ಆರ್ಬಿ ಗಾಂವ್ಚ್ಯಾ ಸಮಕಾಳೀನ್ ಕವಿಂಚೆಂ ಪುಸ್ತಕ್ ತೀನ್ ಭಾಸಾಂನಿ ಮೊಕ್ಳೀಕ್

ಪ್ರಶಸ್ತಿ ವಿಜೇತ್ ಕವಿ ಡೊ. ಶಿಹಾಬ್ ಘಾನೆಮ್ ಹಾಚೆಂ 43 ವೆಂ ಪುಸ್ತಕ್ ಆಯ್ಲೆವಾರ್ ಸಂಯುಕ್ತ್ ಅರಬ್ ಎಮಿರೆತಾಂತ್ ಉಗ್ತಾವಣ್ ಜಾಲೆಂ. `ಸಂಸ್ಕತಿ ಆನಿ ಭಾಶೆಚೊ ಸಾಂಕೊವ್' ನಾಂವಾಚೆ ಶಿಂಕ್ಳೆಂತ್ಲೆಂ, ಸ್ಲೊವಾಕ್ ರಿಪಬ್ಲಿಕ್ ಹ್ಯಾ ದೇಶಾಚೊ ಅನಿವಾಸಿ ರಾಯ್‌ಭಾರಿ ಡೊ. ಪೀಟರ್ ಝೊಲ್ಡೊಸ್ ಹಾಂಚ್ಯಾ ಸಾಂಗಾತಾ ಮೆಳೊನ್ ಸಂಪಾದನ್ ಕೆಲ್ಲೆಂ `ಕಂಟೆಪ್ಪೊರರಿ ಪೊಯೆಮ್ಸ್ ಫ್ರೊಮ್ ದಿ ಅರೇಬಿಯನ್ ಪೆನೆನ್ಸುಲಾ' ಮ್ಹಳ್ಳ್ಯಾ ನಾಂವಾಚೆಂ ಪುಸ್ತಕ್ ಹೆಂ.

ಮಧ್ಯಾ ಪ್ರಾಂತ್ಯಾಚಿ ಸಂಸ್ಕೃತಿ, ಜಿಣಿಯೆ ರೀತ್ ಹೆರಾಂಕ್ ಪಾವಂವ್ಚೊ ಮೂಳ್ ಶೆವೊಟ್ ಘೆವ್ನ್, ಪಾಂತ್ತೀಸ್ ಕವಿತಾ ಹಾಂತುಂ ಸಾದರ್ ಕೆಲ್ಯಾತ್. ಚಾಮ್ಡ್ಯಾಚ್ಯಾ ಪೊತ್ಯಾಂತ್ ಸಜಯಿಲ್ಲ್ಯಾ ಪುಸ್ತಕಾಂತ್ ಯು.ಎ.ಇ., ಬಾಹ್ರೈನ್, ಕುವೈಟ್, ಒಮಾನ್, ಖತಾರ್, ಸೌದಿ ಅರೇಬಿಯಾ ಆನಿ ಯೆಮೆನ್ ಗಾಂವ್ಚ್ಯಾ ಕವಿಂನಿ ಆಪ್ಲ್ಯೊ ಕವಿತಾ ಲಿಕ್ಲ್ಯಾತ್.

ಹೊ `ಕೊಫಿ ಟೇಬಲ್' ಬೂಕ್ ತಿದೊಡ್ಯೆ ಭಾಶೆಂತ್ - ಇಂಗ್ಲೆಜ್ ಸುರ್‍ವಾತೆರ್, ಸ್ಲೊವಾಕ್ ಮದ್ಗಾತ್ ಆನಿ ನಿಮಾಣೆಂ ಆರೆಬಿಕ್ ಭಾಶೆಂತ್ ಸಜಯ್ಲಾ. ಹಾಕಾ ಆಬುದಾಬಿಚ್ಯಾ ಕಲ್ಚರಲ್ ಪೌಂಡೆಶನಾನ್ ಪರ್‍ಗಟ್ಣೆಕ್ ಸಹಕಾರ್ ದಿಲಾ.

ಖುರಾನಾಚೆ ಅವಸ್ವರ್ ಉಲ್ಲೇಕ್ ಕರ್‍ನ್ `ಏ ಮನ್ಶಾ ಆಮಿ ತುಕಾ ದಾದ್ಲೊ ಆನಿ ಬಾಯ್ಲ್ ಮ್ಹಣ್ ರಚ್ಲಾಂ. ಎಕಾಮೆಕಾ ಒಳ್ಕೊಂಚೆ ಖಾತಿರ್, ತುಕಾ ಕಾತಿನ್, ಕುಳಿಯೆನ್ ವೆಗ್ಳೊ ಕೆಲಾ' ಮ್ಹಣ್ ಡೊ. ಘಾನೆಮಾನ್ ಉಗ್ತಾವಣ್ ದಿಸಾ ಉಲೊವ್ಪ್ ಕೆಲೆಂ.

ತಾಣೆಂ ಮುಕಾರ್‍ಸುನ್ `ಜರ್ ಅರಬ್ ಸಂಸಾರಾಚಿ ಸಂಸ್ಕೃತಿ ಜಾಣಾ ಜಾಯ್ಜೆ ತರ್ ಹಾಂಗಾಚ್ಯೊ ಕವಿತಾ ವಾಚಿಜೆ, ಜ್ಯೊ ಸಂಸ್ಕೃತಿಚೊ ದಿವಾನ್ (ರೆಕೊರ್ಡ್) ಜಾವ್ನಾಸಾತ್'.

ಘಾನೆಮಾಕ್ ಕವಿತಾ ಕಾಳ್ಜಾ ಲಾಗ್ಶಿಲ್ಯೊ, ತಾಚೆ ಜಿಣೆಯೆಚ್ಯಾ ಚಡಿತ್ ವಾಂಟ್ಯಾನ್ ತಾಣೆಂ ಅರೆಬಿಕ್ ಕವಿತಾ ಇಂಗ್ಲಿಶಾಕ್ ತರ್‍ಜಣ್ ಕೆಲ್ಯಾತ್.

`ಕವಿತಾ ಜಾವ್ನಾಸಾತ್ ಎಕಾ ದೇಶಾಚೊ ಅತ್ಮೊ, ಜರ್ ತುಮ್ಕಾಂ, ಆಮ್ಚಿಂ ಬೊಗ್ಣಾಂ ಆನಿ ಆಮಿ ಕಶೆಂ ಮ್ಹಳ್ಳೆಂ ಜಾಣಾ ಜಾಯ್ಚೆ ತರ್ ಹ್ಯೊ ಕವಿತಾ ವಾಚಾ' ಮ್ಹಣ್ ಘಾನೆಮಾನ್ ಹಿಶಾರೊ ದಿಲೊ.

`ಕವಿತಾಂನಿ ಅರೆಬಿಕ್ ಭೊಂವಾರಾಚೆಂ ಕಾಳಿಜ್ ಚೊರ್‍ಲ್ಯಾರ್ ಪುರೊ, ಉರಲ್ಲೆಂ ಸಗ್ಳೆಂ ಆಪ್ಣಾವ್ಯೆತ್. ಹಾಂತುಂ ಸಂಸ್ಕೃತಿ ಆನಿ ರಂಗ್ ತಫಾವತಾಚ್ಯಾ ಭೆದ್‌ಪಣಾಕ್ ಜಾಪ್ ಆಸಾ'.

ಆಪ್ಲ್ಯಾ ಪುಸ್ತಕಾಚ್ಯಾ ಪ್ರಸ್ತಾವನೆಂತ್, ಸಹಸಂಪಾದಕ್ ಝೊಲ್ಡೊಸ್ ಹಾಣೆಂ ಹ್ಯಾ ಪರಿಂ ಉಲ್ಲೇಕ್ ಕೆಲಾ: `ಕವಿತಾಂನಿ ಸಂಸ್ಕೃತೆಕ್ ಲ್ಹಾನ್ ಲ್ಹಾನ್ ದಿರ್‍ವ್ಯಾ ಪರಿಂ ಲಾಗಿಂ ಹಾಡ್ಲಾಂ. ಹ್ಯಾ ಸಂಸಾರಾಂತ್ ಜರ್ ಕಿತೆಂಯ್ ಉಣೆಂ ಮ್ಹಣ್ ಭೊಗ್ತಾ ತರ್, ತೆಂ ಫಕತ್ ಕವಿತಾ ಸಂಪೂರ್‍ಣ್ ಕರ್‍ತಾ. ಎಕಾಮೆಕಾ ಸಮ್ಜೆಣೆನ್, ಸಂಸ್ಕೃತೆಚ್ಯಾ ಗಿರೆಸ್ತ್‌ಕಾಯೆನ್ ಭರ್‍ತಾ. ಜಶೆಂ ಆಮಿ ಥರಾವಳ್ ಕೊಪಾಂನಿ ಪಿಯೆಂವ್ಚೆಂ ತೆಂ ಉದಕ್ ಎಕಚ್'.

`ಹ್ಯಾ ಎಕಾ ಲ್ಹಾನ್ ಶೆವೊಟಾನ್ ಸಾತ್ ಗಾಂವ್ಚಿ ಆರ್ಬಿ ಜೀವನ್ ಚರಿತ್ರಾ, ಲ್ಹಾನ್ ಎಕೆ ಬಿಯೆಕ್ ಸರ್‍ಲಾ ಬಿತರ್ ಫಿಚಾರ್ ಕೆಲ್ಲ್ಯಾಬರಿ ಕೆಲಾಂ' ಮ್ಹಣ್ ತಾಣೆಂ ಉಲ್ಲೆಕ್ ಕೆಲಾ.

-ಭಾತ್ಮಿ: ವಿನ್ಸಿ ಪಿಂಟೊ ಆಂಜೆಲೊರ್