18 May 2026

261. ವಿಶ್ವ ಕೊಂಕಣಿ ಕೇಂದ್ರಾಂತ್ ಪಿ. ಜಿ. ಕಾಮತ್ ಜಲ್ಮಾಶತಾಬ್ದಿ ಸಮಾರಂಭ್   

ಕವಿತಾ ಟ್ರಸ್ಟ್ ಹಾಂಣಿ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನ್ ಹಾಂಚೆ ಸಾಂಗಾತಾ ಮೆಳುನ್ ಹ್ಯಾಚ್ ಮಾಯ್ 17, 2026 ತಾರಿಕೆರ್ ವಿಶ್ವ ಕೊಂಕಣಿ ಕೇಂದ್ರ್, ಶಕ್ತಿನಗರ್ ಮಂಗ್ಳುರ್ ಹಾಂಗಾಸರ್ ಕವಿ ಪಿ. ಜಿ. ಕಾಮತ್ ಹಾಂಚಿ ಜಲ್ಮಾಶತಾಬ್ದಿ ಆಚರಣ್ ಕೆಲಿ.

ಹ್ಯಾ ಸಂದರ್ಭಾರ್ ಕವಿತಾ ಟ್ರಸ್ಟ್ ಕಾರ್ಯದರ್ಶಿ ಆಂಡ್ರ್ಯೂ ಎಲ್ ಡಿಕುನ್ಹಾನ್ ಯೆವ್ಕಾರ್ ಉಲೊವ್ಪ್ ಕೆಲೆಂ. ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಪ್ರಾಸ್ತಾವೀಕ್ ಉಲೊವ್ಪ್ ಕೆಲೆಂ ಆನಿ ಕವಿಚಿ ವಳಖ್ ಕರುನ್ ದಿಲಿ. ಹ್ಯಾ ಸಂದರ್ಭಾರ್ ಹಾಜರ್ ಆಸಲ್ಲ್ಯಾ ಸೈರ‍್ಯಾಂನಿ ಪಿ.ಜಿ. ಕಾಮತ್ ಹಾಂಚೆ ತಸ್ವೀರೆಕ್ ಫುಲಾಂ ದವ್ರುನ್ ತಾಂಕಾಂ ನಮನ್ ಕೆಲೆಂ. ಪಿ. ಜಿ. ಕಾಮತಾಚೊ ಪೂತ್ ಆನಂದ್ ಕಾಮತ್ ತಶೆಂ ತಾಂಚಿ ಪತಿಣ್ ಆನಿ ಧುವ್ ಹ್ಯಾ ಸಂದರ್ಭಾರ್ ವೇದಿರ್ ಆಸಲ್ಲಿಂ.

ಮುಕೆಲ್ ಸೈರೊ ಜಾವ್ನ್ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನಾಚೊ ಅಧ್ಯಕ್ಶ್ ಸಿ.ಎ. ನಂದಗೋಪಾಲ್ ಶೆಣೈ ಆಯಿಲ್ಲೊ. ಪಿ. ಜಿ. ಕಾಮತಾಚೊ ಪೂತ್ ಆನಂದ್ ಕಾಮತ್ ಮಾನಾಚೊ ಸೈರೊ ಜಾವ್ನ್ ಆಯಿಲ್ಲೊ. ಎಚ್ಚೆಮ್ ಪೆರ್ನಾಲ್ ಹಾಂಣಿ ಕಾಮತಾಚ್ಯಾ ಕವಿತಾಂಚೆರ್ ಪ್ರಮುಖ್ ಭಾಶಣ್ ದಿಲೆಂ ಆನಿ ಪಿ. ಜಿ. ಕಾಮತ್ ಚಾಬೂಕ್ ಕವಿ ಮ್ಹಳ್ಯಾರ್ ಚೂಕ್ ಜಾಯ್ಶಿನಾ ಮ್ಹಳೆಂ.

ಹ್ಯಾ ಉಪ್ರಾಂತ್ ಎಮ್. ಆರ್. ಕಾಮತ್, ನಿನಿಶಾ ಮೊಂತೇರೊ, ವೆಂಕಟೇಶ್ ನಾಯಕ್ ಆನಿ ಸ್ಮಿತಾ ಶೆಣೈ ಹಾಂಣಿ ಬೋವ್ ಆಪುರ್ಬಾಯೆನ್ ಪಿ. ಜಿ. ಕಾಮತಾಚ್ಯೊ ಕವಿತಾ ಸಾದರ್ ಕೆಲ್ಯೊ.

ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ಸಾದರ್ ಕೆಲ್ಲ್ಯಾಂಕ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ. ಸ್ಟೇನಿ ಬೆಳಾನ್ ಸೂತ್ರ್ ಸಂಚಾಲನ್ ಕೆಲ್ಲೆಂ.

15 May 2026

260. ಎಚ್ಚೆಮ್ ಪೆರ್ನಾಲಾಕ್ ಪರ್ಗಟ್ ಸನ್ಮಾನ್, ಕವಿತಾ ಟ್ರಸ್ಟ್ ಭಾಗೆಲಿ 

ಎಚ್ಚೆಮ್ ಪೆರ್ನಾಲಾಕ್ 2025ವ್ಯಾ ವರ್ಸಾಚೊ ಕೇಂದ್ರ್ ಸಾಹಿತ್ಯ ಅಕಾದಮಿಚೊ ಪುರಸ್ಕಾರ್ ತಾಂಚ್ಯಾ 'ಕೊಂಕಣಿ ಕಾವ್ಯೆಂ: ರುಪಾಂ ಆನಿ ರೂಪಕಾಂ’ ಪುಸ್ತಕಾಕ್ ಲಾಭಲ್ಲೊ ಆಸ್ತಾಂ, ತಾಕಾ ಸಮೇಸ್ತ್ ಕೊಂಕಣಿ ಪರ್ಜೆ ತರ್ಫೆನ್ ಮಾನ್ ಆನಿ ಅಭಿನಂದನ್ ಕರ‍್ಚೆಂ ಕಾರ್ಯೆಂ ಮಾಯ್ 15, 2026 ತಾರಿಕೆರ್ ಮಂಗ್ಳುರ‍್ಚ್ಯಾ ಟೌನ್ ಹೊಲಾಂತ್ ಚಲ್ಲೆಂ.

ಹಿ ಕಾರ್ಯಾವಳ್ ಮೈಕಲ್ ಡಿಸೋಜಾ ವಿಜನ್ ಕೊಂಕಣಿ ಬೊಂದೆರಾಖಾಲ್ ಚಲಲ್ಲಿ ಆಸುನ್, ಕವಿತಾ ಟ್ರಸ್ಟಾನ್ ಹಾಂತುಂ ಭಾಗೆಲಿಪಣ್ ಘೆತಲ್ಲೆಂ.

ಎಚ್ಚೆಮ್ ಪೆರ್ನಾಲಾಚೆಂ ಪುಸ್ತಕ್ ಕವಿತಾ ಟ್ರಸ್ಟಾನ್ ಪರ್ಗಟ್ ಕೆಲ್ಲೆಂ ಆಸುನ್, ಯೆದೊಳ್ ಪಾಸುನ್ ಕವಿತಾ ಟ್ರಸ್ಟಾಚ್ಯಾ ದೋನ್ ಪುಸ್ತಕಾಂಕ್ ಕೇಂದ್ರ್ ಸಾಹಿತ್ಯ ಅಕಾದಮಿಚೊ ಪುರಸ್ಕಾರ್ ಲಾಭ್ಲಾ. ಹ್ಯಾ ಆದಿಂ 2011ವ್ಯಾ ವರ್ಸಾ ಮೆಲ್ವಿನ್ ರೊಡ್ರಿಗಸಾಚ್ಯಾ ’ಪ್ರಕೃತಿಚೊ ಪಾಸ್’ ಪುಸ್ತಕಾಕ್ ಹೊ ಪುರಸ್ಕಾರ್ ಲಾಭಲ್ಲೊ.

ಕಾರ್ಯಾವಳಿ ಸಂದರ್ಭಾರ್ ಕವಿತಾ ಟ್ರಸ್ಟಾನ್ ಎಚ್ಚೆಮ್ ಪೆರ್ನಾಲಾಕ್ ಅಭಿನಂದನ್ ಪತ್ರ್ ದಿಲೆಂ. ಕವಿ ಆಂಡ್ರ್ಯೂ ಎಲ್. ಡಿಕುನ್ಹಾನ್ ಎಚ್ಚೆಮ್ಮಾಚಿ ಕವಿತಾ ’ಕಾಂಕ್ಣಾಂ ಗಲ್ಲೆಂತ್' ಫ್ರೇಮ್ ಕರುನ್ ಭೆಟಯ್ಲಿ.

ಹ್ಯಾ ಸಂದರ್ಭಾರ್ ಟ್ರಸ್ಟಿ ಮೆಲ್ವಿನ್ ರೊಡ್ರಿಗಸ್, ಆಂಡ್ರ್ಯೂ ಎಲ್ ಡಿಕುನ್ಹಾ, ಕಿಶೂ ಬಾರ್ಕೂರ್, ಎವ್ರೆಲ್ ರೊಡ್ರಿಗಸ್, ವಿಲಿಯಮ್ ಪಾಯ್ಸ್ ಆನಿ ಸಾಂಗಾತಿ ಟ್ರಸ್ಟಿ ವಿನ್ಸಿ ಪಿಂಟೊ ಆಂಜೆಲೊರ್, ಫೆಲ್ಸಿ ಲೋಬೊ ಆನಿ ಸ್ಟೇನಿ ಬೆಳಾ ಹಾಜರ್ ಆಸ್ಲೆ.

11 Jan 2026

20th Edition of Kavita Fest 

‍20ವೆಂ ಕವಿತಾ ಫೆಸ್ತ್ ಮಂಗ್ಳುರಾಂತ್ಲ್ಯಾ ಸಾಂ ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯ್ ಆಂಗ್ಣಾಂತ್ಲ್ಯಾ ಮದರ್ ತೆರೆಸಾ ಪೀಸ್ ಪಾರ್ಕಾಂತ್ ಜನೆರ್ 11, 2026 ತಾರಿಕೆರ್ ಚಲ್ಲೆಂ. ಬೆಂಡಾ ವ್ಹಾಜ್ಪಾ ಸವೆಂ ಪುರ್ಶಾಂವ್ ಕಾಡ್ಚೆ ಮಾರಿಫಾತ್ ಫೆಸ್ತಾಚಿ ಅಧಿಕೃತ್ ಸುರ್ವಾತ್ ಜಾಲಿ. ಮುಖೆಲ್ ಸಯ್ರೊ ಫಾ. ಮೆಲ್ವಿನ್ ಡಿಕುನ್ಹಾ ಜೆಸ, ಪ್ರೊ ವೈಸ್ ಚಾನ್ಸಲರ್, ಸಾಂ ಲುವಿಸ್ ಪರಿಗಣಿತ್ ವಿಶ್ವ್ ವಿದ್ಯಾಲಯ್ ಆನಿ ಪ್ರೊ. ಮರಿಯಾ ಡಿಕೋಸ್ತಾ ಹಾಂಣಿ ಗುಲೊಬಾಂಚ್ಯೊ ಪಾಕ್ಳ್ಯೊ ವಾರ‍್ಯಾರ್ ಉಬೊಂವ್ಚೆ ಸವೆಂ ಕವಿತಾ ಫೆಸ್ತಾಕ್ ಅಧಿಕೃತ್ ಚಾಲನ್ ದಿಲೆಂ. ಸಾಂಗಾತಾ ಟ್ರಸ್ಟಿಂನಿ , ಪೋಷಕಾಂನಿ, ಹಿತೈಶಿಂನಿ ಉಗ್ತಾವಣ್ ಕಾರ್ಯಾಕ್ ಸಾಂಗಾತ್ ದಿಲೊ.

ಉಗ್ತಾವಣ್ ಸುವಾಳ್ಯಾ ಉಪ್ರಾಂತ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಜೊಡ್ಲೆಲ್ಯಾ ಮ್ಹಾಲ್ಘಡೊ ಸಾಹಿತಿ ವಲ್ಲಿ ವಗ್ಗಾಲಾಗಿಂ ’ಮ್ಹಜೆಂ ಜಿವಿತ್, ಮ್ಹಜಿ ಕವಿತಾ’ ಮ್ಹಳ್ಳ್ಯಾ ವಿಶಯಾಚೆರ್ ಕವಿ ಆಂಡ್ರ್ಯೂ ಎಲ್ ಡಿ ಕುನ್ಹಾನ್ ಸಂವಾದ್ ಚಲಯ್ಲೊ.

ಸಾಹಿತ್ಯ್ ಅಕಾಡೆಮಿ, ಡೆಲ್ಲಿಚ್ಯಾ ಸಹಯೋಗಾಖಾಲ್ ಚಲಲ್ಲ್ಯಾ ಕವಿಸಂಧಿ ಕಾರ್ಯಾಂತ್ ಗೊಂಯ್ಚೊ ಕವಿ ಪರೇಶ್ ಎನ್ ಕಾಮತಾನ್ ಆಪ್ಲ್ಯಾ ಕವಿತಾಂವಯ್ಲೆ ವಿಚಾರ್ ಸಾದರ್ ಕೆಲೆ ಆನಿ ಕವಿತಾ ಪೇಶ್ ಕೆಲ್ಯೊ. ಫೆಸ್ತಾಚೆ ವೆದಿರ್ ಬಿರಿಬಿರಿ ಪಾವ್ಸ್ ಟಿವಿ ರಿಯಾಲಿಟಿ ಶೋ-ಚ್ಯಾ ಫೈನಲ್ ಹಂತಾಕ್ ಪಾವ್ಲೆಲ್ಯಾ ಯುವ ಆನಿ ಭುರ್ಗ್ಯಾಂಚ್ಯಾ ವಿಭಾಗಾಂತ್ಲ್ಯಾ ಸ್ಪರ್ಧಿಕಾಂಚಿ ವಿಶೇಸ್ ಕವಿಗೋಷ್ಟಿ ಹಾಜರ್ ಆಸ್ಲೆಲ್ಯಾಂಚಿ ಮನಾಂ ಪಿಸ್ವೊಂವ್ಕ್ ಲಾಗ್ಲಿ.

ದೊನ್ಪಾರಾಂ ಜೆವ್ಣಾ ಉಪ್ರಾಂತ್ ಅಸ್ತಿತ್ವ (ರಿ) ಆನಿ ರಂಗ್ ಅಧ್ಯಯನ್ ಕೇಂದ್ರ್ ಸಾಂ ಲುವಿಸ್ ಪರಿಗಣಿತ್ ವಿಶ್ವ್ ವಿದ್ಯಾನಿಲಯಾಚ್ಯಾ ವಿದ್ಯಾರ್ಥಿಂ ಥಾವ್ನ್ ಕಾವ್ಯರಂಗ್ ಮ್ಹಳ್ಳೆಂ ಕಾರ್ಯೆಂ ಸಾದರ್ ಜಾಲೆಂ.

ಸಾಂಜೆರ್ ಚಲ್ಲೆಲ್ಯಾ ಸೊಂಪ್ಣೆ ಕಾರ್ಯಾಕ್ ಜ್ಞಾನ್‍ಪೀಠ್ ಪುರಸ್ಕೃತ್ ದಾಮೋದರ್ ಮೌಜೊ, ನಾಮ್ನೆಚಿ ತರ್ಜಣ್ದಾರ್ ಶೈಲಾ ಮೌಜೊ, ಕೊಂಕ್ಣಿ ಬರವ್ಪಿ ಆನಿ ಪ್ರಾಧ್ಯಾಪಕ್ ಫ್ರಾನ್ಸಿಸ್ ಡಿಕುನ್ಹಾ, ಮುಖೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್ಲೆ. ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾಂನಿ ಕವಿತಾ ಟ್ರಸ್ಟಾವೊ ದಿಶ್ಟಾವೊ, ಮಿಸಾಂವ್ ಸಭೆ ಮುಕಾರ್ ದವರ‍್ಲೆಂ.

ಹ್ಯಾಚ್ ವೆಳಾರ್ ಫೆಲ್ಸಿ ಲೋಬೊ ಹಿಚ್ಯಾ ’ಪಾಲ್ವಾಪೊಂತ್’ ಕವಿತಾ ಸಂಗ್ರಹಾಕ್ ಡೆನಿಸ್ ಆನಿ ಮೇರಿ ಡಿ ಕುನ್ಹಾ ಸ್ಮಾರಕ್ ಇನಾಮ್ ದಿಲೆಂ ತರ್ ವಲ್ಲಿ ವಗ್ಗ ಹಾಂಕಾಂ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ದೀವ್ನ್ ಮಾನ್ ಕೆಲೊ.

ವಿಲಿಯಮ್ ಪಾಯ್ಸಾನ್ ಪುರಸ್ಕಾರ್ ವಿಜೇತ್ ವಲ್ಲಿ ವಗ್ಗಾಚಿ ವಳಕ್ ಕರ್ನ್ ದಿಲಿ. ವಿನ್ಸೆಂಟ್ ಪಿಂಟೊನ್ ಮಾನ್-ಪತ್ರ್ ವಾಚ್ಲೆಂ. ಮನೋಜ್ ಫೆರ್ನಾಂಡಿಸಾನ್ ಬಿರಿಬಿರಿ ಪಾವ್ಸ್ ಕಾರ್ಯಕ್ರಮಾಚೆಂ ಇನಾಮಾಂ ವಿತರಣ್ ಕಾರ್ಯೆಂ ಚಲೊವ್ನ್ ವ್ಹೆಲೆಂ. ಆಂಡ್ರ್ಯೂ ಎಲ್ ಡಿಕುನ್ಹಾನ್ ಉಪ್ಕಾರ್ ಭಾವುಡ್ಲೊ. ವಿತೊರಿ ಕಾರ್ಕಳಾನ್ ಕಾರ್ಯೆಂ ಚಲೊವ್ನ್ ವ್ಹೆಲೆಂ.