ಮನ್ಶಾಚ್ಯಾ ಖರೆ ಜಿಣ್ಯೆಂತ್ಲಿಂ ರುಪಾಂ ಕವಿತೆಂತ್ಲ್ಯಾನ್ ಹಾಡ್ಚಿಂ: ಮೆಲ್ವಿನ್ ರೊಡ್ರಿಗಸ್

ಕವಿತೆಂತ್ ಯೆದೊಳಚ್ ಹಜಾರ್ ಪಾವ್ಟಿಂ ಚಾಬಲ್ಲ್ಯೊ ಗಜಾಲಿ ಬಗ್ಲೆಕ್ ದವರುನ್, ಮನ್ಶಾಚೆ ಖರೆ ಜಿಣ್ಯೆಂತ್ಲಿಂ ರುಪಾಂ ಕವಿತೆಂತ್ ಹಾಡಿಜಾಯ್ ಅಸೊ ಉಲೊ ಸಾಹಿತ್ಯ ಅಕಾಡೆಮಿ ಪುರಸ್ಕಾರಾನ್ ಅಲಂಕೃತ್ ಕವಿ ಮೆಲ್ವಿನ್ ರೊಡ್ರಿಗಸಾನ್ ಹಾಂಣಿ ಸಾಂಗ್ಲಾಂ. ‘ಉಗ್ತೆಂ ಮಳಬ್’ ದ್ವಾರಿಂ ಪರ್ವರಿಂಚ್ಯಾ ಆಝಾದ್ ಭವನಾಂತ್ ಹ್ಯಾಚ್ ಫೆಬ್ರೆರಾಚೆ 4 ಆನಿ 5 ತಾರಿಕೆಂನಿ ಚಲಲ್ಲ್ಯಾ ‘24 ವೊರಾಂಚ್ಯಾ ಕಾವ್ಯಜಾಗೊರ್’ ಕಾರ್ಯಕ್ರಮಾಚೆಂ ಉಗ್ತಾವಣ್ ಕರುನ್ ತೊ ಉಲಯ್ತಾಲೊ.

‘ಹೆಂ ಉಗ್ತೆಂ ಮಳಬ್. ಪರ್ತ್ಯಾನ್ ಹೆಂ ಉಗ್ತಾವಣ್ ಕರ‍್ಚೆ ತಸಲೆಂ ಹಾಂತುಂ ಕಾಂಯ್ ನಾ’ ಮ್ಹಳ್ಳ್ಯಾ ಮೆಲ್ವಿನಾನ್, ‘ಆಯ್ಚೆ ಕವಿ ವಿಷಯಾಂ ಖಾತೀರ್ ಕಷ್ಟತಾತ್. ಕಿತ್ಯಾ ಮ್ಹಳ್ಯಾರ್ ಭೊಂವ್ತಣಿಚ್ಯಾ ಗಜಾಲಿಂ ಥಂಯ್ ತೆ ದೀಷ್ಟ್ ಫಾಂಕಯ್ನಾಂತ್. ಘಡ್ಚ್ಯಾ ಘಡಿತಾಂಕ್ ಉತ್ರಾಂದ್ವಾರಿಂ ಧರ್ನ್ ದವರುಂಕಯ್ ತೆ ಕಷ್ಟತಾತ್. ಕಿತ್ಯಾಕ್ ಮ್ಹಳ್ಯಾರ್ ತಾಂಚೊ ಜಿವಿತಾಚೊ ಅನ್ಭೋಗ್ ಖಂಯ್ಗಿ ತಾಂಕಾಂ ಕಮೀ ಪಡ್ತಾ. ಆಮ್ಚ್ಯಾ ಕವಿಂನಿ ವಾಚಪ್ ಚಡ್ ಕರಿಜಾಯ್, ವೆಗ್ಳ್ಯಾ ಭಾಸಾಂಚೆಂ ಸಾಹಿತ್ಯ್ ವಾಚಿಜಾಯ್’ಮ್ಹಣೊನ್ ಸಾಂಗ್ಲೆಂ. ಉಗ್ತೆಂ ಮಳಬ್ ಆಯೋಜಕಾಂಚಿ ತಾಣೆಂ ಹ್ಯಾ ಸಂದರ್ಭಾರ್ ತೋಖ್ಣಾಯ್ ಕೆಲಿ. ಹ್ಯಾ ಕಾರ್ಯಕ್ರಮಾಚ್ಯಾ ಸಮಾರೋಪಾ ವೆಳಾರ್ ಆಪ್ಲ್ಯಾ ಜಿವಿತಾಚಿಂ 80 ವರ್ಸಾಂ ಸಂಪೊಂವ್ಚ್ಯಾ ಕವಿ ತಶೆಂ ಸುಟ್ಕೆ ಝುಜಾರಿ ನಾಗೇಶ್ ಬಾಬ್ ಕರ್ಮಳಿಕ್ ತಾಣೆ ಬರೆಂ ಮಾಗ್ಲೆಂ.

ಉಗ್ತಾವಣ್ ಸುವಾಳ್ಯಾಚೆಂ ಅಧ್ಯಕ್ಷ್ ಮ್ಹಣೊನ್ ನಾಗೇಶ್ ಕರ್ಮಳಿ ಆಸಲ್ಲೆ. ತಾಂಣಿ ಆಪ್ಲ್ಯಾ ಉಲೊವ್ಪಾಂತ್ ಕವಿಂನಿ ಕವಿತಾ ಕರ‍್ತಾನಾ ಪುರಸ್ಕಾರಾಚಿ ಆಶಾ ಧರ‍್ಚಿ ನ್ಹಯ್. ಎಕಾ ಕಾಳಾರ್ ಕವಿಂಕ್ ಬರೆಂಚ್ ಮಹತ್ವ್ ಆಸ್ಲೆಂ. ಪುಣ್ ಆತಾಂ ಕವಿಂಕ್ ಉಣೆಂ ಮಹತ್ವ್ ದಿತಾತ್ ಅಶಿ ಖಂತ್ ಉಗ್ತಾಯ್ಲಿ. ಗೊಂಯ್ಚ್ಯಾ ಇತಿಹಾಸಾಂತ್ ತಶೆಂಚ್ ಸಾಮಾಜಿಕ್ ಚಳುವಳೆಂನಿ ಕವಿಂನಿ ಮಹತ್ವಾಚಿ ಭೂಮಿಕಾ ಉಟಯ್ಲ್ಯಾ ಅಶೆಂ ತಾಂಣಿ ಹ್ಯಾವೆಳಾರ್ ಸಾಂಗ್ಲೆಂ.

ಉಗ್ತೆಂ ಮಳಬ್ ಸಂಸ್ಥ್ಯಾಚೆ ಅಧ್ಯಕ್ಷ್ ಭರತ್ ನಾಯ್ಕ್ ಹಾಂಣೀ ಆಪ್ಲ್ಯಾ ಪ್ರಾಸ್ತಾವಿಕ್ ಉಲೊವ್ಪಾಂತ್ ಉಗ್ತ್ಯಾ ಮಳ್ಬಾಚಿ ಮ್ಹಾಯೆತ್ ದಿಲಿ. ದಾಮೋದರ್ ಘಾಣೇಕಾರ್ ಹಾಂಣಿ ಸುವಾಳ್ಯಾಚೆಂ ಸೂತ್ರ್ ಸಂಚಾಲನ್ ಕೆಲೆಂ.

ಉಗ್ತಾವಣ್ ಸುವಾಳ್ಯಾ ಉಪ್ರಾಂತ್ ಚಲಲ್ಲ್ಯಾ ಕವಿಸಮ್ಮೇಳನಾಂತ್ ಸಭಾರ್ ಕವಿಂನಿ ಆಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ. ಹಾಂತುನ್ ಎನ್. ಶಿವದಾಸ್, ಲಕ್ಷ್ಮಣ್ ಪಿತ್ರೆ, ಯೂಸುಫ್ ಶೇಖ್, ಜೆಸ್ ಫೆರ್ನಾಂಡಿಸ್, ಸಂಜೀವ್ ವೆರೆಂಕಾರ್, ಶೀತಲ್ ಸಾಲ್ಗಾಂವ್ಕಾರ್, ಅಶೋಕ್ ಚೋಡನ್ಕಾರ್, ಪ್ರಕಾಶ್ ಪಾಡ್ಗಾಂವ್ಕಾರ್, ಶ್ರೀನಿಶಾ ನಾಯ್ಕ್ , ನಾಗೇಶ್ ಕರ್ಮಳಿ ಆನಿ ಮೆಲ್ವಿನ್ ರೊಡ್ರಿಗಸ್ ಹಾಂಣೀ ಭಾಗ್ ಘೆತ್ಲೊ.

ತ್ಯಾ ನಂತರ್ ವೆವೆಗ್ಳ್ಯಾ ಕವಿಂಚ್ಯಾ ಅಧ್ಯಕ್ಷಪಣಾಖಾಲ್ ಕವಿಗೋಷ್ಟಿ ಚಲ್ಲ್ಯೊ. ಮಂಗ್ಳುರ್ ಥಾವ್ನ್ ಹಾಜರ್ ಜಾಲ್ಲ್ಯಾ ಮೆಲ್ವಿನಾನ್ ದುಸ್ರ್ಯಾ ದಿಸಾ ಸಕಾಳಿಂ ಸಾಡೆ-ಸ ವೊರಾಂಚೆರ್ ಪಂದ್ರಾ ಮಿನುಟಾಂಭರ್ ಆಪ್ಲೆಂ ಕವಿತಾ ವಾಚನ್ ಕೆಲೆಂ. ವೆವೆಗ್ಳ್ಯಾ ಪ್ರದೇಶಾಂಥಾವ್ನ್ ಆಯಿಲ್ಲ್ಯಾಂಕ್ ಸಭಾಘರಾಂತ್ ರಾವ್ಪಾಚಿ ತಶೆಂ ಜೆವ್ಣಾಚಿ ವ್ಯವಸ್ಥಾ ಕೆಲ್ಲಿ.

ಸಾಂಜೆಚ್ಯಾ ಸಾಡೆಚ್ಯಾರಾಂಕ್ ಸುರು ಜಾಲ್ಲೆಂ ಹೆಂ ಕಾರ್ಯಕ್ರಮ್ ದುಸ್ರ್ಯಾ ದಿಸಾ ಸಾಂಜೆ ಪಾಸುನ್ ಚಲ್ಲೆಂ. ಎಕಾ ಖಿಣಾಕ್ ಚುಕನಾಸ್ತಾಂ ಸರಾಗ್ ಮರಾಠಿ, ಕನ್ನಡ, ಹಿಂದಿ, ಕೊಂಕಣಿ ಆನಿ ಹೆರ್ ಭಾಸಾಂಚ್ಯಾ ಕವಿಂನಿ ಕವಿತಾ ವಾಚನ್ ಕೆಲೆಂ. ಮಧ್ಯಾನೆ ರಾತಿಂ ದೋನ್ ವೊರಾಂಭರ್ ಗಾವ್ಪ್ಯಾಂನಿ ವೆವೆಗ್ಳ್ಯಾ ಕವಿಂಚ್ಯೊ ಕವಿತಾ ಗಾಯಾನಾ ರುಪಿಂ ಸಾದರ್ ಕೆಲ್ಯೊ.

ಸಮಾರೋಪ್ ಕಾರ್ಯಾಕ್ ಮುಕೆಲ್ ಸೈರೆ ಜಾವ್ನ್ ಗೊಂಯ್ ಸಾಹಿತ್ಯ್ ಆಕಾಡೆಮಿಚೆ ಅಧ್ಯಕ್ಷ್ ಪುಂಡಲೀಕ್ ನಾರಾಯನ್ ನಾಯ್ಕ್ ಹಾಜರ್ ಆಸೊನ್, ಅದ್ಯಕ್ಷ್ ಮ್ಹಣೊನ್ ಉದಯ್ ಎಲ್ ಭೆಂಬ್ರೆ ಹಾಜರ್ ಆಸ್ಲೆ.

मनशाच्या खरे जिण्येंतलीं रुपां कवितेंतल्यान हाडचीं: मेलवीन रोड्रिगस

कवितेंत येदोळच हजार पावटीं चाबल्ल्यो गजाली बगलेक दवरून, मनशाचे खरे जिण्येंतलीं रुपां कवितेंत हाडिजाय असो उलो साहित्य अकाडेमी पुरसकारान अलंकृत कवी मेलवीन रोड्रिगसान हांणी सांगलां. ‘उग्तें मळब’ द्वारीं पर्वरिंच्या आझाद भवनांत ह्याच फेबरेराचे ४ आनी ५ तारिकेंनी चलल्ल्या ‘२४ वोरांच्या काव्यजागोर’ काऱ्यक्रमाचें उग्तावण करून तो उलयतालो.

‘हें उग्तें मळब. पर्त्यान हें उग्तावण कर‍्चे तसलें हांतूं कांय ना’ म्हळ्ळ्या मेलविनान, ‘आयचे कवी विषयां खातीर कषटतात. कित्या म्हळ्यार भोंवतणिच्या गजालीं थंय ते दीषट फांकयनांत. घडच्या घडितांक उत्रांद्वारीं धर्न दवरुंकय ते कषटतात. कित्याक म्हळ्यार तांचो जिविताचो अनभोग खंयगी तांकां कमी पडता. आमच्या कविंनी वाचप चड करिजाय, वेगळ्या भासांचें साहित्य वाचिजाय’म्हणोन सांगलें. उग्तें मळब आयोजकांची ताणें ह्या संदर्भार तोखणाय केली. ह्या काऱ्यक्रमाच्या समारोपा वेळार आपल्या जिविताचीं ८० वर्सां संपोंवच्या कवी तशें सुटके झुजारी नागेश बाब कर्मळीक ताणे बरें मागलें.

उग्तावण सुवाळ्याचें अध्यक्ष म्हणोन नागेश कर्मळी आसल्ले. तांणी आपल्या उलोवपांत कविंनी कविता कर‍्ताना पुरसकाराची आशा धर‍्ची न्हय. एका काळार कविंक बरेंच महत्व आसलें. पूण आतां कविंक उणें महत्व दितात अशी खंत उग्तायली. गोंयच्या इतिहासांत तशेंच सामाजीक चळुवळेंनी कविंनी महत्वाची भूमिका उटयल्या अशें तांणी ह्यावेळार सांगलें.

उग्तें मळब संस्थ्याचे अध्यक्ष भरत नायक हांणी आपल्या प्रासतावीक उलोवपांत उग्त्या मळबाची म्हायेत दिली. दामोदर घाणेकार हांणी सुवाळ्याचें सूत्र संचालन केलें.

उग्तावण सुवाळ्या उपरांत चलल्ल्या कविसम्मेळनांत सभार कविंनी आपल्यो कविता सादर केल्यो. हांतून एन. शिवदास, लक्ष्मण पित्रे, यूसूफ शेख, जेस फेर्नांडीस, संजीव वेरेंकार, शीतल साल्गांवकार, अशोक चोडनकार, प्रकाश पाडगांवकार, श्रीनिशा नायक , नागेश कर्मळी आनी मेलवीन रोड्रिगस हांणी भाग घेतलो.

त्या नंतर वेवेगळ्या कविंच्या अध्यक्षपणाखाल कविगोषटी चल्ल्यो. मंगळूर थावन हाजर जाल्ल्या मेलविनान दूसऱ्या दिसा सकाळीं साडे-स वोरांचेर पंद्रा मिनुटांभर आपलें कविता वाचन केलें. वेवेगळ्या प्रदेशांथावन आयिल्ल्यांक सभाघरांत रावपाची तशें जेवणाची व्यवस्था केल्ली.

सांजेच्या साडेच्यारांक सुरू जाल्लें हें काऱ्यक्रम दूसऱ्या दिसा सांजे पासून चल्लें. एका खिणाक चुकनासतां सराग मराठी, कन्नड, हिंदी, कोंकणी आनी हेर भासांच्या कविंनी कविता वाचन केलें. मध्याने रातीं दोन वोरांभर गावप्यांनी वेवेगळ्या कविंच्यो कविता गायाना रुपीं सादर केल्यो.

समारोप काऱ्याक मुकेल सैरे जावन गोंय साहित्य आकाडेमिचे अध्यक्ष पुंडलीक नारायन नायक हाजर आसोन, अद्यक्ष म्हणोन उदय एल भेंबरे हाजर आसले.