ಶೃದ್ಧಾಂಜಲಿ: ಕೊಂಕಣಿ ಕವಯಿತ್ರಿ ಶೀಲಾ ಕಂಭದಕೋಣೆ ಅಂತರ್ಲಿ
ಕೊಂಕಣಿ ಕವಯಿತ್ರಿ ಶೀಲಾ ಕೇಶವ ಕಂಭದಕೋಣೆ ಹ್ಯಾಚ್ ಸಪ್ತೆಂಬರ್ 5 ತಾರಿಕೆರ್ ಮುಂಬಯ್ಚೆ ಎಕೆ ಆಸ್ಪತ್ರೆಂತ್ ಸಕಾಳಿಂಚ್ಯಾ ಸಾತ್ ವೊರಾಂಚೆರ್ ದೆವಾಧೀನ್ ಜಾಲಿ. ಸರ್ತಾನಾ ತಿಚೊ ಪತಿ ಕೇಶವ್ ರಾವ್ ತಶೆಂ ಪೂತ್ ಅನಿಲ್ ತಿಚ್ಯಾ ಲಾಗಿಂ ಆಸಲ್ಲೆ. ಸರ್ತಾನಾ ತಿಕಾ 79 ವರ್ಸಾಂ ಪ್ರಾಯ್.
ಪ್ರಾಥಮಿಕ್ ಶಿಕಪ್ ಮಂಗ್ಳುರಾಂತ್ ಕೆಲ್ಲ್ಯಾ ತಿಣೆಂ 1948 ಇಸ್ವೆಂತ್ ಎಸ್ಸೆಸೆಲ್ಸಿ ಸಂಪಯಿಲ್ಲಿ. ತಿಚೆ ಮಾವ್ಶೆನ್, ಜಿ ಎಕ್ಲಿ ನಿವೃತ್ತ್ ಟೀಚೆರ್ ತಶೆಂ ಸಮಾಜ್ ಸೆವಕಿ ಆಸಲ್ಲಿ ತಿಣೆಂ ತಿಕಾ ವಾಗಯಿಲ್ಲೆಂ. ಶಾಳೆಂತ್ ಆಸ್ತಾನಾಂಚ್ ಪದಾಂ, ಕವಿತಾ ತಶೆಂ ನಾಟ್ಕುಳೆ ತಿ ಬರಯ್ತಾಲಿ. ಎಸ್ಸೆಸೆಲ್ಸಿ ಜಾವ್ನ್ ಥೊಡ್ಯಾಚ್ ತೆಂಪಾನ್ ತಿಚಿ ಮಾವ್ಶಿ ಅಂತರ್ಲಿ ಜಾಲ್ಲ್ಯಾನ್, ತಿಕಾ ಮುಂಬಯ್ ವೆಚೆಂ ಪಡ್ಲೆಂ.
ಪುಣ್ ಕವಿತೆಚಿ ತಿಚಿ ವೋಡ್ ಉಣಿ ಜಾಲಿನಾ. ಮುಂಬಯ್ ಆಕಾಶ್ವಾಣಿಚೆರ್ ತಿಣೆಂ ಕವಿತಾ ವಾಚುಂಕ್ ಸುರು ಕೆಲ್ಯೊ. ಸಾಂಗಾತಾಚ್ ತಿ ಕೊಲೆಜಿಕ್ ಭರ್ತಿ ಜಾಲಿ. ಕ್ರಮೇಣ್ ಇಂಗ್ಲಿಷ್ ಆನಿ ಜರ್ಮನ್ ಸಾಹಿತ್ಯಾಂತ್ ತಿಣೆಂ ಸನದ್ಯೊ ಆಪ್ನಾಯ್ಲ್ಯೊ. ಶೀಲಾಬಾಯೆನ್ ದೋನ್ ನಾಟಕ್ ಬರಯ್ಲ್ಯಾತ್. ಸಾರಸ್ವತ್ ಮಹಿಳಾ ಸಮಾಜ್ ಮುಂಬಯ್ ಹಾಂಚೆ ಥಾವ್ನ್ ತಿಕಾ ತೀನ್ ವರ್ಸಾಂ ಆದಿಂ ಲೇಕನಾ ಪುರಸ್ಕಾರ್ ಲಾಭ್ಲಾ.
ತಿಚ್ಯೊ ಕವಿತಾ ಸಂಪ್ಯೊ ತಶೆಂ ಸಾದ್ಯೊ ಆಸೊನ್ ಚಡಾವತ್ ಜಾವ್ನ್ ಭುರ್ಗ್ಯಾಂ ಖಾತೀರ್ ಬರಯಿಲ್ಲ್ಯೊ. ತಾಂತುಂ ಹಾಸ್ಯ್ ಮಿಸ್ಳೊನ್ ಆಸ್ತಾ. ಆಪ್ಣೆಂ ಬರೊಂವ್ಚೆಂ ಆನ್ಯೆಕ್ಲ್ಯಾಕ್ ಖುಶಿ ಕರ್ಚೆ ಖಾತೀರ್ ಅಶೆಂ ತಿ ಕೆದಳಾಯ್ ಮ್ಹಣ್ತಾಲಿ.
ಕಾಲ್ಚ್ಯಾ ದಿಸಾ, ಮ್ಹಳ್ಯಾರ್ ಸಪ್ಟೆಂಬ್ರಾಚೆ 4 ತಾರಿಕೆರ್ ಶೀಲಾ ಕಂಭದಕೋಣೆಚ್ಯಾ ಮೊಬಾಯ್ಲ್ ಫೊನಾಚೆರ್ ಕವಿತಾ ಟ್ರಸ್ಟಾಕ್ ಸಂಬಂಧ್ ಜಾಲ್ಲಿ ಏಕ್ ಕಳವ್ಣಿ ಹಾಂವೆಂ ಧಾಡಲ್ಲಿ. ಖಿಣಾನ್ ತಿಚ್ಯಾ ಪುತಾನ್ ಮ್ಹಾಕಾ ಫೊನ್ ಕೆಲೆಂ. `ಶೀಲಾಬಾಯ್ ಆಸ್ಪತ್ರೆಂತ್ ಆಸಾ, ಪೊಪ್ಸಾಂತ್ ಶೆಳ್ ಭರ್ಲ್ಯಾ, ಮೂತಯ್ ವಚನಾ. ದಾಕ್ತೆರ್ ಆಯ್ಲ್ಯಾತ್, ಪರಿಕ್ಷಾ ಚಾಲು ಆಸಾ' - ಮ್ಹಣಾಲೊ. ಹಾಂವ್ ಘಾಬರ್ಲೊಂ. ಧಾ ದಿಸಾಂ ಆದಿಂ ತಿ ಮ್ಹಜೆಲಾಗಿಂ ಉಲಯಿಲ್ಲಿ. ತಶೆಂ ತಿ ದೋನ್-ತೀನ್ ಮ್ಹಯ್ನ್ಯಾಂಕ್ ಏಕ್ ಪಾವ್ಟಿಂ ತರೀ ಫೊನ್ ಕರುನ್ ಮ್ಹಜೊ, ಮ್ಹಜ್ಯಾ ಕುಟ್ಮಾಚೊ ವಿಚಾರ್ ಕರ್ತಾಲಿ. ಉಲಯ್ತಾನಾ, ಪಾಟ್ಲ್ಯಾ ಸ ಮ್ಹಯ್ನ್ಯಾಂ ಥಾವ್ನ್ ಫೊನ್ ಕರಿನಾತಲ್ಲ್ಯಾಚೆಂ ಕಾರಣ್ ತಿಣೆಂ ಸಾಂಗ್ಲೆಂ. ಪಡೊನ್ ತಿಚ್ಯಾ ಪಾಂಯಾಕ್ ಮಾರ್ ಜಾಲ್ಲ್ಯಾ ನಿಮ್ತಿಂ ಥೊಡೊ ಕಾಳ್ ತಿ ಆಸ್ಪತ್ರೆಂತ್ ರಾವೊನ್ ಆಯಿಲ್ಲಿ. ಆನಿ ಆತಾಂ ಸಂಪೂರ್ಣ್ ಬರಿಂ ಜಾಲ್ಯಾಂ ಅಶೆಂ ತಿಣೆಂ ಮ್ಹಾಕಾ ಸಾಂಗಲ್ಲೆಂ. ತಿಚೊ ಬಾಮುಣ್, ಕೇಶವ ರಾವಯ್ ಮ್ಹಜೆಲಾಗಿಂ ಉಲಯಿಲ್ಲೊ. ಹ್ಯಾ ಫುಡೆಂ ಮಂಗ್ಳುರ್ ಯೇಂವ್ಕ್ ಜಾಂವ್ಚೆಂ ನಾ ಕೊಣ್ಣಾ ಅಶೆಂ ತಿಣೆಂ ದುಬಾವ್ ಉಚಾರಲ್ಲೊ ಆನಿ ಹಾಂವೆಂಚ್ ತಿಚ್ಯಾ ಮುಂಬಯ್ಚ್ಯಾ ಘರಾ ಯೇಜಾಯ್ ಮ್ಹಣೊನ್ ತಿಣೆಂ ವೊವ್ಳಿಗ್ ದಿಲ್ಲಿ.
ಮುಂಬಯ್ಚಿ ಆನ್ಯೇಕ್ಲಿ ಕೊಂಕಣಿ ಕವಯಿತ್ರಿ ಅರುಣಾ ರಾವ್ ಮುಕಾಂತ್ರ್ ಮ್ಹಾಕಾ ಶೀಲಾ ಬಾಯೆಚಿ ವೊಳಕ್ ಜಾವ್ನ್ ಚಡ್ ಕಾಳ್ ಜಾಂವ್ಕ್ ನಾ. ಕಾಂಯ್ ಚಾರ್-ಪಾಂಚ್ ವರ್ಸಾಂ ಜಾತಿತ್. ಕರ್ನಾಟಕ ಕೊಂಕಣಿ ಅಕಾಡೆಮಿನ್ ಮಂಗ್ಳುರ್ಚ್ಯಾ ಸಂದೇಶ ಸಭಾಸಾಲಾಂತ್ ಕವಿಗೋಷ್ಟಿ ಜಿ ಮಾಂಡುನ್ ಹಾಡಲ್ಲಿ ತಾಂತುಂ ಥೊಡಿ ಜವಾಬ್ದಾರಿ ಮ್ಹಜೀಯ್ ಆಸಲ್ಲಿ. ತೆ ಕವಿಗೋಷ್ಟಿಕ್ ಮುಂಬಯ್ ಥಾವ್ನ್ ತಿಕಾ ಆಮಿ ಆಪಯಿಲ್ಲೆಂ. ತಿ ತಿಚ್ಯಾ ಘೊವಾ ಸಾಂಗಾತಾ ಮಂಗ್ಳುರ್ ಆಯಿಲ್ಲಿ. ಏಕ್ ಬಾಳ್ ಕವಿತಾ ‘ಕಾಂದೊ ಆನಿ ಬಟಾಟೊ’ ತಿಣೆ ವಾಚಲ್ಲಿ ಆನಿ ಹೆರ್ ಕವಿತಾಯ್. ತ್ಯಾ ಉಪ್ರಾಂತ್ ಈಮೇಯ್ಲಾಚೆರ್ ಆಮ್ಚೊ ಸಂಪರ್ಕ್ ಆಸಲ್ಲೊ. 2010 ಜೂನ್ 27 ತಾರಿಕೆರ್ ಮುಂಬಂಯ್ತ್ ಮೀರಾ ರೋಡ್ ಇಗರ್ಜೆ ಸಾಲಾಂತ್ ಕರ್ನಾಟಕ ಕೊಂಕಣಿ ಅಕಾಡೆಮಿ, ಕವಿತಾ ಟ್ರಸ್ಟ್ ಆನಿ ಹೆರ್ ಸಂಸ್ತ್ಯಾಂನಿ ಮಾಂಡುನ್ ಹಾಡಲ್ಲ್ಯಾ ಕೊಂಕಣಿ ಸಾಹಿತ್ಯ್ ಸಂಸ್ಕೃತಿ ಸಹಮಿಲನಾಕ್ ತಿಚ್ಯಾ ಪತಿ ಸಾಂಗಾತ್ ಆಖ್ಖೊ ದೀಸಭರ್ ಆಮ್ಚೆ ಬರಾಬರ್ ರಾವೊನ್, ಕವಿಗೋಷ್ಟಿಂತ್ ತಿಣೆ ಭಾಗ್ ಘೆತಲ್ಲೊ. ಆದ್ಲ್ಯಾ ದಶೆಂಬರ್ 4 ತಾರಿಕೆರ್ ಕಲಾಂಗಣಾಂತ್ ಚಲಲ್ಲ್ಯಾ ವಿಶ್ವ ಕೊಂಕಣಿ ಸಾಂಸ್ಕೃತಿಕ್ ಮ್ಹಾಮೆಳಾ ಸಂದರ್ಭಾರ್ ಚಲಲ್ಲ್ಯಾ ಕವಿತಾ ಉತ್ಸವಾಂತ್ ತಿಣೆಂ ವಾಂಟೊ ಘೆತಲ್ಲೊ. ಆನಿ ಆಪ್ಲಿ `ಕಾಂದೊ ಬಟಾಟೊ' ಕವಿತಾ ಪರ್ತ್ಯಾನ್ ಮ್ಹಜ್ಯಾ ಉಲ್ಯಾಕ್ ಪಾಳೊ ದೀವ್ನ್ ವಾಚಲ್ಲಿ.
ಹಿ ಕವಿತಾ ಮ್ಹಜೆ ಪತಿಣೆಕ್ ಆನಿ ಪುತಾಕ್ ಬೋವಚ್ ಮೊಗಾಚಿ. ಅದ್ಲ್ಯಾ ದಶೆಂಬರಾ ಥಾವ್ನ್ ಆತಾಂ ಪಾಸುನ್ ಜಾಯ್ತೆ ಪಾವ್ಟಿಂ ಹೆ ಕವಿತೆಚೊ ಉಗ್ಡಾಸ್ ಆನಿ ಅನುಕರಣ್ ಮ್ಹಜ್ಯಾ ಘರಾ ಚಲ್ಲಾಂ ಆನಿ ಶೀಲಾ ಬಾಯೆಕ್ ತಿಚ್ಯಾ ನಾಂವಾಚ್ಯಾಕಯ್ ಚಡ್ ಕರ್ನ್ ‘ಕಾಂದೊ ಬಟಾಟೊ’ ಮ್ಹಣೊನಚ್ ಮೊಗಾನ್ ಆಮಿ ವೊಳ್ಕುಂಕ್ ಲಾಗ್ಲ್ಯಾಂವ್.
ತಿಚ್ಯಾ ಭುರ್ಗ್ಯಾ ಸಾರ್ಕ್ಯಾ ಮೊಗಾಳ್ ಉಲೊವ್ಣ್ಯಾ ಖಾತೀರ್ ತಿ ಮ್ಹಾಕಾ ಮೊಗಾಚಿ ಜಾಲ್ಲಿ.
ಆಜ್ ತಿಚೆ ಭಲಾಯ್ಕೆವಿಶಿಂ ವಿಚಾರ್ ಕರ್ಯಾಂ ಮ್ಹಣ್ ಪರ್ತ್ಯಾನ್ ಹಾಂವೆಂ ಫೊನ್ ಕರ್ತಾನಾ ತಿಚ್ಯಾ ಪತಿನ್ ಆಜ್ ಸಕಾಳಿಂ ತಿ ಅಂತರಲ್ಲಿ ಖಬರ್ ದಿಲಿ. ಮ್ಹಜ್ಯಾನ್ ಮ್ಹಾಕಾಚ್ ಸಾಂಬಾಳುಂಕ್ ಜಾಲೆಂನಾ. ಮೊವಾಳಾಯೆಚೆಂ, ಮೈಪಾಸಾಚೆಂ ಮೊಳಾಬ್ ಕೊಸ್ಳಾಲ್ಲೊ ಅನ್ಭೋಗ್ ಜಾಲೊ. ‘ತಿ ಮರೊಂಕ್ ನಾ, ತಿ ತಿಚ್ಯಾ ಕವಿತಾಂ ಮಾರಿಫಾತ್ ಆಮ್ಚೆ ಮಧೆಂ ಉರ್ತಲಿ’ ಅಶೆಂ ಹಾಂವೆಂ ತಿಚ್ಯಾ ಘರ್ಚ್ಯಾಂಕ್ ಭುಜಯ್ಲೆಂ.
-ಮೆಲ್ವಿನ್ ರೊಡ್ರಿಗಸ್