Kavita Khobro

ಸಮಾಜಾಕ್ ಬರೆಂ ಚಿಂತಪ್ ದೀಂವ್ಕ್ ಸಕ್ಚೆ ಕವಿ ಕೊಂಕಣಿಂತ್ ಆಸಾತ್: ಫಾ ಮೆಂಡೊನ್ಸಾ

ಸಮಾಜಾಕ್ ಬರೆಂ ಚಿಂತಪ್ ದೀಂವ್ಕ್ ಸಕ್ಚೆ ಕವಿ ಕೊಂಕಣಿಂತ್ ಆಸಾತ್,
ಬಾರ್ಕೂರ್ ಕವಿಗೋಷ್ಟಿಂತ್ ಫಾ ವಲೇರಿಯನ್ ಮೆಂಡೊನ್ಸಾ

ಬಾರ್ಕೂರ್ ಚೌಳಿಕೇರಿಚ್ಯಾ ವಿಸ್ತಾರ್ ತಳ್ಯಾಚ್ಯಾ ದಾಂಡ್ಯಾರ್, ಸ್ಟೇನಿ ಆನಿ ಗ್ರೆಟ್ಟಾ ಲುವಿಸಾಂಗೆಲ್ಯಾ ಘರ‍್ಚ್ಯಾ ಆಂಗ್ಣಾಂತ್, ಕವಿತಾ ಟ್ರಸ್ಟಾನ್ ಹ್ಯಾಚ್ ನವೆಂಬ್ರಾಚೆ 18 ತಾರಿಕೆರ್ ಮಾಂಡುನ್ ಹಾಡಲ್ಲಿ ಕವಿಗೋಷ್ಟಿ, ಸಾದರ್ ಜಾಲ್ಲ್ಯಾ ಕವಿತಾಂಕ್ ಲಾಗೊನ್, ರಸಿಕಾಂಚ್ಯಾ ಪ್ರತಿಸಾದಾಕ್ ಲಾಗೊನ್ ಆನಿ ಪ್ರಕೃತಿಚ್ಯಾ ಸೊಭಾಯೆಕ್ ಲಾಗೊನ್ ಮತಿಂತ್ ಸದಾಂಕಾಳ್ ಥಿರ್ ಉರ‍್ಚೆ ತಸಲಿ ಜಾಂವ್ಕ್ ಪಾವ್ಲಿ.

ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸುರ‍್ವೆರ್ ಹಾಜರ್ ಆಸಲ್ಲ್ಯಾಂಕ್ ಯೆವ್ಕಾರ್ ಮಾಗೊನ್ ಬಾರ್ಕೂರ್ ಗಾಂವ್ಚೊ ಲೋಕ್ ತಶೆಂ ಕೊಂಕಣಿ ಕವಿತೆಕ್ ಆಸ್ಚಿ ಸೈರಿಕ್ ಹಾಚೆವಿಶಿಂ ಪ್ರಸ್ತಾಪ್ ಕಾಡ್ಲೊ. ಕೊಂಕಣಿ ಕವಿತೆಚ್ಯಾ ನಾಂವಾರ್ ಖಂಯ್ಚ್ಯಾಯ್ ಗಾಂವಾಂತ್ ಮಾಟವ್ ಘಾಲಾ ತರ್, ತೊ ಪಯ್ಲೆ ಪಾವ್ಟಿಂ ಬಾರ್ಕೂರಾಂತಚ್ ಅಶೆಂ ತಾಣೆಂ ಸಾಂಗ್ಲೆಂ. ಹ್ಯಾ ಸಂದರ್ಭಾರ್ ಬಾರ್ಕೂರ‍್ಚೆ ಕವಿ ಕಿಶೂ ಬಾರ್ಕೂರ್, ಎರಿಕ್ ಸೋನ್ಸ್, ಪಿ ಜೆ ಕರುಗಳ್ನಡೆ, ಎಂಟನಿ ಬಾರ್ಕೂರ್ ಆನಿ ನೆಲ್ಸ್ ಬಾರ್ಕೂರ್ ಹಾಂಚೊ ಉಡಾಸ್ ಕಾಡುಂಕ್ ತೊ ವಿಸರ‍್ಲೊನ. ಆಯ್ಚ್ಯಾ ಕಾಳಾರ್ ಮನೀಸ್ ವೆವ್ಹಾರಿಕ್ ಸಂಗ್ತಿಂನಿ ಇತ್ಲೊ ಬುಡೊನ್ ಗೆಲಾ, ತಾಚಿಂ ಪಂಚೇಂದ್ರಿಯಾಂ ಸಗ್ಳಿಂ ಬಡ್ಡ್ ಜಾಲ್ಯಾಂತ್, ಮಾತಿ ಖೆಲ್ಯಾಂತ್. ಮನ್ಶಾಕ್ ನಾಂವಾಕ್ ಮಾತ್ರ್ ಮನೀಸ್ ಉರ‍್ಲಾ. ತಾಕಾ ಪರ್ತ್ಯಾನ್ ಏಕ್ ಪಾವ್ಟಿಂ ಮನ್ಶಾಪಣಾಕ್ ಆಪೊವ್ನ್ ಹಾಡಿಜಾಯ್ ಜಾಲ್ಯಾರ್ ಕವಿತಾ ಗರ್ಜೆಚಿ ಆಸಾ. ಕವಿತಾ ಪಂಚೇಂದ್ರಿಯಾಂಕ್ ಮಾಂಡಲ್ಲಿಂ ಖೊವ್ಳಾಂ ನಿಕ್ಳಾಂವ್ಕ್ ಉಪ್ಕಾರ‍್ತಾ ಅಶೆಂ ತಾಣೆಂ ಸಾಂಗ್ಲೆಂ.

 

ಕವಿಗೋಷ್ಟಿಚೆಂ ಅಧ್ಯಕ್ಷಪಣ್ ಎರಿಕ್ ಸೋನ್ಸಾನ್ ಘೆತಲ್ಲೆಂ.

ಕ್ಲೊಡಿ ಬ್ರಹ್ಮಾವರಾನ್ ನಾಪಾಸ್ ಕವಿತಾ ಬರಯಿಲ್ಲೊ ಕಸೊ ಕವಿ ಜಾಲೊ ಮ್ಹಳ್ಳಿ ಕವಿತಾ ವಾಚ್ಲಿ ತರ್, ಎಂಟನಿ ಬಾರ್ಕುರಾನ್ ಸ್ತ್ರೀಯಾಂಚೆಂ ಬಳ್ ವರ್ಣುಂಚಿ ‘ಪಾತ್ರಧಾರಿ’ ಕವಿತಾ ವಾಚ್ಲಿ. ವಿನ್ಸಿ ಪಿಂಟೊ ಆಂಜೆಲೊರಾನಾ ದೇವ್ ಪಡ್ಲೊ ಲಜೆಕ್ ಕವಿತಾ ವಾಚ್ಲಿ ತರ್, ಕಿಶೂ ಬಾರ್ಕೂರಾನ್ ಪಿ ಜೆ ಕರುಗಳ್ನಡೆಚಿ ನಿಮಾಣಿ ಸೈರಿಕ್ ಕವಿತಾ ಪೇಶ್ ಕೆಲಿ. ಸ್ಟೀವನ್ ಕ್ವಾಡ್ರಸಾನ್ ಹರಿಶ್ಚಂದ್ರ ಕಾವ್ಯಾಂತ್ಲ್ಯೊ ಕೊಂಕಣಿಕ್ ಅನುವಾದ್ ಕೆಲ್ಲ್ಯೊ ವಿಂಚ್ಲಲ್ಯೊ ತೀನ್ ಷಟ್ಪದಿ ವಾಚ್ತಾನಾ, ಎರಿಕ್ ಸೋನ್ಸಾನ್ ಸಾಂಗಾ ಸಾಂಗಾತಾ ತ್ಯೊ ವೊಳಿ ಗಾವುನ್ ದಾಕಯ್ಲ್ಯೊ. ಮನು ಬಾಹ್ರೇನಾನ್ ಮಾಂಕ್ಡಾಚಿ ಉಪ್ಕಾರಾಚಿ ಕರ್ನಿ ವಾಚುನ್ ಸಾಂಗ್ಲಿ ತರ್ ಮೆಲ್ವಿನ್ ರೊಡ್ರಿಗಸಾನ್ ‘ಚಡ್ತಿಕ್ ತೆಗ್’ ಕವಿತಾ ವಾಚ್ಲಿ. ಕಿಶೂ ಬಾರ್ಕೂರಾನ್ ಆಪ್ಲ್ಯಾ ಧಾಕ್ಟ್ಯಾ ದೆವಾಚಿ ಭುರ್ಗಿಂ ಪುಸ್ತಕಾಂತ್ಲಿ ಕವಿತಾ ವಾಚನ್ ಕೆಲಿ ತರ್ ಎಂಡ್ರ್ಯೂ ಎಲ್ ಡಿಕುನ್ಹಾನ್ ಕಣ್ಶೆಂಚೊ ಆದೇವ್ಸ್ ಆನಿ ಫೆಂಡ್ ಕವಿತಾ ವಾಚ್ಲ್ಯೊ. ಎರಿಕ್ ಸೋನ್ಸಾ ಸ್ತ್ರೀ ಸ್ವಾತಂತ್ರ್ಯಾಚೆರ್ ಸವಾಲಾ ಘಾಲ್ಚಿ ‘ಮ್ಹಾಕಾ ವಿಣ್ಗೆಂ ಜಾಂವ್ಕ್ ಜಾಯ್’ ಕವಿತಾ ಸಾದರ್ ಕೆಲಿ.

ಹ್ಯಾ ಸಂದರ್ಭಾರ್ ಬಾರ್ಕೂರ್ ಇಗರ್ಜೆಚೊ ಯಾಜಕ್ ಫಾ ವಲೇರಿಯನ್ ಮೆಂಡೊನ್ಸಾ ಹಾಜರ್ ಆಸೊನ್ ‘ಚೌಳಿಕೆರೆಚ್ಯಾ ಮುಕಾರ್ ರವಿ ಬುಡೊನ್ ವೆತಾನಾ, ಕವಿ ಜಾಗೊ ಜಾಲೊ’ ಮ್ಹಣ್ ಸಾಂಗೊನ್ ವಿಲ್ಫಿ ರೆಬಿಂಬಸಾಚ್ಯಾ ಪದಾಚೊ ಉಲ್ಲೇಕ್ ಕೆಲೊ. ‘ಆಪುಣ್ ಸರ್ವಯ್ ಸಮ್ಜೊಂಕ್ ಸಕ್ಲೊಂ ಮ್ಹಣ್ ಸಾಂಗಿನಾ. ಪುಣ್ ಜ್ಯೊ ಕವಿತಾ ಹಾಂವ್ ಸಮ್ಜೊಂಕ್ ಸಕ್ಲಾಂ ತಾಂತುಂ ಸಂತೊಸ್ ಪಾವ್ಲಾಂ’ ಮ್ಹಣೊನ್ ತಾಂಣಿ ಸಾಂಗ್ಲೆಂ. ಮಿಲಾರ್ ಇಸ್ಕೊಲಾಂತ್ ಆಸ್ತಾನಾ ಆಪ್ಣೆಂ ಮಧ್ಯಾನೆ ರಾತಿಂ ಉಟೊನ್ ಕವಿತಾ ಬರಯಿಲ್ಲೆವಿಶಿಂ ತಾಣೆಂ ಉಡಾಸ್ ಕಾಡ್ಲೊ ಮಾತ್ರ್ ನ್ಹಯ್, ಫಾ ಪ್ರತಾಪ್ ನಾಯ್ಕಾನ್ ಸಂಪಾದನ್ ಕೆಲ್ಲ್ಯಾ ಕಾನಡಿ ಮಾತಿ ಕೊಂಕಣಿ ಕವಿ ಪುಸ್ತಕಾಂತ್ ಆಪ್ಣಾಚ್ಯೊ ದೋನ್ ಕವಿತಾ ಛಾಪುನ್ ಆಯಿಲ್ಲೆವಿಶಿಂ ತಾಣೆಂ ಸಾಂಗ್ಲೆಂ.

‘ಸಮಾಜೆಕ್ ಬರೆಂ ಚಿಂತಪ್ ದೀಂವ್ಕ್ ಸಕ್ಚೆ ತಸಲೆ ಕವಿ ಆಮ್ಚೆ ಮಧೆಂ ಆಸಾತ್ ಮ್ಹಳ್ಳೊ ಸಂತೊಸ್ ಮ್ಹಾಕಾ ಜಾತಾ’ ಮ್ಹಣೊನ್ ಸಾಂಗಲ್ಲ್ಯಾ ಫಾ ವಲೇರಿಯನ್ ಮೆಂಡೊನ್ಸಾನ್ ಆಪ್ಲ್ಯಾ ಉಲೊವ್ಪಾಂತ್ ಠಾಗೋರಾಚ್ಯಾ ಕವಿತೆಂಚೊ ಉಲ್ಲೇಕ್ ಕೆಲೊ.

ಶೈನಿ ಲುವಿಸ್ ಆನಿ ಸನ್ನಿ ಲುವಿಸಾನ್ ಸಗ್ಳೆಂ ಕಾರ್ಯೆಂ ಮಾಂಡುನ್ ಹಾಡ್ಚ್ಯಾಂತ್ ಸಹಕಾರ್ ದಿಲ್ಲೊ ತರ್ ಆಲ್ವಿನ್ ಆಂದ್ರಾದೆನ್ ಹಾಜರ್ ಆಸಲ್ಲ್ಯಾಂಕ್ ಮಾನ್ನಿ, ಪತ್ರಾಡೆ ತಶೆಂ ಮುಗಾಉದಕ್ ಪಿಯೆಂವ್ಕ್ ದೀವ್ನ್ ಸತ್ಕಾರ್ ಕೆಲೊ.

ಬಾರ್ಕೂರಾಂತ್ ಜಾಂವ್ಚಿ ಹಿ ತಿಸ್ರಿ ಕವಿಗೋಷ್ಟಿ. ಚ್ಯಾರ್ ವರ್ಸಾಂ ಆದಿಂ ಹ್ಯಾಚ್ ಗಾಂವಾಂತ್ ದಿ ಎಕ್ಸಪ್ರೆಶನ್ಸ್ ಹಾಂಚ್ಯಾ ಸಾಂಗಾತಾಂತ್ ಕವಿತಾ ಫೆಸ್ತ್ ಸೈತ್ ಚಲ್ಲಾಂ.

-ತಸ್ವೀರ್ ಕುರ್ಪಾ: ಅನಿರುಧ್ ಗೊನ್ಸಾಲ್ವಿಸ್ ಆನಿ ಕಿಶೂ ಬಾರ್ಕೂರ್

 

समाजाक बरें चिंतप दीवंक सकचे कवी कोंकणिंत आसात,
बार्कूर कविगोषटिंत फा वलेरियन मेंडोन्सा

बार्कूर चौळिकेरिच्या विसतार तळ्याच्या दांड्यार, स्टेनी आनी ग्रेट्टा लुविसांगेल्या घर‍्च्या आंगणांत, कविता ट्रसटान ह्याच नवेंबराचे १८  तारिकेर मांडून हाडल्ली कविगोषटी, सादर जाल्ल्या कवितांक लागोन, रसिकांच्या प्रतिसादाक लागोन आनी प्रकृतिच्या सोभायेक लागोन मतिंत सदांकाळ थीर ऊर‍्चे तसली जावंक पावली.

कविता ट्रसटाचो अध्यक्ष मेलवीन रोड्रिगसान सूर‍्वेर हाजर आसल्ल्यांक येवकार मागोन बार्कूर गावंचो लोक तशें कोंकणी कवितेक आसची सैरीक हाचेविशीं प्रसताप काडलो. कोंकणी कवितेच्या नांवार खंयच्याय गांवांत माटव घाला तर, तो पयले पावटीं बार्कूरांतच अशें ताणें सांगलें. ह्या संदर्भार बार्कूर‍्चे कवी किशू बार्कूर, एरीक सोन्स, पी जे करुगळनडे, एंटनी बार्कूर आनी नेल्स बार्कूर हांचो उडास काडुंक तो विसर‍्लोन. आयच्या काळार मनीस वेव्हारीक संग्तिंनी इतलो बुडोन गेला, ताचीं पंचेंद्रियां सगळीं बड्ड जाल्यांत, माती खेल्यांत. मनशाक नांवाक मात्र मनीस ऊर‍्ला. ताका पर्त्यान एक पावटीं मनशापणाक आपोवन हाडिजाय जाल्यार कविता गर्जेची आसा. कविता पंचेंद्रियांक मांडल्लीं खोवळां निकळावंक उपकार‍्ता अशें ताणें सांगलें.

कविगोषटिचें अध्यक्षपण एरीक सोन्सान घेतल्लें.

क्लोडी ब्रह्मावरान नापास कविता बरयिल्लो कसो कवी जालो म्हळ्ळी कविता वाचली तर, एंटनी बार्कुरान स्त्रीयांचें बळ वर्णुंची ‘पात्रधारी’ कविता वाचली. विन्सी पिंटो आंजेलोराना देव पडलो लजेक कविता वाचली तर, किशू बार्कूरान पी जे करुगळनडेची निमाणी सैरीक कविता पेश केली. स्टीवन क्वाड्रसान हरिश्चंद्र काव्यांतल्यो कोंकणीक अनुवाद केल्ल्यो विंचलल्यो तीन षटपदी वाचताना, एरीक सोन्सान सांगा सांगाता त्यो वोळी गावून दाकयल्यो.  मनू बाह्रेनान मांकडाची उपकाराची कर्नी वाचून सांगली तर मेलवीन रोड्रिगसान ‘चडतीक तेग’ कविता वाचली. किशू बार्कूरान आपल्या धाकट्या देवाची भुर्गीं पुसतकांतली कविता वाचन केली तर एंड्र्यू एल डिकुन्हान कणशेंचो आदेवस आनी फेंड कविता वाचल्यो. एरीक सोन्सा स्त्री स्वातंत्र्याचेर सवाला घाल्ची ‘म्हाका विणगें जावंक जाय’ कविता सादर केली.

ह्या संदर्भार बार्कूर इगर्जेचो याजक फा वलेरियन मेंडोन्सा हाजर आसोन ‘चौळिकेरेच्या मुकार रवी बुडोन वेताना, कवी जागो जालो’ म्हण सांगोन विलफी रेबिंबसाच्या पदाचो उल्लेक केलो.  ‘आपूण सर्वय समजोंक सकलों म्हण सांगिना. पूण ज्यो कविता हावं समजोंक सकलां तांतूं संतोस पावलां’ म्हणोन तांणी सांगलें. मिलार इसकोलांत आसताना आपणें मध्याने रातीं उटोन कविता बरयिल्लेविशीं ताणें उडास काडलो मात्र न्हय, फा प्रताप नायकान संपादन केल्ल्या कानडी माती कोंकणी कवी पुसतकांत आपणाच्यो दोन कविता छापून आयिल्लेविशीं ताणें सांगलें. 

‘समाजेक बरें चिंतप दीवंक सकचे तसले कवी आमचे मधें आसात म्हळ्ळो संतोस म्हाका जाता’ म्हणोन सांगल्ल्या फा वलेरियन मेंडोन्सान आपल्या उलोवपांत ठागोराच्या कवितेंचो उल्लेक केलो.

शैनी लुवीस आनी सन्नी लुविसान सगळें कार्यें मांडून हाडच्यांत सहकार दिल्लो तर आलवीन आंद्रादेन  हाजर आसल्ल्यांक मान्नी, पत्राडे तशें मुगाउदक पियेवंक दीवन सत्कार केलो.

बार्कूरांत जावंची ही तिस्री कविगोषटी. च्यार वर्सां आदीं ह्याच गांवांत दी एक्सपरेशन्स हांच्या सांगातांत कविता फेसत सैत चल्लां.

-तस्वीर कुर्पा: अनिरूध गोन्सालवीस आनी किशू बार्कूर



Title : ಸಮಾಜಾಕ್ ಬರೆಂ ಚಿಂತಪ್ ದೀಂವ್ಕ್ ಸಕ್ಚೆ ಕವಿ ಕೊಂಕಣಿಂತ್ ಆಸಾತ್: ಫಾ ಮೆಂಡೊನ್ಸಾ

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.