ವಿಶ್ವ ಕೊಂಕಣಿ ಕೇಂದ್ರಾಂತ್ ಬಾಕಿಬಾಬ್ ಜಲ್ಮಾಶತಾಬ್ದಿ ಸ್ಮರಣ್ ಜೂನ್ 13 ತಾರಿಕೆರ್

ಆದ್ಲ್ಯಾ ಶತಕಾಂತ್, ಚಡುಣೆಂ ತಿಸ್ರ್ಯಾ ದಶಕಾಂತ್ ಭಾರತೀಯ್ ಸಾಹಿತಿ ಆನಿ ಕವಿಂಚಿಂ ಮನಾಂ ರಾಷ್ಟ್ರವಾದ್ ಆನಿ ಗಾಂಧಿವಾದಾಚ್ಯಾ ಚಿಂತ್ನಾಂನಿ ರೆಂವೊಡ್ ಘಾಲುನ್ ಆಸ್ತಾನಾ, ಬಾಕಿಬಾಬ್ ಬೋರ್ಕರಾನ್ ಕವಿತಾ ಬರೊಂವ್ಕ್ ಧರಲ್ಲಿ. ಸಗ್ಳೆ ಕವಿ ಶಹರಾಂತ್ ರಾವೊನ್, ಕಾಂಯ್ ವರ್ಸಾಂ ಪಾಟಿಂ ಗಾಂವಾಂತ್ ಸಾರಲ್ಲೆ ಜಿಣ್ಯೆಚೊ ಉಡಾಸ್ ಕಾಡುನ್ ತಸಲ್ಯಾ ಜಿವಿತಾಂತ್ಲ್ಯಾ ಸಮಸ್ಯಾಂವಿಶಿಂ ಹುಸ್ಕೊ ಪಾಚಾರುನ್ ಬರಯ್ತಾಲೆ ಜಾಲ್ಯಾರ್, ಬಾಕಿಬಾಬ್ ಬೋರ್ಕರ್ ಗಾಂವಾಂತ್ ಆಸೊನ್, ತಸಲ್ಯಾ ಜಿವಿತಾಂತ್ ಶಿಜೊನ್ ಬರಯ್ತಾಲೊ ಜಾಲ್ಲ್ಯಾನ್ ತೊ ಹೆರಾಂ ಪ್ರಾಸ್ ವೆಗ್ಳೊ ಆಸಲ್ಲೊ. ಮರಾಠಿ ತಿತ್ಲೊಚ್ ಆಪ್ಲೆ ಮಾಯ್‌ಭಾಶೆಂತ್ ತೊ ಬರೊಂವ್ಕ್ ಸಕ್ತಾಲೊ. ಪಾತ್ರಿಸ್ ರೆಂದೆರಾಕ್ ಆಪ್ಲೊ ಗುರು ಮ್ಹಣೊನ್ ಮಾಂದಲ್ಲ್ಯಾ ಬಾಲಕೃಷ್ಣ ಭಗವಂತ್ ಬೋರ್ಕರಾಚಿ ಜಲ್ಮಾಶತಾಬ್ದಿ ಆದ್ಲ್ಯಾ ನವೆಂಬ್ರಾ ಥಾವ್ನ್ ಗೊಂಯಾಂತ್ ತಶೆಂ ಹೆರೆಕಡೆನ್ ಮನಾವ್ನ್ ಆಸಾತ್.
 
ಮಂಗ್ಳುರಾಂತ್ ಹ್ಯಾಚ್ ಜುನಾಚೆ ತೆರಾ ತಾರಿಕೆರ್ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಟಾನ್ ತಶೆಂ ಕವಿತಾ ಟ್ರಸ್ಟ್ ಸಾಂಗಾತ್ ಮೆಳೊನ್ ಮಂಗ್ಳುರ್ ಶಕ್ತಿನಗರಾಂ ಆಸ್ಚ್ಯಾ ವಿಶ್ವ ಕೊಂಕಣಿ ಕೇಂದ್ರಾಂತ್ ಹೆಂ ಆಚರಣ್ ಕರ್‍ತಾತ್.
 
ಗೊಂಯ್ಚೊ ಸುಟ್ಕೆ ಝುಜಾರಿ ನಾಗೇಶ್ ಕರ್ಮಲಿ ಹ್ಯಾ ಸಗ್ಳ್ಯಾ ದಿಸಾಚ್ಯಾ `ಬಾಕಿಬಾಬ್ ಶತಾಬ್ದಿ ಸ್ಮರಣ್' ಸಮಾರಂಭಾಚೆಂ ಉಗ್ತಾವಣ್ ಕರ್‍ತಲೊ. ಪ್ರೊ ನಾರಾಯಣ್ ದೇಸಾಯಿ ಹಾಚ್ಯಾ ಅಧ್ಯಕ್ಷಪಣಾಖಾಲ್ ಬಾಕಿಬಾಬಾಚೆ ಕವಿತೆಚೆರ್ ವಿಚಾರ್‌ಗೋಷ್ಟಿ ಚಲ್ಚಿ ಆಸೊನ್ ಗೊಂಯಾಂ ಥಾವ್ನ್ ಭೂಷಣ್ ಭಾವೆ ಆನಿ ರಾಜಯ್ ಪವಾರ್ ಆಪ್ಲೆ ಪ್ರಬಂಧ್ ಮಾಂಡ್ತಲೆ. ದೊನ್ಪಾರಾಂಚ್ಯಾ ಆದೆಸಾಂತ್ ಕವಿ ತಶೆಂ ವಿಮರ್ಶಕ್ ಎಚ್ಚೆಮ್ ಪೆರ್ನಾಳಾಚ್ಯಾ ಅಧ್ಯಕ್ಷಪಣಾಖಾಲ್ ಕವಿಗೋಷ್ಠಿ ಚಲ್ತಲಿ. ಹೆ ಗೋಷ್ಟಿಂತ್ ಶಕುಂತಳಾ ಆರ್. ಕಿಣಿ, ಜೆರಿ ರಾಸ್ಕಿನ್ಹಾ, ರಾಜಯ್ ಪವಾರ್, ಆಂಡ್ರ್ಯೂ ಎಲ್ ಡಿಕುನ್ಹಾ, ವೆಂಕಟೇಶ ನಾಯಕ್, ಎಸ್ ಎನ್ ಭಟ್ ಸೈಪಂಗಳ್ಳು ಆನಿ ವಿಲ್ಮಾ ಬಂಟ್ವಾಳ್ ಹಿಂ ಭಾಗ್ ಘೆತಲಿಂ.
 
ಬಾಕಿಬಾಬಾಚ್ಯೊ ಕಾಂಯ್ ತಿಸಾಂ ವಯ್ರ್ ಕವಿತಾ ಶಕುಂತಳಾ ಆರ್ ಕಿಣಿನ್ ಕನ್ನಡ ಭಾಶೆಕ್ ಅನುವಾದ್ ಕೆಲ್ಲ್ಯೊ ಆಸೊನ್ `ನೂಪುರ' ನಾಂವಾಚೆಂ ತೆಂ ಪುಸ್ತಕ್ ಕನ್ನಡ ಕವಿ ದುಂಡಿರಾಜ್ ಮೊಕ್ಳೀಕ್ ಕರ್‍ತಲೊ. ಮುಕೆಲ್ ಸೈರೊ ಜಾವ್ನ್ ವಿಜಯ ಕರ್ನಾಟಕ ದಿಸಾಳ್ಯಾಚೊ ಸ್ಥಾನೀಯ್ ಸಂಪಾದಕ್ ಯು ಕೆ ಕುಮಾರನಾಥ ಯೆತಲೆ. 
 
ಸಾಂಜೆರ್ ಉಸ್ತಾದ್ ರಫೀಕ್ ಖಾನ್ ನಿರ್ದೇಶನಾಖಾಲ್ ಬಾಕಿಬಾಬಾಚ್ಯೊ ಕಾಂಯ್ ಕವಿತಾ ಸಂಗೀತ್ ರುಪಾರ್ ಸಾದರ್ ಜಾತಲ್ಯೊ. ಹ್ಯಾ ಸುವಾಳ್ಯಾಂತ್ ವಾಸಂತಿ ಆರ್ ಶೆಣೈ, ಮುರಳೀಧರ ಶೆಣೈ, ರವೀಂದ್ರ ಪ್ರಭು ಆನಿ ದಿವ್ಯಾ ಸುಜೀರ್ ಆನಿ ದೀಕ್ಷಾ ಸುಜೀರ್ ಆಪ್ಲೊ ತಾಳೊ ದಿತಲಿಂ.
 
ಸರ್ವಯ್ ಕೊಂಕಣಿ ಮೋಗಿಂಕ್ ಹ್ಯಾ ಸಗ್ಳ್ಯಾ ದಿಸಾಚ್ಯಾ ಕಾರ್ಯಾಕ್ ಯೆವ್ಕಾರ್ ಆಸಾ. ಸಕಾಳಿಂ ನಾಸ್ಟೊ, ದೊನ್ಪಾರಾಂ ಜೆವಣ್ ತಶೆಂ ಚಾಯೆಚಿ ವ್ಯವಸ್ಥಾ ಕೆಲ್ಯಾ.