ಧಾ ಮಿನುಟಾಂಚ್ಯಾ ಶೆರ್ಮಾಂವಾಚ್ಯಾಕಯ್ ದೋನ್ ವೊಳಿಂಚಿ ಕವಿತಾ ಬರಿ: ಸುರತ್ಕಲ್ ಕವಿಗೋಷ್ಟಿಂತ್ ಫಾ. ಎಂಟನಿ ಲೋಬೊ
ಕವಿತಾ ಟ್ರಸ್ಟಾನ್ ಹ್ಯಾಚ್ ಆಗೋಸ್ತ್ 5 ತಾರಿಕೆರ್ ಸುರತ್ಕಲ್, ಕೊಂಕಣಿ ಲೇಖಕ್ ತಶೆಂ ಕವಿ ರೊನಾಲ್ಡ್ ಸಿಕ್ವೇರಾಚ್ಯಾ ಘರಾ ಆಪ್ಲಿ ಕವಿಗೋಷ್ಟಿ ಮಾಂಡುನ್ ಹಾಡಲ್ಲಿ. ಸುರತ್ಕಲ್ ಇಗರ್ಜೆಚೊ ಯಾಜಕ್ ಫಾ. ಎಂಟನಿ ಲೋಬೊ ಹ್ಯಾ ಸಂದರ್ಭಾರ್ ಮುಕೆಲ್ ಸೈರೆ ಜಾವ್ನ್ ಆಯಿಲ್ಲೆ. ಸುರತ್ಕಲ್ಚೊ ಕವಿ ನವೀನ್ ಪಿರೇರಾ ಸುರತ್ಕಲ್ ಹಾಣೆಂ ಕವಿಗೋಷ್ಟಿಚೆಂ ಅಧ್ಯಕ್ಷಪಣ್ ಘೆತಲ್ಲೆಂ.
ಸುರ‍್ವೆರ್ ಘರ‍್ಚೊ ಯೆಜ್ಮಾನಿ ರೊನಾಲ್ಡ್ ಸಿಕ್ವೇರಾನ್ ಹಾಜರ್ ಜಾಲ್ಲ್ಯಾ ಸೈರ‍್ಯಾಂಕ್ ತಶೆಂ ರಸಿಕಾಂಕ್ ಯೆವ್ಕಾರ್ ಮಾಗ್ಲೊ. ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ಟ್ರಸ್ಟಾಚಿ ವೊಳಕ್, ಶೆವೊಟ್ ತಶೆಂ ಕರುನ್ ಆಸ್ಚ್ಯಾ ಕಾಮಾಂಚೊ ವಿವರ್ ದಿಲೊ. ಆಯ್ಲೆವಾರ್ ಮಂಗ್ಳುರಾಂತ್ ಜಲ್ಮಾದಿಸಾಚೆರ್ ಸಂಭ್ರಮಾವೆಳಾ ಚಲಲ್ಲ್ಯಾ ಹಲ್ಲ್ಯಾವಿಶಿಂ ಉಲ್ಲೇಕ್ ಕರುನ್, ಕೊಂಕಣಿಚೆಂ ಚರಿತ್ರೆಂತ್ ಪಯ್ಲೆಪಾವ್ಟಿಂ ಕವಿ ಸಗ್ಳೆ ಸಾಂಗಾತಾ ಆಯ್ಲ್ಯಾತ್ ಆನಿ ಆಪ್ಲ್ಯಾ ಕವಿತಾಂ ಮಾರಿಫಾತ್ ಹ್ಯಾ ಹಲ್ಲ್ಯಾವಿಶಿಂ ಪ್ರತಿಕ್ರಿಯಾ ದೀಂವ್ಕ್ ಲಾಗ್ಲ್ಯಾತ್. ಹಿ ಏಕ್ ನವಿ ಸುರ‍್ವಾತ್. ಕವಿಂಕ್ ಕವಿತಾ ತಾಂಚೆಂ ಮ್ಹಳ್ಳೆಂ ಆಯ್ದ್. ಹ್ಯಾ ಆಯ್ದಾ ಮಾರಿಫಾತ್ ತಾಂಣಿ ತಾಳೊ ಉಬಾರಿಜಾಯ್ - ಅಶೆಂ ಆಪ್ಲ್ಯಾ ಉಲೊವ್ಪಾಂತ್ ಸಾಂಗ್ಲೆಂ.
ಹೆ ಕವಿಗೋಷ್ಟಿಂತ್ ಜಾಯ್ತ್ಯಾ ಕವಿಂನಿ ಮಂಗ್ಳುರ‍್ಚ್ಯಾ ಹಲ್ಲ್ಯಾಚೆರ್ ಪ್ರತಿಕ್ರಿಯಾ ಜಾವ್ನ್ ಬರಯ್ಲಲ್ಯೊ ಕವಿತಾ ವಾಚ್ಲ್ಯೊ. ಮೆಲ್ವಿನ್ ರೊಡ್ರಿಗಸಾನ್ ಸುಮೇರಿಯನ್ ದೇವತಾ ನಿನ್ಕಾಸಿಲಾಗಿಂ ಮಂಗ್ಳುರ‍್ಚ್ಯಾ ಚಲಿಯಾಂಚೆಂ ಮಾಗ್ಣೆಂ ಕವಿತಾ ವಾಚ್ಲಿ. ವಿನ್ಸಿ ಪಿಂಟೊನ್ ಮಂಗ್ಳುರ‍್ಚ್ಯಾ ಚಲಿಯಾಂಕ್ ಗೋಮಾತೆಕ್ ಸರಿ ಕರುನ್, ಆಜ್ ಆಮ್ಚೆ ಸಂಸ್ಕೃತಿಚೆ ರಾಕ್ವಲಿ ಹೆ ಗೋಮಾತೆಕ್ ತಿ ರಸ್ತ್ಯಾಂನಿ ನಾಗ್ಡಿ ಭೊಂವ್ತಾ ದೆಕುನ್ ತಿಕಾ ಆಂಗ್ಲೆಂ ಶಿಂವೊಂಕ್ ಭಾಯ್ರ್ ಸರ‍್ಲ್ಯಾತ್ ಮ್ಹಣೊನ್ ಆಪ್ಲೆ ಕವಿತೆಂತ್ ಸಾಂಗ್ಲೆಂ. ಮಾವ್ರಿಸ್ ಡೆಸಾನ್ ಸಕಾಳಿಂಚಿ ಧುಂವ್ರಿ (morning mist) ಮಂಗ್ಳುರಾಕ್ ಕಿತೆಂ ಸಕ್ಕಡ್ ಹಾಡ್ನ್ ಆಯ್ಲ್ಯಾ ಮ್ಹಳ್ಳೆಂ ಆಪ್ಲೆ ಕವಿತೆಂತ್ ಸಾಂಗ್ಲೆಂ ತರ್, ಎಂಡ್ರ್ಯೂ ಎಲ್ ಡಿಕುನ್ಹಾನ್ ಹ್ಯಾಚ್ ಘಡಿತಾಬರಿ ಕಿತೆಂಚ್ ಆವಾಜ್ ನಾಸ್ತಾಂ ಚಲ್ಚ್ಯಾ ಅತ್ಯಾಚಾರಾಂ ವಿಶಿಂ ಆಪ್ಲೆ ಕವಿತೆಂತ್ ಸಾಂಗ್ಲೆಂ. ಎಚ್ಚೆಮ್ ಪೆರ್ನಾಳಾನ್ ಆಯ್ಚೊ ಗಣೇಶ್ (ಪ್ರಕರಣಾಂತ್ಲೊ) ಆನಿ ದೇವ್ ಗಣೇಶಾ (ಗಣಪತಿ) ಮದ್ಲೊ ಸಂವಾದ್ ಆಪ್ಲೆ ಕವಿತೆಂತ್ ಹಾಡುನ್ ಹಲ್ಲೆಕೋರಾಂನಿ ಕರ‍್ಚ್ಯಾ ದೆವಾಚ್ಯಾ ಖೆಳ್ಕುಳಾಂಚಿ ಕೂಸ್ ಸಾಂಗ್ಲಿ. ಆಲ್ವಿ ದಾಂತಿನ್ ಚಲ್ಯಾಂಚೆ ವೊಳ್ವಳೆ ಆಪ್ಲೆ ಕವಿತೆಂತ್ ಪಿಂತ್ರಾಯ್ಲೆ.
ಹ್ಯಾ ಭಾಯ್ರ್ ರಿಚ್ಚಿ ಜೊನ್ ಪಾಯ್ಸ್, ಜೊರ್ಜ್ ಲಿಗೊರಿ ಡಿಸೋಜಾ, ಹೆರೊಲ್ಪಿಯುಸ್, ಕ್ಲೆರೆಟ್ ಕಾಟಿಪಳ್ಳ, ವಲ್ಲಿ ಬೊಳಾ, ಜೋಕಿಮ್ ಮಿರಾಂದಾ, ಗ್ಲೇಡಿಸ್ ರೇಗೊ, ವಾಲ್ಟರ್ ದಾಂತಿಸ್, ಸಿಜ್ಯೆಸ್ ತಾಕೊಡೆ, ಮನು ಬಾಹ್ರೇನ್, ವಿಲ್ಸನ್ ಕಿನ್ನಿಗೋಳಿ, ಅರುಣ್ ದಾಂತಿ, ರೊನಿ ಸಿಕ್ವೇರಾ ತಶೆಂ ನವೀನ್ ಪಿರೇರಾ ಸುರತ್ಕಲಾನ್ ಆಪಾಪ್ಲ್ಯೊ ಕವಿತಾ ವಾಚ್ಲ್ಯೊ.
ಹ್ಯಾ ಮಧೆಂ ದುಸ್ರೆ ಕ್ಲಾಶಿಂತ್ಲೊ ಭುರ್ಗೊ ಪ್ರೆಸ್ಟನ್ ಸಿಕ್ವೇರಾನ್ ಕವಿತಾ ವಾಚುನ್ ಸರ‍್ವಾಂಕ್ ಚಕಿತ್ ಕೆಲೆಂ ಆನಿ ಸರ‍್ವಾಂಚ್ಯಾ ತೊಂಡಾರ್ ದಾಧೊಸ್ಕಾಯ್ ಹಾಡ್ಲಿ.
ಮುಕೆಲ್ ಸೈರೊ ಜಾವ್ನ್ ಆಯಿಲ್ಲೊ ಫಾ. ಎಂಟನಿ ಲೋಬೊ ಉಲೊವ್ನ್ "ಕವಿ ಜಾಂವ್ಕ್ ಆಶೆತೆಲ್ಯಾಂನಿ ಪಂಚೇಂದ್ರಿಯಾಂ ಉಗ್ತಿಂ ದವರಿಜಾಯ್ ಪಡ್ತಾ. ಭೊಗ್ಣಾಂ ಸರ‍್ವಾಂಕ್ ಆಸ್ತಾತ್. ಪುಣ್ ಹಿಂ ಭೊಗ್ಣಾಂ ಉಚಾರುಂಕ್ ಆಶೆಂವ್ಚೆ, ತಿಂ ಭೊಗ್ಣಾಂ ಚ್ಯಾರ್ ಚೊವ್ಗಾಂಕ್ ಪಾವೊಂವ್ಕ್ ಸಂಘಟನಾಂ ಬಾಂದ್ತಾತ್. ಕವಿತಾ ಟ್ರಸ್ಟ್ ತಸಲೆಂ ಏಕ್ ಸಂಘಟನ್. ಬೋವಚ್ ಶಾಭಾಸ್ಕೆಚೆಂ ಕಾಮ್ ತೆ ಕರ‍್ತಾತ್. ಪಾದ್ರಿಂನಿ ಆಪ್ಲ್ಯಾ ಶೆರ್ಮಾಂವಾಂತ್ ಪಾಂಚ್ ಧಾ ಮಿನುಟಾಂನಿ ಸಾಂಗ್ಚೆಂ ಎಕ್ಲೊ ಕವಿ ದೋನ್ ವೊಳಿಂನಿ ಸಾಂಗೊಂಕ್ ಸಕ್ತಾ. ಆಯ್ಕೊವ್ಪ್ಯಾಂಕ್ ತೆಂ ಆಯ್ಕೊಂಚಿ ಸೊಸ್ಣಿಕಾಯ್ ಜಾಯ್. ಕಠಿಣ್ ಸಬ್ದಾಂಚೊ ಅರ್ಥ್ ಜಾಣಾ ಜಾಂವ್ಚಿ ಆತುರಾಯ್ ಜಾಯ್.
ಆಯ್ಲೆವಾರ್ ಆಮ್ಚಿಂ ಭುರ್ಗಿಂ ಇಂಟರ್ನೆಟ್ಟಾರ್ ಚಡಿತ್ ವೇಳ್ ಪಾಶಾರ್ ಕರ‍್ತಾತ್. ಕಿತ್ಲ್ಯಾ ಜಣಾಂಕ್ ಕವಿತಾ.ಕೊಮ್ ಆಸಾ ಮ್ಹಳ್ಳಿ ಖಬರ್ ಆಸಾ? ಕಿತ್ಲ್ಯಾ ಆವಯ್ ಬಾಪಾಯ್ನಿ ಅಸಲೆ ಎಕೆ ಕೊಂಕಣಿ ವೆಬ್‌ಸೈಟಿಚೊ ಉಪೇಗ್ ಭುರ್ಗ್ಯಾಂನಿ ಕರುಂಯೆತಾ ಮ್ಹಣೊನ್ ಸಾಂಗ್ಲಾಂ.?
ಹೆ ಕವಿಗೋಷ್ಟಿ ಉಪ್ರಾಂತ್ ಹಾಂವೇಂಯ್ ಬರೊಂವ್ಚೊ ನಿರ್ಧಾರ್ ಕೆಲಾ. ಫಿರ್ಗಜೆಚ್ಯಾ ಯುವಜಣಾಂನಿ ಕವಿತಾ ಬರಯ್ಲ್ಯಾರ್ ಆಮಿ ತ್ಯೊ ನೋಟೀಸ್ ಬೋರ್ಡಾಚೆರ್ ಪರ್ಗಟ್ ಕರ‍್ಯೆತ್. ಮಾಗೀರ್ ಕ್ರಮೇಣ್ ಪುಸ್ತಕಾ ರುಪಿಂ ಪರ್ಗಟ್ ಕರ‍್ಯೆತ್. ವಿಲ್ಫಿ ರೆಬಿಂಬಸಾನ್ ಆಪ್ಲ್ಯಾ ಪದಾಂನಿ ದಿಂವ್ಚ್ಯಾ ಸಂದೇಶಾ ಬರಿ ತುಮ್ಚ್ಯಾ ಕವಿತಾಂನಿ ಕಸಲೊ ತರೀ ಸಂದೇಶ್ ಆಸೊಂ." ಮ್ಹಣೊನ್ ಸಾಂಗಲ್ಲ್ಯಾ ಫಾ. ಎಂಟನಿನ್ ಸರ್ವಾಂನಿ ಕೊಂಕಣಿ ವಾಚಿಜಾಯ್ ಆನಿ ಉಲಯ್ಜಾಯ್ ಮ್ಹಣೊನ್ ಉಲೊ ದಿಲೊ.
ಸಂಗೀತ್‌ಕಾರ್ ತಶೆಂ ಗಾವ್ಪಿ ಕೆವಿನ್ ಮಿಸ್ಕಿತ್ ಸುರತ್ಕಲ್ ಹಾಣೆಂ ಸರ್ವಾಂಚೆ ಉಪ್ಕಾರ್ ಆಟಯ್ಲೆ. ಹ್ಯಾ ಕಾರ್ಯಾಕ್ ಕಾದಂಬರಿಕಾರ್ ರೊನ್ ರೊಚ್ ಕಾಸ್ಸಿಯಾ, ಕವಿತಾ ಟ್ರಸ್ಟಿ ವಿಲಿಯಮ್ ಪಾಯ್ಸ್, ಎವ್ರೆಲ್ ರೊಡ್ರಿಗಸ್ ತಶೆಂ ಸುರತ್ಕಲ್ ಆಸ್‌ಪಾಸ್ಚೊ ಜಾಯ್ತೊ ಲೋಕ್ ಹಾಜರ್ ಆಸಲ್ಲೊ. ಸಗ್ಳ್ಯಾ ಕಾರ್ಯಾಕ್ ಥಳೀಯ್ ಸಂಘಟಕ್ ಜಾವ್ನ್ ರೊನಾಲ್ಡ್ ಸಿಕ್ವೇರಾ, ಕೆವಿನ್ ಮಿಸ್ಕಿತ್ ಆನಿ ನವೀನ್ ಪಿರೇರಾ ಸುರತ್ಕಲ್ ಹಾಂಣಿ ಸಹಕಾರ್ ದಿಲ್ಲೊ.
- ತಸ್ವೀರ್ ಕುರ್ಪಾ: ಪ್ರವೀಣ್ ತಾವ್ರೊ