ಬಾಕಿಬಾಬಾಚ್ಯಾ ಕಾವ್ಯಾಂತ್ಲೊ ಪ್ರತಿರೋಧಿ ಆನಿ ಉಪರೋಧಿ ಸ್ವರ್ - 3
- ರಾಜಯ್ ಪವಾರ್
(ಭಾರತ್ ಭುಂಯ್ಚೆರ್ ಜಲ್ಮೊನ್ ಗೆಲ್ಲೊ ಉಂಚ್ಲೊ ಕವಿ ಬಾಕಿಬಾಬ್ ಬೋರ್ಕರಾಚಿ ಜಲ್ಮಶತಾಬ್ದಿ ಆದ್ಲ್ಯಾ ವರ್ಸಾಚ್ಯಾ ನವೆಂಬ್ರಾಂತ್ ಸುರು ಜಾಲ್ಲಿ. ಆಂವ್ದುಂ ನವೆಂಬ್ರಾ ಪಾಸುನ್ ತಿ ಮುಕಾರ್ ವೆತಲಿ. ಹೊ ಉತ್ಸವ್ ಗೊಂಯಾಂತ್ ಮಾತ್ರ್ ನ್ಹಯ್, ಆಯ್ಲೆವಾರ್ ಮಂಗ್ಳುರಾಂತಯ್ ಚಲ್ಲೊ. ಕವಿತಾ ಟ್ರಸ್ಟಾನ್ ವಿಶ್ವ ಕೊಂಕಣಿ ಕೇಂದ್ರ್ ಹಾಂಚೆ ಸಾಂಗಾತಾ ಮೆಳೊನ್ ಎಕಾ ದಿಸಾಚೆಂ ಕಾರ್ಯೆಂ ಜೂನ್ ಮ್ಹಯ್ನ್ಯಾಚೆ ತೆರಾ ತಾರಿಕೆರ್ ಘಡೊವ್ನ್ ಹಾಡಲ್ಲೆಂ. ತ್ಯಾ ಸಂದರ್ಭಾರ್ ಪ್ರೊ. ನಾರಾಯಣ್ ದೇಸಾಯಿ ಹಾಚ್ಯಾ ಅಧ್ಯಕ್ಷಪಣಾಖಾಲ್ ಜೆಂ ವಿಚಾರ್ ಸಾತೆಂ ಚಲಲ್ಲೆಂ, ತ್ಯಾ ಸಂದರ್ಭಾರ್ ಗೊಂಯಾಂ ಥಾವ್ನ್ ಆಯಿಲ್ಲ್ಯಾ ದೊಗಾಂನಿ ಆಪ್ಲೆ ಪ್ರಬಂಧ್ ಮಾಂಡಲ್ಲೆ. ತ್ಯಾ ಪಯ್ಕಿ ರಾಜಯ್ ಪವಾರಾಚೊ ಪ್ರಬಂಧ್ ಕಂತಾಂ ಕಂತಾಂನಿ ಹಾಂಗಾಸರ್ ಪರ್ಗಟ್ ಕರ್ತಾಂವ್ - ಸಂಪಾದಕ್)
ಬಾಕಿಬಾಬಾನ್ ಜರೀ ಮರಾಠಿಂತ್ಲ್ಯಾನ್ ಖೂಪ್ ಚಡ್ ಪ್ರಮಾಣಾಂತ್ ಕಾವ್ಯಸೆವಾ ಕೆಲ್ಲಿ ಆಸ್ಲಿ ತರೀ ತಾಂಣಿ ಆಪ್ಲೆ ಆವಯ್ಭಾಶೆಕ್ (ಕೊಂಕಣಿಕ್) ಮಾತ್ ಕೆನ್ನಾಚ್ ಉಣಾಕ್ ಲೆಖ್ಲಿ ನಾ. ಭಾಶಾವಾದಾಚ್ಯಾ ಕಾಳಾರ್ ತೆ ಉಕ್ತೆಪಣಾನ್ ಕೊಂಕಣಿಚೆ ವಾಟೆನ್ ಉಬೆ ರಾವ್ಲೆ. ಮಹಾರಾಷ್ಟ್ರಾಂತ್ ತಾಂಕಾಂ ಜಾಯ್ತಿ ನಾಮ್ಣಾ ಫಾವೊ ಜಾಲ್ಲಿ ತರೀ ಗೊಂಯ್-ಮಹಾರಾಷ್ಟ್ರ್ ವಿಲೀನಕರಣಾಚ್ಯಾ ಪ್ರಸ್ನಾವೆಳಾರ್ ತಾಂಣಿ ಕಸಲ್ಯಾಯ್ ಹಾಂಯ್ಸಾಕ್ ಯಾ ದಬಾವಾಕ್ ಬಳಿ ಪಡನಾಸ್ತಾನಾ `ಗೊಂಯ್ ಹೆಂ ವೆಗ್ಳೆಂ ರಾಜ್ಯ್ ಆನಿ ಮಹಾರಾಷ್ಟ್ರಾಚೊ ತೊ ನಿಖಾಲಸ್ ವಾಂಟೊ ನ್ಹಯ್' ಅಶೆಂ ಸ್ಪಷ್ಟ್ ಮತ್ ಮಾಂಡ್ಲೆಂ. ತೆ ಖಾತೀರ್ ತಾಂಕಾಂ ಮಹಾರಾಷ್ಟ್ರವಾದಿ ಆನಿ ಮರಾಠಿವಾದಿ ಸಮರ್ಥಕಾಂ ಕಡ್ಲ್ಯಾನ್ ಜಾಯ್ತಿಂ ವಾಯ್ಟ್ ಉತ್ರಾಂ ಆಯ್ಕುಂಚಿಂ ಪಡ್ಲಿಂ. ಭಾಶಾವಾದಾಚ್ಯಾ ಕಾಳಾರೂಚ್ ತಾಂಣಿ ಉಕ್ತೆಪಣಾನ್ ಆಪ್ಲೆಂ ಮತ್ ಮಾಂಡ್ಲೆಂ. ಕೊಂಕಣಿಕ್ ಮರಾಠಿ ಭಾಶೆಚಿ ಬೋಲಿ ಮ್ಹಣ್ಚಿ ಮ್ಹಣ್ ತಾಂಚೆರ್ ಚೆಪಣ್ ಆಯ್ಲೆಂ, ತ್ಯಾ ಬದ್ಲ್ಯಾಂತ್ ತಾಂಕಾಂ ಅಖಿಲ್ ಭಾರತೀಯ್ ಮರಾಠಿ ಸಾಹಿತ್ಯ್ ಸಮ್ಮೇಳನಾಚೆಂ ಅಧ್ಯಕ್ಷಪದ್ ದಿವ್ಪಾಚೊ ಪ್ರಸ್ತಾವ್ ಆಯ್ಲೊ. ಸ್ವತಾ ತರ್ಕತೀರ್ಥ್ ಲಕ್ಷ್ಮಣ್ಶಾಸ್ತ್ರಿ ಜೋಶಿ ಹೊ ಪ್ರಸ್ತಾವ್ ಘೆವ್ನ್ ಆಯಿಲ್ಲೆ. `ಬೋರ್ಕರ್, ತುಮಿ ಪ್ರತಿಭಾವಂತ್ ಆಸಾತ್. ಹೊ ಪ್ರಸ್ತಾವ್ ತುಮಿ ಸ್ವೀಕಾರ್ಲೊ ಜಾಲ್ಯಾರ್ ತುಮ್ಚೊ ಯೋಗ್ಯ್ ತೊ ಗೌರವ್ ಕರ್ತಲೆ' ಅಶೆಂ ತಾಂಣಿ ಸಾಂಗ್ತಾಕೀಚ್ ಬಾಕಿಬಾಬಾನ್ ಸಂಯಮಾನ್ ತಾಚೊ ಪ್ರತಿರೋಧ್ ಕೆಲೊ. 29 ಆನಿ 30 ಡಿಸೆಂಬರ್ 1962 ಹ್ಯಾ ದಿಸಾಂನಿ ಗೊಂಯಾಂತ್ (ಪಣ್ಜೆ) ಗೋಮಾಂತಕ್ ಮರಾಠಿ ಸಾಹಿತ್ಯ್ ಸಮ್ಮೇಳನಾಚೆ 11ವೆಂ ಅಧಿವೇಶನ್ ಘಡೊವ್ನ್ ಹಾಡಿಲ್ಲೆಂ. ತಾಂತುಂತ್ ನಾ. ಗ. ಗೋರೆ, ಅಚಾರ್ಯ್ ಅತ್ರೆ ಹಾಂಚೊ ಆಮಂತ್ರಿತ್ ಮ್ಹಣ್ ಆಸ್ಪಾವ್ ಆಶಿಲ್ಲೊ. ದುಸ್ರ್ಯಾ ದಿಸಾ ಆಚಾರ್ಯ್ ಪ್ರ. ಕೆ. ಅತ್ರೆ ಹಾಂಚೆಂ ಉಲೊವ್ಪ್ ಜಾಲೆಂ. ತ್ಯಾ ವೆಳಾರ್ ತಾಂಣಿ ಬಾಕಿಬಾಬಾಂಕ್ ಪಳಯ್ನಾಫುಡೆಂ ಮ್ಹಳೆಂ, `ಸ್ವತಂತ್ರ್ ಆಣಿ ಕೊಂಕಣಿಚ್ಯಾ ಉದೊ ಉದೊ ಕರ್ನಾರ್ಯಾ ಯ ಬೋರ್ಕರಾನಾ ನಾಂವಾರುಪಾಸ್ ಆಣ್ಲೆ ಮರಾಠಿನೆ ವ ಮಹಾರಾಷ್ಟ್ರಾನೆ, ಯಾಚಿ ತ್ಯಾಂನಾ ಸ್ಮೃತಿ ನಾಹಿ. ತ್ಯಾಂಚ್ಯಾ ಕಾವ್ಯಾಚೆ, ಕಥಾಸಂಗ್ರಹಾಂಚೆ, ಸಾಹಿತ್ಯಾಚೆ ಕೌತುಕ್ ಕೆಲೆ ಮರಾಠಿನೆ. ಪುರಸ್ಕಾರ್ ದಿಲೆ , ಪದಕೆ ಬಹಾಲ್ ಕೆಲಿ, ಬಕ್ಷೀಸೆ ದಿಲಿ, ವೇಳೊವೆಳಿ ಪ್ರಸಿದ್ಧಿ ದಿಲಿ ಮಹಾರಾಷ್ಟ್ರಾನೆ ಆಣಿ ಅಭಿಮಾನ್ ತೆವ್ಡಾ ಕೊಂಕಣಿಚ್ಯಾ! ಬೋರ್ಕರಾಂಚಿ ಸಗ್ಳಿ ಮರಾಠಿ ಪುಸ್ತಕೆಂ ಪರತ್ ಕರಾ, ಮಜಕಡೆ ಆಣಾ. ಪರ್ತಿಚ್ಯಾ ಪುಸ್ತಕಾಂಚೆ ಸಾರೆ ಪೈಸೆ ಮೀ ದೆತೊ. ಮಿ ಶಿವಾಜಿ ಪಾರ್ಕ್ವರ್ ಬೋರ್ಕರಾಂಚ್ಯಾ ಪುಸ್ತಕಾಂಚಿ ಹೋಳಿ ಕರ್ಣಾರ್!' ಬಾಕಿಬಾಬಾಂಚ್ಯಾ ಭುಂಯ್ ಆನಿ ಭಾಷೆವಿಶಿಂಚ್ಯಾ ಸ್ವಾಭಿಮಾನಾಕ್ ಲಾಗುನ್ ತಾಂಕಾಂ ಮರಾಠಿ ಸಾಹಿತ್ಯಕಾಂನಿ ರಾಜಕಾರಣ್ ಕರುನ್ ಜ್ಞಾನಪೀಠಸಾರ್ಕ್ಯಾ ಪುರಸ್ಕಾರಾಕಡ್ಲ್ಯಾನ್ ಪಯ್ಸ್ ದವರ್ಲೊ. ಪುಣ್ ತಾಂಣಿ ತಾಚಿ ಕೆನ್ನಾ ಪರ್ವಾಯ್ ಕೆಲಿ ನಾ ಆನಿ ಖಂತೂಯ್ ಬಾಳ್ಗಿಲಿ ನಾ. ಫಾ. ಮೋವುಜೀನ್ಯು ಆತಾಈದ್ ಮ್ಹಣ್ತಾತ್, `...ಬಾಕಿಬಾಬಾಂಕ್ ಕಾಂಯ್ ಉಣೆಂ ಜಾಂವ್ಕ್ ನಾ, ದುರ್ಬಳ್ ಜಾಲೆಂ ತೆಂ ಜ್ಞಾನಪೀಠ್.' ಅತ್ರ್ಯಾಂಚ್ಯಾ ತ್ಯಾ ಭಾಷಣಾ ಉಪ್ರಾಂತ್ `ಗೋಮಂತಕ್'ಚೆ ತೆನ್ನಾಚೆ ಸಹಸಂಪಾದಕ್ ವಿ ಗ ದೇಶಪಾಂಡೆ ಹಾಂಣಿ ಬೋರ್ಕರಾಂಚಿ ಪ್ರತಿಕ್ರಿಯಾ ವಿಚಾರ್ಲಿ ತೆನ್ನಾಂ ಬಾಕಿಬಾಬಾನ್ ಆಂಗಾನ್ ಪ್ರತಿರೋಧ್ ಕರೀತ್ ಮ್ಹಳೆಂ, `ದೇಶ್ಪಾಂಡೆ, ತುಕಾರಾಮಾಚೆ ಅಭಂಗ್ ಬುಡ್ವಲೆ ಗೆಲೆ ಪಣ್ ತೆ ಬುಡಾಲೆ ನಾಹೀತ್, ತೆ ತರ್ಲೆ. ಹಿ ಮಹಾರಾಷ್ಟ್ರಾಚಿ ಪರಂಪರಾ ಆಹೆ. ತ್ಯಾಮುಳೆ ಅತ್ರೆ ಮಾಝಿ ಪುಸ್ತಕೆ ಜಾಳ್ಣಾರ್ ಯಾಚಿ ಮಲಾ ಚಿಂತಾ ನಾಹಿ. ಕಧಿ ಹೋಳಿ ಕರ್ಣಾರ್ ತೆ ಸಾಂಗಾ. ಮಿ ಸ್ವತಾ ಯೇವ್ನ್ ಕಾಡಿ ಲಾವೀನ್.' ಬಾಕಿಬಾಬಾಚೆ ಕವಿತೆಂತ್ಲ್ಯಾ ಅಶೆತರೆಚ್ಯಾ ಪ್ರತಿರೋಧಾಕ್ ಸ್ವರಾಚೆಂ ಮಹತ್ವ್ ಜಾಣೂನ್ ಘೆವ್ನ್ ರಮೇಶ್ ವೆಳುಸ್ಕಾರ್ ಮ್ಹಣ್ತಾತ್, `... ಭಾಶೀಕ್ ಸ್ವಾತಂತ್ರ್ಯಾಚೊ, ಗೊಂಯ್ಚ್ಯಾ ಸ್ವಾತ್ರಂತ್ರ್ಯಾಚೊ, ಆತ್ಮಹೀನಪಣಾಂತ್ಲ್ಯಾನ್ ಸುಟಪಾಚೊ ಹೊ ಧ್ಯಾಸ್ ಆನಿ ವಾವ್ರ್ ಶಬ್ದಾಂಚ್ಯಾ ಮಾಧ್ಯಮಾಂತ್ಲ್ಯಾನ್, ಹ್ಯಾ ಪ್ರಾಣಾಂಚ್ಯಾ ಮಾಧ್ಯಮಾಂತ್ಲ್ಯಾನ್ ಮುಖಾರ್ ಗೆಲೊ.'
`ತ್ಯಾ ದಿಸಾ ವಡಾಕಡೆನ್ ಗಡದ್ ತಿನ್ಸಾನಾ, ಮಂದ್ ಮಂದ್ ವಾಜತ್ ಆಯ್ಲಿಂ ತುಜಿಂ ಗೋ ಪಾಂಯ್ಜಣಾಂ' ಅಶೆಂ ಮ್ಹಣ್ಪಿ ಹೊ ನಾದಮಧುರ್, ಲ್ಹವಪೀಕ್ ಮನಾಚೊ ಕವಿ ಕೆನ್ನಾ ಕೆನ್ನಾ `ಪಾತ್ಕಾಂಚೆ ಭಲ್ಲೆ ಘಡೆ, ಘಾಲ್ಯಾಂ ಪಿತ್ರಾಂಕ್ ವಡೆ' ಅಶೆಂ ಮ್ಹಣೀತ್ `ಘಾಲ್ತಾಲೊ ರೆ ಕೃಷ್ಣ ಆತಾಂ ಸುದರ್ಶನಾ ಹಾತ್' ಅಶಿ ಶಿಟ್ಕಾವ್ಣಿ ದೀತ್ ಪ್ರತಿರೋಧ್ ಕರಪಿ, ಆಹ್ವಾನ್ ದಿವಪಿ ಸ್ವರ್ ಲಾಯ್ತಾ.
ಗೊಂಯ್ಕಾರಾಂಕ್ `ಸುಶೆಗಾದ್' ಮ್ಹಣೊನ್ ಸಗ್ಳೆಚ್ ವಳ್ಖತಾತ್. ಆನಿ ಗೊಂಯ್ಕಾರ್ ಹೊ ತಸೊ ಸಪ್ಸಪ್ ಕರೂನ್ ಝಗ್ಡಿಂ ಝುಜಾಂ ಕರಪಿ ಮನೀಸ್ ನ್ಹಯ್. ತೊ ಸೊಂಶೀಕ್. ದೆಖೂನಚ್ ತರ್ ಸಾಡೆಚಾರ್ಶಿಂ ವರ್ಸಾಂ ಪುರ್ತುಗೆಜ್ ಗೊಂಯಾಂತ್ ರಾಂವ್ಕ್ ಶಕ್ಲೆ. ಪುಣ್ ತಾಚ್ಯಾ ಹ್ಯಾ ಸೊಂಶಿಕಪಣಾಕ್ ಏಕ್ ಶೀಮ್-ಮೇರ್ ಆಸಾಚ್. ಪರಶುರಾಮಾಚೆ ಹೆ ಭುಂಯೆಂತ್ಲೊ ಗೊಂಯ್ಕಾರ್ `ದೊಳ್ಯಾಂತ್ ತೇಲ್ ಘಾಲುನ್ ಜಾಗೊ ಆಸಾ' ಅಶೆಂ ಸಾಂಗ್ತಾನಾ ಕವಿ (`ಸೊಂಪ್ತಿ ರಾತ್' ಹೆ ಕವಿತೆಂತ್) ಮ್ಹಣ್ತಾ,
ಮಾತ್ಲೆ ಜರೀ ಲಕ್ಷ್ ಬಳಿ
ಖಿಣಾಂತ್ ವೆತ್ಲೆ ರಸಾತಳಿಂ
ತೀಣ್ ಪಾವ್ಲಾಂ ಭಿತರ್ ಜಾತ್ಲೆ ನಾಚ್ ನಪಚ್ಛಾತ್
ಪರಶುರಾಮ್ ನಾ ರೆ ವೊಗೊ
ದೊಳ್ಯಾಂತ್ ತೇಲ್ ಘಾಲುನ್ ಜಾಗೊ
ಸ್ರಾಪ್ ದೀತ್ ಪ್ರಕಟ್ ಜಾತ್ಲೊ ಅಂತಿಂ ಅಕಸ್ಮಾತ್
ಶಸ್ತ್ರಾಂಚಿ ಅಸ್ತ್ರಾಂಚಿ ಸೊಂಪತ್ ಆಯ್ಲ್ಯಾ ರಾತ್
ಪಾಂತೊಟೆರ್ ಝಟ್ಟಲೆ ರೆ ಶತಸಹಸ್ತ್ರ್ ಹಾತ್
(ಸೊಂಪ್ತಿ ರಾತ್, ಪಾಂಯ್ಜಣಾಂ)
ಬಾಕಿಬಾಬಾನ್ ಗೊಂಯ್ ಆನಿ ಕೊಂಕಣಿಕ್ ಆಪ್ಲ್ಯಾ ಕಾಳ್ಜಾಕುಡಿಂತ್ ಸುವಾತ್ ಫಾವೊ ಕೆಲ್ಲಿ. ಮರಾಠಿ ಕವಿತೆಂತ್ಲ್ಯಾನ್ ಲೆಗೀತ್ ತಾಂಣಿ ಕೊಂಕಣಿ ಶಬ್ದಾವಳಿಚೊ ಪ್ರಯೋಗ್ ಕೆಲೊ. ಬಾಕಿಬಾಬಾನ್ ಆಪ್ಲ್ಯಾ ಕಾವ್ಯಾಂತ್ಲ್ಯಾನ್ ತಶೆಂಚ್ ವ್ಯಕ್ತಿಂತ್ವಾಂತ್ಲ್ಯಾನ್ ಭುಂಯ್ ಆನಿ ಭಾಶೆವಿಶಿಂ ಸದಾಂಚ್ ಸ್ವಾಭಿಮಾನಿ ಭೂಮಿಕಾ ಮಾಂಡ್ಲಿ. ಗೊಂಯ್ ಆನಿ ಕೊಂಕಣಿಚ್ಯಾ ವಿರೋಧಕಾಂಚೆರ್ ಜರೀ ತಾಂಣಿ ಸರಳ್ಪಣಾನ್ ಶಾಬ್ದಿಕ್ ವಾರ್ ಕೆಲ್ಲೆ ನಾಸ್ಲೆ ತರೀ ಪ್ರತಿರೋಧೀಕ್ ಸ್ವರ್ ಮಾತ್ ಕಾಯಮ್ ಕಾರ್ಯರತ್ ದವರ್ಲೊ. ಆಪ್ಲಿ ಭೂಮಿಕಾ ಮಾಂಡ್ತಾನಾ ತಾಣೆಂ ಪರಿಣಾಮಾಂಚಿ ಪರ್ವಾ ಕೆನ್ನಾಚ್ ಕೆಲಿ ನಾ. ಕೆಪ್ಯಾಂ ಇಶ್ಕೊಲಾಂತ್ ಶಿಕ್ಷಕ್ ಮ್ಹಣ್ ವಾವುರ್ತಾನಾಂಚ್ ತೆ ಗೊಂಯ್ಚ್ಯಾ ಸುಟ್ಕೆ ಝುಜಾಚೆ ಚಳವಳಿಂತ್ ದೆಂವ್ಲೆ. ತೆನ್ನಾಚೆ ಪುರ್ತುಗೆಜ್ ಗವರ್ನರ್ ಜನರಲ್ ದೊತೊರ್ ಬೊಸ್ ಹಾಚೆರ್ ತಾಂಣಿ ಪ್ರತಿರೋಧಿಕ್ ಭಾಶ್ಯ್ ಕೆಲೆಂ.
`ದೊತೊರ್ ಬೊಸ್, ದೊತೊರೊ ಬೊಸ್
ಸಮ್ಜಿಕಾಯೆನ್ ವಾಗ್
ತಕ್ಲಿ ತುಕಾ ನಾ ಜಾಲ್ಯಾರ್
ಉಟುನ್ ಚಲೊಂಕ್ ಲಾಗ್
ಫಾತ್ರಾಂ - ತಾಂದುಳ್
ತೇಯ್ ನಾ ವೆಳಾರ್
ಪೊಟಾಕ್ ಪೆಟ್ಲಿ ಆಗ್
ಲಜೆಕ್ ಲುಗಟ್ ಮ್ಹಾರಗ್ ಜಾಲಾಂ
ಉಕ್ತಿ ಪಡ್ಲಿ ಜಾಂಗ್'
ತ್ಯಾ ಅದ್ಮಾಸಾಕ್ ಗೊಂಯಾಂತ್ ವಾಡಿಲ್ಲಿ ಮ್ಹಾರ್ಗಾಯ್ ಆನಿ ತಾಂದುಳ್, ಕಪ್ಡೆ ತಶೆಂಚ್ ಹೆರ್ ಗರ್ಜೆಚ್ಯಾ ವಸ್ತುಂಚೊ ಉಣಾವ್ ಹಾಚೆವಿಶಿಂಚಿ ಹಿ ಪ್ರತಿಕ್ರಿಯಾ ಆನಿ ಸಾಂಗಾತಾಕ್ ತೆನ್ನಾಚ್ಯಾ ಗವರ್ನರಾಕ್ ದಿಲ್ಲಿ ಹಿ ಶಿಟ್ಕಾವ್ಣಿ ಮ್ಹಳ್ಯಾರ್ ಬಾಕಿಬಾಬಾನ್ ದಾಖಯಿಲ್ಲಿ ಪ್ರತಿರೋಧಿಕ್ ವೃತ್ತಿ ಮ್ಹಣೊಂಕ್ ಫಾವೊ. ಎಕಾ ಗವರ್ನರ್ ಜನರಲಾಕ್, ರಾವ್ತಾ ಜಾಲ್ಯಾರ್ ಸಾರ್ಕೊ ಸಮ್ಜಿಕಾಯೆನ್ ವಾಗ್ ಆನಿ ಜರ್ ಆಮ್ಚೆ ಹೆ ವಿಚಾರ್ ತುಜೆ ತಕ್ಲೆಂತ್ ವಚನಾ ಜಾಲ್ಯಾರ್ ಸರಳ್ ಹಾಂಗಾಚ್ಯಾನ್ ತುಜಿ ಬೀಟ್ಕಿ ಕವಳ್ ಅಶೆಂ ಸಾಂಗ್ಪಿ ಹೊ ಬಾಕಿಬಾಬ್ ಮ್ಹಳ್ಯಾರ್ ತ್ಯಾ ಕಾಳಾವೆಲೊ ಏಕ್ `ಕ್ರಾಂತಿಕವೀಚ್'.
ಕೊಂಕಣೀ ಆನಿ ಗೊಂಯ್ ಹಾಂಚೆಖಾತೀರ್ ತಾಂಣಿ ತರಾಂತರಾಂನಿ ಗೊಂಯ್ಕಾರಾಂಕ್ (ಸ್ಥಾಯೀಕ್ ಆನಿ ಸ್ಥಳಾಂತರೀತ್) ಉಲೊ ಮಾರ್ಲೊ. ಆಪ್ಲೆ `ಧಾಂವ್ ಬೆಗಿಂ ಪಾವ್ ಉಲ್ಯಾ' ಹೆ ಕವಿತೆಂತ್ ಕವಿ ಮ್ಹಣ್ತಾತ್,
ಚಂದ್ರಿಮಾಕ್ ಘಾಯ್ ಜಾಲಾ
ಕಾಳ್ಖಾಚೇಯ್ ಫುಟ್ಲೆ ದೊಳೆ
ಕಣ್ಕಿಂತ್ಲಿ ಮಾಯ್, ಆಯ್ಕ್
ಚೊಂಯ್ ವಶೀನ್ ಮ್ಹಾಲ್ತಾ ಉಲೆ
ಸೊಡೊಂವ್ಕ್ ಗೆಲ್ಲೆ ಭಾವ್ಬಂಧ್
ಅಪಘಾತಾಂತ್ ಪಡ್ಲೆ ಚರಿಂ
ಧಾ ದಿಕಾಂಕ್ ಪಾಂಗ್ಲೆ ಪೂತ್
ಏಕಯ್ ನಾ ರೆ ತಿಚೆ ಸರಿಂ
ಧಾಂವ್ ಬೆಗಿಂ, ಪಾವ್ ಉಲ್ಯಾ
ಅಸ್ಲಿ ವೇಳ್ ಪರ್ತಿ ಯೆನಾ
ಆವೈ ಉಲ್ಯಾ ಪಾವ್ನಾ ತಾಕಾ
ದೇವ್ ಪಾಸುನ್ ಮ್ಹರ್ಯಾಂತ್ ಘೆನಾ
-(ಧಾಂವ್ ಬೆಗಿಂ, ಪಾವ್ ಉಲ್ಯಾ, ಪಾಂಯ್ಜಣಾಂ)
`ಗೊಂಯ್ ಆಮ್ಚೆಂ ಮೂಳ್ಪೀಠ್, ಕೊಂಕಣಿ ಆಮ್ಚಿ ಭಾಸ್, ಕೊಂಕಣಿ ಸಂಸ್ಕೃತಾಯ್ ಆಮ್ಚ್ಯಾ ಜಾಂಟ್ಯಾಂಲಿ ಮಿರಾಸ್' ಹೊ ಮಂತ್ರ್ ದೀವ್ನ್ ಬಾಕಿಬಾಬಾನ್ ಆಮ್ಕಾಂ ಉಪ್ಕಾರಾಂತ್ ದವರ್ಲ್ಯಾತ್. ತಾಂಚೆ ಉಪ್ರಾಂತೂಯ್ ಜೆನ್ನಾ ಜೆನ್ನಾ ಭಾಸ್ ವಾ ಸಂಸ್ಕೃತಾಯೆಚೆರ್ ಹಾವಳ್ ಆಯ್ಲ್ಯಾ ತೆನ್ನಾ ತೆನ್ನಾ ಆಮಿ ಹ್ಯಾಚ್ ಮಂತ್ರಾಚೊ ಜಯ್ಘೋಶ್ ಕರುನ್ ನವೆ ಪಿಳ್ಗೆಕ್ ಜಾಗಯ್ಲಾ, ದುಸ್ಮಾನಾಂಕ್ ಶಿಟ್ಕಾಯ್ಲಾ. ದುಸ್ಮಾನಾಂಕ್ ಪ್ರತಿರೋಧ್ ಕರ್ಪಾಚಿ ಶಕ್ತ್ ಹ್ಯಾ ಮಂತ್ರಾಂತ್ ಆಸಾ ಅಶೆಂ ಮ್ಹಳ್ಯಾರ್ ತಿ ಅತಿತಾಯ್ ಥಾರ್ಚಿ ನ್ಹಯ್.
(ಆನಿಕಯ್ ಆಸಾ)
ಬಾಕಿಬಾಬಾಚ್ಯೊ ಕವಿತಾ: