`ಕೈದ್ಯಾಚ್ಯೊ ಕವಿತಾ'  ಕೈದಿಂಚೆಂ ಜಿವಿತ್ ಬದ್ಲಿತಾತ್
 
ಸರಾಳಾಂ ಪಾಟ್ಲಿ ಜೀಣ್ ಪಾತ್ಕಾಚ್ಯಾ ಪ್ರಾಜಿತಾಕ್ ಲಾಗೊನ್ ಸಾರ್‍ತಾನಾ ಆನಿ ಹ್ಯಾ ಎಕ್ಸುರೆ ಜಿಣ್ಯೆಂತ್ ಕವಿತಾ ಉಬ್ಜಾತಾತ್ ಮ್ಹಣ್ ಆಯ್ಕತಾನಾ ಆಜ್ಯಾಪ್ ಜಾಯ್ತ್. ಅತ್ಯಾಚಾರಾಕ್ ಲಾಗೊನ್ ಸುಧೀರ್ ಶರ್ಮಾ ಮ್ಹಳ್ಳ್ಯಾಕ್ ನೋವ್ ವರ್‍ಸಾಂಚಿ ಸಜಾ ಫಾವೊ ಜಾಲ್ಲಿ. ತೆ ಸಜೆಚ್ಯಾ ದುಕಾಳ್ ಪಯ್ಣಾರ್ ವೆತಾನಾ ತಾಚೆ ಥಾವ್ನ್ 153 ಕವಿತಾ ಉಬ್ಜಾಲ್ಯೊ. ತ್ಯೊ ತಾಣೆಂ ಎಕೆ ಚಿಟಿರ್ ಬರೊವ್ನ್ ಎನ್.ಜಿ.ಒ.ಕ್ ಪಾವಿತ್ ಕೆಲ್ಲ್ಯಾನ್, ಆಜ್ ತಾಚ್ಯಾ ಕವಿತೆಂಕ್, ನಾಟಕಾಚೆಂ ರೂಪ್ ಯೇವ್ನ್ ಸಿಮ್ಲಾಚೆ ಮಾಂಚಿಯೆರ್ ಸಾದರ್ ಜಾತಾ.
 
ಜುನಾಚೆ ಚಾರ್ ತಾರ್‍ಕೆರ್ `ತೂಟೆ ಅರ್‍ಮಾಣೊಂಕಿ ಆವಾಜ್' ಮ್ಹಳ್ಳೊ ನಾಟಕ್ ಹಿಮಾಚಲ್ ಪ್ರದೇಶ್ ಸರ್‍ಕಾರಾಚ್ಯಾ ಆಶ್ರ್ಯಾಖಾಲ್, ಎನ್.ಜಿ.ಒ, ದಿಲ್ಲಿ ಕಲಾ ಕರಮ್ ಆನಿ ನ್ಯಾಶನಲ್ ಸ್ಕೂಲ್ ಒಫ್ ಡ್ರಾಮಾ ಖೆಳೊನ್ ದಾಕಯ್ತಲೆ.  ಹ್ಯಾ ನಾಟಕಾಂತ್ ಆಟ್ ಕಲಾಕಾರ್ ನಟನ್ ಕರ್‍ತಲೆ.
 
`ಸುಧೀರಾಚ್ಯೊ ಪುರಾಯ್ ಕವಿತಾ, ಬಂಧಿಖಾನ್ಯಾಂತ್ಲ್ಯಾ ವರ್‍ಸಾಂನಿ ತಾಚಿ ಜಿಣಿ ರೂಪಾಂತರ್ ಜಾವ್ನ್ ನವ್ಯಾ ಸಂಸಾರಾಂತ್ ಉದೆಲ್ಲ್ಯೊ ಕವಿತಾ.  ತ್ಯೊ ನಾಟಕಾಚೆಂ ರೂಪ್ ಜಾವ್ನ್ ಬದ್ಲಾವಣ್ ಕರ್‍ನ್ ಜುನಾಚೆ 4 ತಾರ್‍ಕೆರ್ ಗ್ಯಾಟಿ ಥಿಯೆಟರಾಂತ್ ಸಾದರ್ ಜಾತಾ ಮ್ಹಣ್ ದಿಲ್ಲಿ ಕಾಲಾ ಕರಮ್ ಜೆರಾಲ್ ಕಾರ್‍ಯಾದರ್‍ಶಿ ಸರೋಜ್ ವಾಶಿಂತಾನ್ ಐ.ಎ.ಎನ್.ಎಸ್. ಕ್ ಸಾಂಗ್ಲೆಂ.
    
`ಹೊ ನಾಟಕ್ ಕವಿತಾ ರುಪಾರ್ ಆಸೊನ್ ಕೈದಿಚಿ ಮಾನಸಿಕತಾ, ಕಶೆಂ ಅಪ್ರಾದಿ ಜಿಣೆಯೆ ಥಾವ್ನ್ ಪರಿವರ್‍ತನ್ ಜಾತಾ' ಮ್ಹಳ್ಳ್ಯಾವಿಶಿಂ ಆಸಾ ಮ್ಹಣ್ ತಿಣೆಂ ಸಾಂಗ್ಲೆಂ. 
 
29 ಪ್ರಾಯೆಚೊ ಶರ್ಮಾ 2000 ಇಸ್ವೆಂತ್ ಸ್ರೀಯೆಚ್ಯಾ ಅತ್ಯಾಚಾರಾಕ್ ಲಾಗೊನ್ ನೋವ್ ವರ್‍ಸಾಂಚೆ ಸಜೆನ್ ಜೈಲಾಕ್ ಗೆಲ್ಲೊ. ಆದ್ಲ್ಯಾ ವರ್‍ಸಾ ಫೆಬ್ರೆವರಿಂತ್ ಸಿಮ್ಲಾಚ್ಯಾ ಕಾನ್ಡಾ ಜೈಲಾಥಾವ್ನ್ ತೊ ಆಜಾದ್ ಜಾಲೊ.
 

ಆತಾಂ ಕಾಜಾರ್ ಜಾವ್ನ್ ಸೊಲಾನ್ ಶಹರಾಚ್ಯಾ ಲಾಗ್ಶಿಲೆ ಹಳ್ಳೆಂತ್ ಮ್ಹಾಲ್ಗಡ್ಯಾಂಚ್ಯಾ ಶೆತಾಂತ್ ಕೃಶಿ ಕರ್‍ನ್ ದೀಸ್ ಸಾರ್‍ತಾ. 
 
ಶರ್ಮಾ ಉಚಾರ್‍ತಾ `ಮ್ಹಜಿ ಜೈಲಾಚಿ ಸುರ್‍ವಿಲಿ ಜೀಣ್ ಬೊವ್ ಖಂತಿಚಿ ಜಾವ್ನ್ ಆಸಲ್ಲಿ, ತೆದ್ನಾಂ ಹಾಂವೆಂ ಕವಿತಾ ಲಿಖುಂಕ್ ದರ್‍ಲಿ, ತ್ಯಾ ಉಪ್ರಾಂತ್ ಹಾಂವ್ ಅತ್ವೆಚ್ ರಿತಿನ್ ಜಿಯೆಂವ್ಕ್ ಸಕ್ಲೊಂ. ಆತಾಂ ಹಾಂವ್ ಹೆರ್ ಕೈದ್ಯಾಂಕ್ ದೇಕ್ ಜಾವ್ನ್, ಕಶೆಂ ಬರೊ ಮನಿಸ್ ಜಾವ್ನ್ ಸುಟ್ಕಾ ಜೊಡ್ಯೆತಾ' ಮ್ಹಣ್ ಸಲಹಾ ದಿತಾಂ.
 
ಜೈಲಾಂತ್ ಆಸ್ತಾಂ ದಿಸ್ಪೊಟಿ ಬರೊಂವ್ಚಿ ಸವಯ್ ತಾಣೆ ಕೆಲ್ಲಿ.
 
`ಹ್ಯಾ ಮ್ಹಜ್ಯಾ ಕೈದ್ಯಾಚೆ ಜಿಣಿಯೆಂತ್ ಬಂಧಿಖಾನ್ಯಾಂತ್ ಲಿಪಲ್ಲಿ ಸತಾಂ, ಕೈದ್ಯಾಚಿ ಅಪ್ರಾದಿ ಜೀಣ್, ಜೈಲರಾಚಿ ಕ್ರೂರತಾ, ಮಾದಕ್ ವೊಕ್ತಾಂಚ್ಯಾ ವ್ಯಸನಾಂತ್, ಸಾದೊ ಮ್ಹನಿಸ್ ಕಸೊ ಖೊಟೊ ಜಾತಾ ತೆಂ ಬರೊವ್ನ್ ದವರ್‍ಲಾಂ'.
 
ಕೈದ್ಯಾಚ್ಯಾ ಬರೆಪಣಾ ಖಾತಿರ್ ವಾವುರ್‍ಚ್ಯಾ ಎನ್.ಜಿ.ಒ. ಸಂಸ್ಥ್ಯಾಚಿ ಸತ್ತರ್ ಆನಿ ಸಾತ್ ವರ್‍ಸಾಂಚಿ ವಾಶಿಂತ್ (ಕೈದಿ ತಿಕಾ `ಮಾಂಯ್' ಮ್ಹಣ್ ಉಲೊ ಕರ್‍ತಾತ್) `ಹರ್ ಪಾವ್ಟಿಂ ಆಮಿ ಬಂಧಿಖಾನ್ಯಾಕ್ ಕೈದಿಂಕ್ ಬದ್ಲಾವಣೆಚಿ ಕಾರ್‍ಯಾಗಾರ್ ಆಸಾ ಕರುಂಕ್ ಭೆಟ್ ದಿತಾನಾ, ಸುಧೀರ್ ಶರ್ಮಾ ಕವಿತೆಂಚ್ಯೊ ವೊಳಿ ಆಮ್ಕಾಂ ದಿತಾಲೊ. ಆಮಿ ತಾಕಾ ಸುರ್‍ವೆರ್ ಭೆಟ್ತಾನಾ, ಸಜಾ ಬೊಗುಂಕ್ ಆಯಿಲ್ಲ್ಯಾ ವರ್‍ಸಾಂನಿ ತೊ ಸಗ್ಳೊಚ್ ಪಿಸಾಂತುರ್ ಆಸೊನ್ ಮಾನಸಿಕ್ ಅಸ್ವಸ್ಥೆಂತ್ ವೊಳ್ವಳ್ತಾಲೊ.  ಆಮಿ ತಾಚೆ ಬದ್ಲಾವಣೆಕ್ ಸಹಕಾರ್ ದಿಲೊ' ಮ್ಹಣ್ ತಿ ಸಾಂಗ್ತಾ.
 
ವಾಶಿಂತ್ ಆದಿಂ ದಿಲ್ಲಿಚ್ಯಾ ಆಲ್ ಇಂಡಿಯಾ ರೆಡಿಯೊಂತ್ ಪ್ರಸಾರಕಿ ಜಾವ್ನ್ ವಾವುರ್‍ಲ್ಯಾ. ತಿಣೆ ಶರ್ಮಾಚೆಂ ಕವಿತಾ ಪುಸ್ತಕ್ `ತೂಟೆ ಆರ್‍ಮನೊಂಕಿ ಆವಾಜ್' ಪರ್‍ಗಟ್ ಕೆಲೊ. ಆತಾಂ ತ್ಯಾಚ್ ನಾಂವಾನ್ ನಾಟಕ್ ಸಾದರ್ ಜಾತಾ. ಜುನಾಚೆ ಚಾರ್ ತಾರ್‍ಕೆರ್ ನಾಟಕ್ ಪ್ರದರ್‍ಶನ್ ಜಾತಾನಾ, 66 ಪಾನಾಂಚೊ ಹೊ ಬೂಕ್ ಮೊಕ್ಳಿಕ್ ಜಾತಾ. ಎನ್. ಜಿ. ಒ. ಪ್ರಕಾಶನಾಚ್ಯಾ, ಹ್ಯಾ ಪುಸ್ತಾಕಾಚ್ಯೊ ಪ್ರತಿಯೊ ದೇಶಾಚ್ಯಾ ಹೆರ್ ಬಂದಿಖಾನ್ಯಾಂನಿ ವಾಂಟ್ತಲೆ. `ಹ್ಯಾ ವರ್‍ವಿಂ ಕೈದಿಂಚೆರ್ ಪ್ರಭಾವ್ ಪಡ್ತಲೊ ಮ್ಹಳ್ಳೊ ಭರ್‍ವಸೊ ಆಮ್ಚೊ'.
 
ವಾಶಿಂತ್ ಹ್ಯಾ ಆದಿಂ ದೆಲ್ಲಿಚ್ಯಾ ತಿಹಾರ್ ಜೈಲಾಂತ್ ಕೈದ್ಯಾಂಕ್ ನವಿ ಜೀಣ್ ದಾಕೊಂವ್ಚ್ಯಾಂತ್ ವಾವುರ್‍ಲಲಿ, ಪ್ರಸ್ತುತ್ ಸಿಮ್ಲಾಂತ್ ಅಸಲೊಚ್ ವಾವ್ರ್ ಮುಂದರುನ್ ವ್ಹರೊನ್ ಆಸಾ.
 
-ಭಾತ್ಮಿ ಕೊಂಕಣಿಕ್: ವಿನ್ಸಿ ಪಿಂಟೊ ಆಂಜೆಲೊರ್