ಮಾಧವಿ ಖಾತೀರ್, ದುಖಾನ್, ಪುಣ್ ಫುಡೆಂ ಸರುಂಕ್ ಗರ್ಜ್ ಆಸ್ಚ್ಯಾ ಧೈರಾನ್.
ದೀಗಾ ಮ್ಹಜಿ ಮಿಟಾ ಕಣ್
ತುಜ್ಯಾ ಉದ್ಕಾಂತ್ ಖಿರ್ಲ್ಯಾ
ನಿರಾಸ್ ಜಾಲ್ಯಾ ಮ್ಹಜಿ ಜೀಣ್
ಪೆಜ್ ಅಳ್ಣಿ ಉರ್ಲ್ಯಾ
ಚಾ.ಫ್ರಾ. ದೆಕೊಸ್ತಾಚ್ಯೊ ಹ್ಯೊ ಕವಿತೆಚ್ಯೊ ವೊಳಿ, ಮಾಧವಿಚ್ಯಾ ಮರ್ಣಾಂತ್ ಆಮಿ ಸಮಸ್ತ್ ಕೊಂಕ್ಣಿ ಲೊಕಾಂನಿ ಆಪ್ಣಾಯ್ಜಾಯ್ ಜಾಲ್ಲ್ಯೊ. ಮಾಧವಿ ನಾಂವಾಚಿ ಮಿಟಾ ಕಣ್, ಕೊಂಕಣಿಚ್ಯಾ ದರ್ಯಾಂತ್ ಆಯ್ಜ್ ನೀಜ್ ಜಾವ್ನ್ ಖಿರುನ್ ಗೆಲ್ಯಾ. ತಿ ಕೊಂಕಣಿಚ್ಯಾ ಸಾಗೊರಾಂತ್ ಸಗ್ಳ್ಯಾಂನುಯ್ ಆಸುನ್ ಫಕತ್ 'ಕಣ್' ರುಪಾರ್ ಆಮ್ಕಾಂ ಮೆಳನಾ ಜಾಲ್ಯಾ.
ಮಾಧವಿ ಖರ್ಯಾನ್ ಮ್ಹಜಿ ಮೊಗಾಳಿ ಭಯ್ಣ್. ಪ್ರಾಯೆನ್ ಮ್ಹಜ್ಯಾ ಪರಸ್ ಏಕ್ ದೀಸ್ ವ್ಹಡ್. ಪುಣ್ ಕೊಂಕಣಿಚೆ ದಿಷ್ಟಿನ್ ಮ್ಹಜ್ಯಾ ಪರಸ್ ಹಜಾರ್ ವರ್ಸಾಂ ವ್ಹಡ್. ಆಯ್ಚ್ಯಾ ದಿಸಾ ತಿಚೆವಿಶಿಂ ಚಾರ್ ಫಾವ್ಟ್ ಹಾಂವ್ ಬರೊಂವ್ಕ್ ಬಸ್ಲೊಂ. ಪುಣ್ ಮ್ಹಜ್ಯಾ ದುಕಾಂನಿ ತಿಚೆಂ ಮರಣ್ ಉತ್ರಾಂವ್ಕ್ ಮ್ಹಾಕಾ ಸೊಡ್ಲೆಂನಾ. ತಾಂಕಾಂಯ್ ಹೆಂ ಕಾಮ್ ಕಠಿಣ್ ಮ್ಹಣ್ ಭೊಗ್ಲಾಂ ಆಸುಂಯೆತ್.
ಪ್ರಥ್ವಿ ವಯ್ಲ್ಯಾ ಪವಿತ್ರ್ ವಾರ್ಯಾಂನೊ, ಮಾಧವಿಚೊ ಆತ್ಮೊ ಸಾಂಬಾಳುನ್ ಧರಾ. ರುಕಾಂ ವಯ್ಲ್ಯಾ ತರ್ನ್ಯಾ ಖೊಲ್ಯಾಂನೊ ಮಾಧವಿಚೊ ಆತ್ಮೊ ತುಮ್ಚೆ ಕುಶೀನ್ ವ್ಹಾಳುನ್ ಆಯ್ಲೊ ತೆನ್ನಾಂ ತಾಕಾ ಮೊಗಾನ್ ಪೊಶೆಯಾ. ಆಮ್ಕಾಂ ತೊ ಜಾಯ್. ಕೊಂಕಣೀಕ್ ತೊ ಜಾಯ್. ಆಮ್ಕಾಂ ಸದಾಂಕಾಳ್ ಪ್ರೇರಣೆಚಿ, ಹುಮೆದಿಚಿ ಸಕತ್ ತೊ ಜಾಂವ್ - ಹೆಂಚ್ ಮ್ಹಜೆಂ ಪ್ರಾರ್ಥನ್.
ಮಾಧವಿ ಆನಿ ಮ್ಹಜೆ ವೊಳ್ಕೀಚ್ಯಾ ಕಾಳಾಂತ್ ಜಾಯ್ತ್ಯೊ ಸುಮಧುರ್ ಯಾದಿ ಹಾಂವೆಂ ಫಿಛಾರ್ ಕರುನ್ ದವರ್ಲ್ಯಾತ್. ತ್ಯೊ ಹೆ ಘಡ್ಯೆ ಗರ್ಜೆಚ್ಯೊ ನ್ಹಯ್ ತರುಯ್, ಮ್ಹಜ್ಯಾ ಜಿವಿತಾಂತ್ ಹಾಂವ್ ತ್ಯೊ ಸಾಂಬಾಳುನ್ ದವರ್ತಲೊಂ. ಕೊಂಕಣಿಚ್ಯಾ ಫುಡಾರಾಂತ್ಲೆ ಪಿಳ್ಗೆಕ್ ಮಾಧವಿ ಮ್ಹಳ್ಳ್ಯಾ ಮಿಟಾ ಕಣಾಚಿ ವ್ಹಡ್ವಿಕ್ ಗಾಜ್ತಲೊಂ.
ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನ್, ಕೊಂಕ್ಣಿ ಭಾಷಾ ಮಂಡಳ್ ಕರ್ನಾಟಕ್ ತಶೆಂ ಕವಿತಾ ಟ್ರಸ್ಟ್ ನಾಂವಾರ್ ಆಯ್ಚೆ ದುಖಾಳ್ ಸಾಂಜೆರ್ ವಿಶ್ವ್ ಕೊಂಕ್ಣಿ ಕೇಂದ್ರಾಂತ್ ಮಾಧವಿವಿಶಿಂ ಆಮಿ ಉಲಯ್ಲ್ಯಾಂವ್. ಬಸ್ತಿ ಮಾಮ್, ಗುರು ಬಾಳಿಗಾ, ಗೀತಾ ಶೆಣೊಯ್ ಆನಿ ಹಾಂವೆಂ, ಹೆರಾಂ ಬರಾಬರ್ ತಿಚ್ಯಾ ಆತ್ಮ್ಯಾಕ್ ಶಾಂತಿ ಮೆಳ್ಚ್ಯಾಕ್ ಪ್ರಾರ್ಥನ್ ಕೆಲೆಂ.
ಮಾಧವಿಚೆಂ ಕುಟುಂಬ್ ಆನಿ ಸಮಸ್ತ್ ಕೊಂಕ್ಣಿ ಸಮಾಜಾಚ್ಯಾ ದುಖಾಂತ್ ಆಮಿಂಯ್ ಭಾಗೆಲಿ ಆಸಾಂವ್.
-ಮೆಲ್ವಿನ್ ರೊಡ್ರಿಗಸ್
ಅಧ್ಯಕ್ಷ್, ಕವಿತಾ ಟ್ರಸ್ಟ್
माधवी खातीर, दुखान, पुण फुडें सरूंक गर्ज आसच्या धैरान.
दीगा म्हजी मिटा कण
तुज्या उदकांत खिरल्या
निरास जाल्या म्हजी जीण
पेज अळणी उरल्या
चा.फ्रा. देकोस्ताच्यो ह्यो कवितेच्यो वोळी, माधवीच्या मरणांत आमी समस्त कोंकणी लोकांनी आपणायजाय जाल्ल्यो. माधवी नांवाची मिटा कण, कोंकणीच्या दर्यांत आयज नीज जावन खिरून गेल्या. ती कोंकणीच्या सागोरांत सगळ्यांनूय आसून फकत 'कण' रुपार आमकां मेळना जाल्या.
माधवी खऱ्यान म्हजी मोगाळी भयण. प्रायेन म्हज्या परस एक दीस व्हड. पुण कोंकणीचे दिष्टीन म्हज्या परस हजार वरसां व्हड. आयच्या दिसा तिचेविशीं चार फावट हांव बरोंवक बसलों. पुण म्हज्या दुकांनी तिचें मरण उतरांवक म्हाका सोडलेंना. तांकांय हें काम कठिण म्हण भोगलां आसुंयेत.
प्रथ्वी वयल्या पवित्र वाऱ्यांनो, माधवीचो आत्मो सांबाळून धरा. रुकां वयल्या तरन्या खोल्यांनो माधवीचो आत्मो तुमचे कुशीन व्हाळून आयलो तेन्नां ताका मोगान पोशेया. आमकां तो जाय. कोंकणीक तो जाय. आमकां सदांकाळ प्रेरणेची, हुमेदिची सकत तो जांव - हेंच म्हजें प्रार्थन.
माधवी आनी म्हजे वोळकीच्या काळांत जायत्यो सुमधूर यादी हांवें फिछार करून दवरल्यात. त्यो हे घडये गरजेच्यो न्हय तरूय, म्हज्या जिवितांत हांव त्यो सांबाळून दवरतलों. कोंकणीच्या फुडारांतले पिळगेक माधवी म्हळ्ळ्या मिटा कणाची व्हडवीक गाजतलों.
कोंकणी भास आनी संस्कृती प्रतिष्ठाण, कोंकणी भाषा मंडळ कर्नाटक तशें कवित ट्रस्ट नांवार आयचे दुखाळ सांजेर विश्व कोंकणी केंद्रांत माधवीविशीं आमी उलयल्यांव. बस्ती माम, गुरू बाळीगा, गीता शेणोय आनी हांवें, हेरां बराबर तिच्या आतम्याक शांती मेळच्याक प्रार्थन केलें.
माधवीचें कुटुंब आनी समस्त कोंकणी समाजाच्या दुखांत आमींय भागेली आसांव.
-मेल्विन रोड्रीगस
अध्यक्ष, कविता ट्रस्ट