ಸಗ್ಳ್ಯೊ ಭಾಸೊ ಸಮಾನ್ ಆಸ್ತಾತ್: ಪಣ್ಜೆ ರಾಷ್ಟ್ರೀಯ್ ಕವಿಗೋಷ್ಟಿಂತ್ ಮಾಧವ್ ಬೋರ್ಕರ್

ಸಗ್ಳ್ಯೊ ಭಾಸೊ ಸಮಾನ್ ಆಸ್ತಾತ್: ಮಾಧವ್ ಬೋರ್ಕರ್

ಖಂಯ್ಚೀಯ್ ಭಾಸ್ ಲ್ಹಾನ್ ವಾ ವ್ಹಡ್ ಆಸನಾ. ಸಗ್ಳ್ಯೊ ಭಾಸೊ ಸಮಾನ್ ಆಸ್ತಾತ್ ಅಶೆಂ ಅಭಿಪ್ರಾಯ್ ಜ್ಯೇಶ್ಠ್ ಸಾಹಿತಿಕ್ ತಶೆಂಚ್ ಸಾಹಿತ್ಯ್ ಅಕಾಡೆಮಿಚೊ ಪುರಸ್ಕಾರ್ ಫಾವೊ ಜಾಲ್ಲೆ ಮಾಧವ್ ಬೋರ್ಕರ್ ಹಾಂಣಿ ಉಗ್ತಾಯ್ಲೆಂ.

ಪಣ್ಜೆ ಇನ್ಸಟಿಟ್ಯೂಟ್ ಮಿನೇಜಸ್ ಬ್ರಗಾಂಜಾ ಸಭಾಘರಾಂತ್ ಸನ್ವಾರಾ ಮಾರ್ಚ್ ತೆವೀಸ್ ತಾರಿಕೆರ್ ಸಾಂಜೆವೆಳಾರ್ ರಾಷ್ಟ್ರೀಯ್ ಬಹುಭಾಷಿಕ್ ಕವಿ ಸಮ್ಮೇಳನ್ ಆಯೋಜಿತ್ ಕೆಲ್ಲ್ಯಾ ಸಂದರ್ಭಾರ್ ಅಧ್ಯಕ್ಷ್ ಮ್ಹಣೊನ್ ತೆ ಉಲಯ್ತಾಲೆ.

ಸಗ್ಳ್ಯೊ ಭಾಸೊ ಸಮಾನ್ ಆಶಿಲ್ಲ್ಯಾನ್ ತಾಂಚೆ ಕಡೆನ್ ಆಪ್ಲ್ಯೊ ಭಾವನಾ ವ್ಯಕ್ತ್ ಕರುಂಕ್ ತಾಂಕ್ ಆಸ್ತಾ ಅಶೆಂ ಶ್ರೀ ಬೋರ್ಕರ್ ಹಾಂಣಿ ಸಾಂಗ್ಲೆಂ. ಹ್ಯಾ ಬಹುಭಾಶಿಕ್ ಕವಿ ಸಮ್ಮೇಳನಾಂತ್ಲ್ಯಾನ್ ದೇಶಾಚಿ ಸಂಸ್ಕೃತಿ ದಿಸುನ್ ಆಯಿಲ್ಲ್ಯಾವಿಶಿಂ ತಾಂಣಿ ಅಭಿಪ್ರಾಯ್ ವ್ಯಕ್ತ್ ಕೆಲಿ.

ಇನ್ಸಟಿಟ್ಯೂಟ್ ಮಿನೇಜಸ್ ಬ್ರಗಾಂಜಾಚೆ ಅಧ್ಯಕ್ಷ್ ಸಂಜಯ್ ಹರ್ಮಲ್ಕಾರ್ ಹಾಂಣಿ ಆಪ್ಲ್ಯಾ ಯೆವ್ಕಾರಾಚ್ಯಾ ಉಲೊವ್ಪಾಂತ್ ಅಸಲ್ಯಾ ಕಾರ್ಯಾವಳಿಂತ್ಲ್ಯಾನ್ ರಾಷ್ಟ್ರೀಯ್ ಎಕಾತ್ಮತಾ ಘಟ್ ಜಾಂವ್ಕ್ ಪಾವ್ತಾ ಅಶೆಂ ಸಾಂಗ್ಲೆಂ. 25 ಜನವರಿಕ್ ಜಾಂವ್ಕ್ ಆಸಲ್ಲಿ ಹಿ ಕಾರ್ಯಾವಳ್ ಕಾಂಯ್ ಕಾರಣಾಂಕ್ ಲಾಗೊನ್ ಪಾಟಿಂ ಪಡಲ್ಲ್ಯಾ ಖಾತೀರ್ ತಾಂಣಿ ಹ್ಯಾ ಸಂದರ್ಭಾರ್ ಮಾಫಿ ಮಾಗ್ಲಿ.

ಸುರ್ವೆಕ್ ಸಂಸ್ಥೆಚೆ ಉಪಾಧ್ಯಕ್ಷ್ ಪುಂಡಲೀಕ್ ರಾವತ್ ದೇಸಾಯ್ ಹಾಂಣಿ ಯೆವ್ಕಾರ್ ದಿಲೊ. ಕಾರ್ಯಾವಳಿಚೆಂ ಸೂತ್ರಸಂಚಾಲನ್ ಸ್ಮಿತಾ ಸಂಜ್‌ಗಿರಿನ್ ಕೆಲೆಂ. ನಿಮಾಣೆಂ ವಾಂಗ್ಡಿ ಗೌರವ್ ಮಾಂದ್ರೆಕಾರ್ ಹಾಂಣಿ ಉಪ್ಕಾರ್ ಮಾಂದ್ಲೆ.

ಹ್ಯಾ ಸಮ್ಮೇಳನಾ ಖಾತೀರ್ ರಾಷ್ಟ್ರೀಯ್ ಪಾಂವ್ಡ್ಯಾ ವಯ್ಲ್ಯಾ ಕವಿಂಕ್ ಆಮಂತ್ರಿತ್ ಕೆಲ್ಲೆಂ. ತಾಂಣಿ ಆಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ. ಹಾಂತುನ್ ಅಶೋಕ್ ಬೋರ್ಕರ್ (ಮರಾಠಿ -ಗೊಂಯ್), ವಿನ್ಸಿ ಪಿಂಟೊ ಆಂಜೆಲೊರ್ (ಕೊಂಕಣಿ - ಮಂಗ್ಳುರ್), ಸಂಜೀವ್ ವೆರೆಂಕಾರ್ (ಕೊಂಕಣಿ - ಗೊಂಯ್), ಉರ್ಮಿಲಾ ಉರ್ಮಿ (ಹಿಂದಿ - ಗುಜ್ರಾಥ್), ವಿಕಾಸ್ ಗಯೆನ್ ಸುವಾಸ್‌ಪಲ್ಲಿ (ಬಂಗಾಲಿ - ಪಶ್ಚಿಮ್ ಬಂಗಾಲ್), ಡೊ ಸಂತೋಷ್ ಶ್ರೀವಾಸ್ತವ್ (ಹಿಂದಿ - ಭೋಪಾಲ್), ರಫೀಕ್ ಜಾಫರ್ (ಉರ್ದು - ಪುಣೆ), ಶೋಭಾ ನಾಯಕ್ (ಕನ್ನಡ - ಬೆಳ್ಗಾಂವ್), ವಿಶನ್‌ಸಿಂಹ್ ಎಫ್ ರಾಜ್‌ಪುರೋಹಿತ್ (ರಾಜಸ್ತಾನಿ - ಮುಂಬಯ್), ಅನಿಲ್ ಚಾವ್ಡಾ (ಗುಜರಾಥಿ - ಗುಜ್ರಾತ್) ಆನಿ ದಾದಾ ಮಡ್ಕಯ್ಕಾರ್ (ಮರಾಠಿ - ಮಹಾರಾಷ್ಟ್ರ್) ಹಾಂಚೊ ಆಸ್ಪಾವ್ ಆಸ್ಲೊ.