಚೆ ಕವಿತೆವಿಶಿಂ ಉಲಯ್ತಾನಾ ಚಾಫ್ರಾಕ್ ಆಮಿ ಯೇಂವ್ಕ್ ಸೊಡೊನಾತ್ಲ್ಯಾಂವ್ ಮ್ಹಳ್ಳ್ಯಾ ತಾಣೆಂ, ಸಗ್ಳೆಂ ಸಂಪ್ಲ್ಯಾ ಉಪ್ರಾಂತಿ ಕವಿ ಕೋಣ್ ಪುನೆಕೆಲ್ಲೊ ಮ್ಹಣ್ ಸಾಂಗ್ಲೆಂಚ್ ನಾ. ವಯ್ಲ್ಯಾನ್ ತೊ ಮೆಲಾಗಿ, ಜೀವ್ ಆಸಾಗಿ ಮ್ಹಣೊನಯ್ ಕಳಿತ್ ನಾ ಮ್ಹಣೊನ್ ಗೊಂದೊಳಾಂತ್ ಘಾಲೆಂ.
ಸಗ್ಳೆಂ ಕಾರ್ಯೆಂ `ರಾಕ್ಣೊ' ಸಹಸಂಪಾದಕ್ ಟೊನಿ ಫೆರೊಸಾನ್ ಚಲೊವ್ನ್ ವೆಲೆಂ.
ಆತಾಂ ಹಾಂಗಾ ಸವಾಲಾಂ ತೀನ್:
ಏಕ್ - ಇತ್ಲೆಂ ಗುಪೀತ್, ಸಸ್ಪೆನ್ಸ್ ಕರ್ನ್ ಕಾರ್ಯೆಂ ಕರ್ಚಿ ಗರ್ಜ್ ಕಿತೆಂ? ಕವಿತಾ ವಾ ಗೀತ್ ನಾಟಕ್ ಬರೊವ್ನ್ ಫಾಯ್ಸ್ ಜಾಲ್ಯಾ ಉಪ್ರಾಂತ್ ಘುಟ್ ಕಿತ್ಯಾಕ್?
ದೋನ್- ಕೊಂಕ್ಣಿಂತ್ ಲುವೀಸ್ ಮಸ್ಕರೇನ್ಹಸ್, ಎಡ್ವರ್ಡ್ ನೊರೊನ್ಹಾ, ವಿಲ್ಲಿ ದ ಸಿಲ್ವ್, ಚಾಫ್ರಾ ದೆಕೊಸ್ತಾ, ಜೆ ಬಿ ಮೊರಾಯಸ್, ಮೆಲ್ವಿನ್ ರೊಡ್ರಿಗಸ್, ಕಿಶೂ ಬಾರ್ಕೂರ್ ತಸಲ್ಯಾ ಶ್ಯಾಥಿವಂತ್ ಕವಿಂಚ್ಯೊ ಉಂಚ್ಲ್ಯೊ ಕವಿತಾ ಆಸ್ತಾನಾ ನಾಂವ್ ಲಿಪೊವ್ನ್, ಎಕಾ ನಾಟಕಾಂತ್ಲಿ ತಿಸ್ರ್ಯಾ ವರ್ಗಾಚಿ ಕವಿತಾ ಕಾಡ್ನ್, ಆಮೊಲಿಕ್ ತೀನ್ ವೊರಾಂ ಗುರ್ಕಾರ್ ಆನಿ ಪಾಸ್ಕು ಪಾಟ್ಲ್ಯಾನ್ ಕಿತ್ಯಾಕ್ ವ್ಯರ್ಥ್ ಜಾಯ್ಶೆಂ ಕೆಲಿಂ?
ತೀನ್- ಕವಿಚೆಂ ನಾಂವ್ ಸಾಂಗ್ಲ್ಯಾರ್ ವಿಮರ್ಶಕ್ ಭಿಯೆತಾತ್ (ಕೊಂಕ್ಣಿ ಕವಿಂಕ್ ಭೋವ್ಶಾ ದಾವೂದಾಚೆಂ ವಾ ರಾಜನಾಚೆಂ ಲಿಂಕ್ ಆಸೊಂಕ್ ಪುರೊ). ತರ್ ಕವಿ ಕಿತ್ಯಾಕ್ ನಾಂವ್ ಸಾಂಗೊಂಕ್ ಭಿಯೆತಾತ್ ಆನಿ ಲಿಪಯ್ತಾತ್? ಹ್ಯಾ ಹಿಜ್ಡ್ಯಾಪಣಾಕ್ ಕಿತೆಂ ಅರ್ಥ್?
-ವಿಶ್ಲೇಶಣಾತ್ಮಕ್ ವರ್ದಿ:ಎಚ್ಚೆಮ್ ಪೆರ್ನಾಲ್, ತಸ್ವಿರ್ಯೊ: ಪಚ್ಚು ಫೆರಾರ್