ನೇತ್ರಾವತಿ-ಜುಂವಾರಿ ಯುವ ಕಾವ್ಯಸಂಗಮಾಂತ್ ಯುವಜಣಾಂಚ್ಯೊ ರಂಗೀನ್ ಕವಿತಾ

ಸೈರ್‍ಯಾಂನಿ ಕವಿಗೋಷ್ಟಿಕ್ ಹಾಜರ್ ಜಾಲ್ಲ್ಯಾ ಯುವಕವಿಂಕ್ ಗುಲೊಬ್ ದೀವ್ನ್ ವೇದಿಕ್ ಯೆವ್ಕಾರ್ ಮಾಗ್ಲೊ.

"ಯುವಕವಿ ಕಿತೆಂ ಚಿಂತುನ್ ಆಸಾತ್, ಬದ್ಲಲ್ಲ್ಯಾ ಆಧುನಿಕ್ ಸಮಾಜಾ ಥಂಯ್ ತೆ ಕಶೆಂ ಸ್ಪಂದನ್ ಕರುನ್ ಆಸಾತ್, ತಾಂಕಾಂ ಕಿತೆಂ ಭೊಗ್ತಾ ಹೆಂ ಸಕ್ಕಡ್ ಉತ್ರಾಲ್ಲ್ಯಾ ಕಾಳಾಂತ್ ಜಲ್ಮಲ್ಲೆ ಪಳೆವ್ನ್ ಆಸಾತ್ ತರೀ ಭೊಗುನ್ ನೆಣಾಂತ್. ಆಧುನಿಕ್ ಸವ್ಲತೆಂಚೊ, ಸುವಿಧಾಂಚೊ ಯುವಜಣ್ ಜಶೆಂ ವಾಪರ್ ಕರ್ತಾತ್, ತಶೆಂ ಮ್ಹಾಲ್ಗಡೆ ಕರಿನಾಂತ್. ಪುಣ್ ಯುವಜಣಾಂನಿ ಆಪ್ಲ್ಯಾ ಬರ್ಪಾಂನಿ, ಸಾಹಿತ್ಯಾಂತ್ ಅಸಲ್ಯಾ ಭೊಗ್ಣಾಂಕ್ ಉತ್ರಾಂ ದಿಲಿಂ ತರ್, ನವ್ಯಾ ಕಾಳಾಚೆಂ ಚಿಂತಪ್ ಕಶೆಂ ಆಸ್ತಲೆಂ ತೆಂ ಹೆರಾಂಕಯ್ ಸಮ್ಜತಲೆಂ" -ಅಶೆಂ ಆಪ್ಲ್ಯಾ ಉಲೊವ್ಪಾಂತ್ ಮೆಲ್ವಿನ್ ರೊಡ್ರಿಗಸ್ ಮ್ಹಣಾಲೊ.

"ಆದ್ಲ್ಯಾ ಕಾಳಾರ್ ಯುವಜಣ್ ಮಾಂಕ್ಡಾಬರಿ ಚಡ್ತಾಲೆ. ಫಾತರ್ ಉಡೊವ್ನ್ ತೊರಾಂ ಝಡಯ್ತಾಲೆ, ಹಿತ್ಲಾಂಕ್ ರಿಗೊನ್ ಆಂಬೆ ಚೊರ್ತಾಲೆ. ಆಯ್ಚ್ಯಾ ಯುವಜಣಾಂಚೆ ಮತಿಂತ್ಲಿ ಆಂಬ್ಯಾಚಿ ಕಲ್ಪನಾ ಮ್ಹಳ್ಯಾರ್ ಫಕತ್ ಸೂಪರ್ ಮಾರ್ಕೆಟಿಂತ್ಲ್ಯಾ ಆಂಬ್ಯಾಚಿ, ಯಾ ಆವಯ್ನ್ ಹಾಡ್ನ್ ಫ್ರಿಡ್ಜಾಂತ್ ದವರಲ್ಲ್ಯಾಚಿ ಯಾ ಚೀರ್ನ್ ಕಾಪಾಂ ಕರ್ನ್ ತೊಂಡಾಕ್ ದಿಲ್ಲ್ಯಾಚಿ ಮ್ಹಣೊನ್ ಹಾಂವ್ ಸಮ್ಜತಾಂ ಅಶೆಂ ಮೆಲ್ವಿನ್ ಮ್ಹಣಾಲೊ. ಆಪ್ಲ್ಯಾ ತರ್ನಾಟ್ಪಣಾರ್ ದಿಸಾಕ್ ತೀನ್-ಚ್ಯಾರ್ ಪತ್ರಾಂ ಬರಯಿಲ್ಲ್ಯಾಚೊ ಪ್ರಸ್ತಾಪ್ ಕಾಡುನ್, ಆತಾಂಚೆ ಯುವಜಣ್ ವೊಲಿಭಿತರ್ಲ್ಯಾನ್ ಎಸ್ಸೆಮ್ಮೆಸ್ ಧಾಡ್ಚ್ಯಾಂತ್ ರಾತಿ ಪಾಶಾರ್ ಕರುನ್ ಆಸಾತ್ ಮ್ಹಣಲಾಗ್ಲೊ. ಕನ್ಶೆನ್ಶುವಲ್ ಸೆಕ್ಸಾಚಿ ಪ್ರಾಯ್ ಆಟ್ರಾ ಥಾವ್ನ್ ಸೊಳಾಕ್ ದೆಂವಂವ್ಚೆವಿಶಿಂ ಉಲಯಿಲ್ಲ್ಯಾ ತಾಣೆಂ, ಆಯ್ಚ್ಯಾ ಪಂದ್ರಾವರ್ಸಾಂಚ್ಯಾ ಯುವಜಣಾಂಕ್ ಸೆಕ್ಸ್ ಆಧಾರುಂಕ್ ಭಿರಾಂತ್ ನಾ" ಮ್ಹಣೊನ್ ದಾಕ್ಲೊ ದೀವ್ನ್ ಸಾಂಗ್ಲೆಂ.

ಸಮಾಜ್ ಬದ್ಲಲ್ಯಾ, ಚಿಂತಪ್ ಬದಲ್ಲಾಂ. ಆಯ್ಚ್ಯಾ ಕಾಳಾಚೆ ಪಾಟ್ ಭುಂಯ್ಚೆರ್ ರಾವೊನ್ ಆಯ್ಚೊ ಯುವಜಣ್ ಕಶೆಂ ಚಿಂತಾ, ಕಿತ್ಯಾಕ್ ಚಿಂತಾ - ಮ್ಹಳ್ಳೆಂ ಯುವಜಣಾಂನಿ ಆಪ್ಲ್ಯಾ ಬರ್ಪಾಂನಿ ಸಾಂಗೊಂಕ್ ಜಾಯ್. ಕವಿತಾ ಹಾಕಾ ಉಂಚ್ಲೆಂ ಮಾಧ್ಯಮ್. ತ್ಯಾ ದೆಕುನ್ ಹೆಂ ಯುವಕಾವ್ಯ ಸಂಗಮ್ ಘಡೊವ್ನ್ ಹಾಡ್ಲಾಂ" ಅಶೆಂ ಮೆಲ್ವಿನಾನ್ ಸಾಂಗ್ಲೆಂ.

ಯುವಕವಿಂನಿ ಮ್ಹಾಲ್ಗಡ್ಯಾ ಬರೊವ್ಪ್ಯಾಂ ಲಾಗಿಂ ಸಂವಾದ್ ಚಲೊಂವ್ಕ್ ಪಾಟಿಂ ಸರ್ಚೆಂ ನ್ಹಯ್. ತಾಂಚೆಲಾಗಿಂ ಉಲವ್ನ್ ಜೊಡಲ್ಲೊ ಅನ್ಭೋಗ್ ಫುಡಾರಾಂತ್ಲೆ ಸಾಹಿತ್ಯಾಚೆ ವಾಟೆರ್ ಖಂಡಿತ್ ಉಪ್ಕಾರ್ತಲೊ" ಅಶೆಂ ತಾಣೆಂ ಯುವಜಣಾಂಕ್ ಹಿಶಾರೊ ದಿಲೊ.

ತ್ಯಾ ಉಪ್ರಾಂತ್ ಚಲಲ್ಲೆ ಕವಿಗೋಷ್ಟಿಂತ್ ಗೊಂಯ್ಚ್ಯಾ ಅಮೇಯ್ ನಾಯ್ಕಾನ್ ‘ಆವಯ್ಚೊ ಮಾರ್’, ‘ಆತ್ಮಹತ್ಯಾ’ ಕವಿತಾ ವಾಚ್ಲ್ಯೊ ತರ್ ವಿಲ್ಮಾ ಬಂಟ್ವಾಳಾನ್ `ಮುನ್ನಿ ಭಾಯ್ರ್ ಪಡ್ಲಾಂ', `ಪಂಟಿ' ಆನಿ `ವೊಂಬಾನಾ ಕಿತ್ಯಾ' ಕವಿತಾ ಸಾದರ್ ಕೆಲ್ಯೊ. ವಿಶ್ವಪ್ರತಾಪ್ ಪವಾರ್ ಹಾಣೆಂ `ಆಮುರ್ಪಿಕೆಂ ಸಪಣ್' ಆನಿ `ಕಾಂಯ್ ಉತ್ರಾಂ' ಕವಿತಾ ವಾಚ್ಲ್ಯೊ ತರ್ ಜೊವಿಟಾ ಸಿಕ್ವೇರಾನ್ `ಉಲಯ್ಗೊ ಬರೆಂ ಲಾಗ್ತಾ' ಆನಿ `ಸ್ತ್ರೀ' ಕವಿತಾ ಪೇಶ್ ಕೆಲ್ಯೊ. ಕ್ಲೆಮೆಂಟ್ ಫೆರ್ನಾಂಡಿಸಾನ್ `ಪಾಸ್ಖ್', `ನಾರಿ' ಆನಿ `ಮ್ಹೊಂವಾಚೊ ಮೂಸ್' ಕವಿತಾ ಸಾಂಗ್ಲ್ಯೊ ತರ್ ಸಿದ್ಧಿ ಶೇಟ್ ರಾಯ್ಕರ್ ಹಿಣೆಂ `ಹಾಂವ್ ಕೊಡು' ಆನಿ `ವಿಶ್ವಾಸ್ ಘಾತ್' ಕವಿತಾ ವಾಚುನ್ ಸಾಂಗ್ಲ್ಯೊ. ಜೈಸನ್ ಸಿಕ್ವೇರಾನ್ `ಧವೆಂ ಕಾಪಡ್', `ದುಡು' ಆನಿ `ದೊಳೆ ತುಜೆ' ಕವಿತಾ ವಾಚ್ಲ್ಯಾ ಉಪ್ರಾಂತ್ ನಿಮಾಣೆಂ ಶ್ರೀನಿಶಾ ನಾಯ್ಕಾನ್ `ಶಿಗ್ಮ್ಯಾ ಖೆಳ್', `ಪಳೆವ್ನ್ ತುಕಾ ಮ್ಹರ್ಯಾಂತ್ ಮ್ಹಜ್ಯಾ' ಕವಿತಾ ಗಾವುನ್ ದಾಕಯ್ಲ್ಯೊ.

ಟೊನಿ ಫೆರೊಸಾನ್ ಕವಿಂಚಿ ವೊಳಕ್ ಕರುನ್ ದಿಲಿ.

ಕವಿಗೋಷ್ಟಿಚೆಂ ಅಧ್ಯಕ್ಷಪಣ್ ಘೆತಲ್ಲ್ಯಾ ಎಚ್ಚೆಮ್ ಪೆರ್ನಾಳಾನ್ "ಆಯ್ಚೆ ಕವಿ ಬಂಡ್ವಾಳಶಾಹಿ ಆನಿ ಬಿಸ್ನೆಸ್‌ವಾಲ್ಯಾಂಚೆ ಗುಲಾಮ್ ಜಾತೇ ಆಸಾತ್. ತ್ಯಾದೆಕುನ್ ಹಿಂದಿ ಪದಾಂನಿ ಖಂಯ್ಚ್ಯಾಗಿ ಬ್ರಾಂಡಾಚಿಂ ನಾಂವಾಂ ಘಾಲ್ನ್ ಉತ್ರಾಂಚೆಂ ಸರ್ಕಸ್ ಕೆಲ್ಲೆಂ ಪಳೆಂವ್ಕ್ ಮೆಳ್ತಾ. ಕವಿ ಆಜ್ ದುಡ್ವಾ ಪಾಟ್ಲ್ಯಾನ್ ವಚೊನ್ ಭೃಷ್ಟ್ ಜಾತೇ ಆಸಾತ್" ಮ್ಹಳೆಂ.

ಕವಿಂನಿ ಸಾಮಾಜಿಕ್ ಗಜಾಲಿ ಸೊಧುನ್ ವಚಜಾಯ್ ಆನಿ ತಾಂಚೆವಿಶಿಂ ಬರಯ್ಜಾಯ್. ಎಕೆ ಕವಿತೆನ್ ವಾಚ್ಪ್ಯಾನ್ ಪ್ರತಿಕ್ರಿಯಾ ದಿಂವ್ಚೆದಿಶಿಂ ತಾಕಾ ಕದ್ವಳಾಯ್ಜೆ. ವಿಲ್ಫಿ ರೆಬಿಂಬಸಾನ್ ಭೋಪಾಲ್ ಗ್ಯಾಸ್ ಅನಾಉತಾವಿಶಿಂ ಪದ್ ಗಾಯ್ಲಲ್ಯಾವೆಳಾರ್ ಸಗ್ಳ್ಯಾ ಲೊಕಾಚಿಂ ಭಾವನಾಂ ಉಚಾಂಬಳ್ ಜಾಲ್ಲಿಂ. ಅಶೆಂ ಉಚಾಂಬಳ್ ಜಾಲ್ಲ್ಯಾ ಭೊಗ್ಣಾಂ ವರ್ವಿಂ ಆನಿಕಯ್ ಜಾಯ್ತ್ಯಾಂನಿ ಪದಾಂ ರಚ್ಲಿಂ ಆನಿ ಬರ್ಪಾಂ ಬರಯ್ಲಿಂ. ಕವಿತಾ ಮನೋರಂಜನಾಚಿ ವಸ್ತ್ ಮಾತ್ರ್ ನ್ಹಯ್, ತಿಣೆಂ ಭೊಗ್ಣಾಂ ಉಸಯ್ಜೆ ಪಡ್ತಾತ್" ಅಶೆಂ ಎಚ್ಚೆಮ್ ಪೆರ್ನಾಳ್ ಆಪ್ಲ್ಯಾ ಉಲೊವ್ಪಾಂತ್ ಮ್ಹಣಾಲೊ.

ಹ್ಯಾ ಕಾರ್ಯಾವೆಳಾರ್ ದಾಯ್ಜಿವರ್ಲ್ಡ್ ವೀಕ್ಲಿ ಸಂಪಾದಕ್ ಹೇಮಾಚಾರ್ಯ, ಕಲಾಕಾರ್ ಎಡ್ಡಿ ಸಿಕೇರ್, ರಾಕ್ಣೊ ಸಂಪಾದಕ್ ಫ್ರಾನ್ಸಿಸ್ ರೊಡ್ರಿಗಸ್, ಕಾದಂಬರಿಕಾರ್ ರೊನ್ ರೊಚ್ ಕಾಸ್ಸಿಯಾ, ಫಾ ಡೆನಿಸ್ ಕಾಸ್ತೆಲಿನೊ, ಲೇಖಕ್ ಎಡಿ ನೆಟ್ಟೊ, ಐರಿನ್ ಪಿಂಟೊ, ಗ್ಲೇಡಿಸ್ ರೇಗೊ, ಶಾಲಿನಿ ವಾಲೆನ್ಸಿಯಾ, ಆಂಡ್ರ್ಯೂ ಎಲ್ ಡಿಕುನ್ಹಾ, ವಿತೊರಿ ಕಾರ್ಕೊಳ್, ಗುರು ಬಾಳಿಗಾ, ಗೋಕುಲ್‌ದಾಸ್ ಪ್ರಭು, ಜೆರಿ ರಾಸ್ಕಿನ್ಹಾ, ವಲ್ಲಿ ಬೋಳಾ, ವಿತೊರಿ ಕಾರ್ಕೊಳ್, ಫ್ಲೋರಿನ್ ರೋಚ್ ಆನಿ ಹೆರಾಂ ಹಾಜರ್ ಆಸಲ್ಲಿಂ.

ह्या काऱ्यावेळार दायजिवरल्ड वीकली संपादक हेमाचाऱ्य, कलाकार एड्डी सिकेर, राकणो संपादक फ्रान्सीस रोड्रिगस, कादंबरिकार रोन रोच कास्सिया, फा डेनीस कासतेलिनो, लेखक एडी नेट्टो, ऐरीन पिंटो, ग्लेडीस रेगो, शालिनी वालेन्सिया, आंडऱ्यू एल डिकुन्हा, वितोरी कार्कोळ, गुरू बाळिगा, गोकूल‌दास प्रभू, जेरी रासकिन्हा, वल्ली बोळा, वितोरी कार्कोळ, फ्लोरीन रोच आनी हेरां हाजर आसल्लीं.