ಸಂಪಾದಕೀಯ್:

ಜೆಜುನ್ ಸೊಸಲ್ಲೆ ದುಖಿಂಕ್ ಮಿಕ್ವಲ್ಲಿ ದೂಖ್

ಸಮಕಾಳೀನ್ ಅರೆಬಿಕ್ ಕವಿಂ ಮಧೆಂ ದಶೆಂಬರ್ 8, 1978 ವರ್ಸಾ ಜಲ್ಮಲ್ಲ್ಯಾ ಪಾಲೆಸ್ತೀನಿ ಕವಿ ನಜ್ವಾನ್ ದಾರ್ವಿಶಾಕ್ ಉಂಚ್ಲೆಂ ಸ್ಥಾನ್ ಆಸಾ. ತಾಚಿಂ ಕವಿತೆಚಿಂ ಪುಸ್ತಕಾಂ ಸಂಸಾರಾಚ್ಯಾ ವಿಸಾಂಕ್ ಮಿಕ್ವುನ್ ಭಾಸಾಂನಿ ಅನುವಾದ್ ಜಾವ್ನ್ ಪರ್ಗಟ್ ಜಾಲ್ಯಾಂತ್ ಆನಿ ತಾಕಾ ತಾಚ್ಯೊ ಕವಿತಾ ಸಾದರ್ ಕರುಂಕ್ ವೆವೆಗ್ಳ್ಯಾ ದೇಶಾಂ ಥಾವ್ನ್ ವೊವ್ಳಿಗ್ ಯೆತಾ.

ಥೊಡ್ಯಾಂ ಮ್ಹಯ್ನ್ಯಾಂ ಆದಿಂ ತೊ ಮಂಗ್ಳುರ್ ಪಾವಲ್ಲೊ. ತಾಚೆಂ ಏಕ್ ಪುಸ್ತಕ್ ಅರೆಬಿಕ್ ಭಾಶೆಥಾವ್ನ್ ಇಂಗ್ಲಿಷ್ ಅನುವಾದಾಚ್ಯೆ ಮಜತೆನ್ ಆಮ್ಚೊಚ್ ಕಿಶೂ ಬಾರ್ಕುರ್ ಪಾಟ್ಲ್ಯಾ ಎಕಾ ವರ್ಸಾ ಥಾವ್ನ್ ಕೊಂಕಣಿಕ್ ಅನುವಾದ್ ಕರುನ್ ಆಸಾ ಆನಿ ಆಮಿ ಮಂಗ್ಳುರ್‌ಗಾರಾಂನಿ ಯೆದೊಳ್ ದೆಖನಾತಲ್ಲೊ ಸಂಸಾರ್ ಉಗ್ತೊ ಕರ್‌ಚ್ಯಾರ್ ಆಸಾ.

’ಲಾಚಾರ್ ಜಾಲಾ, ಖುರ್ಸಾರ್’ ಕವಿತೆಂತ್ ಮನ್ಶಾಕುಳಾಚಿ ದೂಖ್ ಜೆಜುನ್ ಸೊಸಲ್ಲೆ ದುಖಿಂಕ್ ಮಿಕ್ವುನ್ ವಯ್ರ್ ಸರ‍್ತಾ. ಜೆಜುನ್ ಸೊಸಲ್ಲಿ ಖುರ್ಸಾವಯ್ಲಿ ದೂಖ್ ಎಕಾ ದಿಸಾಚಿ. ಪುಣ್ ದರೆಕಾ ಪಾಲೆಸ್ತೀನಿಂಚ್ಯಾ ಜಿವಿತಾಂತ್ ದರೆಕಾ ಫಾಂತ್ಯಾರ್ ಏಕ್ ನವೊ ಖುರಿಸ್ ಉಬೊ ಜಾತಾ. ಮನ್ಶಾಕುಳಾಚಿ ಸೊಡ್ವಣ್ ಕರುಂಕ್ ದೆಂವಲ್ಲೊ ಕ್ರೀಸ್ತ್ ಸರೊನ್ ಸಾಸ್ರ್ ಸಾಸ್ರ್ ವರ್ಸಾಂ ಸೊಂಪ್ಲಿಂ - ದುಬ್ಳ್ಯಾಂಕ್ ದಲಿತಾಂಕ್, ದಣ್ಸಲ್ಲ್ಯಾಂಕ್ ಸಾಸ್ಣಾಕ್ ಖುರ್ಸಾರ್ ಲಾಚಾರ್ ಜಾಂವ್ಕ್ ಸೊಡುನ್ - ಮ್ಹಳ್ಳೆಂ ಥಾಪಡ್ ಹಿ ಕವಿತಾ ಮಾರ‍್ತಾ.

ಕಿಶೂ ಬಾರ್ಕುರಾನ್ ಏಕ್ ಉತ್ತೀಮ್ ಕವಿತಾ ಕೊಂಕ್ಣಿಕ್ ದಿಲ್ಯಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಲಾಚಾರ್ ಜಾಲಾ, ಖುರ್ಸಾರ್

ಉಮ್ಕಳ್ತಲೆ
ಥಕ್ಲ್ಯಾತ್,
ದೆಕುನ್ ಸಕಯ್ಲ್ ದೆಂವಯ್ ಆಮ್ಕಾಂ,
ಆನಿ ದಿ ಇಲ್ಲಸೊ ವಿಶೆವ್ ಆಮ್ಕಾಂ.

ಆಮಿ ಚರಿತ್ರೆಂಕ್ ಆಮ್ಚ್ಯಾ ಪಾಟ್ಲ್ಯಾನ್ ವೋಡ್ನ್ ಹಾಡ್ತಾಂವ್.
ಹಾಂಗಾಸರ್, ಜಂಯ್
ನಾ ಮಳಬ್, ನಾ ಭುಂಯ್.

ಸೊಮ್ಯಾ,
ಪಾಜ್ ತುಜಿ ತಲ್ವಾರ್
ಆನಿ ದಿ ತುಜ್ಯಾ ಸಾಕ್ರಿಫಿಸಾಕ್ ತಾಚೊ ವಿಶೆವ್.

*****

ತುಕಾ ನಾತಲ್ಲಿಂ ಆವಯ್ ಯಾ ಬಾಪಯ್
ಆನಿ ತುಂವೆಂ ಕೆನ್ನಾಂಯ್
ತುಜ್ಯಾ ಭಾವಾಂಕ್ ಪಳೆಂವ್ಕಚ್ ನಾಂಯ್
ಉಮ್ಕಳ್ಚೆಂ,
ಫಾಂತ್ಯಾಚ್ಯಾ ಶೀತಳ್ ದಾವ್ಲ್ಯಾಂಥಾವ್ನ್.

ತುಂವೆಂ ಕೊಣಾಯ್ಚೊ ಮೋಗ್ ಕೆಲ್ಲೊ ನಾ
ಆನಿ ಕೊಣಿಂಯ್ ಕೆನ್ನಾಂಯ್ ತುಕಾ ಸೊಡ್ನ್ ಘಾಲ್ಲೆಂನಾ
ಆನಿ ಮರಣ್ ಕೆನ್ನಾಂಯ್ ತುಜ್ಯಾ ಹಾತಾಂತುನ್ ಜೆವ್ಲೆಂನಾ.
ತುಕಾ ಆಮ್ಚೆಂ ದೂಖ್ ಕಳನಾ.

*****

ಹಾಂವ್ ದಾವಿದ್ ರಾಯ್ ನ್ಹಯ್-
ಪಾತ್ಕಾಂ ಉಪ್ರಾಂತ್
ಪಶ್ಚಾತಾಪಾಚ್ಯಾ ದಾರ್ವಟ್ಯಾಚೆರ್ ಬಸುನ್
ತುಕಾ ವಿಳಾಪಾಚಿಂ ಕೀರ್ತನಾಂ ಹಾಂವ್ ಗಾಂವ್ಚೊನಾ.

*****

ಮ್ಹಾಕಾ ಸಕಯ್ಲ್ ದೆಂವಯ್,
ಮ್ಹಜೊ ವಿಶೆವ್ ಘೆಂವ್ಕ್ ಸೊಡ್.

-ಅರೆಬಿಕ್ ಮೂಳ್: ನಜ್ವಾನ್ ದಾರ್ವಿಶ್
ಕೊಂಕ್ಣಿಕ್: ಕಿಶೂ, ಬಾರ್ಕುರ್

संपादकीय:

जेजून सोसल्ले दुखींक मिकवल्ली दूख

समकाळीन अरेबीक कवीं मधें दशेंबर 8, 1978 वर्सा जल्मल्ल्या पालेस्तीनी कवी नजवान दार्विशाक उंचलें स्थान आसा. ताचीं कवितेचीं पुस्तकां संवसाराच्या विसांक मिकवून भासांनी अनुवाद जावन पर्गट जाल्यांत आनी ताका ताच्यो कविता सादर करुंक वेवेगळ्या देशां थावन वोवळीग येता.

थोड्यां म्हयन्यां आदीं तो मंगळूर पावल्लो. ताचें एक पुस्तक अरेबीक भाशेथावन इंगलीष अनुवादाच्ये मजतेन आमचोच किशू बार्कूर फाटल्या एका वर्सा थावन कोंकणीक अनुवाद करून आसा आनी आमी मंगळूर‌गारांनी येदोळ देखनातल्लो संवसार उगतो कर‌च्यार आसा.

’लाचार जाला, खुर्सार’ कवितेंत मनशाकुळाची दूख जेजून सोसल्ले दुखींक मिकवून वयर सरता. जेजून सोसल्ली खुर्सावयली दूख एका दिसाची. पूण दरेका पालेस्तीनींच्या जिवितांत दरेका फांत्यार एक नवो खुरीस उबो जाता. मनशाकुळाची सोडवण करुंक देंवल्लो क्रीस्त सरोन सास्र सास्र वर्सां सोंपलीं - दुबळ्यांक दलितांक, दणसल्ल्यांक सासणाक खुर्सार लाचार जावंक सोडून - म्हळ्ळें थापड ही कविता मारता.

किशू बार्कुरान एक उत्तीम कविता कोंकणीक दिल्या.

-मेल्विन रोड्रीगस

कविता:

लाचार जाला, खुर्सार

उमकळतले
थकल्यात,
देकून सकयल देंवय आमकां,
आनी दी इल्लसो विशेव आमकां.

आमी चरित्रेंक आमच्या फाटल्यान वोडन हाडतांव.
हांगासर, जंय
ना मळब, ना भुंय.

सोम्या,
पाज तुजी तलवार
आनी दी तुज्या साक्रीफिसाक ताचो विशेव.

*****

तुका नातल्लीं आवय या बापय
आनी तुंवें केन्नांय
तुज्या भावांक पळेंवकच नांय
उमकळचें,
फांत्याच्या शीतळ दावल्यांथावन.

तुंवें कोणायचो मोग केल्लो ना
आनी कोणींय केन्नांय तुका सोडन घाल्लेंना
आनी मरण केन्नांय तुज्या हातांतून जेवलेंना.
तुका आमचें दूख कळना.

*****

हांव दावीद राय न्हय-
पात्कां उपरांत
पश्चातापाच्या दार्वट्याचेर बसून
तुका विळापाचीं कीर्तनां हांव गांवचोना.

*****

म्हाका सकयल देंवय,
म्हजो विशेव घेवंक सोड.

-अरेबीक मूळ: नज्वान दार्वीश
कोंकणीक: किशू, बार्कूर