ಬಾಕಿಬಾಬಾಚ್ಯಾ ಕಾವ್ಯಾಂತ್ಲೊ ಪ್ರತಿರೋಧಿ ಆನಿ ಉಪರೋಧಿ ಸ್ವರ್ - 5
- ರಾಜಯ್ ಪವಾರ್
(ಭಾರತ್ ಭುಂಯ್ಚೆರ್ ಜಲ್ಮೊನ್ ಗೆಲ್ಲೊ ಉಂಚ್ಲೊ ಕವಿ ಬಾಕಿಬಾಬ್ ಬೋರ್ಕರಾಚಿ ಜಲ್ಮಶತಾಬ್ದಿ ಆದ್ಲ್ಯಾ ವರ್ಸಾಚ್ಯಾ ನವೆಂಬ್ರಾಂತ್ ಸುರು ಜಾಲ್ಲಿ. ಆಂವ್ದುಂ ನವೆಂಬ್ರಾ ಪಾಸುನ್ ತಿ ಮುಕಾರ್ ವೆತಲಿ. ಹೊ ಉತ್ಸವ್ ಗೊಂಯಾಂತ್ ಮಾತ್ರ್ ನ್ಹಯ್, ಆಯ್ಲೆವಾರ್ ಮಂಗ್ಳುರಾಂತಯ್ ಚಲ್ಲೊ. ಕವಿತಾ ಟ್ರಸ್ಟಾನ್ ವಿಶ್ವ ಕೊಂಕಣಿ ಕೇಂದ್ರ್ ಹಾಂಚೆ ಸಾಂಗಾತಾ ಮೆಳೊನ್ ಎಕಾ ದಿಸಾಚೆಂ ಕಾರ್ಯೆಂ ಜೂನ್ ಮ್ಹಯ್ನ್ಯಾಚೆ ತೆರಾ ತಾರಿಕೆರ್ ಘಡೊವ್ನ್ ಹಾಡಲ್ಲೆಂ. ತ್ಯಾ ಸಂದರ್ಭಾರ್ ಪ್ರೊ. ನಾರಾಯಣ್ ದೇಸಾಯಿ ಹಾಚ್ಯಾ ಅಧ್ಯಕ್ಷಪಣಾಖಾಲ್ ಜೆಂ ವಿಚಾರ್ ಸಾತೆಂ ಚಲಲ್ಲೆಂ, ತ್ಯಾ ಸಂದರ್ಭಾರ್ ಗೊಂಯಾಂ ಥಾವ್ನ್ ಆಯಿಲ್ಲ್ಯಾ ದೊಗಾಂನಿ ಆಪ್ಲೆ ಪ್ರಬಂಧ್ ಮಾಂಡಲ್ಲೆ. ತ್ಯಾ ಪಯ್ಕಿ ರಾಜಯ್ ಪವಾರಾಚೊ ಪ್ರಬಂಧ್ ಕಂತಾಂ ಕಂತಾಂನಿ ಹಾಂಗಾಸರ್ ಪರ್ಗಟ್ ಕರ್‍ತಾಂವ್ - ಸಂಪಾದಕ್)
ಆಪ್ಲೆ ಭುಂಯೆವಿಶಿಂಚೊ ಮೋಗ್ ಆನಿ ಸ್ವಾಭಿಮಾನ್ ವ್ಯಕ್ತ್ ಕರ್ತಾನಾ ಬಾಕಿಬಾಬೂಚ್ ಎಕೆಕಡೆನ್ ಮ್ಹಣ್ಟಾತ್, ‘In the whole of India, Kashmir, Kamarupa, Kerala and Konkan are supposed to be the richest in scenic beauty... if I am to be born again and I am allowed to choose my future birth place, I shall undoubtedly opt for Goa'. ಗೊಂಯ್ ಘೆಂವ್ಚೆಖಾತೀರ್ ಮಹಾರಾಷ್ಟಾಂತ್ಲ್ಯಾನ್ ಆಯಿಲ್ಲ್ಯಾ ವಿಲೀನಿಕರಣವಾದ್ಯಾಂಕ್ ಉದ್ದೇಶುನ್ ತಾಂಣಿ ಬರಯ್ಲೆಂ,
ಘಾಂಟಾರ್ ಸಾವ್ನ್ ಆಯ್ಲಾ ಜೋಗಿ
ಘೆವ್ನ್ ಭಗ್ವಿ ಘುಡಿ
ಘರಾಕ್ ಚೂಡ್ ಲಾವ್ನ್ ಸೊದ್ತಾ
ವೊಡುಂಕ್ ಆಪ್ಲಿ ವಿಡಿ
ಘಾಟಾರ್ ಸಾವ್ನ್ ಆಯ್ಲಾ ಜೋಗಿ
ಘೆವ್ನ್ ತಾಯ್ತ್ ದೊರೆ
ಚಾರ್ ಜೊಂಧ್ಳೆ ದೀವ್ನ್ ಹಾತಾರ್
ವ್ಹರುಂಕ್ ಆಂಬೆ ಘರೆ
.. ಘಾಂಟಾರ್ ಸಾವ್ನ್ ಆಯ್ಲಾ ಜೋಗಿ
ವಣ್ಟಿ ಖಣುಂಕ್ ಸಾಂಗ್ತಾ
ಸಾವಧ್ ಭಾವಾ ದೆವಾರ್‍ಯಾಂತ್ಲೊ
ಸಾಳಿಗ್ರಾಮ್ ಮಾಗ್ತಾ.
- (ಜೋಗಿ, ಸಾಸಾಯ್)
ಆಮ್ಚೆ ‘ಆತ್ಮಹೀನ್’ಪಣಾಚೆ ಭಾವನೆಕ್ ಮತಿಂತ್ ಧರುನ್ ಕವಿ ಬಾಕಿಬಾಬಾನ್ ಆಮ್ಕಾಂ ಪರ್ಕ್ಯಾಂಚ್ಯಾ ಭುಲೊವ್ಣ್ಯಾಂಕ್ ಬಳಿ ಪಡುಂ ನಾಕಾತ್ ಮ್ಹಣುನ್ ಬುದ್ಧ್ ದಿಲಿ. ಭಾಯ್ಲ್ಯಾನ್ ಆಯಿಲ್ಲೊ ಜೋಗಿ ಮ್ಹಳ್ಯಾರ್ ಆಮಿಚ್ ‘ಚೂಡ್ ದಾಖೊವ್ನ್ ಹಾಡಿಲ್ಲೊ ಮ್ಹಾರು ಹಾಚಿ ಜಾಣ್ವಿಕ್ ಕರುನ್ ದಿಲಿ. ಆನಿ ಹೆಂ ಕರ್ತಾನಾ ತಾಂಣಿ ಆಪ್ಲ್ಯಾ ಕಾವ್ಯಾಂತ್ ಥೊಡೊಸೊ ಉಪರೋಧಿ ಸೂರ್ ದವರ್ತನಾಚ್ ಸಮ್ಜವ್ಣೆಚೋಯ್ ಸೂರ್ ದವರ್ಲೊ. ಕೊಂಕಣಿ ಭಾಶೆಚಿ ಆನಿ ಪರ್ಯಾಯಾನ್ ಸಾಹಿತ್ಯಾಚಿ ಮೊಲಾವ್ಣಿ ಕರ್ತಾನಾ ಜಾಯ್ತೆ ಜಣ್ ಕೊಂಕಣಿಕ್ ಮರಾಠಿ ಪರಸ್ ಉಣಾಕ್ ದರ್ಜಾಚಿ ಮಾನ್ತಾಲೆ. ಅಶಾ ವಿಚಾರ್ ವರ್ಗಾಕ್ ತಾಂಣಿ ಕೊಂಕಣಿಂತ್ಲ್ಯಾನ್ ಲಾವ್ಣೀ, ಪೊವಾಡೆ, ಠುಮ್ರಿ, ಭೂಪಾಳಿ ಹೆ ಪ್ರಕಾರ್ ರಚುನ್ ಜಾಪ್ ದಿಲಿ. ಬಾಕಿಬಾಬಾನ್ ಗೊಂಯಾಕ್, ಗೊಂಯ್ಕಾರಾಂಕ್, ಕೊಂಕಣಿಕ್ ಆಪ್ಲೆ ಪರಿನ್ ಜೆಂ ಜೆಂ ಶಕ್ಯ್ ಜಾಲೆಂ ತೆಂ ತೆಂ ದಿಲೆಂ. ದೆಖುನಚ್ ಬಾಕಿಬಾಬ್ ಮ್ಹಳ್ಯಾರ್ ಖರ್ಯಾ ಅರ್ಥಾನ್ ‘ಕೊಂಕಣಿ ಅಸ್ಮಿತಾಯೆಚೊ ಮಾಡ್’. 16 ತಾರ್ಕೆಕ್ ಜಾಂವ್ಚೊ ಆಶಿಲ್ಲ್ಯಾ ‘ಒಪೀನಿಯನ್ ಪೋಲಾ’ಚೆಂ ವಾರೆಂ ಜನಸಾಮಾನ್ಯಮೆರೆನ್ ಪಾವೊಂವ್ಕ್ ಆನಿ ಲೊಕಾಂಕ್ ಸಾದುರ್ ಕರ್ಚೆ ಖಾತೀರ್ ‘ಸೊಳಾ ತಾರೀಕ್’ ಕವಿತಾ ರಚ್ಲಿ.
ಚೂಡ್ ದಾಖೊವ್ನ್ ಹಾಡ್ಲೊ ಮಾರೂ ನಷ್ಟ್ಯೊ ತಾಚ್ಯೊ ಕಳಾ
ತುಕಾ ಮ್ಹಾಕಾ ಜೊಖೂಂಕ್ ಭಾವಾ ಯೆತಾ ತಾರೀಕ್ ಸೊಳಾ
..ರಾಗಾನ್ ಮ್ಹಜ್ಯಾ, ಚುಲಿವೆಲಿ ಮಡ್ಕಿ ನಾಕಾ ಫೊಡುಂ
ಎಕೆ ರಾಶೀರ್, ಆಸುಂ ಜಾಲ್ಯಾರ್ ಸರ್ಗ್ ಲೆಗೀತ್ ಜೊಡುಂ
...ವಳಖ್ ರಗತ್ ಧಾಂವ್ ಭಾವಾ ಆಯ್ಚ್ಯಾ ಕಳೆ ವೆಳಾ
ದೊಶಿಂ ಜಾಲ್ಲೆಂ ಪಾಣಿಂ ಜೊಡುಂಕ್ ತಾರೀಕ್ ಯೆತಾ ಸೊಳಾ
-(ಸೊಳಾ ತಾರೀಕ್, ಸಾಸಾಯ್)
ಬಾಕಿಬಾಬಾನ್ ಗೊಂಯ್ಚೆರ್ ಶೆಕ್ ಗಾಜೊವ್ಪಿ, ಲೊಕಾಂಕ್ ಪಿಡಾಪೀಡ್ ಭೊಗೊವ್ಪಿ ಪುರ್ತುಗೆಜಾಂಕ್ ಆಪ್ಲ್ಯಾ ಪ್ರತಿರೋಧಿಕ್ ಕಾವ್ಯಾವರ್ವಿಂ ಧಪ್ಕಾಯ್ಲೆ ತೆಚ್ ಬರಾಬರ್ ಮೆಕ್ಳೆಂ ಕೆಲ್ಲೆಂ ಗೊಂಯ್ ಕಶೆತರೆನ್ ಆಪ್ಲೆಚ್ ಭಾವ್ ವಾಟ್ ಲಾಯ್ತಾತ್, ಗೊಂಯ್ ಮಹಾರಾಷ್ಟ್ರಾಂತ್ ವಿಲೀನ್ ಕರ್ಪಾಚಿಂ ಸಪ್ನಾಂ ಪಳಯ್ತಾತ್ ತಾಂಕಾಂ ಉದ್ದೇಶುನ್ ಉಪರೋಧಿಕ್‍ಪಣಾನ್, ಉಪಹಾಸಾನ್ ಶಿಟ್ಕಾಯ್ಲೆ ಲೆಗಿತ್.
ನಾಖ್ ಆಮಿ ಪಾವ್ಣೆರ್ ಕಾಡ್ಲಾಂ ಘಾಲಾತ್ ತುಮಿ ಲಾಂಸ್
ಮ್ಹಣ್ಶಾತ್ ತುಮಿ ತೀಚ್ ಆಮಿ ಮ್ಹಣುಂ ಆಮ್ಚಿ ಭಾಸ್’
.. ತುಮಿ ವ್ಹೆಲ್ಯಾರ್ ನಾಖ್ ಆಮ್ಚೆಂ ವಾಂಟ್ಟಲೊ ಭುಗೋಲ್
ಲಾವ್ನ್ ಘೆಂವ್ ತ್ಯಾ ಖಾತೀರ್ ಆಮಿಂಚ್ ಆಮ್ಕಾಂ ಗೋಳ್
-(ನಾಖ್ ಆಮಿ ಪಾವ್ಣೆರ್ ಕಾಡ್ಲಾಂ, ಸಾಸಾಯ್)
ಬಾಕಿಬಾಬಾಕ್ ಜೆನ್ನಾ ಜೆನ್ನಾ ಗೊಂಯ್ಕಾರಾಂಚಿಂ ಉಣಿಂ ದಿಸ್ಲಿಂ, ತೆನ್ನಾ ತಾಂಣಿ ಉಪರೋಧಿಕಪಣಾನ್ ತಾಚೆರ್ ಭಾಶ್ಯ್ ಕೆಲೆಂ. ಬಾಕಿಬಾಬ್ ಎಕೆಕಡೆನ್ ಮ್ಹಣ್ಟಾ,
ಆಮೀಚ್ ಮ್ಹಣ್ಟಾತ್ ಗೊಂಯ್ ಮ್ಹಳ್ಯಾರ್
ನಸ್ತೆಂ ಪೆಂಸಣ್, ಬುಡಿತ್ ಖಾತೆಂ
ಖರೆಂಚ್ ಹಾಂಗಾ ಜಾಣ್ವಾಯ್ ಸೊಡುನ್
ದುಸ್ರೆಂ ಆನಿಕ್ ಪಿಕ್ತಾ ಕಿತೆಂ?
- (ಗೊಂಯಾಂತ್ ಅಶೆಂ ಆಸಾ ಕಿತೆಂ?, ಸಾಸಾಯ್)
16 ಜನವರಿ 1967 ಹ್ಯಾ ದಿಸಾ ಆಶಿಯಾ ಖಂಡಾಂತ್ಲೊ ಆಯ್ಜ್ ಮೆರೆನ್ಚೊ ಏಕಮೇವ್ ‘ಒಪಿನೀಯನ್ ಪೋಲ್’ ಜಾಲೊ ತೊ ಗೊಂಯಾಂತ್, ಗೊಂಯ್ ಆನಿ ಮಹಾರಾಷ್ಟ್ರಾಚ್ಯಾ ವಿಲೀನಿಕರಣಾಚ್ಯಾ ಪ್ರಸ್ನಾಚೆರ್. ಗೊಂಯ್ ವೆಗ್ಳೆಂ ದವರ್ಚೆಂ ಕಾಯ್ ಮಹಾರಾಷ್ಟ್ರಾಂತ್ ವಿಲೀನ್ ಕರ್ಚೆಂ ಹ್ಯಾ ಪ್ರಸ್ನಾಚೆರ್ ಮತದಾನ್ ಕರ್ಪಾ ಸಂಬಂದಾಂತ್ಲ್ಯಾ ಪ್ರಚಾರಾಚ್ಯಾ ಕಾಳಾರ್ ಜಾಯ್ತಿಂ ಕವನಾಂ ನಿರ್ಮಾಣ್ ಜಾಲಿಂ. ಹಾಂತುತ್ ಮ್ಹತ್ವಾಚೆಂ ಯೋಗದಾನ್ ದಿವ್ಪ್ಯಾಂಮದ್ಲೆಂ ಏಕ್ ಮಹತ್ವಾಚೆಂ ನಾಂವ್ ಮ್ಹಳ್ಯಾರ್ ‘ಬಾಕಿಬಾಬ್’. ಮನೋಹರರಾಯ್ ಮ್ಹಣ್ತಾತ್, ‘... ಗೊಂಯ್ಕಾರಾಂಚ್ಯೊ ಎಕಾಚ್ ಖಿಣಾಂತ್ ದೋನ್ ಜಾತಿ ಜಾಲ್ಯೊ. ಏಕ್ ಕುಲ್ಕಾರ್ ವಿಲೀನಕರಣವಾದಿ ಆನಿ ದುಸ್ರಿ ಪಾನ್ಕಾರ್ ಸಂಘಪ್ರದೇಶಿ.... ಸಂಘಪ್ರದೇಶ್ ರಾಖ್ಪಾಕ್ ಆನಿ ಕೊಂಕಣಿಚೆಂ ಖಾಶೆಲೆಪಣ್ ಸಾಂಬಾಳ್ಪಾಂತ್ ಕೊಂಕಣಿ ಕವಿಂನಿ ಬರೋಚ್ ಹಾತ್‍ಭಾರ್ ಲಾಯ್ಲೊ ತಾಂತುಂತ್ ಬಾಕಿಬಾಬಾಂಚೋಯ್ ವಾಂಟೊ ಅಸಾ.’ ಬಾಕಿಬಾಬಾನ್ ಮ್ಹಳಿಲ್ಲೆಂ, ‘ನಾಖ್ ಆಮಿ ಪಾವ್ಣೆರ್ ಕಾಡ್ಲಾಂ, ಘಾಲಾತ್ ತುಮಿ ಲಾಂಸ್, ಮ್ಹಣ್ಶಾತ್ ತುಮಿ ತೀಚ್ ಆಮಿ ಮ್ಹಣುಂ ಆಮ್ಚಿ ಭಾಸ್’. ಹಿಂ ಕಿಂವಾಟ್ಯಾಂಚಿಂ ಉತ್ರಾಂ ಆಶಿಲ್ಲಿಂ ಆಮ್ಕಾಂಚ್, ಜೆ ಗೊಂಯ್ ಪಾವ್ಣೆರ್ ಕಾಡುನ್ ಪರ್ಕ್ಯಾಂಕ್ ದೀಂವ್ಕ್ ಸೊದ್ತಾಲೆ. ಪುಣ್ ಗೊಂಯ್ ಗಿಳ್ಪಾಚಿಂ ಸಪ್ನಾಂ ಪಳೊವ್ಪಿ ದುಸ್ಮಾನಾಂಕ್ ಮಾತ್ ತಾಂಣಿ ಹಾಂಗ್ಚಿ ಸಾಸಾಯ್ ಜಾಗಿ ಜಾಲ್ಯಾ ಆನಿ ತಿಚೆರ್ ಆತಾಂ ಭಾರ್ ಆಯ್ಲಾ ಅಶಾ ಉತ್ರಾಂನಿ ಶಿಟ್ಕಾಯಿಲ್ಲೆ.
ಜಾಗಿ ಜಾಲ್ಯಾ ಗೊಂಯ್ಚಿ ಸಾಸಾಯ್
ಯೆತಲೊ ಭಾರ್ ಯೆತಲೊ ಭಾರ್
ಧೊಲ್ ತಾಶೆ ಬಡಯ್ ಬಡಯ್
ಮಾರ್ ಶೆಂಸಾರ್ ಮಾರ್ ಶೆಂಸಾರ್
-(ಜಾಗಿ ಜಾಲ್ಯಾ ಗೊಂಯ್ಚಿ ಸಾಸಾಯ್, ಸಾಸಾಯ್)
ಭಾಶೆಸಂಬಂಧಾಂತ್ ಉಲಯ್ತಾನಾ, ವ್ಯಕ್ತ್ ಜಾತನಾ ತಾಂಚೊ ಹೊ ಪ್ರತಿರೋಧಿ ಸ್ವರ್ ಅದೀಕಚ್ ಖರ್ ಜಾತಾಲೊ. ಬಾಕಿಬಾಬಾಂಕ್ ಕೊಂಕಣಿ ಕಾವ್ಯ ವಾ ಭಾಶೆಚೆಂ ಜಾಣ್ವಲೆಂ ತೆಂ ಪಾತ್ರೀಸ್ ರೆಂದೆರ್ ಆನಿ ಗೊಂಯ್ ಬಾಬಾಕ್ ಲಾಗುನ್. ಪುಣ್ ತಾಂಚೆ ವಾಂಗ್ಡಾಚ್ ಕಾಕಾಸಾಯ್ಬ್ ಕಾಲೆಲ್ಕಾರ್ ಹಾಂಚೀಂಯ್ ಉತ್ರಾಂ ಹೆ ನದ್ರೆಂತ್ಲ್ಯಾನ್ ತಾಂಕಾಂ ಮಾರ್ಗದರ್ಶಕ್ ಆನಿ ಸ್ಪುರ್ತ್‌ದಿಣಿ ಥಾರ್ಲಿಂ. ಕಾಕಾಸಾಯ್ಬಾನ್ ತಾಂಕಾಂ ಮ್ಹಣಿಲ್ಲೆಂ, ‘ತುಮಿ ಕೊಂಕಣಿ ಹಿ ಘರ್‌ಗುತಿ ಭಾಸ್ ಕರುನ್ ದವರ್ಲ್ಯಾ. ತಿಚಿ ಗೋಡಿ ಆನಿ ತಾಂಕ್ ಮೊಟಿ ಆಸುನಯ್ ಮಸ್ಕೆರೆಚಿಂ ಕವನಾಂ ಆನಿ ಫಾರ್ಸ್ ಬರೊವ್ಪಾ ಖಾತೀರೂಚ್ ತೆ ಭಾಶೆಚೊ ವಾಪರ್ ಕರ್ತಾತ್ ಆನಿ ಗಂಭೀರ್ ವಿಶಯಾವೆಲೆಂ ಸಾಹಿತ್ಯ್ ದುಸ್ರೆ ಭಾಶೆಂತ್ಲ್ಯಾನ್ ಬರಯ್ತಾತ್. ಹೊ ಮಾಂಯ್ ಭಾಶೆಚೆರ್ ಅನ್ಯಾಯ್ ತರ್ ಆಸಾಚ್, ತೆ ಭಾಯ್ರ್ ಅಶೆಂ ಕೆಲ್ಲ್ಯಾನ್ ಆವಯ್ಚೊ ಸ್ರಾಪೂಯ್ ಲಾಗುಂ ಯೆತಾ.’
ಬಾಕಿಬಾಬ್ ಆಪ್ಲೆ ಕವಿತೆಂತ್ಲ್ಯಾನ್ ರಗ್ತಾಚಿ ಧಾರ್ ದಿವ್ಪಾಚಿ, ಹೊಮ್ಖಣಾಂತ್ ಉಡಿ ಘೆವ್ಪಾಚಿ, ಪ್ರಾಣ್ ದಿವ್ಪಾಚಿ, ಅನ್ಯಾಯ್ ಆನಿ ಅಸತ್ಯ್ ಹುಮ್ಟಾವ್ಪಾಚಿ, ಸುದರ್ಶನಾಕ್ ಹಾತ್ ಘಾಲ್ಪಾಚಿ, ಹಾಂಗಾಚ್ಯಾನ್ ಉಠುಂಕ್ ಚಲುಂಕ್ ಲಾಗ್ ಮ್ಹಣ್ಪಾಚಿ, ವಾರ್ ಝೆಲ್ಪಾಚಿ, ಭಾರ್ ಯೆವ್ಪಾಚಿ ಪ್ರತಿರೋಧಿ ಭಾಸ್ ಉಲಯ್ತಾ. ಸುಟ್ಕೆಉಪ್ರಾಂತ್ ಹಾಂಗಾಚ್ಯಾ ಗೊಂಯ್ಕಾರಾಂಚಿ ಬದಲಿಲ್ಲಿ ಘಾತ್ಕಿ ಮಾನಸಿಕತಾಯ್ ಪಳೊವ್ನ್ ಬಾಕಿಬಾಬ್ ಆಪ್ಲ್ಯಾ ಹ್ಯಾ ಭಾವಾಂಕ್ ಸಮ್ಜವ್ಣೆಚಿಂ ಚಾರ್ ಉತ್ರಾಂ ಸಾಂಗ್ತಾನಾ ಉಪರೋಧಿಕ್ ಭಾಸ್ ಉಪ್ಕಾರಾಯ್ತಾ. ಆಪ್ಲೆಂ ಸಗ್ಳೆಂ ಉಣಾಕ್ ಲೆಖುನ್ ಪರ್ಕ್ಯಾಂಲೆಂ ಉಷ್ಟೆಂ ಲೆಗಿತ್ ವಂದನೀಯ್ ಮಾನ್ಪಿ ಗೊಂಯ್ಕಾರಾಂಕ್ ತೊ ಆಪ್ಣೆಂ ‘ಅಸಲ್ಯಾ’ ಸ್ವಾತಂತ್ರ್ಯಾಚಿಂ ಸಪ್ನಾಂ ಪಳೊಂವ್ಕ್ ನಾಶಿಲ್ಲಿಂ ಅಶೆಂ ಖಂತೀನ್ ಮ್ಹಣ್ಟಾ. ಬಾಕಿಬಾಬಾನ್ ಆಪ್ಲ್ಯಾ ಕಾವ್ಯಸಂಗ್ರಹಾಂತ್ ‘ಉಪರೋಧ್’ ಆನಿ ‘ಪ್ರತಿದೋಧ್’ ಅಶಾ ದೋನಯ್ ಸ್ವರಾಂಚೊ ಕುಶಳ್ಟಾಯೆನ್ ವಾಪರ್ ಕೆಲ್ಲೊ ಪಳೊಂವ್ಕ್ ಮೆಳ್ಟಾ. ಬಾಕಿಬಾಬಾಂಕ್ ಜಾಯ್ತೆ ಮಾನ್ ಸಮ್ಮಾನ್ ಮೆಳಿಲ್ಲೆ ತರೀ ತರ್ನ್ಯಾಂ ಕಡೆನ್ ಉಲಯ್ತಾನಾ ತೆ ಆಪ್ಲೆಪಣಾನ್, ಖಾಂದಾರ್ ಹಾತ್ ಘಾಲುನ್ ಗಜಾಲಿ ಕರ್ತಾಲೆ. ಹೆಂ ಪಳೊವ್ನ್ ಮಹಾರಾಷ್ಟ್ರಾಂತ್ಲೆ ಸಾಹಿತ್ಯಿಕ್ ಹ್ಯಾ ತರ್ನಾಟ್ಯಾ ಲೇಖಕಾಂಕ್ ಭಾಗ್ಯವಂತ್ ಲೆಖ್ತಾಲೆ. ಹ್ಯಾ ಸಂದರ್ಭಾಕ್ ಧರುನ್ ಉದಯ್ ಬಾಬ್ ಭೆಂಬ್ರೆ ಮ್ಹಣ್ಟಾತ್, ‘ಕೊಂಕಣಿಂತ್ಲ್ಯಾ ವಾ ಗೊಂಯಾಂತ್ಲ್ಯಾ ಸಗ್ಳ್ಯಾಚ್ ವ್ಹಡ್ ಸಾಹಿತ್ಯಿಕಾಂಚ್ಯಾ ಆಂಗಾಂತ್ ತೊ ಗೂಣ್ ಆಸ್ತಾ ಅಶೆಂ ನಾ. ತೊ ಬಾಕಿಬಾಬಾಚ್ಯಾ ಖೆರಿತ್ ಗುಣಾಂ ಮದ್ಲೆ ಏಕ್.’ ಅಶಾ ಹ್ಯಾ ಸ್ವಾಭಿಮಾನಿ ಗೊಂಯ್ಕಾರಾಚೆ ಹೆ ಪ್ರತಿರೋಧಿ ಆನಿ ಉಪರೋಧಿ ಕವಿತೆನ್ ಜಾಯ್ತ್ಯಾ ಜಾಣಾಂಕ್ ಪ್ರೇರಿತ್ ಕೆಲೆ, ಸಾಹಿತ್ಯಾಚೆ ಸೆವೆಖಾತೀರ್ ತಶೆಂಚ್ ಮುಕ್ತಿಝುಜಾಚ್ಯಾ ಆಂದೋಲನಾ ಖಾತೀರೂಯ್.
-ಸಮಾಪ್ತ್
ಬಾಕಿಬಾಬಾಚ್ಯೊ ಕವಿತಾ: