ಘಾಮಾಂತ್ ಬುಡಲ್ಲ್ಯಾಂಕ್ ಥಂಡಾಯೆಚೆಂ ವಾರೆಂ ವ್ಹಾಳಯಿಲ್ಲಿ ದೆರೆಬೈಲಾಂತ್ಲಿ ಕವಿಗೋಷ್ಟಿ
ಕವಿತಾ ಟ್ರಸ್ಟಾನ್ ಹ್ಯಾಚ್ ಎಪ್ರಿಲ್ 28 ತಾರಿಕೆರ್ ಆಯ್ತಾರಾ ಸಾಂಜೆರ್ ದೆರೆಬೈಲ್ ಕೊಟ್ಟಾರ್ ಕ್ರೊಸ್ ಲಾಗ್ಸಾರ್ ಆಸ್ಚ್ಯಾ ಕೊಂಕಣಿ ಲೇಖಕ್ ಪಾವ್ಲು ಮೊರಾಸಾಚ್ಯಾ ಘರ‍್ಚ್ಯಾ ಆಂಗ್ಣಾಂತ್ ಚಲೊವ್ನ್ ವೆಲ್ಲಿ ಗಿಮಾಳಿ ಕವಿಗೋಷ್ಠಿ, ಭಾಯ್ಲ್ಯಾ ಕಠಿಣ್ ಧಗಿಕ್ ಘಾಮಾಂತ್ ಬುಡಲ್ಲ್ಯಾ ಲೊಕಾಚ್ಯಾ ಮನಾಂಕ್ ಥಂಡಾಯೆಚೆಂ ವಾರೆಂ ದಿಂವ್ಚ್ಯಾಕ್ ಯಶಸ್ವಿ ಜಾಲಿ. ಮೋಗ್ ಸೊಡುನ್ ಹೆರ್ ವಿಷಯಾಂಚೆರ್ ಭಾಗ್ ಘೆತಲ್ಲ್ಯಾ ಆಟ್ರಾ ಕವಿಂನಿ ಆಪ್ಲ್ಯೊ ಕವಿತಾ ವಾಚ್ಲ್ಯೊ ಜಾಲ್ಯಾರ್, ಹೆ ಕವಿಗೋಷ್ಟಿಚೆಂ ಸುಂಕಾಣ್ ಕೊಂಕಣಿ ಕವಿ, ವಿಮರ್ಶಕ್ ತಶೆಂ ಕೋಶ್‌ಕಾರ್ ಸ್ಟೀವನ್ ಕ್ವಾಡ್ರಸ್ ಪೆರ್ಮದೆ ಹಾಣೆಂ ಘೆತಲ್ಲೆಂ.
ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸುರ‍್ವೆರ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ. ಆಪ್ಲ್ಯಾ ಉಲೊವ್ಪಾಂತ್ ದೆರೆಬೈಲ್ಚೊ ಗಾಂವ್ ಆಪ್ಣಾಕ್ ಮೊಗಾಚೊ, ಹ್ಯಾಚ್ ಗಾಂವಾಂತ್ ಆಪ್ಲೊ ಜಲ್ಮ್ ಜಾಲ್ಲೊ, ಹ್ಯಾ ಗಾಂವ್ಚ್ಯೊ ಹರ‍್ಯೆಕ್ ವಾಟೊ, ವಾಟೆ ವಯ್ಲಿ ಮಾತಿ ಆನಿ ಮಾತಿಯೆಂತ್ಲೆ ಫಾತರ್ ಆಪ್ಲ್ಯಾ ಪಾವ್ಲಾಂಕ್ ವೊಳ್ಕತಾತ್ ಮ್ಹಣೊನ್ ತಾಣೆ ಸಾಂಗ್ಲೆಂ. ಆಪ್ಲ್ಯಾ ಆಜ್ಯಾನ್ ಶಿಕಯಿಲ್ಲಿಂ ‘ಏಕ್ ಮುಡೊ ಕೊಣೆಂ ವೆಲೊ?’ ತಶೆಂ ‘ಆಡ್ಕುಲೊಗೊ ಬುಡ್ಕುಲೊ ತೆಲಾ ತುಪಾಚೊ’ ಗಿತಾಂ ತಾಣೆಂ ಉಡಾಸಾಂತ್ ಹಾಡ್ಲಿಂ. ದೆರೆಬೈಲ್ಚ್ಯಾ ಗಾಂವಾಂತ್ ಎ.ಟಿ.ಲೋಬೊ, ಜ್ಯೋ ಆರಾನ್ಹಾ ತಸಲ್ಯಾಂನಿ ನಾಟಕ್ ಶೆತಾಕ್ ಜಾಯ್ತೆಂ ಯೋಗದಾನ್ ದಿಲಾಂ; ರೈಮಂಡ್ ಲೋಬೊ, ಸಿಪ್ರಿ ದೆರೆಬೈಲ್, ಫೆಲಿಕ್ಸ್ ಸಲ್ಡಾನ್ಹಾ, ವಿನ್ಸಿ ರೆಬೆಲ್, ಇಂತ್ರಾಬ್, ಕಾರ್ಮೆಲಿಟಾ ಗೋವಿಯಸ್, ಜಿಲ್ಲಿ ಟೀಚೆರ್, ಕಾರ್ಮಿಣ್ ಟೀಚೆರ್, ಆಲ್ಬೀನಾ, ಮೀರಾ ತಸಲ್ಯಾಂನಿ ಕಲಾಕಾರ್ ಜಾವ್ನ್ ವ್ಹರ್ತೊ ವಾವ್ರ್ ಕೆಲಾ; ಪತ್ರಾವೊ ಭಾವ್, ತಾಂಚೊ ಬಾಪಯ್, ವಿಕ್ಟರ್ ಕೊನ್ಸೆಸೊ, ಲಿಝಿ ಕೊನ್ಸೆಸೊ, ಓಲ್ವಿನ್ ಡಿಕುನ್ಹಾ, ರೊನಿ ಡಿಕುನ್ಹಾ ತಸಲ್ಯಾಂನಿ ಸಂಗೀತ್ ಶೆತಾಕ್ ಮಹತ್ವಾಚಿ ದೇಣ್ಗಿ ದಿಲ್ಯಾ ಮ್ಹಣೊನ್ ಅಪ್ರೂಪಾಚೆ ತಾಣೆ ಉಡಾಸ್ ಕಾಡ್ಲೆ. ರೈಮಂಡ್ ಲೋಬೊ, ತಾಚಿ ಆವಯ್ ತಶೆಂ ಎಜಿಲ್ ಮಥಾಯಸ್ ತಸಲ್ಯಾಂಚಿ ದೇವ್ ಭಕ್ತ್, ನಿತಳ್ ಮನ್ ತಶೆಂ ಪರೋಪಕಾರಿ ಮನೋಭಾವ್ ತಾಣೆ ವಾಖಣ್ಲೊ ಮಾತ್ರ್ ನ್ಹಯ್ ರೈಮಂಡ್ ಲೋಬೊ ತಸಲ್ಯಾ ವ್ಯಕ್ತಿತ್ವಾ ಮುಕಾರ್ ಆಪ್ಣಾಚೆಂ ಫಕತ್ ಏಕ್ ಕಿರ್ಕೊಳ್ ವ್ಯಕ್ತಿತ್ವ್ ಅಶೆಂ ಸಾಂಗ್ಲೆಂ ಆನಿ ಥಂಯ್ಸರ್ ಹಾಜರ್ ಆಸಲ್ಲ್ಯಾ ತಾಕಾ ಗುಲೊಬಾಚೆಂ ಫುಲ್ ದೀವ್ನ್ ಮಾನ್ ದಿಲೊ.
ಕವಿತಾ ಟ್ರಸ್ಟಾಚ್ಯಾ ವಾವ್ರಾವಿಶಿಂ ಹ್ಯಾಚ್ ಸಂದರ್ಭಾರ್ ಮೆಲ್ವಿನಾನ್ ಮ್ಹಾಯೆತ್ ದಿಲಿ.
ಅಧ್ಯಕ್ಷಪಣ್ ಘೆತಲ್ಲ್ಯಾ ಸ್ಟೀವನ್ ಕ್ವಾಡ್ರಸಾನ್ ‘ಮನ್ಶಾಕುಳಾಚೆ ಸುರ‍್ವೆರ್ ಉತರ್ ಆಸಲ್ಲೆಂ ಆನಿ ಹೆಂ ಉತರ್ ಕಾವ್ಯೆಂ ಜಾವ್ನಾಸಲ್ಲೆಂ’ ಮ್ಹಣೊನ್ ಸಾಂಗ್ಲೆಂ. ಸುರ‍್ವಿಲೆ ಹರ‍್ಯೆಕ್ ಧಾರ್ಮಿಕ್ ಗೃಂಥ್ ಕಾವ್ಯೆಂ ಜಾವ್ನಾಸಲ್ಲೆ ಮ್ಹಣೊನ್ ತಾಣೆಂ ಸಾಂಗ್ಲೆಂ. ಆಪ್ಣೆಂ ಚಲೊವ್ನ್ ವೆಲ್ಲೆ ದಸ್ತುರೆ ಪ್ರಕಾರ್ ಬೆಂಗಾಲಿ ಕಾವ್ಯಾಚೆ ವೆವೆಗ್ಳೆ ಪಾಂವ್ಡೆ ಆನಿ ತಾಂಚೆ ತುಕ್ಡೆ, ಕವಿಗೋಷ್ಟಿ ಚಲಯ್ತಾಂ ಚಲಯ್ತಾನಾ ತಾಣೆಂ ಲೊಕಾ ಹುಜಿರ್ ದವರ‍್ಲೆ.
ಬೆಂಗಾಲಿ ಕಾವ್ಯೆಂ 9-10 ವ್ಯಾ ಶೆಕ್ಡ್ಯಾಂತ್ ಬುದ್ಧಿಸಮಾಂತ್ಲ್ಯಾ ವಜ್ರಾಯನಾಂತ್ಲ್ಯಾ ಚಾರ್ಯ ಪದಾ ದ್ವಾರಿಂ ಸುರು ಜಾಲ್ಲೆಂ, ಹಿಂ ಚಾರ್ಯ ಪದಾಂ ವಜ್ರಾಯನಾ ನಾಚಾ ವೆಳಾರ್ ಗಾಂವ್ಚೆ ತಸಲಿಂ ಮಿಸ್ತಿಕ್ ತಶೆಂ ಥಿಯೊಸೊಫಿಕಲ್ ಗಿತಾಂ ಜಾವ್ನಾಸಲ್ಲಿಂ. ಬಾರಾವ್ಯಾ-ತೆರಾವ್ಯಾ ಶೆಕ್ಡ್ಯಾಂತ್ ವೈಷ್ಣವ ಭಕ್ತಿ ಚಳುವಳೆವರ್ವಿಂ ಬೆಂಗಾಲಿ ಕವಿತಾ ಫುಲ್ಲಿ. ಕೃತಿ ಭಾಸ್ಕರ್ ಓಜಾ, ಚೈತನ್ಯ ಮಹಾಪ್ರಭು ಆನಿ ಹೆರ್ ವೈಷ್ಣವ ಸಂತಾಂನಿ ಬೆಂಗಾಲಿ ಕಾವ್ಯೆಂ ಲೊಕಾಮೊಗಾಳ್ ಕರುಂಕ್ ವ್ಹರ್ತಿ ಮ್ಹಿನತ್ ಘೆತ್ಲ್ಯಾ ಮ್ಹಣೊನ್ ಸ್ಟೀವನ್ ಕ್ವಾಡ್ರಸಾನ್ ಹ್ಯಾವೆಳಾರ್ ಸಾಂಗ್ಲೆಂ.
ಮೈಕಲ್ ಮಧುಸೂದನ್ ದತ್ತಾನ್ ಬೆಂಗಾಲಿ ಕಾವ್ಯಾಕ್ ನವೊ ಜೀವ್ ದಿಲೊ. ತಾಚ್ಯಾ ಉರ್ಬೆಭರಿತ್ ವಾವ್ರಾವರ್ವಿಂ ಬೆಂಗಾಲಿ ಕಾವ್ಯಾನ್ ನವ್ಯಾ ಯುಗಾಕ್ ಪ್ರವೇಸ್ ಕೆಲೊ. ನವ್ಯಾ ಯುಗಾಂತ್ಲ್ಯಾ ಕಾವ್ಯಾಮಧೆಂ ದತ್ತಾಚ್ಯಾ ಕಾವ್ಯಾಕ್ ಮಹತ್ವಾಚೆಂ ಸ್ಥಾನ್ ಆಸಾ. ಹ್ಯಾಚ್ ಸಂದರ್ಭಾರ್ ರಬೀಂದ್ರನಾಥ ಠಾಕೂರ್ ತಶೆಂ ಕ್ವಾಜಾ ನಸ್ರುಲ್ ಹಾಂಚ್ಯಾ ಯೋಗದಾನಾವಿಶಿಂ ಪ್ರೊ ಸ್ಟೀವನ್ ಕ್ವಾಡ್ರಸಾನ್ ವಿಶೇಸ್ ಥರಾನ್ ದಾಂಬೂನ್ ಸಾಂಗ್ಲೆಂ. ಮಿಸ್ತಿಕತಾ ಆನಿ ಮಾನವತಾವಾದ್, ಠಾಕೂರಾಚ್ಯಾ ಆನಿ ನಸ್ರುಲಾಚ್ಯಾ ಕಾವ್ಯಾಂನಿ ಭರಲ್ಲೊ ಜಾಲ್ಲ್ಯಾನ್ ಉಪ್ರಾಂತ್ಲ್ಯಾ ಹಜಾರಾಂನಿ ಕವಿಂಚೆರ್ ತಾಂಚೊ ಪ್ರಭಾವ್ ಪಡ್ಲೊ. ರಬೀಂದ್ರೊ ಸಂಗೀತ್ ತಶೆಂ ನಸ್ರುಲ್ ಸಂಗೀತ್ ಆಯ್ಚ್ಯಾ ದಿಸಾ ಜಾಲ್ಯಾರಿ ಬೆಂಗಾಲಿ ಕಾವ್ಯಾಥಾವ್ನ್ ಮೆಕ್ಳೆ ಕರುಂಕ್ ಜಾಯ್ನಾತಲ್ಲೆ ಅಪ್ರೂಪಾಚೆ ವಿಸ್ವೆ - ಅಶೆಂ ತಾಂಣಿ ಮ್ಹಳೆಂ.
ಹಂಗ್ರಿಸಮ್ ಚಳುವಳೆವಿಶಿಂ, ಪ್ರಕಲ್ಪನಾ ಚಳುವಳೆವಿಶಿಂ, ಸ್ತ್ರೀವಾದ್ ಚಳುವಳೆವಿಶಿಂ, ಸಾಬೊರ್ ಭಾಷಾ ಕೊಬಿತಾ ಚಳುವಳೆವಿಶಿಂ - ಸ್ಟೀವನಾನ್ ಉಲ್ಲೇಕ್ ಕೆಲೊ.
ಎಚ್ಚೆಮ್ ಪೆರ್ನಾಳಾನ್ ‘ಎಕಾ ಹೊಟ್ಲಾಚಿ ಕಾಣಿ’, ಆಂದ್ರು ಡಿಕುನ್ಹಾನ್ ‘ವೆಗಿಂ ಯೇ ಪಾವ್ಸಾ’, ಜೈಸನ್ ಸಿಕ್ವೇರಾನ್ ‘ಪರತ್ ವೋಟ್ ಆಯ್ಲಾ’, ಗ್ಲೇಡಿಸ್ ರೇಗೊನ್ ‘ಕವಿತಾ ಅಶೀಚ್ ಆಸ್ತಾ’, ವಾಲ್ಟರ್ ದಾಂತಿಸಾನ್ ‘ಪೊಟಾಂ ಮಧ್ಲೊ ಫರಕ್’, ಮಹೇಶ್ ಆರ್ ನಾಯಕಾನ್ ‘ಮ್ಹಗೆಲೊ ಪಯ್ಲೊ ಘಾಮ್’, ‘ಎಡ್ಡಿ ಶಿಕೆರಿನ್ ‘ಪಣ್ಟೆ ವಯ್ಲಿ ಜೀಬ್ ಉಜ್ಯಾಚಿ’, ಪಾವ್ಲು ಮೊರಾಸಾನ್ ‘ಆಶಾ, ಆಕಾಂಕ್ಷಾ’, ರೋಹನ್ ಆರ್ಕಬರೆನ್ ‘ಸನ್ವಾರಾಚೊ ಗಿರಾಯ್ಕ್’, ಸ್ಟೀವನ್ ಕ್ವಾಡ್ರಸಾನ್ ಗೀತಾಂಜಲಿಚೆ ಅನುವಾದಿತ್ ಸ್ಲೋಕ್ ತಶೆಂ ತಸ್ಲೀಮಾಚಿ ಅನುವಾದಿತ್ ಕವಿತಾ, ಓಸ್ಟಿನ್ ಡಿಕುನ್ಹಾನ್ ‘ಮ್ಹಾಕಾ ಗೊತ್ತು ನಾ’, ಮನು ಬಾಹ್ರೇನಾನ್ ‘ಆವಯ್ಚೊ ಮೋಗ್’, ರಿಚ್ಚಿ ಪಿರೇರಿನ್ ‘ಹಾಂವ್ ಬರಯ್ತಾಂ ಮ್ಹಜೆ ಖಾತೀರ್’, ನವೀನ್ ಕುಲ್ಶೇಕರಾನ್ ‘ಕೋಮಲ್ ತರ್ನಿ ಆಂಕ್ರಿ ಆಮ್ಚೆಂ ಬಾಳ್’, ಗುರು ಬಾಳಿಗಾನ್ ‘ಠರಾವ್’, ಚಾರ್ಲಿ ಸೊಜ್ ಯೆಯ್ಯಾಡಿನ್ ‘ಚತ್ರಾಯ್ ತುಕಾ ಪಾಕಿಸ್ತಾನಾ’, ವಿಲ್ಸನ್ ಕಟೀಲಾನ್ ‘ರಾಮಾಚ್ಯಾ ಆಯ್ತಾರಾ’ ಆನಿ ಮೆಲ್ವಿನ್ ರೊಡ್ರಿಗಸಾನ್ ‘ಝುಜ್’ ಕವಿತಾ ಹ್ಯಾ ವೆಳಾರ್ ಪೇಶ್ ಕೆಲ್ಯೊ.
ಹ್ಯಾಚ್ ಸಂದರ್ಭಾರ್ ಕಲಾಸಾಗರ್ ಸಂಸ್ಥ್ಯಾ ತರ್ಫೆನ್ ಪಾವನ್ಶಾಂವೊ ಜಲ್ಮಾದೀಸ್ ಎಪ್ರಿಲಾಂತ್ ಆಚರಣ್ ಕೆಲ್ಲ್ಯಾ ಲೇಖಕ್, ಕಥಾಕಾರ್ ಎಡಿ ನೆಟ್ಟೊಕ್ ಸನ್ಮಾನ್ ಕೆಲೊ. ಎಪ್ರಿಲ್ ಮ್ಹಯ್ನ್ಯಾಂತ್ ಜಲ್ಮಾದೀಸ್ ಆಚರಣ್ ಕೆಲ್ಲ್ಯಾ ಎಡಿ ನೆಟ್ಟೊನ್ ತಶೆಂ ಪಾವ್ಲು ಮೊರಾಸಾನ್ ಕೇಕ್ ಕಾತರ್ನ್ ಸಂತೊಸ್ ವಾಂಟುನ್ ಘೆತ್ಲೊ. ಕಲಾಸಾಗರ್ ಸಂಸ್ಥ್ಯಾಚೊ ಮುಕೆಲಿ ನವೀನ್ ಕುಲ್ಶೇಕರಾನ್ ಭಲಾಯ್ಕಿ ಮಾಗ್ಲಿ.
ಹ್ಯಾ ಕಾರ್ಯಾಕ್ ವಿಶ್ವ ಕೊಂಕಣಿ ಸರ್ದಾರ್ ಬಸ್ತಿ ವಾಮನ್ ಶೆಣೈ ತಶೆಂ ಕಾಣಿಕ್ ಪತ್ರಾಚೊ ಸ್ಥಾಪಕ್, ಪ್ರಕಾಶಕ್ ತಶೆಂ ಸಂಪಾದಕ್ ಆಂದ್ರು ಮೆಂಡೊನ್ಸಾ ಹಾಜರ್ ಆಸಲ್ಲೆ. ಬಸ್ತಿ ವಾಮನ್ ಶೆಣೈ ಉಲೊವ್ನ್, ಜಲ್ಮಾದೀಸ್ ಆಚರಣ್ ಕೆಲ್ಲ್ಯಾಂಕ್ ತಾಣೆಂ ಉಲ್ಲಾಸಿಲೆಂ.
ವಿತ್ತಿ ಕೊರೆಯಾನ್ ಹೆಂ ಕಾರ್ಯೆಂ ಚಲೊವ್ನ್ ವೆಲೆಂ. ಓಲ್ವಿನ್ ಡಿಕುನ್ಹಾ ತಶೆಂ ಪಂಗ್ಡಾನ್ ಉಲ್ಲಾಸುಂಚಿಂ ಗಾಣಾಂ ಗಾಯ್ಲಿಂ.
घामांत बुडल्ल्यांक थंडायेचें वारें व्हाळयिल्ली देरेबैलांतली कविगोषटी
कविता ट्रसटान ह्याच एपरील २८ तारिकेर आयतारा सांजेर देरेबैल कोट्टार क्रोस लागसार आसच्या कोंकणी लेखक पावलू मोरासाच्या घर्च्या आंगणांत चलोवन वेल्ली गिमाळी कविगोषठी, भायल्या कठीण धगीक घामांत बुडल्ल्या लोकाच्या मनांक थंडायेचें वारें दिंवच्याक यशस्वी जाली. मोग सोडून हेर विषयांचेर भाग घेतल्ल्या आट्रा कविंनी आपल्यो कविता वाचल्यो जाल्यार, हे कविगोषटिचें सुंकाण कोंकणी कवी, विमर्शक तशें कोशकार स्टीवन क्वाड्रस पेर्मदे हाणें घेतल्लें.
कविता ट्रसटाचो अध्यक्ष मेलवीन रोड्रिगसान सूर्वेर सर्वांक येवकार मागलो. आपल्या उलोवपांत देरेबैल्चो गांव आपणाक मोगाचो, ह्याच गांवांत आपलो जल्म जाल्लो, ह्या गांवच्यो हर्येक वाटो, वाटे वयली माती आनी मातियेंतले फातर आपल्या पावलांक वोळकतात म्हणोन ताणे सांगलें. आपल्या आज्यान शिकयिल्लीं ‘एक मुडो कोणें वेलो?’ तशें ‘आडकुलोगो बुडकुलो तेला तुपाचो’ गितां ताणें उडासांत हाडलीं. देरेबैल्च्या गांवांत ए.टी.लोबो, ज्यो आरान्हा तसल्यांनी नाटक शेताक जायतें योगदान दिलां; रैमंड लोबो, सिपरी देरेबैल, फेलिक्स सलडान्हा, विन्सी रेबेल, इंत्राब, कार्मेलिटा गोवियस, जिल्ली टीचेर, कार्मीण टीचेर, आलबीना, मीरा तसल्यांनी कलाकार जावन व्हर्तो वावर केला; पत्रावो भाव, तांचो बापय, विकटर कोन्सेसो, लिझी कोन्सेसो, ओलवीन डिकुन्हा, रोनी डिकुन्हा तसल्यांनी संगीत शेताक महत्वाची देणगी दिल्या म्हणोन अपरूपाचे ताणे उडास काडले. रैमंड लोबो, ताची आवय तशें एजील मथायस तसल्यांची देव भक्त, नितळ मन तशें परोपकारी मनोभाव ताणे वाखणलो मात्र न्हय रैमंड लोबो तसल्या व्यक्तित्वा मुकार आपणाचें फकत एक किर्कोळ व्यक्तित्व अशें सांगलें आनी थंयसर हाजर आसल्ल्या ताका गुलोबाचें फूल दीवन मान दिलो.
कविता ट्रसटाच्या वावराविशीं ह्याच संदर्भार मेलविनान म्हायेत दिली.
अध्यक्षपण घेतल्ल्या स्टीवन क्वाड्रसान ‘मनशाकुळाचे सूर्वेर उतर आसल्लें आनी हें उतर काव्यें जावनासल्लें’ म्हणोन सांगलें. सूर्विले हर्येक धार्मीक गृंथ काव्यें जावनासल्ले म्हणोन ताणें सांगलें. आपणें चलोवन वेल्ले दसतुरे प्रकार बेंगाली काव्याचे वेवेगळे पांवडे आनी तांचे तुकडे, कविगोषटी चलयतां चलयताना ताणें लोका हुजीर दवर्ले.
बेंगाली काव्यें ९-१० व्या शेकड्यांत बुद्धिसमांतल्या वज्रायनांतल्या चाऱ्य पदा द्वारीं सुरू जाल्लें, हीं चाऱ्य पदां वज्रायना नाचा वेळार गांवचे तसलीं मिसतीक तशें थियोसोफिकल गितां जावनासल्लीं. बाराव्या-तेराव्या शेकड्यांत वैषणव भक्ती चळुवळेवर्वीं बेंगाली कविता फुल्ली. कृती भासकर ओजा, चैतन्य महापरभू आनी हेर वैषणव संतांनी बेंगाली काव्यें लोकामोगाळ करुंक व्हर्ती म्हिनत घेतल्या म्हणोन स्टीवन क्वाड्रसान ह्यावेळार सांगलें.
मैकल मधुसूदन दत्तान बेंगाली काव्याक नवो जीव दिलो. ताच्या उरबेभरीत वावरावर्वीं बेंगाली काव्यान नव्या युगाक प्रवेस केलो. नव्या युगांतल्या काव्यामधें दत्ताच्या काव्याक महत्वाचें स्थान आसा. ह्याच संदर्भार रबींद्रनाथ ठाकूर तशें क्वाजा नस्रूल हांच्या योगदानाविशीं प्रो स्टीवन क्वाड्रसान विशेस थरान दांबून सांगलें. मिसतिकता आनी मानवतावाद, ठाकूराच्या आनी नस्रुलाच्या काव्यांनी भरल्लो जाल्ल्यान उपरांतल्या हजारांनी कविंचेर तांचो प्रभाव पडलो. रबींद्रो संगीत तशें नस्रूल संगीत आयच्या दिसा जाल्यारी बेंगाली काव्याथावन मेकळे करुंक जायनातल्ले अपरूपाचे विस्वे - अशें तांणी म्हळें.
हंग्रिसम चळुवळेविशीं, प्रकल्पना चळुवळेविशीं, स्त्रीवाद चळुवळेविशीं, साबोर भाषा कोबिता चळुवळेविशीं - स्टीवनान उल्लेक केलो.
एच्चेम पेर्नाळान ‘एका होटलाची काणी’, आंद्रू डिकुन्हान ‘वेगीं ये पावसा’, जैसन सिकवेरान ‘परत वोट आयला’, ग्लेडीस रेगोन ‘कविता अशीच आसता’, वाल्टर दांतिसान ‘पोटां मधलो फरक’, महेश आर नायकान ‘म्हगेलो पयलो घाम’, ‘एड्डी शिकेरीन ‘पणटे वयली जीब उज्याची’, पावलू मोरासान ‘आशा, आकांक्षा’, रोहन आर्कबरेन ‘सन्वाराचो गिरायक’, स्टीवन क्वाड्रसान गीतांजलिचे अनुवादीत स्लोक तशें तसलीमाची अनुवादीत कविता, ओसटीन डिकुन्हान ‘म्हाका गोत्तू ना’, मनू बाह्रेनान ‘आवयचो मोग’, रिच्ची पिरेरीन ‘हांव बरयतां म्हजे खातीर’, नवीन कुलशेकरान ‘कोमल तर्नी आंक्री आमचें बाळ’, गुरू बाळिगान ‘ठराव’, चारली सोज येय्याडीन ‘चत्राय तुका पाकिसताना’, विल्सन कटीलान ‘रामाच्या आयतारा’ आनी मेलवीन रोड्रिगसान ‘झूज’ कविता ह्या वेळार पेश केल्यो.
ह्याच संदर्भार कलासागर संस्थ्या तर्फेन पावनशांवो जल्मादीस एपरिलांत आचरण केल्ल्या लेखक, कथाकार एडी नेट्टोक सन्मान केलो. एपरील म्हयन्यांत जल्मादीस आचरण केल्ल्या एडी नेट्टोन तशें पावलू मोरासान केक कातर्न संतोस वांटून घेतलो. कलासागर संस्थ्याचो मुकेली नवीन कुलशेकरान भलायकी मागली.
ह्या काऱ्याक विश्व कोंकणी सर्दार बसती वामन शेणै तशें काणीक पत्राचो स्थापक, प्रकाशक तशें संपादक आंद्रू मेंडोन्सा हाजर आसल्ले. बसती वामन शेणै उलोवन, जल्मादीस आचरण केल्ल्यांक ताणें उल्लासिलें.
वित्ती कोरेयान हें काऱ्यें चलोवन वेलें. ओलवीन डिकुन्हा तशें पंगडान उल्लासुंचीं गाणां गायलीं.