ಕವಿತಾ ಟ್ರಸ್ಟ್, ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತ್ - ಪಣಜಿ ಫೆರಿಯೆಂತ್ ಸಾತ್ ಜಣಾಂಕ್ ವಿಂಚ್ಲೆಂ
ಕವಿತಾ ಟ್ರಸ್ಟಾನ್ ಚಲೊವ್ನ್ ವ್ಹರ‍್ಚ್ಯಾ ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಚೊ ಪಣಜಿ ಶೆರಾಂತ್ಲೊ ಪಾಂವ್ಡೊ ಹ್ಯಾಚ್ ಸಪ್ಟೆಂಬರ್ 6 ತಾರಿಕೆರ್ ಚಲೊನ್, ಸಾತ್ ಯುವಜಣಾಂಕ್ 2013 ವರ್ಸಾಚ್ಯಾ ಜನೆರ್ 13 ತಾರಿಕೆರ್ ಚಲ್ಚ್ಯಾ ನಿಮಾಣ್ಯಾ ಪಾಂವ್ಡ್ಯಾಕ್ ವಿಂಚುನ್ ಕಾಡ್ಲಾಂ.
ಪಣಜಿ ಶೆರಾಂತ್ಲ್ಯಾ ಟಿ. ಬಿ. ಕೂನ್ಹಾ ಸಭಾಸಾಲಾಂತ್, ಕೊಂಕಣಿ ಭಾಷಾ ಮಂಡಳ್ ಗೊಂಯ್ ಹಾಂಚ್ಯಾ ಸಹಕಾರಾನ್ ಚಲಲ್ಲ್ಯಾ ಹ್ಯಾ ಸ್ಪರ್ಧ್ಯಾಂತ್ ಪಂದ್ರಾ ಥಾವ್ನ್ ತೀಸ್ ವರ್ಸಾಂ ಭಿತರ‍್ಲ್ಯಾ ಯುವಜಣಾಂಕ್ ಭಾಗ್ ಘೆಂವ್ಕ್ ಆವ್ಕಾಸ್ ಆಸಲ್ಲೊ. ಭಾಗ್ ಘೆತಲ್ಯಾಂಕ್ ಆಪ್ಣಾಚಿ ಯಾ ಹೆರಾಂಚಿ ಕವಿತಾ ವಾಚುಂಕ್ ಸಂದ್ರಾಪ್ ಕರುನ್ ದಿಲ್ಲೊ. ವಾಚನ್ ಕರ‍್ಚಿ ಕವಿತಾ ದೇಡ್ ಮಿನುಟಾಂ ಥಾವ್ನ್ ತೀನ್ ಮಿನುಟಾಂ ಭಿತರ್ ಆಸುಂಯೆತ್ ಆಸಲ್ಲಿ.
ಹೆ ಕವಿತಾ ಸರ್ತೆಕ್ ಕವಿತಾ ಟ್ರಸ್ಟಾಚೆ ಟ್ರಸ್ಟಿ ಎಂಡ್ರ್ಯೂ ಎಲ್ ಡಿಕುನ್ಹಾ, ವಿಲಿಯಮ್ ಪಾಯ್ಸ್ ತಶೆಂ ಕಿಶೂ ಬಾರ್ಕೂರ್ ವೊರಯ್ಣಾರ್ ಜಾವ್ನ್ ಬಸಲ್ಲೆ. ಆನ್ಯೇಕ್ಲೊ ಟ್ರಸ್ಟಿ ವಿತೊರಿ ಕಾರ್ಕಳಾನ್ ಮಾಂಚಿಯೆವಯ್ಲಿ ಜವಾಬ್ದಾರಿ ಘೆತಲ್ಲಿ.
ಸುರ‍್ವೆರ್ ಗೊಂಯ್ ಕೊಂಕಣಿ ಭಾಷಾ ಮಂಡಳಾಚೊ ಅಧ್ಯಕ್ಷ್ ಚೇತನ್ ಆಚಾರ್ಯಾನ್ ಸರ್ವಾಂಕ್ ಯೆವ್ಕಾರ್ ದಿಲೊ. ಪಯ್ಲೆ ಪಾವ್ಟಿಂ ಕವಿತಾ ಟ್ರಸ್ಟಾ ತಸಲ್ಯಾ ಎಕಾ ಸಂಸ್ಥ್ಯಾ ಸಾಂಗಾತಾ ಮೆಳೊನ್ ಭಾಷಾ ಮಂಡಳ್ ಅಸಲಿ ಏಕ್ ಅಖಿಲ್ ಭಾರತ್ ಮಟ್ಟಾಚಿ ಸರ್ತ್ ಚಲೊವ್ನ್ ವ್ಹರೊಂಕ್ ಖುಶಿ ಪಾವ್ತಾ ಮ್ಹಣೊನ್ ಆಪ್ಲ್ಯಾ ಉಲೊವ್ಪಾಂತ್ ತಾಣೆಂ ಸಾಂಗ್ಲೆಂ. ಉಪ್ರಾಂತ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಉಲೊವ್ನ್ ಟ್ರಸ್ಟಾಚೆ ಶೆವೊಟ್, ಮಿಸಾಂವ್, ವಾವ್ರ್ ಹಾಜರ್ ಆಸಲ್ಲ್ಯಾಂಚ್ಯಾ ಹುಜಿರ್ ದವರ‍್ಲೆ.
ಸ್ಪರ್ಧ್ಯಾಂತ್ ಭಾಗ್ ಘೆತಲ್ಲ್ಯಾ ಸರ್ವಾಂಕ್ ಕವಿತಾ ಪಬ್ಲಿಕೇಶನ್ಸಾಚಿಂ ಪುಸ್ತಕಾಂ ದಿಲಿಂ. ವಿಂಚುನ್ ಆಯಿಲ್ಲ್ಯಾ ಸಾತ್ ಜಣಾಂಕ್ ರುಪಯ್ 300 ನಗ್ದೆಚೆಂ ಇನಾಮ್ ದಿಲೆಂ.
ಫೈನಲಾಕ್ ವಿಂಚುನ್ ಆಯಿಲ್ಲಿಂ / फैनलाक विंचून आयिल्लीं:
कात्यायिनी घाटवाल, युगा आडार्कार, वरषा कवळेकार, निकिता भोंसले,
ಕಾತ್ಯಾಯಿನಿ ಘಾಟ್ವಾಲ್, ಯುಗಾ ಆಡಾರ್ಕಾರ್, ವರ್ಷಾ ಕವ್ಳೆಕಾರ್, ನಿಕಿತಾ ಭೋಂಸ್ಲೆ,
सुविना पाल्कर, पूर्ण गावंकार, रेश्मा सुरलेकार
ಸುವಿನಾ ಪಾಲ್ಕರ್, ಪೂರ್ಣ ಗಾಂವ್ಕಾರ್, ರೇಶ್ಮಾ ಸುರ್ಲೆಕಾರ್
कविता ट्रसट, अखील भारत कोंकणी कविता वाचन सर्त - पणजी फेरियेंत सात जणांक विंचलें
कविता ट्रसटान चलोवन व्हर्च्या अखील भारत कोंकणी कविता वाचन सर्तेचो पणजी शेरांतलो पावंडो ह्याच सपटेंबर ६ तारिकेर चलोन, सात युवजणांक २०१३ वर्साच्या जनेर १३ तारिकेर चल्च्या निमाण्या पावंड्याक विंचून काडलां.
पणजी शेरांतल्या टी. बी. कून्हा सभासालांत, कोंकणी भाषा मंडळ गोंय हांच्या सहकारान चलल्ल्या ह्या स्पर्ध्यांत पंद्रा थावन तीस वर्सां भितर्ल्या युवजणांक भाग घेवंक आवकास आसल्लो. भाग घेतल्यांक आपणाची या हेरांची कविता वाचुंक संद्राप करून दिल्लो. वाचन कर्ची कविता देड मिनुटां थावन तीन मिनुटां भितर आसुंयेत आसल्ली.
हे कविता सर्तेक कविता ट्रसटाचे ट्रसटी एंड्र्यू एल डिकुन्हा, विलियम पायस तशें किशू बार्कूर वोरयणार जावन बसल्ले. आन्येकलो ट्रसटी वितोरी कार्कळान मांचियेवयली जवाब्दारी घेतल्ली.
सूर्वेर गोंय कोंकणी भाषा मंडळाचो अध्यक्ष चेतन आचार्यान सर्वांक येवकार दिलो. पयले पावटीं कविता ट्रसटा तसल्या एका संस्थ्या सांगाता मेळोन भाषा मंडळ असली एक अखील भारत मट्टाची सर्त चलोवन व्हरोंक खुशी पावता म्हणोन आपल्या उलोवपांत ताणें सांगलें. उपरांत कविता ट्रसट अध्यक्ष मेलवीन रोड्रिगस उलोवन ट्रसटाचे शेवोट, मिसावं, वावर हाजर आसल्ल्यांच्या हुजीर दवर्ले.
स्पर्ध्यांत भाग घेतल्ल्या सर्वांक कविता पबलिकेशन्साचीं पुसतकां दिलीं. विंचून आयिल्ल्या सात जणांक रुपय ३०० नगदेचें इनाम दिलें.